Ua farii-maitai-hia Iosia te haehaa e Iehova

TE RIARIA ra tera te tamaiti hui arii no Iuda e pae matahiti o Iosia. Te oto ra to ˈna metua vahine o Iedida. E tumu ta Iedida e heva ˈi oia no te mea ua pohe te metua tupuna o Iosia, te arii Manase.—Mau arii 2, 21:18.

I teie nei, e riro mai te metua tane o Iosia, o Amona, ei arii o Iuda. (Paraleipomeno 2, 33:20) E piti matahiti i muri aˈe (659 H.T.T.), e haapohehia Amona e to ˈna mau tavini. E faaore te nunaa i te feia opuaraa ino e e faaarii ratou i te tamarii ra o Iosia. (Mau arii 2, 21:24; Paraleipomeno 2, 33:25) A faatere noa ˈi Amona, ua matau roa Iosia i te hauˈa o te mea noˈanoˈa tei faaî i te mataˈi i Ierusalema no te mau fata e rave rahi i nia i te mau tapoˈi fare i reira te mau taata e tipapa ˈi i mua i te mau atua haavare. E nehenehe te mau tahuˈa etene e itehia e porote haere ra, e te tǎpû ra te feia i pee—tae noa ˈtu te tahi pae te parau ra e te haamori ra ratou ia Iehova—i te iˈoa o te atua ra o Malakama.—Zephania 1:1, 5.

Ua ite Iosia e ua rave o Amona i te ohipa ino na roto i te haamoriraa i te mau atua haavare. Ua taa maitai aˈe atoa i te arii apî no Iuda te mau parau i porohia e te peropheta a te Atua o Zephania. I taua taime ra, 15 matahiti to Iosia (652 H.T.T.), tei roto oia i te 8raa o ta ˈna matahiti faatereraa e ua faaoti maite oia e haapao i te mau parau a Zephania. E tamaiti noâ o Iosia a haamata ˈi oia i te imi ia Iehova.—Paraleipomeno 2, 33:21, 22; 34:3.

E rave Iosia i te hoê ohipa papu!

E maha matahiti te mairi e e haamata Iosia i te tamâ ia Iuda e ia Ierusalema i te haapaoraa hape (648 H.T.T.). E haamou oia i te mau idolo, te mau pou moˈa, e te fata mea noˈanoˈa e faaohipahia i roto i te haamoriraa ia Baala. E faarirohia te mau hohoˈa o te mau atua haavare ei repo puehu e e ueuehia i nia i te mau menema o te feia i pûpû i te tusia na te reira. E haafaufaa-ore-hia te mau fata i faaohipahia no te haamoriraa viivii e haamouhia ˈtu ai.—Mau arii 2, 23:8-14.

Te tupu maitai ra te tamâraa a Iosia i to Ieremia, te tamaiti a te hoê tahuˈa ati Levi, haereraa mai i Ierusalema (647 H.T.T.). Ua tono te Atua ra o Iehova i te taurearea ra o Ieremia ei peropheta na ˈna, e e poro oia ma te itoito mau i te poroi patoi a Iehova i te haapaoraa hape! Fatata hoê â to Iosia matahiti e to Ieremia. Noa ˈtu râ te tamâraa itoito a Iosia e te mau pororaa mǎtaˈu ore a Ieremia, e topa oioi faahou te mau taata i roto i te haamoriraa hape.—Ieremia 1:1-10.

Te hoê itearaa faito ore!

E mairi fatata e pae matahiti. E 25 matahiti to Iosia e fatata 18 matahiti to ˈna faatereraa i teie nei. E titau oia ia Saphana, papai parau; ia Maaseia, tavana o te oire; e ia Ioa, tapao parau. E faaue te arii ia Saphana e: ‘A parau ia Hilikia tahuˈa rahi e rave i te ario i haaputuhia e te feia tiai uputa o te hiero i te mau taata nei e e tuu atu i te feia rave ohipa ia tifai ratou i te fare o Iehova.’—Mau arii 2, 22:3-6; Paraleipomeno 2, 34:8.

