Te faatia ra te feia poro i te Basileia

No Iehova, mea faufaa te feia e here ra ia ˈna

MAI te tau Bibilia mai â to Lebanona haafaahiahiaraahia no ta ˈna mau faufaa natura. (Salamo 72:16; Isaia 60:13) O ta ˈna mau arezi teitei iho â râ, o tei imi-rahi-hia ei tauihaa hamaniraa fare no to ratou nehenehe, noˈanoˈa, e paari, tei hinaarohia. I te senekele matamua, ua matara mai te tahi mea faufaa roa ˈtu â i Lebanona. Te faatia ra te Evanelia a Mareko e mai Turia e Sidona mai, i te tuhaa fenua tahito o Lebanona, ‘ua haere maira te feia rahi, i te iteraa i te mau peu rarahi ta [Iesu] i rave ra, ia ˈna ra.’—Mareko 3:8.

I teie mahana atoa, te faahotu noa râ o Lebanona i te hotu faufaa roa i mua i te aro o Iehova. Te haamataratara ra te mau faatiaraa i muri nei i te reira.

• Ua anihia ia Wissam, te hoê Ite apî, e vauvau i te hoê oreroraa parau e 30 minuti i mua i ta ˈna piha haapiiraa. Ua faaoti o Wissam e e taime tano teie no te horoa i te hoê faaiteraa. No reira, ua faaohipa oia i te buka La vie: comment est-elle apparue? Évolution ou création? e ua faaineine atura i te oreroraa parau i nia i te tumu parau o te poieteraa. Teie râ, i to te orometua haapii a Wissam iteraa i te tumu parau, ua na ô oia e i te mea e mea faufaa roa te reira, e nehenehe o Wissam e faaroa ˈtu i ta ˈna oreroraa parau i te 45 minuti.

I to Wissam haamataraa i ta ˈna oreroraa parau, ua tapea ta ˈna orometua haapii ia ˈna e ua ani atu i te faatere o te fare haapiiraa ia haere mai. Ua tae oioi maira te faatere o te fare haapiiraa e ua haamata faahou aˈera o Wissam. I to ˈna faarooraa i te mau uiraa ta Wissam i ui ei omuaraa i ta ˈna oreroraa parau, ua anaanatae roa aˈera te faatere o te fare haapiiraa e ua parau atu e e tia i te mau tamarii haapii atoa ia fanaˈo i te hoê hohoˈa o te oreroraa parau.

I muri iti noa ˈˈe, ua ite te tahi atu orometua haapii, o te haere atu na reira, i te anaanatae i roto i te piha haapiiraa e ua ui aˈera eaha te ohipa e tupu ra. I to ˈna faaiteraahia, ua ui oia e te haapapu ra anei o Wissam i te poieteraa aore ra i te tauiuiraa o te mau mea ora. Ua pahonohia, te “Poieteraa.” I to ˈna iteraa e e Ite no Iehova o Wissam, ua na ô te orometua haapii i te piha haapiiraa e: “E ite mai outou na roto i ta ˈna oreroraa parau e te turu ra te ihi i te poieteraa, eiaha i te tauiuiraa o te mau mea ora.”

Ua itehia e te vai ra ta teie orometua haapii te buka ra Création ta ˈna e faaohipa ra ei buka i te fare haapiiraa tuatoru! Hou oia a haere ai, ua ui oia e e nehenehe anei ta ˈna e hoˈi mai e ta ˈna mau tamarii haapii i te mahana i muri iho e ia paraparau o Wissam ia ratou. Ua faatupu te reira i te tahi faaiteraa maitai no nia ia Iehova.

• E poihâ to Nina, e 22 matahiti to ˈna, i te mau pape o te parau mau. I te hoê mahana, ua pûpû to ˈna taeae fetii i te hoê Bibilia na ˈna e ua faaô atu ia ˈna i roto i te Ekalesia Penetekose. Ua taio o Nina i te Bibilia ma te anaanatae e ua ite oia na roto i ta ˈna taioraa e e tia i te mau Kerisetiano ia poro, no reira oia i haamata ˈi i te paraparau atu i te feia ta ˈna i matau. Ua ui te feia atoa ta ˈna i paraparau ia ˈna e: “E Ite no Iehova anei oe?” Ua maere roa oia i te reira.

E 6 matahiti i muri aˈe, ua haere mai te mau Ite no Iehova i te fare o Nina e ua paraparau atu ia ˈna no nia i te Basileia o te Atua. I te haamataraa, ua tamata oia i te faahape i ta ratou mau haapiiraa. Ua ite râ oia e mea tano iho â ta ratou mau pahonoraa atoa e mea niuhia i nia i te Bibilia.

Maoti te mea ta Nina i haapii i te pae hopea—te iˈoa o te Atua ra o Iehova; te mau haamaitairaa o te Basileia; e e rave rahi atu â—i papu ai ia ˈna e ua itea mai ia ˈna te parau mau. Ua pûpû oia i to ˈna ora na te Atua e ua rave i te bapetizoraa. I na matahiti e hitu i mairi, ua tavini o Nina ei taata poro taime taatoa. Oia mau, e haamaitai mai Iehova i te feia e here mau ra ia ˈna.—Korinetia 1, 2:9.