E tiaturi anei outou i ta outou e ore e ite ra?

IA PARAU te hoê taata e, ‘E tiaturi noa vau i ta ˈu e ite ra,’ e auraa parau ïa te reira. Inaha, te tiaturi nei hoi tatou paatoa i te mau mea aita tatou e ite ra.

Ei hiˈoraa, i te fare haapiiraa, ua rave paha outou i te hoê tamataraa no te haapapu i te vai-mau-raa o te puai o te auri ovahine. Teie paha te tamataraa: A ueue i te mau huˈahuˈa auri i nia i te hoê papie. I muri iho, a tuu atu i te papie i nia i te auri ovahine. Ia hautiuti te papie, mai te huru ra e e ohipa tahutahu tera, e tere pauroa mai te mau  huˈahuˈa auri i pihai iho i te mau poro o te auri ovahine e riro atu ai ei hohoˈa o te auri ovahine. Ia na reira outou, e nehenehe anei outou e ite roa ˈtu i te puai o te auri ovahine? Eita, o ta ˈna râ ohipa i nia i te mau huˈahuˈa auri o te ite-roa-hia, ei haapapuraa ia outou e te vai mau ra te puai o te auri ovahine.

Te farii nei tatou ma te feaa ore i te tahi mau mea aita tatou e ite ra. Ia hiˈo tatou i te hoê hohoˈa peni haviti aore ra ia umere tatou i te hoê nanaˈoraa nehenehe mau, eita tatou e feaa e te vai mau ra te hoê taata peni hohoˈa aore ra te hoê taata nanaˈo. No reira, ia hiˈo tatou i te hoê toparaa pape aore ra te hoê toparaa mahana, eita anei tatou e turaihia ia feruri aˈe e o te ohipa tera a te hoê Ihotaata peni hohoˈa aore ra nanaˈo Rahi?

Te tumu eita vetahi e tiaturi

Ma te huru ê mau, ua faaea te tahi mau taata i te tiaturi i te Atua no te mau mea ta ratou i haapii mai i roto i te ekalesia. O te mea ïa i tupu i nia i te hoê taata no Norevetia o tei haapiihia e e tahu te Atua i te feia iino i roto i te hoê po auahi ura. Aita roa ˈtu i taa ia ˈna eaha tera huru Atua o te haamauiui i te taata mai teie, no reira oia i riro ai ei taata tiaturi ore i te Atua.

I muri aˈe râ, ua farii oia i te haapii i te Bibilia, maoti te tauturu a te hoê Ite no Iehova. Ua maere oia i te iteraa e aita te Bibilia e haapii ra e e haamauiuihia te feia iino i roto i te hoê po auahi ura. Te faaau nei te Bibilia i te pohe i te taoto. I roto i te apoo, eita tatou e ite i te mauiui; eita roa ˈtu tatou e ite i te hoê noa ˈˈe mea. (Koheleta 9:5, 10) Ua haapii atoa oia e e vai noa te feia ta te Atua e haava e mea ino e aita e ravea faahou, i roto i te apoo e a muri noa ˈtu. (Mataio 12:31, 32) No te toea râ o te feia pohe, e faatiahia mai ïa i te taime ta te Atua i faataa, e te tiaturiraa e fanaˈo i te ora mure ore i roto i te mau tupuraa Paradaiso. (Ioane 5:28, 29; 17:3) Mea tano iho â teie faataaraa. Te tuati ra te reira i te parau a te Bibilia e “e aroha . . . te Atua.” (Ioane 1, 4:8) Ua tamau teie taata hinaaro mau i ta ˈna haapiiraa i te Parau a te Atua e, i muri iho, ua nehenehe oia e here i te Atua o te Bibilia.

Te patoi nei vetahi ê i te vai-mau-raa o te hoê Atua Poiete î i te here no te rahi o te mau ati e te parau-tia ore. Hoê â to ratou manaˈo e to te hoê taata no Tuete o tei faatoro i te rima i nia i te raˈi ma te ui e: “Nafea te hoê Atua mana hope e te horoa maitai e nehenehe ai e vai i nia nei a tupu rahi ai te haerea piˈo e te ino i raro nei?” No te mea aita hoê taata i nehenehe e pahono i ta ˈna uiraa, ua riro atoa oia ei taata tiaturi ore i te Atua. I muri aˈe, ua haamata oia i te haapii i te Bibilia e te mau Ite no Iehova. Ua haapii oia e te horoa maitai ra te Parau a te Atua i te pahonoraa mauruuru i teie uiraa  tahito roa, No te aha te Atua e faatia ˈi i te ino? *