Mai te poipoi roa, e itoito noa te feia tifai i te hiero i te rave i te ohipa. Papu maitai e te mauruuru ra Iosia ia Iehova i te mea e te faaore ra te mau rave ohipa i te tuinoraa ta te tahi o to ˈna mau tupuna iino i faatupu i roto i te fare o te Atua. A haere ai te  ohipa i mua, e haere mai Saphana e vauvau i te hoê parau faataa. Eaha râ hoi teie? Inaha, e otaro to roto i to ˈna rima! E faataa oia e ua itea mai i te tahuˈa rahi o Hilikia “te buka ture a Iehova i papaihia e Mose ra.” (Paraleipomeno 2, 34:12-18) Auê ïa itearaa e—papu maitai o te papai tumu o te Ture tera!

Te ru ra Iosia i te faaroo i te mau parau atoa o te buka. A taio ai Saphana, e tamata te arii i te hiˈo nafea te mau faaueraa atoa e au ai ia ˈna e te nunaa. E horuhoru taa ê oia ia haamataratara te buka i te haamoriraa mau e ia tohu i te ati e te faatîtîraa e tae mai ia pee te nunaa i te haapaoraa hape. I teie nei a ite ai oia e aita te mau faaueraa atoa a te Atua i haapaohia, e pihae Iosia i to ˈna ahu e e faaue ia Hilikia, ia Saphana, e vetahi atu e: ‘A ui ia Iehova i te parau i roto i teie nei buka; ua rahi hoi te riri o Iehova ia tatou no te mea aita to tatou mau metua i haapao i te parau i roto i teie nei buka.’—Mau arii 2, 22:11-13; Paraleipomeno 2, 34:19-21.

E faataehia te parau a Iehova

E haere te mau vea a Iosia i te peropheta vahine ra o Hulada i Ierusalema e e hoˈi mai ratou e te hoê parau faataa. Ua faatae o Hulada i te parau a Iehova, o te faaite e e tae mai te mau ino i papaihia i roto i te buka no ite-noa-hia maira i nia i te nunaa taiva. No to ˈna râ faahaehaaraa i mua ia Iehova, eita Iosia e ite atu i te ino. E amuihia ˈtu oia e to ˈna mau metua e e hunahia oia ma te hau.—Mau arii 2, 22:14-20; Paraleipomeno 2, 34:22-28.

Ua tano anei te tohu a Hulada, ua pohe hoi Iosia i roto i te hoê aroraa? (Mau arii 2, 23:28-30) Oia, e taa ê te “hau” o to ˈna hunaraa i te “ino” e tae mai i nia ia Iuda. (Mau arii 2, 22:20; Paraleipomeno 2, 34:28) Ua pohe Iosia hou te ati o te mau matahiti 609-607 H.T.T. i to te mau Babulonia haaatiraa e haamouraa ia Ierusalema. E te ‘amui-atoa-raa e to te hoê mau metua,’ e ere ïa te auraa e eita oia e roohia i te pohe ino. E faaohipahia te hoê parau mai teie no te pohe ino e te pohe ino ore atoa.—Deuteronomi 31:16; Mau arii 1, 2:10; 22:34, 40.

E haere te haamoriraa mau i mua

E haaputuputu Iosia i te mau taata no Ierusalema i te hiero e e taio atu “i te mau parau atoa i taua buka faufaa i itea i roto i te fare o Iehova.” E fafau atu ai oia i te hoê faufaa “e e pee oia ia Iehova e e haapao i ta ˈna parau e ta ˈna i faaite mai, e ta ˈna haapaoraa ma te aau atoa e te varua atoa, e ia rave maite i te mau parau no te faufaa i papaihia i roto i teie nei buka.” Ua paturu te taata atoa i te faufaa.—Mau arii 2, 23:1-3.

E rave te arii Iosia i te tahi atu ohipa faaoreraa haamoriraa idolo mea papu e mea rahi atu â. E faaorehia te ohipa a te mau tahuˈa a te mau atua ěê no Iuda. E ere te mau tahuˈa ati Levi tei pee i te haamoriraa viivii i ta ratou fanaˈoraa taa ê e tavini i te fata a Iehova ra, e faarirohia te mau vahi teitei i faatiahia i te tau faatereraa a te arii Solomona ei mau vahi tano ore no te haamoriraa. E tae roa te tamâraa i te tuhaa fenua o te basileia tahito o na opu hoê ahuru o Iseraela, tei tahuri aˈena i to Asura (740 H.T.T.).

