‘Tei te feia haehaa te paari’

“Eaha ta Iehova hinaaro ia oe ra maori râ o . . . te haere ma te haehaa i te aro o to Atua?”—MIKA 6:8.

1, 2. Eaha te haehaa, e nafea oia e taa ê roa ˈi i te teoteo?

 E PATOI te hoê aposetolo rahi i te huti i te ara-maite-raa i nia ia ˈna iho. E parau te hoê haava ati Iseraela itoito e o ˈna tei iti roa i te fetii o to ˈna metua tane. E faˈi te taata rahi roa ˈˈe i ora aˈenei e aita to ˈna e mana taotia-ore-hia. E faaite teie nau taata taitahi i te haehaa.

² E taa ê roa te haehaa i te teoteo. E manaˈo au noa to te taata haehaa i to ˈna aravihi e to ˈna faufaa e eita oia e faaahaaha. Eita oia e faaoru, e faateoteo, aore ra e nounou i te tiaraa, ua ite noa râ te taata haehaa i to ˈna mau taotiaraa. No reira oia e faatura ˈi e e tâuˈa ˈi ma te au i te mau manaˈo hohonu e te mau manaˈo o vetahi ê.

3. Mea nafea e “tei te feia haehaa” te paari?

³ Ua tano iho â ïa te Bibilia i te parauraa e: ‘Tei te feia haehaa te paari.’ (Maseli 11:2) E paari to te taata haehaa no te mea te pee ra oia i te hoê haerea ta te Atua e farii, e te haapae ra oia i te hoê huru feruriraa teoteo o te faatupu i te haama. (Maseli 8:13; Petero 1, 5:5) Na te huru oraraa o te mau tavini a te Atua e rave rahi e haapapu ra i te paari o te haehaa. E hiˈo mai tatou i na hiˈoraa e toru i faahitihia i te paratarapha matamua.

O Paulo—Te hoê “tavini” e te hoê “tiaau”

4. Eaha te mau fanaˈoraa taa ê i noaa ia Paulo?

⁴ E aposetolo rahi o Paulo i rotopu i te mau Kerisetiano matamua, e te taa ra ia tatou no te aha. I te roaraa o ta ˈna taviniraa, ua fano oia e mau tausani kilometera i te atea na te moana e te fenua, e ua haamau oia e rave rahi amuiraa. Hau atu â, ua haamaitai Iehova ia Paulo i te mau orama e te ô e paraparau i te mau reo ěê. (Korinetia 1, 14:18; Korinetia 2, 12:1-5) Ua faaurua atoa oia ia Paulo no te papai 14 rata i riro i teie nei ei tuhaa o te mau Papai Heleni Kerisetiano. E nehenehe mau â e parauhia e mea rahi aˈe ta Paulo mau ohipa i ta te tahi atu mau aposetolo atoa.—Korinetia 1, 15:10.

5. Nafea to Paulo faaiteraa e e manaˈo haehaa to ˈna no nia ia ˈna iho?

 ⁵ I te mea e e tuhaa faufaa ta Paulo i roto i te ohipa Kerisetiano, e manaˈo paha vetahi e e taata faahiahia ïa oia, o te faaiteite atoa ra i to ˈna tiaraa. E ere roa ˈtu râ, no te mea e taata haehaa o Paulo. Ua parau oia e e ‘iti oia i te mau aposetolo,’ oia atoa: “E ore hoi au e au ia parauhia e, e aposetolo, no te mea i hamani ino vau i te [amuiraa a] te Atua.” (Korinetia 1, 15:9; MN) Ei taata hamani ino i te mau Kerisetiano na mua ˈˈe, aita roa ˈtu i moe ia Paulo e maoti noa te maitai rahi i noaa ˈi ia ˈna te hoê taairaa e te Atua, e te tahi mau fanaˈoraa taa ê i roto i te taviniraa. (Ioane 6:44; Ephesia 2:8) No reira, aita Paulo i manaˈo e maoti ta ˈna mau ohipa faahiahia i rave i roto i te taviniraa, mea teitei aˈe oia ia vetahi ê.—Korinetia 1, 9:16.

