No te feia tatou i noaa te faaroo

Te faaiteraa i te Basileia o te Atua i te mau motu no Fiti

UA FAAHITI o Iesu Mesia e piti eˈa i te hoê taime. Mea aano te hoê e tae atu ai i te pohe. Mea piri te tahi atu e tae atu ai i te ora. (Mataio 7:13, 14) Ia nehenehe te taata e maiti i te eˈa maitai, ua opua te Atua ra o Iehova e ia porohia te parau apî maitai o te Basileia na te ao atoa nei. (Mataio 24:14) No reira, te faaroo ra te taata i te mau vahi atoa i te poroi o te Basileia, e te maiti ra vetahi pae i te ora na roto i te riroraa mai ei ‘feia i noaa te faaroo, e ora ˈtu ai te [nephe].’ (Hebera 10:39; MN) Te ani atu nei matou ia outou ia taio nafea to vetahi pae maitiraa i te ora i Fiti e vetahi ê atu i te mau motu tapiri no Patitifa Apatoa.

Ua tiaturi ratou ia Iehova

Te haere noa râ o Mere i te haapiiraa a faaroo ai oia no te taime matamua i te poroi o te Basileia i te matahiti 1964 ra. No te atea o to ˈna motu, mea varavara oia i te farerei i te mau Ite no Iehova. I te pae hopea râ, ua noaa ia ˈna te hoê ite mau i te Bibilia. I taua tau ra, mea faaipoipo oia i te hoê taata e raatira pǔpǔ taata oia i to ˈna oire iti. No to Mere maitiraa e faaohipa i te mau faaueraa tumu Bibilia, ua rave ino roa ta ˈna tane e to ˈna fetii ia ˈna e aita te feia o te oire iti i tâuˈa ia ˈna. Noa ˈtu râ, ua bapetizohia oia i te matahiti 1991.

I muri iti noa ˈˈe, ua taui te huru o Josua, te tane a Mere, e ua apiti atoa mai oia i roto i te mau aparauraa Bibilia a Mere e ta raua mau tamarii. Ua faaea o Josua i te haere i te Ekalesia Méthodiste. Ei raatira râ, ua peretiteni noâ oia i te mau apooraa a te oire iti i te mau hebedoma atoa. No te feia o te oire iti, ua taiva o Josua, no te mea mea faufaa roa te Ekalesia Méthodiste i roto i te oraraa o te oire iti no Fiti. No reira, ua faaue te orometua o te oire ia Josua e hoˈi i roto i ta ˈna haapaoraa tahito.

Ua parau atura o Josua ma te itoito e ua rave o ˈna e to ˈna utuafare i ta ratou faaotiraa e ua opua ratou e haamori i te Atua ra o Iehova “ma te varua e te parau mau.” (Ioane 4:24) I te hoê apooraa a te oire i muri iho, ua faaoti te raatira teitei e ia faarue o Josua e to ˈna utuafare i te oire iti ei feia i tiavaruhia. Ua horoahia na ratou e hitu mahana no te faarue i te motu e to ratou fare, to ratou fenua, e mau faaapu—oia, ta ratou imiraa atoa.

Ua tauturu mai te tahi mau taeae pae varua no te tahi atu motu ia Josua e to ˈna utuafare, ma te horoa ˈtu i te hoê vahi nohoraa e te hoê tâpû fenua no te faaapu. I teie nei, ua bapetizohia o Josua e ta ˈna tamaiti matahiapo, e te tahi atu tamaiti ra, e taata poro ïa i te parau apî maitai bapetizo-ore-hia. Aita i maoro aˈenei, ua riro mai o Mere ei pionie tamau (te hoê vahine poro i te Basileia ma te taime taatoa). Te faahopearaa o ta ratou maitiraa e tavini ia Iehova, oia ïa te ereraa i te tiaraa e te mau taoˈa materia, tera râ, mai te aposetolo Paulo, te hiˈo nei ratou i te reira ei mea faufaa ore ia faaauhia i tei noaa mai ia ratou.—Philipi 3:8.

