E nehenehe anei e haafatata ˈtu i te hoê Atua itea ore?

‘Nafea vau e faatupu ai i te taairaa piri e te hoê taata eita vau e ite atu?’ o ta outou paha ïa e ui. E au ra e e uiraa tano te reira. A hiˈo mai na râ:

MAI te aha te faufaa o te ite mata no te faatupu i te taairaa î i te here e te maoro? E ere anei hoê â faufaaraa to te mau mea itea ore, peneiaˈe mea faufaa ˈtu â? Oia mau! No taua mea ra i faatupu ai te tahi mau taata i te taairaa piri e vetahi ê na roto i te papairaa rata tamau—a faaite ai ta ratou mau rata ma te haavare ore i ta ratou e au, e ore e au, ta ratou mau fa, mau faaueraa tumu e pee, to ratou huru hoata, e te tahi atu â mau huru taata aore ra mau anaanataeraa.

Te faaite atoa ra te feia matapo e e ere te ite mata i te mea faufaa roa no te faatupu i te taairaa piri e te tahi atu taata. A rave na i te hiˈoraa o Edward e o Gwen, na feia faaipoipo matapo. * Ua farerei o Edward ia Gwen i te hoê fare haapiiraa no te matapo i reira oia e haere ai ei hoa haapiiraa taata paari matapo. Ua umere oia i to Gwen mau huru maitatai, i ta ˈna iho â râ huru paraparau e to ˈna haerea haavare ore, e to ˈna huru feruriraa maitai roa i mua i te ohipa. I te tahi aˈe pae, ua anaanatae o Gwen ia Edward no te mea, ia au i ta ˈna mau parau, “ua faaite oia i te mau huru maitatai atoa ta ˈu i haapiihia ia tiaturi e mea faufaa.” Ua haamata ihora te hoê haamatauraa, e e toru matahiti i muri aˈe, ua faaipoipo aˈera raua.

“Ia farerei orua orua anaˈe,” o ta Edward ïa e parau ra, “aita e taa-ê-raa mai te peu e e matapo orua no te faatupu i te taairaa e te tahi atu taata. Eita paha orua e ite te tahi i te tahi, e ere râ te mau manaˈo hohonu i te mea fifi ia itehia.” I teie nei, e 57 matahiti i muri aˈe, te here rahi noa râ raua. Te faataa ra raua e te ravea e faahiahia roa ˈi to raua taairaa, maoti ïa na mea e maha aˈe: (1) te tapaoraa i te mau huru maitatai o te tahi atu taata, (2) te manaˈonaˈoraa e te anaanataeraa i taua mau huru maitatai ra, (3) te tapearaa i te aparauraa maitai, e (4) te rave-amui-raa i te mau mea.

Mea faufaa roa teie na manaˈo e maha no te mau huru taairaa maitai atoa, i rotopu anei i te mau hoa, te mau hoa faaipoipo, aore ra, mea faufaa ˈtu â, i rotopu i te taata e te Atua. I roto i te tumu parau i muri nei, e ite mai tatou nafea te faaohiparaa i teie mau manaˈo e tauturu mai ai ia faatupu i te taairaa piri e te Atua, noa ˈtu e eita tatou e ite atu ia ˈna. *

[Nota i raro i te api]