6. Nafea to Paulo faaiteraa i te haehaa i roto i to ˈna mau taairaa e to Korinetia?

⁶ Te ite-maitai-hia ra te haehaa o Paulo i roto i to ˈna mau taairaa e to Korinetia. E au ra e ua horuhoru vetahi pae i te feia ta ratou i manaˈo e e mau tiaau rahi ratou, mai ia Apolo, Kepha, e ia Paulo atoa. (Korinetia 1, 1:11-15) Aita râ Paulo i ani i to Korinetia ia arue ia ˈna e aita atoa oia i faaohipa ino i ta ratou umere. Ia haere oia e hiˈo ia ratou, aita oia i faaite ia ˈna “ma te parau ahaaha e te paari.” Teie râ ta Paulo i parau no nia ia ˈna iho e to ˈna mau hoa: “E teie nei, a manaˈo te taata ia matou nei, e e tavini anaˈe no te Mesia, e e tiaau no te parau moe a te Atua ra.” *—Korinetia 1, 2:1-5; 4:1.

7. Nafea to Paulo faaiteraa i te haehaa ia horoa atoa oia i te mau aˈoraa?

⁷ Ua faaite atoa Paulo i te haehaa i to ˈna horoaraa i te mau aˈoraa e te aratairaa etaeta. Ua aˈo oia i to ˈna mau hoa Kerisetiano “ma te aroha rahi o te Atua” e ma “te here,” eiaha râ ma te mana o to ˈna tiaraa aposetolo. (Roma 12:1, 2; Philemona 8, 9, MN) No te aha Paulo i na reira ˈi? No te mea ua faariro mau oia ia ˈna iho ei “tauturu” i to ˈna mau taeae, eiaha ei ‘fatu o to ratou faaroo.’ (Korinetia 2, 1:24) Papu maitai e na te haehaa o  Paulo i rave e ia here-taa-ê-hia oia e te mau amuiraa Kerisetiano no te senekele matamua.—Ohipa 20:36-38.

Te hoê manaˈo haehaa no nia i ta tatou mau hopoia

8, 9. (a) No te aha e tia ˈi ia haehaa to tatou manaˈo no nia ia tatou? (b) Nafea te feia e hopoia ta ratou e nehenehe ai e faaite i te haehaa?

⁸ Ua vaiiho mai Paulo i te hoê hiˈoraa maitai roa no te mau Kerisetiano i teie mahana. Noa ˈtu eaha te mau hopoia i horoahia mai na tatou, eiaha hoê aˈe o tatou e manaˈo e mea teitei aˈe tatou ia vetahi ê. “Te manaˈo ra hoi te hoê taata ia ˈna iho, e, e faufaa ta ˈna, e aita roa a ˈna,” ta Paulo ïa i papai, “ua vare oia ia ˈna iho.” (Galatia 6:3) No te aha? No te mea “ua rave paatoa hoi i te hara, e ua ere i te haamaitai a te Atua ra.” (Roma 3:23; 5:12) Oia, eiaha roa ˈtu tatou e haamoe e ua naea tatou i te hara e te pohe tufahia e Adamu. Eita te mau fanaˈoraa taa ê e faateitei ia tatou mai to tatou tiaraa taata hara riirii. (Koheleta 9:2) Mai te hiˈoraa o Paulo, maoti noa te maitai rahi e nehenehe ai te taata e faatupu i te hoê taairaa e te Atua, e e tavini atoa ia ˈna i roto i te tahi tuhaa fanaˈo.—Roma 3:12, 24.

