A faaite i te huru feruriraa o te Mesia
A faaite i te huru feruriraa o te Mesia
“Ia faafaito mai te Atua no ˈna te faaoromai e te mahanahana i to outou [huru feruriraa], outou outou iho, ia au i [to] te Mesia ra o Iesu.”—ROMA 15:5; MN.
1. Nafea te huru feruriraa o te hoê taata e nehenehe ai e ohipa i nia i to ˈna oraraa?
TEI te huru feruriraa o te hoê taata to ˈna oraraa. Te hoê huru faatau aore ra itoito, te hoê huru maitai aore ra haaparuparu, te hoê huru aa aore ra rave amui i te ohipa, te hoê huru amuamu aore ra mauruuru, e nehenehe ïa e ohipa puai i nia i ta te hoê taata e rave i mua i te tahi mau tupuraa e te haerea o vetahi ê i nia ia ˈna. Ma te hoê huru feruriraa maitai, e nehenehe te hoê taata e oaoa noa ˈtu te tahi mau tupuraa fifi. Area te hoê taata e huru feruriraa ino to ˈna, e au ra ïa e aita hoê aˈe mea maitai, noa ˈtu e—ia au i te hoê manaˈo pae tahi ore—mea maitai te oraraa.
2. Nafea te hoê taata e haapii ai i te mau huru feruriraa?
2 E nehenehe te mau huru feruriraa—maitai aore ra ino—e haapiihia. Oia mau, mea haapiihia te reira e tia ˈi. Te na ô ra te hoê buka ite rahi (Collier’s Encyclopedia) no nia i te hoê aiû fanau apî e: “Te mau huru feruriraa e noaa mai ia ˈna i te pae hopea, e tia ïa ia ˈna ia haapii, mai ia ˈna e haapii i te hoê reo aore ra i te tahi atu aravihi.” Nafea tatou e haapii ai i te mau huru feruriraa? Mea rahi te mau mea e turu ra i te reira, tera râ, e mana puai to te mau mea e haaati ra e te auhoaraa. Te tapao ra te buka ite rahi i faahitihia aˈenei e: “E haapii aore ra e apo mai tatou, mai te mea ra e mea pee, i te mau huru feruriraa o te feia mea piri roa to tatou taairaa.” E mau tausani matahiti aˈenei, ua faahiti te Bibilia i te hoê â manaˈo: “O tei amui atoa to ˈna haerea i to te feia paari ra, e paari atoa ïa; o tei amui râ i te feia maamaa ra, e pohe ïa.”—Maseli 13:20; Korinetia 1, 15:33.
Te hoê hiˈoraa o te huru feruriraa e tano
3. To vai te hiˈoraa maitai i te pae o to ˈna huru feruriraa, e nafea tatou e nehenehe ai e pee ia ˈna?
3 Mai no te tahi atu â mau mea atoa, no nia atoa i te huru feruriraa, te horoa ra Iesu Mesia i te hiˈoraa maitai roa ˈˈe. Ua na ô oia e: “Ua horoa ˈtu na hoi au i te [hiˈoraa] na outou, o ta ˈu i rave iho ia outou nei, ia na reira atoa hoi outou.” (Ioane 13:15; MN) No te pee ia Iesu, e tia ia tatou ia haapii na mua no nia ia ˈna. * E faahohonu tatou i te oraraa o Iesu ma te opua e rave i ta te aposetolo Petero i faaitoito: “I parauhia ˈi hoi outou; i pohe atoa hoi te Mesia iho no outou; e ua vaiiho hoi i te [hiˈoraa] na outou, ia pee [maite] outou i to ˈna taahiraa avae.” (Petero 1, 2:21; MN) Ta tatou tapao, o te pee-maite-raa ïa ia Iesu. Te auraa ra, te faahoturaa i to ˈna huru feruriraa.
4, 5. Eaha te tuhaa o te huru feruriraa o Iesu e haamataratarahia ra i roto i te Roma 15:1-3, e nafea te mau Kerisetiano e nehenehe ai e pee ia ˈna?
