‘E haapao i ta ˈu nei mau faaueraa, e ora ïa oe’

MEA apî oia e te maramarama, ‘e te purotu hoi i te tupu maitai, e te mata maitai.’ Mea hinaaro na te vahine a ta ˈna paoti ohipa i te mea navenave e mea haama ore oia. No to ˈna hinaaro rahi i te taurearea ra i tamata ˈi oia i te mau mahana atoa i te faahema ia ˈna. “Tae aˈera . . . i te hoê mahana, haere atura Iosepha i roto i te fare e rave i ta ˈna ra ohipa, e aore roa te hoê taata o taua utuafare ra i roto. Ua haru maira taua vahine ra i tana pereue, na ô maira, E taoto na tâua.” Ua faarue râ Iosepha, te tamaiti a te patereareha ra o Iakoba, i to ˈna ahu e ua horo ê atura mai mua ˈtu i te vahine a Potiphara.—Genese 39:1-12.

Papu mau, e ere o te mau taata atoa te fariu ê i te hoê tupuraa faahema. Ei hiˈoraa, a rave na i te aamu o te hoê taurearea ta te arii Solomona no Iseraela i tahito ra i ite i roto i te mau aroâ i te po. I to ˈna faahemaraahia e te hoê vahine onoono, “pee noa ˈtura oia i reira ra, mai te puaatoro e haere i te taparahiraa ra.”—Maseli 7:21, 22.

Te aˈohia ra te mau Kerisetiano e “maue ê atu i te faaturi.” (Korinetia 1, 6:18) Ua papai atu te aposetolo Paulo i te pǐpǐ Kerisetiano taurearea ra o Timoteo: “E maue ê oe i te mau hinaaro o te apîraa ra.” (Timoteo 2, 2:22) Ia farerei tatou i te mau tupuraa o te faahema e rave i te poreneia, te faaturi, aore ra te tahi atu â mea hape i te pae morare, e tia atoa ia tatou ia horo ê ma te papu mai ia Iosepha ra mai mua ˈtu i te vahine a Potiphara. Eaha te tauturu ia tatou ia faaoti maite e na reira? I roto i te pene 7 o te buka Bibilia ra Maseli, te horoa maira Solomona i te tahi mau aˈoraa faufaa rahi. Aita oia e parau noa ra no te mau haapiiraa o te paruru ia tatou i te mau ravea aravihi a te feia morare ore, te faaite atoa maira râ oia i ta ratou ravea faahemaraa na roto i te faataaraa mai ma te oraora i te hoê tupuraa i reira te hoê taurearea e faahemahia ˈi e te hoê vahine noaa ohie.

‘E taamu i ta ˈu mau faaueraa i nia i to rimarima’

E haamata te arii ma teie aˈoraa a te hoê metua tane: “E tau tamaiti, e haapao mai i ta ˈu nei parau, e ta ˈu e faaite atu e vaiiho i ǒ na ia oe na. E haapao i ta ˈu nei [mau faaueraa] parau, e ora ïa oe, e ta ˈu nei ture mai to orio mata ra.”—Maseli 7:1, 2; MN.

Tei te mau metua, te mau metua tane iho â râ, te hopoia no ǒ mai i te Atua ra e haapii i te mau ture a te Atua no nia i te maitai e te ino i ta ratou mau tamarii. Ua aˈo Mose i te mau metua tane e: “Teie nei mau parau ta ˈu e parau atu ia oe i teie nei mahana, ei roto i to aau e vai ai: e e haapii tamau maite oe i to mau tamarii i taua mau parau nei; o ta oe ïa e parau ia parahi noa oe i roto i te fare, e ia haere noa oe na te eˈatia ra, e ia taoto noa oe ra, e ia tia noa oe i nia ra.” (Deuteronomi 6:6, 7) E ua papai te aposetolo Paulo e: “O outou hoi, e te feia metua ra, eiaha e faaooo atu i ta outou tamarii ia riri, e haapii râ ia ratou e ia paari ma te aˈo [e te mau faaararaa a Iehova].” (Ephesia 6:4; MN) I roto i te haapiiraa a te mau metua e tia ia poiherehia, aore ra ia haafaufaa-rahi-hia, te vai mau ra ïa te mau haamanaˈoraa, te mau faaueraa e te mau ture e itehia i roto i te Parau a te Atua, te Bibilia.

