Ua matau anei outou i te tiai?

E NEHENEHE anei ta outou e feruri ehia rahiraa taime ta te taata e rave ra i te mau matahiti atoa no te tiai? E tiai ratou i roto i te anairaa taata i te fare toa aore ra i te titoraa mori. E tiai ratou ia afaihia mai ta ratou maa i te fare tamaaraa. E tiai ratou i te taote aore ra i te taote niho. E tiai ratou i te pereoo mataeinaa aore ra i te pereoo auahi. Oia, e rahiraa taime maere i roto i te oraraa o te hoê taata o te haamâuˈahia no te tiai ia tupu te tahi mau mea. Ia au i te hoê manaˈo, e pau i to Helemani anaˈe e 4,7 miria hora i te matahiti hoê no te tiai noa ua apǐ anaˈe te purumu i te pereoo! Ua numera te hoê taata e e au te reira i te faito roa taatoa o te oraraa o na taata fatata e 7 000.

E nehenehe te ohipa tiai e riro ei mea fiu mau. I teie nei tau, e au ra e aita e navai nei te taime no te rave i te mau mea atoa, e ia feruri tatou i te tahi atu mau mea e tia ia tatou ia rave, e riro te ohipa tiai ei tamataraa mau. Ua parau te papai buka o Alexander Rose i te hoê mahana e: “Te afaraa o te mau fifi o te oraraa, o te ohipa tiai ïa.”

Ua faˈi atoa te tia hau Marite o Benjamin Franklin e e nehenehe atoa te moni e pau i te ohipa tiai. Ua hau atu i te 250 matahiti aˈenei, ua parau oia e: “E moni te taime.” No reira te feia tapihoo e imi ai i te ravea eiaha ia mâuˈa noa te taime i roto i te mau raveraa ohipa. Ia rahi atu â te taoˈa e oti mai i roto i te taime iti aˈe, e rahi atoa ˈtu ïa te apî. E tamata te feia tapihoo o te ohipa tia ˈtu e te taata i te pûpû i te ohipa vitiviti—maa oti noa, ohipa fare moni mea faahoro roa ˈtu te pereoo, e mai te reira te huru—no te mea ua ite ratou e no te faaoaoa i te aimamau, e tia atoa ia haapoto i te taime tiairaa.

Te haamâuˈaraa i to tatou oraraa

Ua autâ atoa te rohipehe Marite no te senekele 19 o Ralph Waldo Emerson i te hoê mahana e: “Ehia rahiraa o te oraraa taata e mâuˈa i roto i te ohipa tiai!” E huru fatata aˈe mai, ua autâ te papai buka o Lance Morrow no nia i te huru haumani e  te au ore i te pae tino o te ohipa tiai. I muri iho râ, ua parau oia no “te ati itea ore o te ohipa tiai.” Eaha ïa tera? “Te iteraa ïa e te eiâhia ra, te moe roa ˈtu ra e eita e noaa faahou mai te taoˈa faahiahia roa ˈˈe a te taata, te taime, te hoê tuhaa o to ˈna oraraa.” E parau peapea tera, e parau mau râ. Ua moe roa ino te taime i moe i te ohipa tiai.

Parau mau, ahiri e e ere te oraraa i te mea poto, e iti ïa te haapeapearaa no te ohipa tiai. Mea poto râ te oraraa. Ahia tausani matahiti aˈenei, ua parau te papai salamo o te Bibilia e: “To matou pue mahana i te oraraa nei e hitu ïa ahuru i te matahiti, e ia tae i te vau i te ahuru i te matahiti i te etaeta, e riro râ taua etaeta ra ei rohirohi e ei taiâraa: e ore hoi e mahia motu ê atura, maue atura matou!” (Salamo 90:10) Aita e hiˈoraa ihea tatou e noho ai e o vai tatou, mea taotiahia to tatou oraraa, te mau mahana, te mau hora, te mau minuti e vai ra i mua ia tatou i to tatou fanauraa. Teie râ, eita ta tatou e nehenehe e ape i te tahi mau tupuraa e titauhia ia haamâuˈa tatou maa taime faufaa no te tiai i te tahi mea ia tupu aore ra i te taata.