4 Eaha te auraa e faahotu i te huru feruriraa o te Mesia ra o Iesu? E tauturu mai te pene 15 o te rata a Paulo i to Roma i te pahono i taua uiraa ra. I roto i te tahi nau irava matamua o teie pene, te faahiti ra Paulo i te hoê huru faahiahia roa o Iesu i to ˈna parauraa e: “E teie nei, o tatou o tei itoito nei, e faaoromai i te paruparu o te itoito ore e tia ˈi, eiaha e faatia i ta tatou iho. E haamauruuru tatou atoa nei ia vetahi ê, ia maitai oia, ia itoito. Aore atoa hoi te Mesia i haamauruuru ia ˈna iho, i tei papaihia ra e, Te faaino a te feia i faaino ia oe ra, ua iri mai ïa i nia iho ia ˈu.”—Roma 15:1-3.
5 No te pee i te huru feruriraa o Iesu, te faaitoitohia ra te mau Kerisetiano ia ineine i te haapao i te mau hinaaro o vetahi ê ma te haehaa eiaha ma te hinaaro e ia mauruuru noa ratou iho. Oia mau, o taua hinaaro haehaa ra e tavini ia vetahi ê te hoê huru taa ê o te feia “itoito.” Teie ta Iesu, i itoito aˈe i te pae varua i te tahi taata i ora aˈenei, i parau no nia ia ˈna iho: “Aita atoa hoi te Tamaiti a te taata nei i haere mai ia tavinihia to ˈna, ei tavini râ, e ia horoa i to ˈna ora ei hoo no te taata e rave rahi.” (Mataio 20:28) E hinaaro atoa tatou, te mau Kerisetiano, e haere e tauturu ia vetahi ê, tae noa ˈtu tei “itoito ore.”
6. Nafea tatou e nehenehe ai e pee i te huru o Iesu i mua i te patoiraa e te faahaparaa?
6 Te tahi atu huru taa ê ta Iesu i faaite, o te hoê ïa hiˈoraa o te manaˈo e te ohipa maitai noa. Aita roa ˈtu oia i vaiiho e ia ohipa te huru feruriraa haaparuparu o vetahi ê i nia i to ˈna huru feruriraa maitai i mua i te taviniraa i te Atua; eiaha atoa ïa tatou. I to ˈna faainoraahia e hamani-ino-raahia no te haamoriraa i te Atua ma te haapao maitai, ua faaoromai Iesu ma te ore e autâ. Ua ite oia e e farerei iho â te feia e tamata ra i te haamauruuru ia vetahi ê ‘ia maitai e ia itoito oia,’ i te patoiraa a te hoê ao tiaturi ore e te taa ore.
7. Nafea to Iesu faaiteraa i te faaoromai, e no te aha e tia ˈi ia tatou ia na reira atoa?
7 Ua faaite Iesu i te hoê huru feruriraa e tano na roto i te tahi atu â mau raveraa. Aita roa ˈtu oia i faaite aˈenei i te fatimauu ia Iehova, ua tiai râ oia ma te haamahu ia tupu Ta ˈna mau opuaraa. (Salamo 110:1; Mataio 24:36; Ohipa 2:32-36; Hebera 10:12, 13) Hau atu â, aita Iesu i fatimauu i ta ˈna mau pǐpǐ. Ua na ô oia ia ratou e: “Ia haapiihia outou e au”; i te mea e mea “mǎrû” oia, e patu e e haamahanahana ïa ta ˈna haapiiraa. E no te mea e mea ‘haehaa to ˈna aau,’ aita roa ˈtu oia i faaahaaha aore ra i faateoteo. (Mataio 11:29) Te faaitoito maira Paulo ia pee tatou i teie mau huru o Iesu i to ˈna parauraa e: “Ia hoê atoa o outou huru [feruriraa] e to te Mesia ra to Iesu; o te huru ïa oia no te Atua, e aore oia i parau e haru toroa ia faito atoa oia i te Atua, haapae atura râ i to ˈna iho, rave atura i to te tavini ra huru, i te fanauraa mai ma te huru o te taata nei.”—Philipi 2:5-7; MN.
