Faaitoitohia te 108raa o te piha no Gileada ia rave i te taviniraa moˈa

I ROTO i te Bibilia, e pinepine te haamoriraa i te Atua i te parauhia te “taviniraa moˈa.” No roto mai te reira i te hoê taˈo Heleni o te faahiti i te raveraa i te taviniraa i te Atua. (Roma 9:4, MN) Ua faaroo na taata e 5 562 i tae mai i te porotarama faatuiteraa i te 108raa o te piha a te Haapiiraa Bibilia no Gileada a te Taiete Watchtower i to te feia orero horoaraa i te mau aˈoraa maitatai o te tauturu i te feia faatuitehia ia rave i te taviniraa moˈa e auhia mai e te Atua ra o Iehova. *

Na Theodore Jaracz, te hoê melo o te Tino Aratai a te mau Ite no Iehova, i peretiteni. Ua haamata te porotarama na roto i te himene 52, “Te iˈoa o to tatou Metua.” Te na ô ra te piti o te tuhaa o taua himene ra na roto i te reo Beretane e: “E imi matou i te ravea e nehenehe atoa ˈi matou e faaraa i to iˈoa faaauraa ore.” Te faaite maite ra te reira i te aau tae o te feia haapii o te piha faatuitehia (no na fenua 10 mai) e faaohipa i ta ratou i haapii i roto i ta ratou tuhaa taviniraa mitionare, i roto ïa 17 fenua taa ê.

I roto i ta ˈna mau parau omuaraa, ua huti Taeae Jaracz i te ara-maite-raa i nia i na avaˈe haapiiraa Bibilia hohonu e pae a te feia haapii o tei faaineine ia ratou no te tavini i roto i te aua ěê. Ua tauturu te reira ia ratou ia “hiˈopoa maite i te mau mea atoa ra,” oia hoi, ia faahohonu na roto i te maramarama o te Parau a te Atua i ta ratou i haapii na mua ˈˈe e “tei maitai ra e tapea maite” ïa. (Tesalonia 1, 5:21) Ua faaitoito oia ia ratou ia taai atu ma te haapao maitai ia Iehova, ta ˈna Parau, e te mau hopoia no reira ratou i haapii-maite-hia ˈi. Eaha te tauturu ia ratou a rave ai ratou i taua mau mea atoa ra?

Mau aˈoraa maitatai no te rave i te taviniraa moˈa

Ua paraparau o Lon Schilling, te hoê melo o te Tomite Tiaauraa i te Betela, no nia i te tumu parau “E manuïa anei outou i roto i te hiˈopoaraa i te haerea ma te au?” Ua haamataratara oia i te faufaa o te haerea ma te au, o te faaite i te paari no ǒ mai i te Atua ra. (Iakobo 3:17) No te haerea ma te au, e titauhia ia tuu i mua ia vetahi ê, eiaha e faatia paetahi, ia haehaa, ia haapao maitai ia vetahi ê, e ia faaoromai. “E huru faito noa to te feia haerea ma te au i nia ia vetahi ê. Eita ratou e pee i te haerea ê roa ino,” ta Taeae Schilling ïa i parau. Eaha te nehenehe e tauturu i te hoê mitionare ia pee i te haerea ma te au? Ia haehaa ïa te manaˈo ia ˈna iho, ia haafaufaa i te mau taime e faaroo ai e e haapii mai ai na roto ia vetahi ê, e ia hinaaro e haapao i to vetahi ê manaˈo a ore ai e ofati i te mau faaueraa tumu a te Atua.—Korinetia 1, 9:19-23.