Te vai atoa ra te tahi atu â mau ture i roto i te haapiiraa a te mau metua—te mau ture utuafare. No te maitai te reira o te mau melo o te utuafare. Parau mau, ia au i te mau hinaaro, mea ê te mau ture a te hoê utuafare i ta te tahi atu. E ohipa râ na te mau metua e faaoti eaha te mea maitai roa ˈˈe no to ratou iho utuafare. E te mau ture ta ratou e haamau, e pinepine ïa e tapao o to ratou here e tapitapi mau. Te aˈohia ra te feia apî e auraro atu i teie mau ture e te  mau haapiiraa atoa o te Bibilia ta to ratou mau metua e horoa ˈtu. Oia, mea hinaarohia ia faariro i teie mau haapiiraa “mai to orio mata ra”—a haapao maitai roa ˈtu ai. Tera te ravea e ape ai i te faahopearaa pohe o te oreraa e tâuˈa ˈtu i te mau ture a Iehova e ‘e ora ˈi.’

“E taamu [i ta ˈu mau faaueraa] i nia i to rimarima ra,” o ta Solomona ïa e parau faahou ra, “e papai i nia i te pǎpǎ ra o to aau iho na.” (Maseli 7:3) Mai te mau rimarima e vai ra i mua maitai i to tatou mata e mea faufaa hoi no te faatupu i ta tatou mau opuaraa, ia riro te mau haapiiraa i noaa mai i to tatou aratairaahia ia au i te mau Papai aore ra te noaaraa mai te ite Bibilia ei haamanaˈoraa tamau e ei aveia i roto i te mau mea atoa ta tatou e rave. E tia ia tatou ia tapao i te reira i nia i te pǎpǎ o to tatou aau, ia riro ei huru mau no tatou iho.

Ma te ore e haamoe i te faufaa o te paari e te maramarama, e aˈo te arii e: “E parau atu oe i te paari ra, O tau tuahine oe; e parau hoi oe i te [maramarama] ra, e no to oe ra ïa fetii.” (Maseli 7:4; MN) Te paari, o te aravihi ïa i te faaohipa ma te tano i te ite i horoahia e te Atua. Ia poihere tatou i te paari mai te hoê tuahine here rahi. Eaha te maramarama? O te aravihi ïa i te faahohonu i te hoê tumu parau e te ite i to ˈna auraa na roto i te taaraa i te mau taairaa i rotopu i to ˈna mau tuhaa e te taatoaraa. E tia i te maramarama ia piri roa ia tatou mai te hoê hoa rahi.

No te aha e tia ˈi ia pee maite tatou i te haapiiraa Bibilia e ia faahotu i te taairaa piri e te paari e te maramarama? “Ia tapea raua ia [tatou] i te vahine moiheuo, i te vahine ê ra e taparu ta ˈna parau.” (Maseli 7:5) Oia, ia na reira tatou, e paruruhia ïa tatou i te vaha taparu o te hoê taata ê—te hoê taata morare ore. *

E farerei te taurearea i ‘te hoê vahine paari’

E faataa ˈtu ai te arii o Iseraela i te hoê tupuraa ta ˈna iho i hiˈopoa: “Ia ˈu i tia noa i te haamaramarama i to ˈu ra fare, ua hiˈo atura na roto, ite atura vau i roto i te feia ite ore ra; hiˈo ihora vau i roto i te mau taurearea ra, i te hoê taata aore e haapao. Te haere noa ra na te aroâ i pihaiiho i to ˈna pae fare: e te haere maite ra oia na te eˈa e tae atu ai i to ˈna fare: i na reira oia i te arehurehuraa i te ahiahi ra, e te pouri-roa-raa hoi o te rui ra.”—Maseli 7:6-9.