8, 9. (a) No te aha e tia ˈi ia tatou ia rohi i te faahotu i te hoê huru feruriraa miimii ore? (b) No te aha e ore ai e tia ia tatou ia haaparuparu ia ore e noaa ia tatou i te pee i te hiˈoraa o Iesu, e nafea Paulo i riro ai ei hiˈoraa maitai i roto i teie tuhaa?
8 Mea ohie ia parau e te hinaaro ra tatou e tavini ia vetahi ê e e haapao i to ratou mau hinaaro na mua ˈˈe i to tatou. E nehenehe râ te hoê hiˈopoaraa haavare ore i to tatou huru feruriraa e faaite mai e e ere to tatou i te aau tae roa. No te aha? A tahi, no te mea ua raea tatou i te mau huru miimii o Adamu e o Eva; a piti, no te mea te ora nei tatou i roto i te hoê ao o te faaitoito ra i te miimii. (Ephesia 4:17, 18) Te faaohiparaa i te hoê huru feruriraa miimii ore, e pinepine te faahoturaa ïa i te hoê huru feruriraa taa ê roa i to tatou naturaraa tia ore i to tatou fanauraa mai. E titau te reira i te faaoti-maite-raa e te tutavaraa.
9 I te tahi taime, e nehenehe to tatou huru tia ore, tei taa ê roa i te hiˈoraa tia roa ta Iesu i vaiiho mai na tatou, e haaparuparu ia tatou. E feaa paha tatou e e noaa ia tatou te hoê â huru feruriraa e to Iesu. A tapao na râ i te mau parau faaitoito a Paulo: “Ua ite hoi au e aore roa e mea maitai i vai i roto ia ˈu (i roto i tau tino nei,) o te hinaaro râ, te fatata nei ïa ia ˈu, area te rave i te mea maitai ra, aita ïa i itea ia ˈu. O te maitai hoi ta ˈu i hinaaro ra, aore ïa vau i rave: area te ino hinaaro-ore-hia e au ra, o ta ˈu ïa e rave nei. Te oaoa nei hoi au i te ture a te Atua, i te haapaoraa i te taata i roto ra; te ite nei râ vau i te tahi ture i roto i tau tino nei, i te mârôraa mai i te ture i roto i tau aau nei, e te faariroraa ia ˈu ei tîtî na te ture ino i roto i tau tino nei.” (Roma 7:18, 19, 22, 23) Oia mau, ua haafifi tamau te huru tia ore o Paulo ia ˈna ia rave i te hinaaro o te Atua mai ta ˈna i hinaaro, area to ˈna huru feruriraa ra—to ˈna manaˈo ia Iehova e no nia i Ta ˈna ture—mea maitai ïa. E nehenehe atoa tatou e na reira.
Te faatitiaifaroraa i te mau huru feruriraa tano ore
10. Eaha te huru feruriraa ta Paulo i faaitoito i to Philipi ia faahotu?
10 E nehenehe anei e parau e mea hinaarohia e vetahi pae e faatitiaifaro i te hoê huru feruriraa tano ore? E. Te vai ra te hiˈoraa o te tahi mau Kerisetiano i te senekele matamua. I roto i ta ˈna rata i to Philipi, ua faahiti Paulo i te parau o te huru feruriraa maitai. Teie ta ˈna i papai: “Eita vau e parau e, ua noaa ia ˈu [te oraraa i nia i te raˈi maoti te tia-faahou-raa matamua] e ua oti nehenehe roa to ˈu hororaa i teie nei, te titau nei râ vau, peneiaˈe o te noaa ia ˈu te mea i roohia mau ai au nei e te Mesia ra e Iesu. E au mau taeae, aore au i manaˈo ia ˈu iho nei, e ua noaa, hoê roa a ˈu mea e rave nei, i te haamoeraa i te mau mea i muri ra, e te titauraa ˈtu hoi i tei mua, te nenei tia ˈtu nei au i te tapao, ia noaa te berabeio i te parauraa a te Atua no nia maira i te Mesia nei ia Iesu. E teie nei, e na reira to tatou [“huru feruriraa,” MN], to te feia atoa i paari ra.”—Philipi 3:12-15.
11, 12. Nafea Iehova e faaite mai ai i te huru feruriraa e tano ia tatou?
