E faatupu te hamani-ino-raa i te maraaraa i Anetiohia

I TO te hamani-ino-raa tupu-taue-raa i muri aˈe i to Setephano haapoheraahia no te faaroo, e rave rahi mau pǐpǐ a Iesu tei horo ê mai Ierusalema ˈtu. Hoê o te mau vahi i reira to ratou imiraa i te haapuraa, o Anetiohia ïa, i Suria, fatata e 550 kilometera i te pae apatoerau atu. (Ohipa 11:19) E taui te tuatapaparaa Kerisetiano taatoa no te mau mea i tupu i muri mai i reira. Ia taa ia tatou te mea i tupu, mea faufaa ia ite i te tahi mau mea no nia ia Anetiohia.

I roto noa i te mau oire o te Hau emepera Roma, i te pae o te aano, te ruperupe, e te faufaaraa, e hemo noa Anetiohia ia Roma e ia Alesanederia. E tiaraa faahiahia to teie oire no Suria i te poro apatoerau hitia o te râ o te miti Mediteranea. Tei nia o Anetiohia (o Antakya ïa i teie nei tau, i Turekia) i te anavai Oronte e terehia e te pahi, e te taai ia ˈna i to ˈna tapaeraa pahi, i Seleukia no Piérie, e 32 kilometera i te atea. Na ˈna i faatere na i te hoê o te mau aveia tapihooraa faufaa roa ˈˈe i rotopu ia Roma e te peho o te Tigre e o te Eupharate. Ei pu tapihooraa, ua rave oia i te reira e te taatoaraa o te hau emepera e ua ite oia i te mau haereraa mai e haereraa ˈtu o te mau huru taata atoa, o tei hopoi i te mau parau apî a te mau pǔpǔ faaroo i te mau vahi atoa o te ao Roma.

Ua ruperupe mai te haapaoraa e te philosophia Heleni i Anetiohia. “I te tau [râ] o te Mesia,” o ta te taata tuatapapa o Glanville Downey ïa e parau ra, “te haamata ra te mau haamoriraa tahito e te mau philosophia i te riro ei ohipa faaroo na te taata taitahi, a imi ai te taata ma te tiamâ i te mauruuru i te pae faaroo no to ratou iho mau fifi e mau hinaaro.” (A History of Antioch in Syria) E rave rahi tei ite mai i te mauruuru i roto i te tiaturiraa i te Atua otahi, te mau peu faaroo, e te morare a te haapaoraa ati Iuda.

E pǔpǔ rahi ati Iuda te faaea ra i Anetiohia mai te haamauraa mai â o te oire i te matahiti 300 H.T.T. Te manaˈohia ra e ua taea ratou mai te 20 000 e tae atu i te 60 000, ua hau atu ïa i te 10 % o te huiraatira. Te na ô ra te taata tuatapapa o Josèphe e ua faaitoito te opu hui arii a te mau Séleucide i te mau ati Iuda e faaea i taua oire ra, a horoa ˈtu ai i te mau tiaraa huiraatira atoa. I taua taime ra, te vai ra te mau Papai Hebera na roto i te reo Heleni. Ua faaitoito te reira i te anaanatae o te mau hoa i te mau tiairaa a te ati Iuda i te Mesia. No reira, e rave rahi peroseluto tei noaa mai i roto i to Heleni. Maoti teie mau mea atoa i riro ai Anetiohia ei aua hotu maitai no te faariro i te taata ei pǐpǐ Kerisetiano.

 Pororaa i te mau Etene

Ua faaite te rahiraa o te mau pǐpǐ a Iesu tei haapurara-ê-hia mai Ierusalema ˈtu i to ratou faaroo i te mau ati Iuda noa. I Anetiohia râ, ua paraparau atu te tahi mau pǐpǐ no Kupero e no Kurene mai i “te feia parau Heleni.” (Ohipa 11:20, MN) Ua rave-noa-hia iho â te pororaa i te mau ati Iuda e te mau peroseluto parau Heleni mai te Penetekose 33 T.T., area te pororaa i Anetiohia ra, e au ra ïa e e ohipa apî. E ere noa te ati Iuda tei porohia ˈtu. Parau mau, ua riro aˈena te Etene ra o Korenelio e to ˈna utuafare ei pǐpǐ. Ua titauhia râ te hoê orama no ǒ mai ia Iehova ra no te haapapu i te aposetolo Petero e mea tia ia poro atu i te mau Etene, aore ra i to te mau nunaa.—Ohipa 10:1-48.