⁹ Ia taa ia ˈna te reira, eita te hoê taata haehaa e umere i ta ˈna mau fanaˈoraa taa ê e eita atoa e faaahaaha no ta ˈna mau ohipa i rave. (Korinetia 1, 4:7) Ia horoa oia i te aˈoraa aore ra te aratairaa, e na reira oia mai te hoê tauturu—eiaha te hoê fatu. Papu maitai, e ere i te mea tano ia titau te hoê taata aravihi i roto i te tahi mau ohipa i te arueraa a te mau hoa i roto i te faaroo aore ra ia faaohipa ino i ta ratou umere. (Maseli 25:27; Mataio 6:2-4) Te arueraa hoê e faufaa to ˈna, no ǒ mai ïa ia vetahi ê ra—e ia ore te reira e anihia. Ia tupu te reira, eiaha e vaiiho e ia hau te manaˈo ia tatou iho.—Maseli 27:2; Roma 12:3.

10. A faataa nafea vetahi mau taata riirii ia hiˈohia ˈtu e riro mau ai ei “feia taoˈa i te faaroo.”

¹⁰ Ia horoahia mai te tahi mau hopoia, e tauturu mai te haehaa ia ape tatou i te haafaufaa ia tatou ma te tano ore, i te horoa i te manaˈo e maoti noa ta tatou mau tutavaraa e to tatou aravihi e ruperupe ai te amuiraa. Ei hiˈoraa, mea ite paha tatou i te horoa i te haapiiraa. (Ephesia 4:11, 12) Mai te peu râ e e taata haehaa tatou, e tia ia tatou ia farii e e ere vetahi mau haapiiraa rahi roa ˈˈe e noaa mai i te hoê putuputuraa a te amuiraa i te mea vauvauhia mai na mua mai. Aita anei outou e faaitoitohia ra ia ite outou, ei hiˈoraa, i te metua hoê e haere tamau ra i te Piha a te Basileia e ta ˈna mau tamarii atoa? Aore ra te taata hepohepo e haere noa ra i te mau putuputuraa noa ˈtu te manaˈo onoono e mea faufaa ore oia? Aore ra te taurearea e haere tamau noa ra i mua i te pae varua noa ˈtu te mau mana iino i te fare haapiiraa e i te tahi atu vahi? (Salamo 84:10) E ere paha teie mau taata i te mea faahiahia. Aita vetahi ê e ite roa ra i te mau tamataraa ta to ratou taiva ore e faaruru ra. Teie râ, e ‘feia taoˈa ratou i te faaroo’ mai te feia teitei aˈe atoa. (Iakobo 2:5) Inaha, te faahopearaa o te haapao maitai, o te fanaˈoraa ïa i te farii maitai a Iehova.—Mataio 10:22; Korinetia 1, 4:2.

O Gideona—“Tei iti roa” i te fetii o to ˈna metua tane

11. Nafea to Gideona faaiteraa i te haehaa i to ˈna paraparauraa i te melahi a te Atua?

¹¹ Ua ora na o Gideona, te hoê taata apî pautuutu o te opu o Manase, i te hoê tau arepurepu i roto i te tuatapaparaa a Iseraela. E hitu matahiti i te maoro to te nunaa o te Atua faarururaa i te haavîraa a to Midiana. Teie râ, ua tae i te taime e faaora ˈi Iehova i to ˈna nunaa. No reira, ua fa maira te hoê melahi ia Gideona e ua na ô maira e: “Tei pihaiiho Iehova ia oe, e tena na taata puai e te itoito ra.” E taata haehaa o Gideona, aita ïa oia i umere i te hanahana o teie haapopouraa  manaˈo-ore-hia. Ua parau râ oia ma te faatura i te melahi e: “E tau fatu e, tei pihaiiho Iehova ia matou ra, eaha matou i roohia mai ai i teie nei mea rahi?” Ua haamaramarama ˈtura te melahi e na ô atura ia Gideona e: “Na oe e faaora ia Iseraela i te rima o te ati Midiana.” Eaha ta Gideona i pahono? Maoti i te faariro ru i teie ohipa faauehia ei ravea maitai no te riro mai ei aito o te nunaa, ua pahono Gideona e: “E tau fatu e, eaha te ravea e ora ˈi Iseraela ia ˈu? Inaha, e fetii haehaa to ˈu ia Manase nei, e o vau hoi tei iti roa i te fetii o to ˈu ra metua.” E haehaa faahiahia mau â teie!—Mau tavana 6:11-15.