Te hoê maitiraa no nia i te manaˈo haava

Te maitiraa e pee i te hoê manaˈo haava i haapiihia ia au i te Bibilia, e titauhia ïa te faaroo e te itoito. O te ohipa ïa i tupu i nia ia Suraang, te hoê vahine apî bapetizo-apî-hia e faaea ra i Tarawa, hoê o te mau motu no Kiribati. Ua ani o Suraang i te parau faatia eiaha e rave i te hoê tuhaa o ta ˈna ohipa tuati i te fare maˈi. Aita ta ˈna aniraa i farii-maitai-hia e ei faahopearaa, ua tonohia oia e haapao i te pu rapaauraa iti i te hoê motu moemoe, ia atea ê oia ia vetahi hoê â to ratou faaroo.

I nia i taua motu ra, e peu matauhia ia pûpû te feia atoa e tae apî mai i te hoê ô na te “varua” no  reira. Te tiaturi ra te taata e ia ore ratou e na reira, e pohe ïa ratou. I te mea e ua patoi o Suraang i te farii ia ravehia teie peu haamori idolo no ˈna e ta ˈna pǔpǔ, ua tiai te feia o te oire iti e ia uumihia to ˈna arapoa e te varua i faaririhia. I te mea e aita o Suraang aore ra ta ˈna pǔpǔ i haamauiuihia, mea rahi ïa ta ˈna mau taime maitatai no te horoa i te hoê faaiteraa maitai.

Aita râ i oti atura te mau tamataraa a Suraang. No te tahi mau taata apî o taua motu ra, e tataˈuraa te faahinaaroraa i te mau vahine apî o te ratere mai. Tera râ, ua patoi o Suraang i ta ratou mau aniraa e ua tapea oia i to ˈna taiva ore i te Atua. Oia mau, ua nehenehe oia e tavini ei pionie tamau, noa ˈtu ta ˈna ohipa tiairaa ei tuati e 24 hora i te mahana.

Hou i te hoê tamaaraa i faatupuhia no Suraang a faaineine ai oia i te faarue i te motu, ua parau te mau matahiapo o te oire iti e o o ˈna te mitionare mau matamua i haere mai i ǒ ratou. No ta ˈna turu papu i te mau faaueraa tumu Bibilia, ua farii maitai vetahi ê atu o taua motu ra i te poroi o te Basileia.

Te mau haafifiraa i te pae tino

No te atea o te tahi mau oire iti, e tia i te nunaa o Iehova ia tutava rahi i te apiti i roto i te taviniraa e i te haere i te mau putuputuraa Kerisetiano. A rave na i te hiˈoraa o na Ite bapetizohia e maha—hoê tane e e toru vahine—o te tere ehia hora no te haere i te mau putuputuraa e no te hoˈi mai. E tia ia ratou ia haere na roto e toru tahora e na reira faahou no te hoˈi mai. Ia teitei te pape, e ǎu na mua te taeae i te tahi pae mai, a tapea noa ˈi i te hoê pani rahi tei roto ta ratou mau pute, mau buka, e mau ahu no te putuputuraa. I muri iho, e hoˈi mai oia e tauturu i na tuahine e toru.

E mau haafifiraa ê to te tahi atu pǔpǔ iti, o te haere i te mau putuputuraa i te motu atea no Nonouti, i Kiribati. E hitu aore ra e vau noa taata te ô i roto i te fare i reira ratou e putuputu ai. Area te toea ra, e parahi ïa i rapae e e faˈao mai na roto i te aua niuniu. Mea mahorahora noa te vahi putuputuraa, e ite mai ïa te tahi atu mau taata o te oire iti o te haere i ta ratou mau fare pure rarahi e o te hoˈi mai. Parau mau, ua ite te mau tavini a Iehova e o te taata, eiaha te mau fare, te mea hinaaro-mau-hia i te hiˈoraa a te Atua. (Hagai 2:7) Te tuahine bapetizohia hoê roa o te motu, e ruhiruhia ïa e eita ta ˈna e nehenehe e haere atea. Tera râ, te tauturuhia ra oia i roto i te taviniraa e te hoê vahine apî, e vahine poro bapetizo-ore-hia oia, o te turai ia ˈna na nia i te hoê pereoo turai. Auê ïa mauruuru mau ta raua e faaite ra no te parau mau e!

Ua faaoti papu na taata poro e hau atu i te 2 100 e tavini ra i te mau motu no Fiti e tamau noa i te faaite i te parau apî maitai o te Basileia o te Atua. E ua papu ia ratou e mea rahi â o te riro mai ei ‘feia i noaa te faaroo, e ora ˈtu ai te nephe.’

[Hohoˈa fenua i te api 8]

(Hiˈo i te papai)

Auteralia

Fiti