Ta tatou tufaa faufaa rahi—Eaha to ˈna auraa no outou?
Ta tatou tufaa faufaa rahi—Eaha to ˈna auraa no outou?
“A haere mai outou, e te feia i faaorahia e tau Metua, e parahi i te basileia i haapaohia no outou mai te hamaniraa mai o te [ao] nei ra.”—MATAIO 25:34; MN.
1. Eaha te tahi mau mea i noaa mai i te taata ei tufaa?
E MAU mea ta te taata atoa i horoahia mai ei tufaa. Te hoê oraraa fanaˈo paha i te pae materia ta vetahi pae tufaa. Te hoê oraraa veve ta te tahi atu. I roto i te tahi mau tupuraa, ua tutuu mai te mau ui tahito i te riri rahi uˈana i te opu taata ěê, no ta ratou i ite aore ra i faaroo. Tera râ, hoê â to tatou paatoa tupuraa. Ua raea tatou paatoa i te hara a te taata matamua ra o Adamu. Te faahopearaa o taua tufaa ra, o te pohe ïa.—Koheleta 9:2, 10; Roma 5:12.
2, 3. Eaha te tufaa ta Iehova i faanaho no te huaai o Adamu raua o Eva i te omuaraa, e no te aha ratou i ore ai e fanaˈo i te reira?
2 I te matamua ra, ua pûpû Iehova, ei Metua i te raˈi î i te here, i te hoê tufaa taa ê roa na te huitaata—te ora mure ore ma te tia roa i roto i te Paradaiso. Ua horoahia te hoê haamataraa tia roa e te hara ore i to tatou nau metua matamua, o Adamu raua o Eva. Ua horoa te Atua ra o Iehova i te palaneta ra Fenua na te huitaata ei ô. (Salamo 115:16) Ua faanaho oia i te ô i Edene ra ei hohoˈa o te huru o te fenua taatoa a muri aˈe e ua faaue oia i to tatou nau metua matamua e rave i te hoê ohipa faahiahia e te anaanatae roa. E tia ia raua ia fanau i te tamarii, ia aupuru i te fenua e te mau raau tupu e te mau animala huru rau atoa, e ia faaaano i te mau otia o te Paradaiso e ati noa ˈˈe te fenua. (Genese 1:28; 2:8, 9, 15) E rave atoa to raua huaai i teie ohipa. E tufaa faahiahia mau â ïa teie e nehenehe e tutuuhia ˈtu na ratou!
3 No te oaoa râ i teie ohipa atoa, e tia ia Adamu, ia Eva e i to raua huaai ia faatupu i te hoê taairaa maitai e te Atua. E tia ia ratou ia here e ia auraro ia Iehova, tera râ, aita Adamu e o Eva i mauruuru i ta te Atua i tuu mai na raua e i faaroo i ta ˈna faaueraa. Ua ere raua i to raua oraraa paradaiso e te mau ravea faahiahia ta te Atua i haapao no raua. No reira, aita raua i nehenehe e tutuu atu i te reira na to raua huaai.—Genese 2:16, 17; 3:1-24.
4. Nafea e noaa mai ai ia tatou te tufaa i erehia e Adamu?
4 Ma te aroha, ua rave Iehova i te faanahoraa ia nehenehe te huaai o Adamu raua o Eva e fanaˈo i te tufaa tei erehia e Adamu. Nafea? I te taime i faataahia e te Atua, ua pûpû ta ˈna iho Tamaiti, o Iesu Mesia, i to ˈna ora taata tia roa no te huaai o Adamu. Na roto i teie ravea i hoo mai ai te Mesia ia ratou paatoa. Tera râ, eita ratou e fanaˈo taue noa i te tufaa. E tia ia ratou ia tia ˈtu ma te fariihia i mua i te Atua, ma te faaohipa i te faaroo i te faufaa taraehara o te tusia a Iesu e ma te faaite i taua faaroo ra na roto i te auraroraa. (Ioane 3:16, 36; Timoteo 1, 2:5, 6; Hebera 2:9; 5:9) Te faaite ra anei to outou huru oraraa i te mauruuru i taua faanahoraa ra?