“Eiaha e haamoe i te amu i  te maa!” o te upoo parau maere ïa o te tuhaa i muri mai o te porotarama, i vauvauhia e Samuel Herd, te tahi atu melo o te Tino Aratai. Ua haamataratara oia i te faufaa o te hoê huru amuraa maa pae varua maitai ia au noa te hoê no te rave i te taviniraa moˈa. Ua parau Taeae Herd e: “Eita e maoro e maraa ta outou ohipa pae varua a rave maite ai outou i ta outou tuhaa taviniraa, te pororaa e te haapiiraa. No reira, e tupu mai te hoê hinaaro e ia haamaraa outou i ta outou maa pae varua e amu ia faito noa to outou puai.” E tauturu te hoê huru amuraa maa pae varua tamau i te mitionare eiaha oia ia roohia i te hepohepo pae varua e ia mihi i to ˈna fetii. E tauturu te reira ia ite i te mauruuru e ia faaoti e taai maite i ta ˈna hopoia o te taviniraa moˈa.—Philipi 4:13.

Ua faaitoito te hoê orometua haapii no Gileada, o Lawrence Bowen, i te feia haapii faatuitehia ia “Hoˈi i te matamua ra.” Eaha ta ˈna e hinaaro ra e parau? Ua parau oia i te feia e faaroo ra ia rave i te Maseli 1:7 [MN] o te na ô ra e: “Te matamua o te [ite] mau ra, o te mǎtaˈu ïa ia Iehova.” Ua faataa te taata orero e: “Te mau mea atoa o te ore e haapao i te parau rahi o te vai-mau-raa o Iehova, eita roa ˈtu e nehenehe e parauhia e e ite mau, e ere atoa i te faahopearaa o te maramarama mau.” Ua faaau Taeae Bowen i  te mau parau rii a te Parau a te Atua, te Bibilia, i te mau tuhaa o te hoê puzzle, te hoê hohoˈa tâpûpûhia. Ia apǎpǎ-paatoa-hia te mau tuhaa, e oti mai te hoê hohoˈa. Ia rahi noa ˈtu â te mau tuhaa, e rahi e e maramarama noa ˈtu â te hohoˈa e e rahi noa atoa ˈtu te mauruuru o te hoê taata. E nehenehe te reira e tauturu i te taatoaraa ia rave i te taviniraa moˈa na te Atua.

Na Wallace Liverance, te papai parau o te Haapiiraa no Gileada, i faaoti i te mau oreroraa parau. Teie ta ˈna tumu parau, “A pûpû i te mau haamaitairaa ei tusia na te Atua.” Ua huti oia i te ara-maite-raa i nia i te aamu o to Iesu faaoraraa i na lepera hoê ahuru. (Luka 17:11-19) Hoê noa tei hoˈi i muri e arue i te Atua e e haamauruuru ia Iesu. “Aita e feaaraa e ua oaoa roa te toea i te mâraa mai. Ua mauruuru ratou i to ratou huru, e au ra râ hoi e, o ta ratou e hinaaro noa ra, ia itehia ïa ratou e te tahuˈa e ua mâ,” ta Taeae Liverance ïa i tatara. Ia turai te mâraa i te pae varua maoti te haapiiraa i te parau mau, oia atoa te aau mehara, ia tatou ia faaite i te mauruuru i te Atua no to ˈna maitai. Ua faaitoitohia te feia haapii o te 108raa o te piha no Gileada ia feruriruri i te mau ohipa atoa e te maitai o te Atua e ia riro ta ratou taviniraa e mau tusia ei faaiteraa i te mauruuru i te Atua.—Salamo 50:14, 23; 116:12, 17.

Mau faatiaraa e mau titorotororaa nafea e na reira ˈi

Na Mark Noumair, te tahi atu â orometua haapii no Gileada, i faatere i to muri mai tuhaa o te porotarama. No nia te reira i te mau tupuraa i farereihia e te piha i roto i te taviniraa i tera e tera fare i te roaraa o te tau haapiiraa. Ua horoa te feia haapii, i te faito au noa, fatata 12 matahiti i roto i te taviniraa ma te taime taatoa hou a haere mai ai i Gileada. I te tau haapiiraa, mea huru rahi te mau haapiiraa Bibilia ta ratou i haamata e te mau taata e rau to ratou huru oraraa, o te faaite ïa e ua ite te feia haapii i te ‘faaau ia ratou iho i te mau mea atoa i te taata atoa nei.’—Korinetia 1, 9:22.