I roto i te hoê oire tei farii i te hoê pǔpǔ ati Iuda rahi mea maoro i te vairaa e aita i rahi te riri i rotopu i te ati Iuda e te Etene, te porohia ra te feia e ere i te ati Iuda e te farii maitai ra ratou i te parau apî maitai. Papu maitai e e huru tupuraa maitai to Anetiohia no teie haereraa i mua, e ‘e feia rahi tei faaroo.’ (Ohipa 11:21) E ia riro mai te mau peroseluto tei haamori na i te mau atua etene ei Kerisetiano, ua ineine taa ê ïa ratou no te poro atu i te tahi atu mau Etene e na reira noa râ.

I to ratou faarooraa no nia i te mau maraaraa i Anetiohia, ua tono te amuiraa no Ierusalema ia Baranaba i ǒ e hiˈopoa. E maitiraa paari e te î i te here tera. No Kupero mai oia, mai te tahi pae o tei haamata i te poro atu i te feia e ere i te ati Iuda. E au roa Baranaba ia tae atu oia i roto i te mau Etene no Anetiohia. Ei faahoˈiraa, e faariro ratou ia ˈna ei melo o te hoê pǔpǔ ta ratou i matau. * E taa maite ïa ia ˈna te ohipa e ravehia ra. No reira, “e tae atura oia i reira, e ite atura i te hamani maitai o te Atua, oaoa ˈtura, e aˈo atura ia ratou atoa ia ati atu i te Fatu ma te aau atoa,” e “te feia rahi hoi tei amuihia i te Fatu ra.”—Ohipa 11:22-24.

“Te mau tumu mau paha i manuïa ˈi te ohipa matamua i Anetiohia,” o te manaˈo ïa o te taata tuatapapa ra o Downey, “te mea ïa e i roto i teie oire, aita e tumu e mǎtaˈu ai te mau mitionare i te mau ati Iuda itoito hua i te pae faaroo mai ta ratou i farerei i Ierusalema; te mea atoa e te faaterehia ra te oire, ei oire pu o Suria, e te hoê raatira faehau, e te fanaˈo ra ïa i te hoê faito nahonaho rahi aˈe, e iti aˈe te faaaehuehuraa uˈana a te nahoa mai tei tupu i Ierusalema, e au ra hoi e (i taua taime aˈe ra) aita i noaa i te mau tavana no Iudea i te tapea i te mau ati Iuda itoito hua i te pae faaroo.”

I roto i taua mau huru tupuraa maitatai ra e ma te rahi te ohipa e tiai maira, ua itea mai paha ia Baranaba e e hinaaro oia i te tauturu, e ua manaˈo aˈera oia i to ˈna hoa ia Saulo. No te aha ia Saulo, aore ra Paulo? E au ra e no te mea ua noaa ia Paulo te tiaraa aposetolo i ǒ te mau nunaa ra, noa ˈtu e e ere oia i to na aposetolo 12. (Ohipa 9:15, 27; Roma 1:5; Apokalupo 21:14) No reira Paulo i tano maitai ai ei hoa no te poro atu i te parau apî maitai i te oire Etene o Anetiohia. (Galatia 1:16) Haere atura ïa Baranaba i Taresisa, ite aˈera ia Saulo, e aratai maira ia ˈna i Anetiohia.—Ohipa 11:25, 26; a hiˈo i te tumu parau tarenihia i te mau api 26-27.

Parauhia e Kerisetiano maoti te hinaaro o te Atua

Hoê matahiti taatoa to Baranaba e o Saulo ‘haapiiraa i te taata e rave rahi, e i Anetiohia na te mairiraahia to te mau pǐpǐ iˈoa Kerisetiano [maoti te hinaaro o te Atua].’ E ere iho â ïa na te mau ati Iuda na mua i mairi i te mau pǐpǐ a Iesu e Kerisetiano (Heleni) aore ra Messianiste (Hebera), no te mea ua faarue ratou ia Iesu ei Mesia, e eita iho â ïa ratou e farii i teie tiaraa to ˈna na roto i te mairiraa i ta ˈna mau pǐpǐ e Kerisetiano. Te manaˈo nei te vetahi e ua topa paha te mau etene i to ratou iˈoa e Kerisetiano ei faaoooraa aore ra ei vahavaharaa. Te faaite nei râ te Bibilia e na te Atua i horoa i te iˈoa Kerisetiano.—Ohipa 11:26; MN.