E opeˈa to te haamaramarama ta Solomona e hiˈo atura na roto—e au ra e e taoˈa hamanihia e te mau lati e peneiaˈe te mau nanaˈoraa haviti. A arehurehu atu ai te ahiahi, te pouri o te rui maira i roto i te mau aroâ. Ite atura oia i te hoê taurearea e hema haere noa. No te mea aita to ˈna e haroaroaraa, aore ra e feruriraa maitai, aita to ˈna e haapao. Peneiaˈe, ua ite maite oia eaha te huru o te vahi tapiri ta ˈna e haere atura  e eaha te mea e nehenehe e roohia i nia ia ˈna i reira. E haere atu te taurearea i pihai iho i “to ˈna pae fare,” o te aratai atu hoi i to ˈna ra fare. O vai oia? Eaha ta ˈna i opua?

Te na ô râ te arii e hiˈopoa ra e: “Inaha, ua farerei maira taua vahine ra ia ˈna, e te ahu o te faaturi ra te ahu, e te paari hoi o te aau. (E vahine parau rahi, e te aˈo atâ, e ore e mau i te utuafare, rouiho tei te vahi atea, rouiho tei te aroâ, e ei te mau fare hiti ra oia e tiai mai ai.)”—Maseli 7:10-12.

Te faaite maitai ra to ˈna ahuraa i to ˈna huru ohie ia noaa. (Genese 38:14, 15) Mea haehaa ore to ˈna ahuraa, mai to te hoê faaturi ra. Hau atu â, mea paari to ˈna aau—mea “haavarevare” to ˈna feruriraa, mea “aravihi” to ˈna manaˈo. (An American Translation; New International Version) E vahine parau rahi oia e te aˈo atâ, mea paraparau roa oia e te upoo etaeta, te maniania e te onoono, te haama ore e te aa. Eita oia e faaea noa i te fare, mea au aˈe na ˈna e haere i te mau vahi taata, a tapuni ai i te mau poro aroâ e haru i te pau ia ˈna. Te tiai ra oia i te hoê taata mai te taurearea ra.

‘Te rahi o te parau vahavai’

Inaha, e farerei te hoê taurearea i te hoê vahine noaa ohie e opuaraa aravihi ta ˈna. Ua huti mau â te reira i te ara-maite-raa o Solomona! Te faatia ra oia e: “Ua haru maira oia ia ˈna, e ua hôˈi maira, e ua na ô maira ia ˈna, ma te mata haama ore â, E tusia amu anaˈe ta ˈu tei te utuafare; i hopoi na vau i te euhe na ˈu i teie nei mahana. I haere mai au ia farerei atu ia oe ra, e imi maite ia oe i te arehurehuraa nei, e ua itea ˈtura oe e au.”—Maseli 7:13-15.

E vahavai to teie vahine. Ma te mata haama ore, e parau papu oia i ta ˈna mau parau. Mea feruri-maitai-hia te mau mea atoa ta ˈna e parau no te faahema i te taurearea. Na roto i te parauraa e ua hopoi oia i ta ˈna tusia amu i taua iho mahana ra e ua aufau i ta ˈna euhe, te faaiteite ra oia i te parau-tia, a oomo atu ai i te manaˈo e aita oia e ere ra i te huru pae varua. I roto i te tusia amu i te hiero i Ierusalema, te vai ra te iˈo, te faraoa ota, te hinu e te uaina. (Levitiko 19:5, 6; 22:21; Numera 15:8-10) I te mea e e nehenehe te taata pûpû e rave i te hoê tuhaa o te tusia amu na ˈna e na ta ˈna utuafare, te na ô ra ïa oia e mea rahi te maa e te inu i to ˈna ra fare. Mea maramarama maitai te auraa: E arearea maitai te taurearea i reira. Ua haere mai iho â oia i rapae i to ˈna fare no te imi ia ˈna. Mea putapû mau—ia nehenehe aˈe te hoê taata e tiaturi i teie aamu. “E parau mau e ua haere oia i rapae e imi i te hoê taata,” o ta te hoê ïa aivanaa Bibilia e parau ra, “ua haere mau mai râ anei oia e imi i teie iho nei taata taa ê? O te hoê anaˈe maamaa—peneiaˈe teie iho nei taata—te tiaturi ia ˈna.”