11 Ia au i te mau parau a Paulo, e huru feruriraa tano ore to te taata, o tei riro mai ei Kerisetiano, ia manaˈo oia e aita e faufaa ia haere i mua. Aita taua taata ra i farii i te huru feruriraa o te Mesia. (Hebera 4:11; Petero 2, 1:10; 3:14) E tupuraa ravea ore anei to taua taata ra? E ere roa ˈtu. E nehenehe te Atua e tauturu mai ia taui tatou i to tatou huru feruriraa ia hinaaro mau tatou e na reira. Te parau atoa ra Paulo e: “E manaˈo ê to outou i te tahi mea ˈtu, na te Atua e faaite mai ia outou i te reira.”—Philipi 3:15.
12 Tera râ, e tia ia tatou ia rave i ta tatou tuhaa ia hinaaro tatou e ia faaite mai Iehova i te huru feruriraa e tano. Maoti te haapiiraa i te Parau a te Atua na roto i te pure e te mau mea Kerisetiano atoa i neneihia e “te tavini haapao maitai e te paari,” e nehenehe te feia “e manaˈo ê” to ratou e faaohipa i te hoê huru feruriraa e tano. (Mataio 24:45) E oaoa te mau matahiapo Kerisetiano, i nominohia e te varua moˈa no te ‘faaamu i te amuiraa a te Atua,’ i te pûpû i ta ratou tauturu. (Ohipa 20:28, MN) Te mauruuru mau nei tatou e te tâuˈa ra Iehova i to tatou mau huru tia ore e te pûpû ra oia ma te here i te tauturu ia tatou! E farii anaˈe ïa i te reira.
Te haapiiraa na roto ia vetahi ê
13. Eaha ta tatou e haapii na roto i te huru feruriraa e tano i roto i te aamu Bibilia o Ioba?
13 I roto i te Roma pene 15, te faaite ra Paulo e e nehenehe te feruriruriraa i te tahi mau hiˈoraa faufaa e tauturu mai ia faatitiaifaro tatou i to tatou huru feruriraa. Ua papai oia e: “Te mau parau atoa hoi i papaihia i mutaa ihora, i papaihia ïa ia ite tatou; ia noaa to tatou tiairaa, i te faaoromai e te mahanahana o te parau i papaihia ra.” (Roma 15:4) Mea hinaarohia e ia faatitiaifaro te tahi mau tavini haapao maitai a Iehova i mutaa ihora i te tahi mau tuhaa o to ratou huru feruriraa. Mea pinepine, ei hiˈoraa, e huru feruriraa maitai to Ioba. Aita roa ˈtu oia i parau e o Iehova te tumu o te ino, e aita roa ˈtu oia i vaiiho e ia faaaueue te mauiui i to ˈna tiaturi i te Atua. (Ioba 1:8, 21, 22) Tera râ, ua faatia oia ia ˈna iho. Ua aratai o Iehova ia Elihu e tauturu ia Ioba ia faatitiaifaro i teie huru. Aita Ioba i manaˈo e te faainohia ra oia, ua farii râ oia ma te haehaa e e tia ia ˈna ia taui i to ˈna huru feruriraa e ua na reira oia.—Ioba 42:1-6.
14. Nafea tatou e riro ai mai ia Ioba ia aˈohia tatou no nia i to tatou huru feruriraa?
14 Mai to Ioba anei to tatou huru ia parau mǎrû mai te hoê hoa Kerisetiano e e huru feruriraa tano ore to tatou? Eiaha roa ˈtu tatou, mai ia Ioba, e “faahapa i te Atua.” (Ioba 1:22) Ia mauiui tatou ma te tano ore, eiaha roa ˈtu tatou e autâ aore ra e pari e o Iehova te tumu o to tatou mau fifi. Eiaha atoa tatou e tamata i te faatia ia tatou iho, ia haamanaˈo râ e noa ˈtu eaha ta tatou mau fanaˈoraa taa ê i roto i te taviniraa a Iehova, e mau “tavini” noa tatou ‘aita e faufaa.’—Luka 17:10.
15. (a) Eaha te huru feruriraa tano ore ta te tahi mau pǐpǐ a Iesu i faaite? (b) Nafea to Petero faaiteraa i te huru feruriraa maitai?