Ua haapii teie taata hinaaro mau e aita te ino e haapapu ra e aita e Atua. Ei hiˈoraa: E hamani paha te hoê taata i te hoê tipi no te tâpû i te maa. E hoo mai paha te hoê taata i teie tipi e e faaohipa oia i te reira, eiaha no te tâpû i te maa, no te taparahi pohe râ i te taata. Eita roa ˈtu te faaohipa-hape-raa i te tipi e haapapu e aita e taata i hamani i te reira. Oia atoa, te mea e aita te fenua i faaohipahia ia au i ta ˈna opuaraa, e ere ïa te auraa e aita e Atua Poiete.

Te haapii ra te Bibilia e mea tia roa te ohipa a te Atua. Tei ia ˈna “te ino ore ra; e parau-tia ta ˈna e te titiaifaro.” (Deuteronomi 32:4) E horoa te Atua i te mau ô maitatai na te taata, ua faaohipa-hape-hia râ te tahi mau ô, no reira ïa te mauiui i rahi ai. (Iakobo 1:17) Teie râ, e faaore te Atua i te mauiui. I muri aˈe, “te feia mǎrû ra, e parahi ïa i te fenua, . . . e parahi tamau â ratou i reira.”—Salamo 37:11, 29.

Ua oto te taata no Tuete i faahitihia i nia nei i to ˈna iteraa i to ˈna mau taata-tupu o te mauiui ra. Oia mau, te haapapu ra to ˈna tapitapiraa ia vetahi ê e te vai mau ra te Atua. Nafea ïa?

No te rahiraa o te taata, e maiti ïa ratou i te tiaturi i te tauiuiraa o te mau mea ora eiaha râ i te Atua. Te haapii nei te feia tiaturi i te tauiuiraa o te mau mea ora e e “upootia te mea ite roa ˈˈe i te faatano ia ˈna iho”—e faatitiaua te taata e te animala no te ora ia au i to ratou iho huru. E ora te mea ite roa ˈˈe i te faatano ia ˈna iho; e pohe te mea paruparu roa ˈˈe. Tera te faanahoraa natura o te mau mea, o ta ratou ïa e parau ra. Teie râ, mai te peu e mea “natura” ia pohe te paruparu no te vaiiho i te parahiraa i tei puai, nafea ïa tatou ia faataa e te oto ra te tahi feia puai, mai te taata no Tuete, i mua i te mauiui o to ratou mau taata-tupu?

Te iteraa i te Atua

Eita tatou e nehenehe e hiˈo i te Atua no te mea aita to ˈna e tino taata. Te hinaaro nei râ te Atua ia haapii tatou no nia ia ˈna. Hoê ravea e matau ai tatou ia ˈna, o te hiˈoraa ïa i ta ˈna mau ohipa taa ê mau—te “mau hohoˈa peni” e te “mau nanaˈoraa” i roto i tei poietehia. I roto i te Roma 1:20, te na ô ra te Bibilia e: “Te mau mea [a te Atua] e ore e tia ia hiˈo ra, te itea papuhia nei ïa i te mau mea i hamanihia nei, mai te hamaniraa mai â o teie nei ao; oia hoi to ˈna ra mana hope ra e te Atuaraa ra.” Oia, mai ta te hiˈopoa-noa-raa i te hoê hohoˈa peni aore ra te hoê nanaˈoraa e nehenehe e tauturu ia outou ia ite hohonu i te huru o te taata i rave i te reira, e maoti te feruriruriraa i te mau ohipa faahiahia a te Atua e matau roa ia outou i to ˈna huru.

Parau mau, eita tatou e nehenehe e pahono i te mau uiraa peapea atoa o te oraraa na roto i te hiˈo-noa-raa i te mau ohipa poietehia a te Atua. E nehenehe râ tatou e ite i te mau pahonoraa o taua mau uiraa ra na roto i te heruraa i te Parau a te Atua, te Bibilia. Maoti te taioraa i te Bibilia ma te feruriraa mahorahora i faaoti ai na taata e piti i faahitihia na mua ˈtu e te vai mau ra te Atua e te tapitapi ra oia i te mau mea e tupu ra i nia ia tatou.

[Nota i raro i te api]

[Faaiteraa i te fatu o te hohoˈa i te api 28]

J. Hester and P. Scowen (AZ State Univ.), NASA