12. Nafea to Gideona faaiteraa i te mamahu i to ˈna raveraa i ta ˈna ohipa faauehia?

¹² Hou oia a tono ai ia Gideona i te tamaˈi, ua tamata Iehova ia ˈna. Nafea? Ua faauehia Gideona e vavahi i te fata a Baala i hamanihia e to ˈna metua tane e e haamarua i te pou moˈa e tia ra i pihai iho. E titau teie ohipa faauehia i te itoito, ua faaite atoa râ o Gideona i te haehaa e te mamahu i roto i ta ˈna raveraa i te reira. Aita oia i rave i te reira i mua i te taata, ua ohipa râ o Gideona i te po, eita ïa oia e itehia. Hau atu â, ua rave o Gideona i ta ˈna ohipa faauehia ma te ara maitai. Ua rave oia hoê ahuru tavini—peneiaˈe ia nehenehe vetahi pae e tiai a tauturu ai te toea ia ˈna i te vavahi i te fata e te pou moˈa. * Noa ˈtu eaha te tupuraa, ua rave o Gideona i ta ˈna ohipa faauehia ma te haamaitairaa a Iehova, e i muri iho, ua faaohipa te Atua ia ˈna no te faaora ia Iseraela i te ati Midiana.—Mau tavana 6:25-27.

E faaite anaˈe i te haehaa e te mamahu

13, 14. (a) Nafea tatou e faaite ai i te haehaa ia horoahia mai te hoê hopoia i roto i te taviniraa? (b) Nafea to Taeae A. H. Macmillan horoaraa mai i te hoê hiˈoraa maitai roa o te haehaa?

¹³ Mea rahi te haapiiraa ta tatou e nehenehe e huti mai na roto i te haehaa o Gideona. Ei hiˈoraa, e nafea tatou ia horoahia mai te hoê hopoia i roto i te taviniraa? E manaˈo  anei tatou na mua i te roo maitai aore ra i te tiaraa e noaa mai? Aore ra e hiˈopoa anei tatou ma te haehaa e i roto i te pure e e maraa anei ia tatou te mau mea e titauhia e te reira? Ua horoa mai Taeae A. H. Macmillan, o tei faaoti i ta ˈna hororaa i te fenua nei i te matahiti 1966, i te hoê hiˈoraa maitai roa i roto i teie tuhaa. I te hoê taime, ua ui o C. T. Russell, te peretiteni matamua o te Taiete Watch Tower, i te manaˈo o Taeae Macmillan o vai te nehenehe e haapao i te ohipa ia reva oia. I roto i te aparauraa i muri iho, aita Taeae Macmillan i parau noa ˈˈe e e nehenehe ta ˈna, noa ˈtu e mea ohie ia ˈna ia na reira. I te pae hopea, ua ani Taeae Russell ia Taeae Macmillan ia farii i te reira. “Ua tia noa vau ma te hitimahuta rii,” ta Taeae Macmillan ïa i papai tau matahiti i muri aˈe. “Ua feruri maitai au i te reira, ma te hohonu roa, e ua pure au no nia i te reira tau taime na mua ˈˈe au a parau roa ˈtu ai ia ˈna e e oaoa vau i te rave i te mau mea atoa e maraa ia ˈu no te tauturu ia ˈna.”