Te hoê tufaa i tutuuhia mai na roto ia Aberahama
5. Nafea to Aberahama faaiteraa i te mauruuru no to ˈna taairaa e o Iehova?
5 A faatupu ai oia i ta ˈna opuaraa no te fenua, ua faaite Iehova i te hoê huru taa ê i nia ia Aberahama. Ua faaue oia i taua taata haapao maitai ra e faarue i to ˈna fenua e e haere i te hoê fenua ta te Atua iho e faaite ia ˈna. Ua faaroo o Aberahama ma te hinaaro mau. I to Aberahama taeraa ˈtu i reira, ua parau Iehova e e horoa oia i te fenua ei tufaa na te huaai o Aberahama, eiaha na Aberahama iho. (Genese 12:1, 2, 7) Eaha te huru o Aberahama? Ua ineine oia i te tavini ia Iehova i te mau vahi e ia au i te mau ravea atoa ta te Atua i faataa ia nehenehe to ˈna huaai e fanaˈo i ta ratou tufaa. Ua tavini Aberahama ia Iehova i nia i te hoê fenua e ere no ˈna 100 matahiti i te maoro, e tae roa ˈtu i to ˈna poheraa. (Genese 12:4; 25:8-10) E na reira anei outou? Ua parau Iehova e e “hoa” Aberahama no ˈna.—Isaia 41:8.
6. (a) Eaha ta Aberahama i faaite na roto i to ˈna ineineraa i te pûpû i ta ˈna tamaiti ei tusia? (b) Eaha te tufaa faufaa rahi ta Aberahama e nehenehe e tutuu atu na to ˈna huaai?
6 Ua tiai o Aberahama i te hoê tamaiti, o Isaaka, ta ˈna i here rahi e rave rahi matahiti i te maoro. I te paariraa mai te tamaroa ei taata apî, ua faaue Iehova ia Aberahama e rave i te tamaroa e e pûpû ia ˈna ei tusia. Aita Aberahama i ite e te haere ra oia e faahohoˈa i ta te Atua iho e rave, oia hoi te horoaraa i ta ˈna Tamaiti ei hoo; tera râ, ua faaroo oia e te haamata ra oia i te pûpû ia Isaaka ei tusia, a tapea mai ai te melahi a Iehova ia ˈna. (Genese 22:9-14) Ua parau aˈena Iehova e e tupu ta ˈna mau parau i tǎpǔ ia Aberahama na roto ia Isaaka. No reira Aberahama i tiaturi papu ai e, ia titauhia ra, e nehenehe ta te Atua e faatia mai ia Isaaka mai te pohe mai, noa ˈtu e aita roa ˈtu te reira i tupu aˈenei. (Genese 17:15-18; Hebera 11:17-19) No te mea e aita Aberahama i patoi i te horoa i ta ˈna iho tamaiti, ua parau Iehova e: “E maitai te mau fenua atoa o te ao nei i to oe na huaai.” (Genese 22:15-18) E tapao faaite ïa e e fa mai te Huero o te Genese 3:15, te Mesia faaora, i roto i te huaai o Aberahama. E tufaa faufaa rahi mau â teie e tutuu atu!
7. Nafea to Aberahama, Isaaka, e Iakoba faaiteraa i te mauruuru no ta ratou tufaa?
7 Aita Aberahama i ite i te auraa o te ohipa ta Iehova e rave ra i taua taime ra; aita atoa ta ˈna tamaiti o Isaaka e ta ˈna mootua o Iakoba, o tei riro mai ei ‘taata aiˈa e oia atoa i tei parauhia maira.’ Tera râ, ua tiaturi ratou paatoa ia Iehova. Aita ratou i hinaaro i te hoê noa ˈˈe o te mau oire basileia o te fenua no te mea te tiai ra ratou i te hoê mea maitai aˈe—‘te oire niu mau, o te Atua te faaau e te faatia.’ (Hebera 11:8-10, 13-16) Tera râ, e ere o te taatoaraa o te huaai o Aberahama tei taa ia ratou te faufaa rahi o te tufaa e vai ra na roto ia Aberahama.