15 I te roaraa o te senekele matamua, e huru feruriraa tano ore to vetahi pae tei faaroo ia Iesu. I te hoê taime, ua faahiti Iesu i te tahi mau parau mea fifi ia taa te auraa. Ei pahonoraa, “e rave rahi ta ˈna mau pǐpǐ i faaroo i taua parau nei, i na ô e, E parau riaria teie, e itea ia vai?” Papu maitai e e huru feruriraa tano ore to te feia i na reira i te parau. E no to ratou huru feruriraa tano ore, aita ratou i faaroo faahou ia Iesu. Te na ô ra te faatiaraa e: “Faarue maira te hoê pae rahi pǐpǐ a ˈna i reira ra, aita maira i pee faahou ia ˈna.” O te taatoaraa anei tei faaite i teie huru feruriraa tano ore? E ere. Te na ô atoa ra te faatiaraa e: “Ua parau maira Iesu i te ahuru ma piti ra, E haere atoa anei outou? Ua parau atura Simona Petero ia ˈna, E te Fatu, e haere tia matou ia vai ra?” Ua pahono atura Petero i ta ˈna iho uiraa: “Tei ia oe hoi te parau o te ora mure ore ra.” (Ioane 6:60, 66-68) Auê ïa huru feruriraa maitai e! Mai te peu e, i te omuaraa, mea fifi no tatou ia farii i te tahi mau tatararaa aore ra mau tauiraa no nia i te maramarama i te mau Papai, e ere anei i te mea maitai ia faaite tatou i te huru feruriraa o Petero? Mea maamaa mau â ia faaea tatou i te tavini ia Iehova aore ra ia faahapa tatou i “te hiroa parau mau” no te mea noa e mea fifi ia maramarama i te tahi mau mea i te omuaraa!—Timoteo 2, 1:13.
16. Eaha te huru feruriraa au ore roa ta te mau aratai haapaoraa ati Iuda i faaite i te tau o Iesu?
16 Aita te mau aratai haapaoraa ati Iuda i te senekele matamua i faaite i te huru feruriraa o Iesu. Ua itehia to ratou faaoti-papu-raa eiaha e faaroo ia Iesu i to Iesu faatiaraa mai ia Lazaro mai te pohe mai. No te feia e huru feruriraa tano to ratou, ua riro taua semeio ra ei haapapuraa feaa ore e mea tonohia mai Iesu e te Atua. Te taio nei râ tatou e: “Ua haaputuputu maira te mau tahuˈa rarahi ra e te mau Pharisea i te sunederi, ua na ô aˈera, Te aha nei tatou? e rave rahi hoi ta teie nei taata tapao e rave nei. I vaiiho noa ˈtu â tatou ia ˈna mai teie nei â, e hope roa te taata i te faaroo ia ˈna; e e tae mai hoi to Roma e rave i to tatou nei vahi e te fenua atoa hoi.” E nafea ratou? “E mai taua mahana mai râ ratou i te tahuˈaraa i ta ratou parau taparahi ia ˈna.” Taa ê atu i te opuaraa e taparahi ia Iesu, ua hinaaro ratou e faaore i te haapapuraa oraora e e taata faatupu semeio oia. “E tia roa aˈera ta te mau tahuˈa rarahi ra tahuˈaraa e taparahi atoa ratou ia Lazaro.” (Ioane 11:47, 48, 53; 12:9-11) Mea au ore mau â ia faaitoito tatou i te hoê â huru feruriraa e ia riri aore ra ia inoino i te mau mea e tia hoi ia tatou ia oaoa! Oia, mea atâta mau!
Te peeraa i te huru feruriraa maitai o te Mesia
17. (a) I roto i teihea mau tupuraa i faaite ai Daniela i te hoê huru feruriraa mǎtaˈu ore? (b) Nafea to Iesu faaiteraa i to ˈna mǎtaˈu ore?
