No te feia tatou i noaa te faaroo

Te faaiteraa i te parau apî maitai i roto i te mau aua raiti i Taïwan

E FANAˈO noa iho â Taïwan i te ûa rahi, no reira e nehenehe ai e ooti e piti auhune raiti maitatai i te mau matahiti atoa. I te tahi râ mau taime, eita te ûa e topa i te taime tano, e pohe ïa te mau raiti tupu. Ia tupu te reira, e faaea anei te taata faaapu i te ohipa? Eita. Ua ite oia e mea faufaa te tamau-noa-raa. E faatupu oia i te raiti apî e e tanu faahou oia i te mau faaapu. I muri aˈe, mai te peu e e maitai mai te mau huru tupuraa, e ooti te taata faaapu i te hoê auhune maitai. I te tahi mau taime, e tuati roa te tanuraa e te ootiraa i te pae varua i te reira.

Te tamau-noa-raa i roto i te ootiraa i te pae varua

I te roaraa o te mau matahiti, ua rohi te mau Ite no Iehova i Taïwan i te tanu e i te ooti i te mau huero o te parau mau Bibilia i te tahi mau vahi e au ra e e ere i te mea hotu maitai. O te Mataeinaa o Miao-li ïa te hoê hiˈoraa. Aita i manuïa rahi te mau tutavaraa i ravehia i te tahi mau taime no te poro i taua vahi ra. No reira i te matahiti 1973, ua tonohia na hoa faaipoipo pionie taa ê no te ohipa i ǒ ei feia poro i te Basileia taime taatoa. I te haamataraa, ua anaanatae mai vetahi i te parau apî maitai. Teie râ, ua ore oioi taua anaanatae ra. No reira teie nau pionie taa ê i tonohia ˈi i te tahi atu vahi.

I te matahiti 1991, ua tonohia e piti pionie taa ê ê atu i ǒ. Ua faaite atoa râ te mau tupuraa e e ere teie te taime maitai no te maraaraa i te pae varua. Tau matahiti i muri aˈe, ua tono-faahou-hia te mau pionie taa ê i te mau tuhaa fenua manaˈohia e mea hotu aˈe. No reira, ua vaiiho-noa-hia teie vahi no te hoê taime.

E ooti te mau tutavaraa faaapîhia i te manuïaraa

I te avaˈe Setepa 1998, ua faaotihia e tutava i te imi i te mau vahi hotu aˈe i roto i te tuhaa fenua rahi aita i operehia i Taïwan. Mea nafea to te reira raveraahia? Mea na roto ïa i te tonoraa e 40 pionie taa ê taime poto no te ohipa i roto i te mau tuhaa fenua taata aˈe aita i operehia.

Tei roto na oire tapiri e piti o te Mataeinaa o Miao-li i te mau tuhaa fenua i maitihia no te pororaa. Ua opuahia e e ohipa na tuahine taa noa e maha i ǒ e toru avaˈe ei tamatamataraa i te tuhaa fenua. I muri iti noa ˈˈe i to ratou taeraa ˈtu, ua papai ratou i te tahi mau parau faataa faahiahia no nia i te numera o te mau taata anaanatae ta ratou i paimi. I te taime a hope ai ta ratou taviniraa pionie e toru avaˈe i taua vahi ra, te faatere ra ratou e rave rahi mau haapiiraa Bibilia i te fare o te taata. Ua haamau atoa ratou i te hoê pǔpǔ haapiiraa buka ma te tauturu a te hoê matahiapo no te hoê amuiraa tapiri.