Vetahi pae o tei haafaufaa ore i te tufaa
8. Nafea to Esau faaiteraa e aita oia i haafaufaa i ta ˈna tufaa?
8 Aita o Esau, te tamaiti matahiapo a Isaaka, i haafaufaa i ta ˈna tufaa matahiapo. Aita oia i mauruuru i te mau mea moˈa. No reira, i te hoê mahana, ua hoo oia i ta ˈna tufaa matahiapo na to ˈna taeae o Iakoba no to ˈna pohe poia. Ei tauiraa i te aha? Ei tauiraa ïa i te pane e te pipi tunu! (Genese 25:29-34; Hebera 12:14-17) Te nunaa o te riro ei ravea e tupu ai te mau parau ta te Atua i tǎpǔ ia Aberahama, no roto mai ïa ia Iakoba, ta te Atua i taui i te iˈoa ia Iseraela. Eaha te mau ravea ta taua tufaa taa ê mau ra i horoa na ratou?
9. No ta ratou tufaa pae varua, eaha te faaoraraa ta te huaai o Iakoba, aore ra Iseraela, i fanaˈo?
9 I te hoê tau oˈe, ua haere o Iakoba e to ˈna utuafare e faaea i Aiphiti. I reira, ua rahi roa mai ratou, tera râ, ua riro atoa ratou ei tîtî. Aita râ Iehova i haamoe i ta ˈna faufaa i faaau ia Aberahama. I te taime i faataahia e te Atua, ua faaora oia i te mau tamarii a Iseraela i te faatîtîraa e ua faaara oia ia ratou e te afai ra oia ia ratou i te hoê “fenua e pihaa noa mai te û e te meli,” te fenua ta ˈna i tǎpǔ ia Aberahama.—Exodo 3:7, 8; Genese 15:18-21.
10. I te mouˈa Sinai, eaha ˈtu â te mau ohipa faahiahia roa i tupu no nia i te tufaa a te mau tamarii a Iseraela?
10 A haere ai te mau tamarii a Iseraela i te Fenua Tǎpǔhia, ua haaputuputu Iehova ia ratou i te mouˈa Sinai. I reira, ua na ô oia ia ratou e: “Ia faaroo mau mai outou i tau reo, e ia haapao maite i ta ˈu ra faufaa, e riro ïa outou ei taoˈa here rahi na ˈu i te mau taata atoa ra. No ˈu noa iho hoi to te ao atoa nei. E riro â outou ei basileia tahuˈa anaˈe na ˈu, ei nunaa moˈa.” (Exodo 19:5, 6) I muri aˈe i to te nunaa parau-tahi-raa ma te hinaaro mau e e na reira ratou, ua horoa ˈtura Iehova i ta ˈna Ture ia ratou ra—aita oia i na reira i te tahi atu nunaa.—Salamo 147:19, 20.
11. Eaha vetahi mau mea faufaa rahi i roto i te tufaa pae varua a te mau tamarii a Iseraela?
11 E tufaa pae varua mau â ta taua nunaa apî ra i fanaˈo! Ua haamori ratou i te Atua mau hoê ra. Ua faaorahia mai ratou e ana i Aiphiti e ua ite mata roa ratou i te tahi mau ohipa riaria i tupu i te horoaraahia mai te Ture i te mouˈa Sinai. Ua ruperupe â ta ratou tufaa a fanaˈo ai ratou i te tahi atu â mau “parau” moˈa “a te Atua” na roto i te mau peropheta. (Roma 3:1, 2) Ua parauhia ratou e Iehova to ˈna mau ite. (Isaia 43:10-12) E tia i te Huero Mesia ia fa mai i roto i to ratou nunaa. Na te Ture, o tei huti i te ara-maite-raa i nia ia ˈna, e faaite mai o vai o ˈna, e e tia i te reira ia tauturu ia taa ia ratou e e hinaaro mau â ratou ia ˈna. (Galatia 3:19, 24) Hau atu â, e horoahia te ravea na ratou e ohipa amui e te Huero Mesia ei basileia tahuˈa e ei nunaa moˈa.—Roma 9:4, 5.
12. Noa ˈtu e ua tae ratou i te Fenua Tǎpǔhia, eaha ta te mau ati Iseraela i ore i ite? No te aha?
12 Ia au i ta ˈna i fafau, ua aratai Iehova i te mau tamarii a Iseraela i te Fenua Tǎpǔhia. Mai ta te aposetolo Paulo râ i faataa i muri aˈe, aita taua fenua ra i riro ei vahi “faaearaa” mau no to ratou faaroo ore. Aita ratou, ei nunaa, i ô i roto i “te faaearaa o te Atua” no te mea aita i taa ia ratou e aita ratou i ohipa ia au i te fa o te mahana faaearaa a te Atua iho, o tei haamata i muri aˈe i te poieteraahia o Adamu e o Eva.—Hebera 4:3-10.