¹⁴ Aita i maoro roa, ua pohe Taeae Russell, ua vata ïa te piha ohipa a te peretiteni o te Taiete Watch Tower. I te mea e o Taeae Macmillan te taata haapao a reva ˈi Taeae Russell i to ˈna tere pororaa hopea, ua parau te hoê taeae ia ˈna e: “E Mac, mea papu roa e e fanaˈo oe i tera piha. O oe te tia taa ê no Taeae Russell i to ˈna revaraa, e ua parau mai o ˈna ia matou pauroa e e faaroo i ta oe parau. Ua reva oia e aita roa ˈtu i hoˈi mai. E au ra e o oe te taata e haapao i te ohipa.” Ua pahono Taeae Macmillan e: “E Taeae, e ere mea na reira ia hiˈo i teie ohipa. E ohipa teie na te Fatu e na ˈna e hiˈo eaha noa te parahiraa e au i te horoa no oe i roto i te faanahonahoraa a te Fatu; e ua papu ia ˈu e e ere au i te taata no teie ohipa.” Ia oti, ua maiti atura Taeae Macmillan i te tahi atu taata no taua ohipa ra. Mai ia Gideona, e manaˈo haehaa to ˈna no nia ia ˈna iho—te hoê manaˈo e tia ia tatou ia farii.

15. Eaha te tahi mau ravea ohie e nehenehe ai tatou e faaite i te ite hohonu ia poro tatou ia vetahi ê?

¹⁵ E tia atoa ia tatou ia haehaa i roto i te huru raveraa i ta tatou hopoia. E taata mamahu o Gideona, e ua tutava oia i te rave ia ore to ˈna mau enemi ia riri faufaa ore noa. Oia atoa i roto i ta tatou ohipa pororaa, ia haehaa e ia mamahu tatou i roto i ta tatou huru paraparauraa ia vetahi ê. Parau mau, to roto tatou i te hoê tamaˈi pae varua no te faatahuri i “te mau pare” e “te feruri teoteo.” (Korinetia 2, 10:4, 5) Eiaha râ tatou e faahaehaa ia vetahi ê aore ra e horoa ˈtu ia ratou i te tahi tumu papu e inoino ai ratou i ta tatou poroi. Eiaha, e tia ia tatou ia faatura i to ratou mau manaˈo, ia faaite i te mau mea ua tu to tatou manaˈo, e i muri iho, e haamataratara i te mau tuhaa maitatai o ta tatou poroi.—Ohipa 22:1-3; Korinetia 1, 9:22; Apokalupo 21:4.

 O Iesu—Te hiˈoraa rahi o te haehaa

16. Nafea to Iesu faaiteraa e e manaˈo haehaa to ˈna no nia ia ˈna iho?

¹⁶ O Iesu Mesia te hiˈoraa maitai roa ˈˈe o te haehaa. * Noa ˈtu to ˈna taairaa piri roa e to ˈna Metua, aita o Iesu i taiâ i te faaite e te vai ra te tahi mau mea aita to ˈna e mana i nia iho. (Ioane 1:14) Ei hiˈoraa, i to te metua vahine o Iakobo raua o Ioane aniraa e ia haaparahihia ta ˈna na tamaiti e piti i pihai ia Iesu i roto i to ˈna basileia, ua parau Iesu e: “Area te parahi i tau rima atau e tau rima aui, eita ïa e tia ia ˈu ia horoa.” (Mataio 20:20-23) I te tahi atu taime, ua parau roa Iesu e: “Aore e mea e tia ia ˈu iho ia rave . . . Aita hoi au i imi i to ˈu iho hinaaro, o te hinaaro râ o te Metua o tei tono mai ia ˈu nei ra.”—Ioane 5:30; 14:28; Philipi 2:5, 6.

17. Nafea to Iesu faaiteraa i te haehaa i roto i to ˈna mau taairaa e o vetahi ê?

¹⁷ Mea teitei aˈe Iesu i te mau taata tia ore i roto i te mau tuhaa atoa, e e mana faito ore to ˈna no ǒ mai i to ˈna Metua ra o Iehova. Noa ˈtu râ, mea haehaa o Iesu i roto i to ˈna mau taairaa e ta ˈna mau pǐpǐ. Aita oia i faateimaha ia ratou i te hoê faaiteiteraa horuhoru o to ˈna ite. Ua tâuˈa e ua aroha oia i te taata e ua haapao i to ratou mau hinaaro. (Mataio 15:32; 26:40, 41; Mareko 6:31) No reira, noa ˈtu e mea tia roa o Iesu, aita oia i titau ia haamaitai roa ino. Aita roa ˈtu oia i ani hau atu i tei maraa i ta ˈna mau pǐpǐ ia horoa, e aita roa ˈtu oia i titau hau atu i tei maraa ia ratou ia amo. (Ioane 16:12) E ere i te mea maere ia hiˈo e rave rahi ia ˈna mai te hoê taata mahanahana mau!—Mataio 11:29.