17 E huru feruriraa maitai noa to te mau tavini a Iehova. I to te mau enemi o Daniela opuaraa e ia haamanahia te hoê ture o te opani i te pureraa i te tahi atua aore ra taata maoti noa râ i te arii e 30 mahana i te maoro, ua ite o Daniela e e haafifi te reira i to ˈna taairaa e te Atua ra o Iehova. E faaea anei oia i te pure i te Atua e 30 mahana i te maoro? Eita, ua tamau oia ma te mǎtaˈu ore i te pure ia Iehova e toru taime i te mahana, mai ta ˈna i matau. (Daniela 6:6-17) Aita atoa o Iesu i mǎtaˈu i to ˈna mau enemi. I te hoê Sabati, ua farerei oia i te hoê taata rima mǎrô. Ua ite o Iesu e eita te mau ati Iuda e rave rahi i reira e mauruuru ia faaora oia i te hoê taata i te Sabati. Ua ani roa ˈtura oia ia ratou ia faaite mai i to ratou manaˈo no nia i te reira. Aita ratou i farii, tera râ, ua faaora Iesu i te taata ra. (Mareko 3:1-6) Aita roa ˈtu Iesu i otohe i mua i te faatupuraa i ta ˈna ohipa faauehia, ta ˈna i manaˈo e e ohipa tano.
18. No te aha vetahi pae e patoi ai ia tatou, e nafea râ tatou i mua i to ratou huru feruriraa haaparuparu?
18 Ua taa atoa i te mau Ite no Iehova i teie mahana e eiaha roa ˈtu ratou e mǎtaˈu i te huru haaparuparu o te feia patoi. Aita anaˈe, eita ïa ratou e faaite i te huru feruriraa o Iesu. Mea rahi o te patoi ra i te mau Ite no Iehova, no te mea aita vetahi pae i ite i te mau tupuraa, e no te mea mea riri roa na vetahi atu â te mau Ite aore ra ta ratou poroi. Eiaha roa ˈtu râ tatou e vaiiho e ia haafifi to ratou huru feruriraa au ore i to tatou huru maitai. Eiaha roa ˈtu tatou e vaiiho e na vetahi ê e haapii mai nafea tatou e haamori ai.
19. Nafea tatou e nehenehe ai e faaite i te hoê huru feruriraa mai to Iesu Mesia?
19 Ua faaite noa Iesu i te hoê huru feruriraa maitai i nia i ta ˈna mau pǐpǐ e i mua i te mau faanahoraa a te Atua, noa ˈtu e mea fifi ia na reira. (Mataio 23:2, 3) E tia ia tatou ia pee i to ˈna hiˈoraa. Parau mau, mea tia ore to tatou mau taeae, o tatou atoa râ. E ihea ˈtu â tatou e ite ai i te mau hoa maitai aˈe e te haapao maitai mau maoti râ i roto i to tatou fetii taeae na te ao nei? Aitâ Iehova i horoa mai i te hoê maramarama hope roa no nia i ta ˈna Parau papaihia, tera râ, eaha te pǔpǔ haapaoraa maramarama aˈe? Ia tapea noa ïa tatou i te huru feruriraa e tano, oia hoi to Iesu Mesia. Taa ê atu i te tahi mau mea, ia ite tatou nafea ia tiai ia Iehova, o te reira ta tatou e tauaparau i roto i te tumu parau i muri nei.
[Nota i raro i te api]
^ Te faahohonu ra te buka ra Te taata rahi roa ˈˈe i ora aˈenei, neneihia e te Watchtower Bible and Tract Society of New York, Inc., i te oraraa e te taviniraa a Iesu.
E nehenehe anei outou e faataa?
• Nafea to tatou huru feruriraa e ohipa ˈi i nia i to tatou oraraa?
• A faataa i te huru feruriraa o Iesu Mesia.
• Eaha ta tatou e nehenehe e haapii na roto i te huru feruriraa o Ioba?
• Eaha te huru feruriraa e tano i mua i te patoiraa?
[Uiraa haapiiraa]
[Hohoˈa i te api 7]
E haere te hoê Kerisetiano e huru feruriraa maitai to ˈna e tauturu ia vetahi ê
[Hohoˈa i te api 9]
E tauturu mai te haapiiraa i te Parau a te Atua na roto i te pure ia pee tatou i te huru feruriraa o te Mesia