13. No to ratou mauruuru ore i ta ratou tufaa pae varua, eaha ta te nunaa Iseraela i haapae?
13 E nehenehe hoi te Iseraela pae tino e horoa i te numera tia o te feia e apiti e te Mesia i roto i to ˈna Basileia i nia i te raˈi ei basileia tahuˈa e ei nunaa moˈa. Aita râ ratou i mauruuru i ta ratou tufaa faufaa rahi. O te hoê noa toea o te mau ati Iseraela pae tino tei farii i te Mesia i to ˈna haereraa mai. I te pae hopea, hoê anaˈe numera iti tei ô i roto i te basileia tahuˈa i tohuhia. Ua hopoi-ê-hia te Basileia ia Iseraela pae tino e ua “tuuhia ˈtu i te nunaa e faahotu mai i te huero ra.” (Mataio 21:43) O vai tera nunaa?
Te hoê tufaa i nia i te raˈi
14, 15. (a) I muri aˈe i te poheraa o Iesu, nafea to te mau nunaa haamataraa i te haamaitaihia maoti te “huero” o Aberahama? (b) Eaha te tufaa e noaa mai i te mau melo o ‘te Iseraela a te Atua’?
14 Te nunaa i tuuhia ˈtu te Basileia, o ‘te Iseraela a te Atua’ ïa, te Iseraela pae varua, oia hoi na 144 000 pǐpǐ faatavaihia i te varua a Iesu Mesia. (Galatia 6:16; Apokalupo 5:9, 10; 14:1-3) E mau ati Iuda pae tino vetahi pae o taua na melo 144 000 ra, area te rahiraa ra, no roto mai ïa i te mau nunaa Etene. Mea na reira te tǎpǔ a Iehova ia Aberahama, e maitai te mau nunaa atoa i to ˈna “huero,” i te haamataraa i te tupu. (Ohipa 3:25, 26, MN; Galatia 3:8, 9) I taua tupuraa matamua ra, ua faatavaihia te mau taata o te mau nunaa i te varua moˈa e ua faariro te Atua ra o Iehova ia ratou ei mau tamaiti pae varua, ei mau taeae no Iesu Mesia. No reira ratou atoa i riro ai ei tuhaa piti o taua “huaai” ra.—Galatia 3:28, 29.
15 Hou to ˈna poheraa, ua faaau Iesu i te faufaa apî, o te haamanahia maoti to ˈna iho toto, e te mau ati Iuda o te riro mai ei melo o taua nunaa apî ra. I nia i te niu o to ratou faaroo i taua tusia ra o te haamana, e riro taua mau taata ra o tei faaôhia i roto i taua faufaa ra ei mea ‘tia roa e a muri noa ˈtu.’ (Hebera 10:14-18) E nehenehe ratou e “tiahia” e ta ratou mau hara e faaorehia. (Korinetia 1, 6:11) I roto ïa i teie auraa e riro ai ratou mai ia Adamu hou oia a hara ˈi. Tera râ, eita ratou e ora i nia i te hoê fenua paradaiso. Ua parau Iesu e te haere ra oia e faaineine i te hoê parahiraa no ratou i nia i te raˈi. (Ioane 14:2, 3) E vaiiho ratou i ta ratou mau ravea i te fenua nei no te fanaˈo i te hoê ‘tufaa i vaiihohia no ratou i nia i te raˈi.’ (Petero 1, 1:4) Eaha ta ratou ohipa i ǒ? Ua faataa Iesu e: “E fafau vau i te hoê faufaa ia outou . . . no te hoê basileia.”—Luka 22:29, MN.
16. Eaha te tuhaa taviniraa faahiahia e tiai maira i te mau Kerisetiano faatavaihia?
16 Mai nia mai i te raˈi, e tauturu te feia o te faatere e te Mesia, ei hiˈoraa, i te tamâ roa i te fenua i te mau tapao atoa o te orureraa i te mana arii o Iehova. (Apokalupo 2:26, 27) Ei tuhaa piti o te huaai pae varua o Aberahama, e horoa atoa mai ratou i te haamaitairaa o te hoê oraraa tia roa na te taata o te mau nunaa atoa. (Roma 8:17-21) E tufaa faufaa rahi mau â ta ratou!—Ephesia 1:16-18.