Te haapiiraa i te tiai

Ua parahi aˈena te rahiraa o tatou i roto i te hoê pereoo e te hoê taata faahoro o te tamau noa i te faahemo i te pereoo e vai ra i mua ia ˈna. Mea pinepine, aita e ohipa ru—aita ta te taata faahoro e farereiraa ru. Teie râ, eita ta ˈna e nehenehe e faaoromai e na te tahi atu taata faahoro e taotia i to ˈna tere. Te faaite ra to ˈna ereraa i te faaoromai e aita oia i haapii i te tiai. Haapii? Oia, te iteraa i te tiai, o te hoê ïa mea e tia ia haapiihia. Aita te reira i to tatou fanauraa ra. E titau te mau aiû ia haapao-oioi-hia mai ratou ia poia aore ra ia au ore ratou. Ia paari noa mai ratou i reira e taa ˈi ia ratou e i te tahi mau taime, e tia ia ratou ia tiai i ta ratou e hinaaro ra. Inaha, i te mea e eita e nehenehe e ape i te ohipa tiai i roto i te oraraa, e tapao ïa o te paari te iteraa i te tiai ma te faaoromai ia titauhia ra.

Parau mau, te vai ra te mau tupuraa ru e taahia ia ore te hoê e faaoromai i te tiai. E tano iho â ia ore te hoê tane apî o te faahoro ru ra i ta ˈna vahine i te fare maˈi no te mea fatata roa oia i te fanau i to raua pêpe apî, e faaoromai i te tiai. Aita te mau melahi e turai ra ia Lota ia faarue ia Sodoma i faaineinehia no te tiai a faataere ai Lota. Te fatata roa maira te haamouraa, e te fifihia ra te ora o Lota e o to ˈna utuafare. (Genese 19:15, 16) I te rahiraa râ o te mau taime, aita te ora e haafifihia ra ia titauhia te taata e tiai. I taua mau taime ra, mea au roa ˈtu ïa ahiri e ua haapii te taata atoa i te faaoromai—noa ˈtu e no te aravihi ore aore ra te anaanatae ore o te hoê taata i titauhia ˈi e tiai. Hau atu â, mea ohie aˈe ia faaoromai ahiri e ua haapii te taata atoa nafea ia faaohipa ma te faufaa i te taime haamâuˈahia no te tiai. Te vai ra te tahi mau manaˈo tauturu eiaha noa no te faaoromai i te tiairaa, no te haafaufaa atoa râ i te reira i roto i te tumu parau tarenihia i te api 5.

Eiaha e haamoehia e e faaite te faaoromai ore i te hoê haerea teoteo, te hoê manaˈo hohonu e mea faahiahia roa te hoê eiaha oia ia faatiaihia. No te taata atoa o te reira to ˈna haerea, e tia ia ˈna ia haafaufaa i teie mau parau o te Bibilia: “E mea maitai te taata aau faaoromai i te taata aau faateitei ra.” (Koheleta 7:8) E huru taata ino mau te faateitei, aore ra teoteo, e te na ô ra te maseli o te Bibilia e: “Te riaria ra Iehova i te feia atoa i teoteo te aau ra.” (Maseli 16:5) No te haapii i te faaoromai—no te haapii i te tiai—e titauhia ïa ia hiˈopoa maitai tatou ia tatou iho e to tatou mau taairaa e te taata e haaati ra ia tatou.

E haamaitaihia te faaoromai

E ohie aˈe iho â ia tatou e tiai ua papu anaˈe ia tatou e te tiai ra tatou i te hoê mea mea faufaa ia tiaihia e o te tae mau mai i te pae hopea. I te reira pae, mea maitai ia feruri i te mea e te tiai ra te feia haamori haavare ore atoa a te Atua i te tupuraa o ta ˈna mau tǎpǔ faahiahia e vai ra i roto i te Bibilia. Ei hiˈoraa, te parauhia maira i roto i te hoê salamo faauruahia e te Atua e: “E parahi te feia parau-tia i nia i te fenua, e parahi tamau â ratou i reira.” Ua tapitihia teie tǎpǔ e te aposetolo Ioane i to ˈna parauraa e: “O tei haapao râ i to te Atua ra hinaaro, e tia ïa i te oraraa e a muri noa ˈtu.” (Salamo 37:29; Ioane 1, 2:17) Papu maitai, mai te peu e e nehenehe tatou e ora e a muri noa ˈtu, eita te ohipa tiai e riro ei fifi rahi. Aita râ tatou e ora ra e a muri noa ˈtu i teie nei iho â. Mea tano anei ia tauaparau no nia i te ora mure ore?