Ei faatupuraa i te mau parau i faahitihia e 300 matahiti na mua ˈˈe e “te hoê taata no te Atua” aita i faaitehia te iˈoa, e tutui Iosia i te mau ivi o te mau tahuˈa a Baala i nia i te fata ta te arii Ieroboama I i faatia i Betela. E tatarahia te mau vahi teitei i reira e i te tahi atu mau oire, e e faatusiahia te mau tahuˈa haamori idolo i nia i te mau fata iho i reira to ratou pûpûraa i te mau tusia.—Mau arii 1, 13:1-4; Mau arii 2, 23:4-20.

E faatupuhia te hoê oroa Pasa rahi

Te turuhia ra te mau ohipa patururaa i te haamoriraa viivii ore a Iosia e te Atua. A ora noa ˈi oia, e haamaitai noa te arii i te Atua i te mea e aita te nunaa “i faarue i te pee i te Atua o to ratou mau metua ia Iehova.” (Paraleipomeno 2, 34:33) E nafea e moe ai ia Iosia te hoê tupuraa faahiahia tei tupu i te 18raa o ta ˈna matahiti faatereraa?

E faaue te arii i te nunaa e: “E haapao outou i te pasa na to outou Atua na Iehova, i tei papaihia i roto i te buka faufaa [no ite-noa-hia mai] nei.” (Mau arii 2, 23:21) E oaoa Iosia i te iteraa i te farii maitai. No teie oroa, e horoa oia iho e 30 000 animala no te Pasa e 3 000 puaatoro. Auê ïa Pasa e! Na roto i te mau pûpûraa, te mau faanahoraa tabula-maitai-hia, e te numera o te feia haamori, e hau aˈe te reira i te mau Pasa atoa i faatupuhia mai te tau o te peropheta Samuela mai.—Mau arii 2, 23:22, 23; Paraleipomeno 2, 35:1-19.

 Heva-rahi-hia i to ˈna poheraa

No te toea o ta ˈna na 31 matahiti faatereraa (659-629 H.T.T.), ua riro Iosia ei arii maitai. I te pae hopea o ta ˈna faatereraa, e faaroo oia e te opua ra te pharao Neko e na Iuda ˈtu i te haere e tapea i te mau nuu Babulonia a tauturu atu ai i te arii o Asura i Karekemisa i nia i te anavai Eupharate. No te tahi tumu ite-ore-hia, e haere Iosia e aro i te arii no Aiphiti. E tono Neko i te mau vea ia ˈna ra e parau e: “Eiaha oe e mârô mai i te Atua, tei ia ˈu nei hoi oia, a pohe hoi oe ia ˈna.” E faahuru ê râ Iosia ia ˈna iho e e tamata i te haafariu ê i to Aiphiti i Megido e ia hoˈi atu.—Paraleipomeno 2, 35:20-22.

Auê râ hoi te arii no Iuda e! E puta te fa a te feia teˈa enemi, e e parau oia i ta ˈna mau tavini e: “E hopoi ê outou ia ˈu, ua puta roa vau.” E rave ratou ia Iosia mai nia mai i to ˈna pereoo tamaˈi, e tuu ia ˈna i nia i te tahi atu, e haere tia ˈtura i Ierusalema. I reira aore ra a tere atu ai i te oire, e huti Iosia i te aho no te taime hopea. Te na ô ra te aamu i faauruahia e: “Pohe ihora oia, e tanuhia ihora i roto i te hoê menema no to ˈna ra mau metua. Oto ihora Iuda atoa e Ierusalema ia Iosia ra.” Ua himene Ieremia i te himene otoraa ia ˈna, e ua riro te arii ei tumu no te mau himene hevaraa i roto i te mau tupuraa taa ê i muri mai.—Paraleipomeno 2, 35:23-25.

Oia, ua hape roa te arii Iosia i te aaraa ˈtu i to Aiphiti. (Salamo 130:3) Ua fanaˈo râ oia i te farii maitai a te Atua maoti to ˈna haehaa e to ˈna mau-maitai-raa i te haamoriraa mau. Te faaite maitai mau ra te oraraa o Iosia e e farii maitai Iehova i ta ˈna mau tavini paieti aau haehaa!—Maseli 3:34; Iakobo 4:6.

[Hohoˈa i te api 29]

Ua imi te arii apî ra o Iosia ia Iehova ma te aau rotahi

[Hohoˈa i te api 31]

Ua haamou Iosia i te mau vahi teitei e ua paturu i te haamoriraa mau