I roto i te mau Papai Heleni Kerisetiano, e  taai-noa-hia te ihoparau i tapirihia i te iˈoa apî, o te huri-pinepine-hia ei “mairiraahia,” i te hoê mea i hau ê i te mea natura, i te hoê parau tohu aore ra i te Atua. No reira te mau aivanaa e huri ai i te reira ei “faahiti i te hoê parau tohu,” “faauehia e te Atua,” aore ra “horoa i te hoê faaueraa aore ra aˈoraa a te Atua, haapii mai nia mai i te raˈi.” I te mea e ua mairihia te mau pǐpǐ a Iesu e Kerisetiano “maoti te hinaaro o te Atua,” peneiaˈe ua aratai Iehova ia Saulo e ia Baranaba ia horoa i te iˈoa.

Ua mau roa te iˈoa apî. Eita te mau pǐpǐ a Iesu e parau-hape-faahou-hia e e pǔpǔ faaroo o te haapaoraa ati Iuda, e taa ê roa hoi ratou i te reira. I te area 58 T.T., ua ite maite te feia toroa a te hau Roma o vai te mau Kerisetiano. (Ohipa 26:28) Ia au i te taata tuatapapa o Tacite, i te area 64 T.T., ua matau-roa-hia te iˈoa i roto atoa i te feia no Roma.

E faaohipa Iehova i to ˈna feia haapao maitai

Ua haere rahi roa te parau apî maitai i mua i Anetiohia. Ma te haamaitaihia e Iehova e te faaoti-papu-raa a te mau pǐpǐ a Iesu e tamau noa i te poro, ua riro mai Anetiohia ei pu o te Kerisetianoraa i te senekele matamua. Ua faaohipa te Atua i to reira amuiraa ei vahi mai reira ˈtu te parau apî maitai e parare ai i te mau fenua atea. Ei hiˈoraa, mai Anetiohia ˈtu te aposetolo Paulo e reva ˈi no taua ohipa apî ra oia hoi to ˈna mau tere mitionare atoa.

I teie nei tau, ua tauturu atoa te itoito e te mau-papu-raa i mua i te patoiraa e ia parare te Kerisetianoraa mau, maoti ïa te reira i faaroo ai te rahiraa i te parau apî maitai e i faaite ai i te mauruuru no te reira. * No reira, mai te peu e te farerei ra outou i te patoiraa no te mea te turu ra outou i te haamoriraa mau, a haamanaˈo e e tumu ta Iehova e faatia ˈi oia i te reira. Mai i te senekele matamua, e tia ia horoahia te ravea i te taata e faaroo ai ratou no nia i te Basileia o te Atua e ia tia ratou i to ˈna paeau. O ta outou noa paha faaoti-papu-raa e tamau noa i te tavini ia Iehova ma te haapao maitai te mea e titauhia no te tauturu i te hoê taata ia noaa ia ˈna te ite mau i te parau mau.

[Nota i raro i te api]

[Tumu parau tarenihia/Hohoˈa i te mau api 26, 27]

Te “mau matahiti mamû noa” a Saulo

TE TAIME hopea i faahitihia ˈi o Saulo i roto i te buka Ohipa hou oia a haere atu ai i Anetiohia i te area 45 T.T., i te faataupupuraahia ïa te opuaraa e haapohe ia ˈna i Ierusalema e to to ˈna mau hoa faaroo hopoiraa ia ˈna i Taresisa. (Ohipa 9:28-30; 11:25) E iva râ matahiti na mua ˈˈe tera, i te area 36 T.T. Eaha ta ˈna i rave i taua area taime ra—te hoê area taime i parauhia te mau matahiti mamû noa a Saulo?