17. Eaha te tahi mau tuhaa o ta ratou tufaa ta te mau Kerisetiano faatavaihia e fanaˈo a vai noa ˈi ratou i te fenua nei?
17 Tera râ, e ere noa te tufaa a te mau pǐpǐ faatavaihia a Iesu to a muri aˈe. Ma te hoê ravea e ore e noaa i te tahi atu taata, ua tauturu Iesu ia ratou ia ite no nia ia Iehova, te Atua mau hoê. (Mataio 11:27; Ioane 17:3, 26) Na roto i te parau e te hiˈoraa, ua haapii oia ia ratou eaha te auraa e ‘tiaturi ia Iehova’ e e auraro atu ia ˈna. (Hebera 2:13; 5:7-9) Ua tuu atu Iesu i te ite i te parau mau no nia i te opuaraa a te Atua, ia ratou ra e ua haapapu atu e na te varua moˈa e haamaramarama ˈtu â ia ratou no nia i te reira. (Ioane 14:24-26) Ua faaô maitai oia i te faufaaraa o te Basileia o te Atua i roto i to ratou feruriraa e to ratou mafatu. (Mataio 6:10, 33) Ua horoa atoa Iesu na ratou te hopoia e poro e e faariro i te taata ei pǐpǐ i Ierusalema, Iudea, Samaria, e tae noa ˈtu i te hopea o te fenua.—Mataio 24:14; 28:19, 20; Ohipa 1:8.
Te hoê tufaa faufaa rahi no te hoê nahoa rahi
18. Nafea te tǎpǔ a Iehova e e maitai te mau nunaa atoa i te “huero” o Aberahama e tupu ai i teie mahana?
18 Eita e ore e ua faataahia te numera tia o te Iseraela pae varua, taua “nǎnǎ iti” o te feia aiˈa o te Basileia ra. (Luka 12:32) Tau ahuru matahiti i teie nei, ua huti Iehova i te ara-maite-raa i nia i te haaputuputuraa o te hoê nahoa taata ê atu no te mau nunaa atoa. No reira, te tupu ra te tǎpǔ a Iehova ia Aberahama e e maitai te mau nunaa atoa i to ˈna “huero,” i nia i te hoê faito rahi. Ma te oaoa, te pûpû atoa ra teie feia haamaitaihia i te hoê taviniraa moˈa na Iehova e ua taa ia ratou e tei te faaroo i te Arenio a te Atua, o Iesu Mesia, e ora ˈi ratou. (Apokalupo 7:9, 10) Ua farii anei outou i te titau-manihini-raa hamani maitai a Iehova e apiti atu i taua pǔpǔ taata oaoa ra?
19. Eaha te tufaa ta te feia o te mau nunaa e haamaitaihia ra i teie nei, e tiai ra?
19 Eaha te tufaa faufaa rahi ta Iehova e horoa na te feia e ere i to te nǎnǎ iti? E ere i te hoê tufaa i nia i te raˈi. O te tufaa râ ta Adamu, ahiri e aita oia i taiva, i nehenehe e tutuu atu na to ˈna huaai—te ravea o te ora mure ore ma te tia roa i roto i te hoê paradaiso o te aano mǎrû noa e ati noa ˈˈe te fenua. E riro ei ao “e ore roa te pohe, e te oto, e te mihi, e te mauiui.” (Apokalupo 21:4) No reira, no outou teie faahitiraa a te Parau faauruahia a te Atua e: “E tiaturi ia Iehova, a rave ai i te parau maitai; e parahi oe i te fenua i reira, e amu i te maa ma te hauti-ore-hia mai. E haapopou atu hoi oe ia Iehova, e na ˈna e horoa mai i ta to aau e hinaaro ra. No parahirahi aˈe te paieti ore, e aita ra . . . Area te feia mǎrû ra, e parahi ïa i te fenua, e oaoa ratou i te rahi o te hau ra. E parahi te feia parau-tia i nia i te fenua, e parahi tamau â ratou i reira.”—Salamo 37:3, 4, 10, 11, 29.