I muri aˈe i te mau faatiaraa a te feia haapii, ua titorotoro o Charles Molohan e o William Samuelson i te tahi mau melo o te utuafare o te Betela e te tahi mau tiaau ratere tei tae mai i Gileada. Ua tavini te hoê o te mau taeae i titorotorohia, o Robert Pevy, i Philipino i muri aˈe i to ˈna faatuiteraahia e te 51raa o te piha no Gileada. Ua haamanaˈo oia i te piha e: “Ia tupu noa mai te hoê fifi, e horoa te mau taata atoa i to ratou manaˈo nafea ia faatitiaifaro i te fifi. Te vai noa ra iho â te hoê taata maramarama aˈe ia oe, te hoê taata o te horoa mai i te hoê manaˈo maitai aˈe i to oe. Ia hiˈo râ outou i roto i te Bibilia a imi ai i te manaˈo o te Atua no nia i te mau mea, aita ïa e taata e hau aˈe i te reira. E riro noa iho â te reira ei pahonoraa maitai.”

Ei faaoti-roa-raa i te porotarama pae varua maitai roa, ua vauvau o John Barr, te hoê melo o te Tino Aratai, i te tumu parau ra “A rave i te taviniraa moˈa e auhia mai e Iehova.” Ua faaite oia nafea te taviniraa moˈa e nehenehe ai e ravehia i tera e tera fare no te tauturu i te feia aau tia ia haamori i te Atua ma te auhia mai. I muri aˈe i to ˈna raveraa i te mau parau a Iesu i roto i te Mataio 4:10, ua parau Taeae Barr e: “Mai te peu e e haamori tatou ia Iehova o tatou anaˈe, e tia ia tatou ia haapae i te mau huru haamoriraa idolo atoa, mai te nounou moni, te hiaai i te taoˈa rahi, e te nounou tiaraa. E oaoa mau tatou ia feruri e ua maitai noa ta tatou mau mitionare i te roaraa o te mau matahiti mai te omuaraa o te mau matahiti 1940, i te reira paeau! E te papu nei ia matou e o outou, te feia i faatuitehia o te 108raa o te piha no Gileada, e pee outou i to ratou hiˈoraa maitai. E rave outou i te taviniraa moˈa na Iehova, o oia anaˈe hoi te au i te reira.”

E taime faahiahia maitai roa tera no te hoê porotarama o te patu. I reira te faarooraahia te mau aroha na te ao atoa mai, te pûpûraahia te mau parau tuite, e te taioraahia te hoê rata a te piha o te faaite i to ratou mauruuru no te haapiiraa ta ratou i fanaˈo. Ua aˈohia te piha faatuitehia ia faaite i te huru maitai o te taiva-ore-raa i roto i ta ratou mau hopoia e taviniraa ia Iehova. Ua apiti te feia atoa i tae mai, tae noa ˈtu te mau manihini no na fenua e 25, i roto i te faaotiraa i te porotarama na roto i te himene e te pure.

[Nota i raro i te api]

[Tumu parau tarenihia i te api 23]

TABULA O TE PIHA HAAPIIRAA

Rahiraa o te mau fenua e tia to ratou: 10

Rahiraa o te mau fenua e terehia ˈtu: 17

Rahiraa o te feia haapii: 46

Faito matahiti au noa: 34

Rahiraa matahiti au noa i roto i te parau mau: 16

Rahiraa matahiti au noa i roto i te taviniraa taime taatoa: 12

[Tumu parau tarenihia i te api 24]

Te 108raa o te piha faatuitehia a te Haapiiraa Bibilia no Gileada a te Taiete Watchtower

I roto i te tabula iˈoa i muri nei, a taio i te mau anairaa mai mua e haere atu i muri, e te mau iˈoa mai te pae aui e haere atu i te pae atau.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.