Ua haapapu e toru o teie mau tuahine e te hinaaro nei ratou e tamau i te haapao atu i te mau hotu apî e “tupu” maitai ra. No reira, ua nominohia e piti o ratou ei pionie taa ê tamau, e te tahi, ua ohipa noa ïa oia i ǒ ei pionie tamau. Ua haere te hoê matahiapo no te amuiraa tapiri i taua vahi ra no te tauturu ia ratou. E hau atu i te 60 taata tei tae mai i te oreroraa parau huiraatira matamua tei vauvauhia i taua vahi ra. I teie nei, te tauturu ra te amuiraa tapiri i teie pǔpǔ apî i te faatere i te mau putuputuraa tamau i te Sabati taa ê atu i te tahi mau haapiiraa buka. E fatata paha te hoê amuiraa apî i te haamauhia i taua vahi ra.

 E hopoi mai te tamau-noa-raa i te mau haamaitairaa i te tahi atu mau vahi i Taïwan

Mai te reira atoa te huru i te tahi atu mau vahi. I te mataeinaa o I-lan, i te pae apatoerau hitia o te râ o Taïwan, ua haamauhia te hoê Haapiiraa Buka apî a te Amuiraa i te hoê vahi i reira to te mau pionie taa ê taime poto ohiparaa.

A haere ai oia i tera e tera fare i te hoê po, ua farerei te hoê pionie taa ê taime poto i te hoê taurearea e ua faaite atu i te hoê api parau no nia i te mau putuputuraa a te amuiraa. Aita oia i haamarirau i te ui e: “E nehenehe anei au e haere i te putuputuraa ananahi po? Mai te peu e e, eaha te ahu e tia ia ˈu ia omono?” Ua faatere teie pionie e vau haapiiraa Bibilia tahebedoma e te mau taata anaanatae. Aita i maoro, ua opua aˈera tau feia haapii Bibilia e riro atoa ei feia poro i te parau apî maitai, ma te tapao e rave i te bapetizoraa.

I roto i teie noâ oire, te vai ra te hoê vahine o tei haere i te pureraa e rave rahi matahiti, aita râ oia i ite i te hoê taata no te haapii ia ˈna i te Bibilia. I to ˈna faarooraa i te faanahoraa no nia i te haapiiraa Bibilia, ua farii oia i te reira. Ua faaitoitohia oia ia faaineine aˈena i ta ˈna haapiiraa. I to te pionie taa ê taime poto taeraa ˈtu no te faatere i te haapiiraa, ua ite oia e ua faaineine teie vahine i ta ˈna “haapiiraa” na roto i te hooraa mai i te hoê buka tapaopaoraa i reira to ˈna papairaa i te mau uiraa e vai ra i roto i ta ˈna buka haapiiraa. I muri iho, ua papai oia i ta ˈna mau pahonoraa i te mau uiraa atoa. Ua papai atoa oia i roto i ta ˈna buka tapaopaoraa i te mau irava Bibilia atoa e horoahia ra i roto i ta ˈna haapiiraa. I to te tuahine taeraa ˈtu no te faatere i te haapiiraa matamua, ua faaineine aˈena teie vahine i na haapiiraa matamua e toru!

Tera atoa te mau faahopearaa tei itehia i te oire o Dongshih i Taïwan no ropu. Ua vaiiho te mau pionie taa ê taime poto hau atu i te 2 000 buka rairai i roto i na avaˈe e toru to ratou pororaa i ǒ. I te toruraa o te avaˈe, te faatere ra ratou 16 haapiiraa Bibilia i te fare o te taata. Ua vavahi rahi te hoê aueueraa fenua, tei tupu i Taïwan no ropu i te 21 no Setepa 1999, i te oire, ua tamau noa râ te tahi feia anaanatae i te haere i mua i te pae varua, noa ˈtu e e tia ia ratou ia rave hoê hora no te haere atu i te mau putuputuraa i te Piha a te Basileia piri roa ˈˈe. Oia, mea faufaa te tamau-noa-raa no te ooti i te hoê auhune maitai, e hotu i te pae materia anei aore ra i te pae varua.

[Hohoˈa fenua i te api 8]

(Hiˈo i te papai)

TAINA

Area no Taïwan

TAÏWAN

[Faaiteraa i te tumu]

Mountain High Maps® Copyright © 1997 Digital Wisdom, Inc.