Hou e pahono atu ai, e feruri anaˈe e ua poiete te Atua i to tatou na metua matamua ma te tiaturiraa  e ora e a muri noa ˈtu. No te mea noa e ua hara raua i ere ai raua i taua tiaturiraa ra no raua iho e no to raua mau tamarii—e no tatou atoa nei. I muri noa mai râ i to raua hararaa, ua faaite te Atua i ta ˈna opuaraa e faaore i te mau faahopearaa o to raua faaroo ore. Ua tǎpǔ oia i te haerea mai o te hoê “huero,” o tei riro e o Iesu Mesia.—Genese 3:15, MN; Roma 5:18.

E faufaahia anei tatou ei taata taitahi i te tupuraa o ta ˈna mau tǎpǔ, na tatou iho ïa e faaoti. E titauhia te faaoromai ia ravehia te reira. No te tauturu mai ia tatou ia haapii i taua huru faaoromai ra, te faaitoito maira te Bibilia ia tatou ia feruriruri i nia i te hiˈoraa o te hoê taata faaapu. E ueue oia i ta ˈna mau huero e aita ˈtu e ravea ta ˈna i te tiairaa ma te faaoromai—a rave ai i ta ˈna e nehenehe no te paruru i ta ˈna faaapu—e tae roa i te taime auhuneraa. I reira to ˈna faaoromai e haamaitaihia ˈi, e e ite ai oia i te hotu o ta ˈna ohipa. (Iakobo 5:7) Ua faahiti te aposetolo Paulo i te tahi atu hiˈoraa o te faaoromai. Te haamanaˈo maira oia i te mau tane e te mau vahine haapao maitai no tahito ra. Ua tiai ru ratou i te tupuraa o te mau opuaraa a te Atua, ua titauhia râ ratou ia tiai i te tau faataahia e te Atua. Te faaitoito maira Paulo ia tatou ia pee ia ratou, “te feia i noaa tei parauhia maira i te faaroo e te faaoromai.”—Hebera 6:11, 12.

Oia, eita e noaa i te ape i te ohipa tiai i roto i te oraraa. Eiaha râ te reira e riro tamau noa ei ohipa ahoaho. No te feia e tiai ra i te tupuraa o te mau tǎpǔ a te Atua, e nehenehe te reira e riro ei oaoaraa. E nehenehe ta ratou e faaohipa maitai i te taime e mâuˈa i te ohipa tiai no te faahotu i te taairaa piri e te Atua e no te rave i te mau ohipa o te faaite i to ratou faaroo. E na roto i te pure, te haapiiraa, te feruriruriraa, e nehenehe ratou e faahotu i te tiaturi aueue ore i te mau mea atoa ta te Atua i tǎpǔ e e tupu i te taime au.

[Tumu parau tarenihia/Hohoˈa i te api 5]

A FAAITI MAI I TE ROHIROHI O TE OHIPA TIAI!

A tabula aˈena i te ohipa! Ua ite anaˈe outou e e titauhia outou ia tiai, a faaineine i te taioraa, te papairaa, te niraraa, aore ra te raveraa i te tahi atu ohipa faufaa.

A faaohipa i te taime no te feruriruri, te hoê mea o te fifi noa ˈtura i roto i teie ao e tere oioi noa ra.

A vaiiho i te tahi taioraa i pihai i te niuniu paraparau ta outou e rave ia faatiaihia outou; i roto e pae aore ra hoê ahuru minuti, e nehenehe ta outou e taio tau api.

Ia tiai outou i roto i te hoê pǔpǔ taata, a faaohipa i te taime, mai te peu e e nehenehe, no te haamata i te aparauraa e vetahi ê e te horoa ˈtu i te mau manaˈo o te patu.

A vaiiho i te hoê buka tapaopaoraa aore ra te tahi taioraa i roto i to outou pereoo no te mau taime tiairaa manaˈo-ore-hia.

A tapiri i to outou mata, a faatoaru, aore ra a pure.

TE TIAIRAA O TE MANUÏA, TEI TE HURU FERURIRAA ÏA E TE FAANAHO-AˈENA-RAA.