Mai Ierusalema ˈtu, ua haere Saulo i te mau tuhaa fenua o Suria e o Kilikia, e ua faaroo to te mau amuiraa no Iudea e: “Te taata i hamani ino mai ia tatou i mutaa ihora, te aˈo nei ïa i te parau ta ˈna i tinai i mutaa ihora.” (Galatia 1:21-23) Te faahiti ra paha teie parau faataa i te ohipa i Anetiohia e o Baranaba, hou atoa râ te reira, papu maitai e aita Saulo i tupai mahana na. I te matahiti 49 T.T., te vai ra tau amuiraa i Suria e i Kilikia. Tei Anetiohia hoê, te manaˈo nei râ te vetahi e ua faatupu te ohipa a Saulo i te tahi atu â i te roaraa o ta ˈna mau matahiti parauhia mamû noa.—Ohipa 11:26; 15:23, 41.

Te tiaturi nei te tahi mau aivanaa e ua tupu te tahi mau ohipa peapea i roto i te oraraa o Saulo i taua noâ area taime ra. Mea rahi atu â râ mau ati ta ˈna i farerei ei “tavini a te Mesia,” mea fifi ia tuu i roto i to ˈna oraraa mitionare. (Korinetia 2, 11:23-27, MN) Afea ra to Paulo tairiraahia e pae taime e 39 pǎpǎiraa e te ati Iuda? Ihea to ˈna roturaahia i te raau e toru taime? Ihea to ˈna faarururaa i te tapearaa “rahi”? No muri mai to ˈna tapearaahia i Roma. Hoê ta tatou faatiaraa no nia i te hoê taime i reira to ˈna roturaahia e huriraahia i roto i te tapearaa—i Philipi. E te tahi atu mau taime? (Ohipa 16:22, 23) Te na ô ra te  hoê taata papai e i taua area taime ra, te “poro ra Saulo no nia i te Mesia i roto i te mau sunago o te Diaspora ia au i te hoê huru tei faatupu i te hamani-ino-raa a te haapaoraa e a te mau mana tivila atoa.”

Ua roohia Saulo i na iriraa pahi e maha, te faatia huˈahuˈa nei râ te mau Papai i te hoê noa, tei tupu i muri aˈe i to ˈna faahitiraa i to ˈna mau ati i roto i ta ˈna rata i to Korinetia. (Ohipa 27:27-44) Ua tupu paha ïa te tahi atu e toru i roto i te mau tere aita tatou i ite i te hoê noa ˈˈe mea. Ua tupu paha te hoê aore ra te taatoaraa o teie mau mea i roto i te “mau matahiti mamû noa.”

Te faataahia ra te tahi atu tupuraa e au ra e no taua area taime atoa ra i roto i te Korinetia 2, 12:2-5. Ua parau Saulo e: ‘Ua ite au i te hoê taata i roto i te Mesia, hoê aˈenei ahuru matahiti e maha tiahapa, i hopoi-roa-hia taua taata ra i nia i te raˈi tua toru ra, i roto i te paradaiso, e ua faaroo i te parau, eita roa e tia i te taata nei ia parau.’ Papu maitai e te parau ra Saulo no ˈna iho. I te mea e ua papai oia i te reira i te area 55 T.T., 14 matahiti na mua ˈˈe, e tae ïa tatou i te matahiti 41 T.T., i ropu i te “mau matahiti mamû noa.”

Eita e ore e ua horoa teie orama i te ite hohonu taa ê na Saulo. No te faaineine anei ia ˈna ia riro ei ‘aposetolo i ǒ te Etene ra’? (Roma 11:13) Ua taui anei te reira i ta ˈna huru manaˈoraa, papairaa aore ra paraparauraa i muri aˈe? Ua riro anei te mau matahiti i rotopu i te tauiraa te faaroo a Saulo e to ˈna piiraahia i Anetiohia ei faaineineraa e ei haapaariraa ia ˈna no te mau hopoia no a muri aˈe? Noa ˈtu eaha te mau pahonoraa i teie mau uiraa, e nehenehe tatou e papu e i to Baranaba titauraa ia ˈna e tauturu i te aratai i te ohipa pororaa i Anetiohia, ua ineine maitai te taata itoito ra o Saulo no te amo i taua hopoia ra.—Ohipa 11:19-26.

[Hohoˈa fenua i te api 25]

(Hiˈo i te papai)

SURIA

Oronte

Anetiohia

Seleukia

KUPERO

MITI MEDITERANEA

Ierusalema

[Faaiteraa i te tumu]

Mountain High Maps® Copyright © 1997 Digital Wisdom, Inc.

[Hohoˈa i te api 24]

I nia: Anetiohia no teie tau

I ropu: Tuhaa apatoerau o Seleukia

I raro: Uahu o Seleukia