E pee anaˈe i te hiˈoraa o te haehaa o Iesu

18, 19. Nafea tatou e nehenehe ai e pee i te hiˈoraa o te haehaa o Iesu i roto i (a) ta tatou huru hiˈoraa ia tatou iho, e (b) to tatou huru i nia ia vetahi ê?

¹⁸ Mai te peu e ua faaite te taata rahi roa ˈˈe i ora aˈenei i te haehaa, e hau atu â ïa tatou. Mea pinepine te taata tia ore i te ore e farii oioi e aita to ratou e mana taotia-ore-hia. Ia au râ i te hiˈoraa o Iesu, te tutava ra te mau Kerisetiano i te faaite i te haehaa. E ere ratou i te mea teoteo no te horoa i te hopoia i te feia aravihi; e ere atoa ratou i te mea faaahaaha e te mea haapaari no te farii i te aratairaa a te feia e tiaraa to ratou e na reira. Ma te hoê huru feruriraa ohipa amui, te rave nei ratou i te mau mea atoa i roto i te amuiraa “ma te tia e ma te [nahonaho].”—Korinetia 1, 14:40; MN.

¹⁹ E turai atoa te haehaa ia tatou ia au noa ta tatou mau tiairaa ia vetahi ê e ia haapao i to ratou mau hinaaro. (Philipi 4:5) E aravihi e e puai paha to tatou e aita to vetahi ê. Ia haehaa râ tatou, eita ïa tatou e manaˈo noa e e tia ia vetahi ê ia ohipa mai ta tatou e hinaaro. I te mea e to te taata taitahi to ˈna iho mau taotiaraa, e faaore ïa tatou ma te haehaa i te mau hapa a vetahi ê. Ua papai o Petero e: “Hau atu i te mau mea atoa, ia rahi to outou here te tahi i te tahi, no te mea e tapoˈi te here i te hapa e rave rahi.”—Petero 1, 4:8, MN.

20. Nafea tatou e nehenehe ai e haavî i te huru teoteo?

²⁰ Mai ta tatou i haapii mai nei, tei te feia haehaa mau â te paari. E nafea râ outou ia ite outou e e huru haehaa ore aore ra teoteo to outou? Eiaha e haaparuparu. A pee râ i te hiˈoraa o Davida, i pure e: “E tapea mai oe i to tavini i te hara iimi; eiaha roa te reira ia faahepo mai ia ˈu.” (Salamo 19:13) Na roto i te peeraa i te faaroo o te mau taata mai ia Paulo, Gideona, e—tei nia ˈˈe ia vetahi ê atoa—o Iesu Mesia, e ite tatou iho i te tanoraa o teie mau parau: ‘Tei te feia haehaa te paari.’—Maseli 11:2.

[Nota i raro i te api]

Te haamanaˈo ra anei outou?

• Eaha te haehaa?

• Nafea tatou e nehenehe ai e pee i te hiˈoraa o te haehaa o Paulo?

• Eaha ta tatou e nehenehe e haapii na roto i te hiˈoraa o te haehaa o Gideona?

• Nafea to Iesu horoaraa i te hiˈoraa rahi o te haehaa?

[Uiraa haapiiraa]

[Hohoˈa i te api 15]

Ua here te mau hoa Kerisetiano ia Paulo no to ˈna haehaa

[Hohoˈa i te api 17]

Ua faaite o Gideona i te mamahu i to ˈna faatupuraa i te hinaaro o te Atua

[Hohoˈa i te api 18]

E faaite o Iesu, te Tamaiti a te Atua, i te haehaa i roto i ta ˈna mau mea atoa e rave