20. Nafea te mau “mamoe ê atu” e fanaˈo ai i te pae rahi o te tufaa pae varua a te mau Kerisetiano faatavaihia?
20 E tufaa ta te mau “mamoe ê atu” a Iesu i nia i te fenua o te faaterehia e te Basileia i nia i te raˈi. (Ioane 10:16a) Noa ˈtu e eita ratou e haere i nia i te raˈi, te tutuuhia ra te pae rahi o te tufaa pae varua i fanaˈohia e te feia faatavaihia, na ratou. Mea na roto i te tino amui o te feia faatavaihia, “te tavini haapao maitai e te paari,” i maramarama ˈi te mau mamoe ê atu i te mau tǎpǔ faufaa rahi i roto i te Parau a te Atua. (Mataio 24:45-47; 25:34) Ua ite amui te feia faatavaihia e te mau mamoe ê atu o vai te Atua mau hoê ra o Iehova, e te haamori ra ratou ia ˈna. (Ioane 17:20, 21) Te haamauruuru amui ra ratou i te Atua no te faufaa taraehara o te tusia a Iesu. Te tavini amui ra ratou ei hoê aˈe nǎnǎ i raro aˈe hoê Tiai, o Iesu Mesia. (Ioane 10:16b) E melo anaˈe ratou no te hoê fetii taeae î i te here na te ao nei. Te fanaˈo amui nei ratou i te riroraa ei Ite no Iehova e no to ˈna Basileia. Oia, e tavini pûpûhia e te bapetizohia a Iehova anei outou, tei roto teie mau mea atoa i ta outou tufaa pae varua.
21, 22. Nafea tatou paatoa e nehenehe ai e faaite e te haafaufaa nei tatou i ta tatou tufaa pae varua?
21 Eaha te faufaa rahi o teie tufaa pae varua no outou? Te haafaufaa maitai ra anei outou i te reira no te faariro i te raveraa i te hinaaro o te Atua ei ohipa faufaa roa ˈˈe i roto i to outou oraraa? Ei haapapuraa i te reira, te pee ra anei outou i te aˈoraa o ta ˈna Parau e a ta ˈna faanahonahoraa e haere tamau i te mau putuputuraa atoa a te amuiraa Kerisetiano? (Hebera 10:24, 25) Mea faufaa roa anei taua tufaa ra no outou e tamau noa ˈi outou i te tavini i te Atua noa ˈtu te mau fifi? Mea hohonu mau anei to outou mauruuru i te reira e puai mai ai outou i te patoi i te mau huru tamataraa atoa e pee i te hoê haerea o te aratai paha ia tatou ia haapae i taua faufaa ra?
22 Ia aupuru ïa tatou paatoa i te tufaa pae varua ta te Atua i tutuu mai na tatou. A tiatonu maite noa ˈi tatou i te Paradaiso i mua nei, e rave faahope anaˈe i te mau fanaˈoraa taa ê i te pae varua ta Iehova e horoa maira na tatou i teie nei. Ma te niu mau i to tatou oraraa i nia i to tatou taairaa e o Iehova, te haapapu ra ïa tatou e mea faufaa mau â ta tatou tufaa ta te Atua i tutuu mai, no tatou. Ia parau atoa ïa tatou e: “E faateitei â vau ia oe, e tau Atua, e te Arii; e haamaitai â vau i to oe ra iˈoa e a muri noa ˈtu.”—Salamo 145:1.
Nafea outou ia faataa?
• Ahiri e aita o Adamu i taiva i te Atua, eaha te tufaa ta ˈna e tutuu mai na tatou?
• Ua nafea te huaai o Aberahama i te tufaa e vai ra no ratou?
• Eaha to roto i te tufaa a te mau pǐpǐ faatavaihia a te Mesia?
• Eaha te tufaa a te nahoa rahi, e nafea ratou e nehenehe ai e faaite e te mauruuru mau nei ratou i te reira?
[Uiraa haapiiraa]
[Hohoˈa i te api 20]
Ua fanaˈo te huaai o Aberahama i te tǎpǔ o te hoê tufaa faufaa rahi
[Hohoˈa i te api 23]
Te mauruuru ra anei outou i ta outou tufaa pae varua?