I muri aˈe i to ˈna faariroraa ia ˈna iho ei mea anaanatae na roto i to ˈna mau ahu, te taˈi o ta ˈna mau parau vahavai, ta ˈna tauahi, e te mǎrû o ta ˈna apâ, e faaohipa te vahine faahema i te navenave o te hauˈa. E parau oia e: “Ua faaunauna vau i tau roi i te mea nehenehe, i te ahu taoto, e te ahu hua no Aiphiti ra. Ua faanoˈanoˈa vau i tau roi i te mura, e te aloe, e te kinamo.” (Maseli 7:16, 17) Ua faaunauna oia i to ˈna roi i te ahu vavai û rau no Aiphiti mai e ua faanoˈanoˈa i te reira i te mau taoˈa noˈanoˈa ra te mura, te aloe e te kinamo.

“E mai haere tâua e faahope hua i te hinaaro e ao noa ˈˈe,” o ta ˈna ïa e parau faahou ra, “tâua e faanavenave maite i nia ia tâua iho.” E hau atu â te titauraa i te hoê noa tamaaraa au mau no e piti taata. Ta ˈna tǎpǔ, o te fanaˈoraa ïa i te taatiraa pae tino. No te taurearea, mea arearea e mea anaanatae mau te titauraa! Ei faaitoitoraa hau, e parau â oia e: “Aita râ hoi tau tane i te utuafare, ua reva i te fenua roa. E pute ario ta ˈna i hopoi atoa; e ia tae i te marama apî oia e hoˈi mai ai i te utuafare.” (Maseli 7:18-20) Eita roa ˈtu raua e haamǎtaˈuhia, ta ˈna ïa e haapapu atu ia ˈna, no te mea ua haere ta ˈna tane no te hoê tere tapihoo e eita e hoˈi oioi mai. Mea aravihi mau oia i te haavarevare i te hoê taata apî! “No te rahi o ta ˈna ra parau vahavai, vare noa ˈtura oia; no te taparu rahi o to ˈna vaha, riro atura oia.” (Maseli 7:21) E tia ïa e na te hoê taata morare  puai mai ia Iosepha e patoi i te hoê titauraa mai teie i te aminamina. (Genese 39:9, 12) E noaa anei i teie taurearea i te patoi?

‘Mai te puaatoro i te taparahiraa ra’

“Pee noa ˈtura oia i reira ra,” o ta Solomona ïa e faatia ra, “mai te puaatoro e haere i te taparahiraa ra, e mai te aili e ouˈa i roto i te upeˈa ra, e puta noa ˈtura ta ˈna paraia i te hoto: mai te manu e maue i te marei ra, aore hoi i ite e, ia pohe oia i tuuhia ˈi.”—Maseli 7:22, 23.

Eita e noaa i te taurearea i te patoi i te titauraa. Ma te haamamû i te feruriraa maitai, e pee oia ia ˈna “mai te puaatoro e haere i te taparahiraa ra.” Mai te hoê taata i mau i te auri o te ore e nehenehe e maue ê i ta ˈna utua, e huti-atoa-hia te taurearea i roto i te hara. Eita roa ˈtu oia e ite i te atâtaraa o te reira e ia ‘puta noa ˈtu to ˈna upaa i te hoto,’ oia hoi, e ia roo-noa-hia ˈtu oia e te pepe o te nehenehe e haapohe ia ˈna. E riro paha ei pohe i te pae tino no te mea e tuu oia ia ˈna iho i roto i te maˈi purumu pohe. * E nehenehe atoa te pepe e faatupu i to ˈna pohe pae varua; “ia pohe oia i tuuhia ˈi.” Ua ino mau â to ˈna tino taatoa e to ˈna ora, e ua hara ino oia i te Atua. Ua horo oioi atu ïa oia i roto i te pohe mai te manu i roto i te marei!

“Eiaha oe e haere na to ˈna ra mau eˈa”

Ma te huti mai i te haapiiraa i ta ˈna i ite, e faaitoito te arii paari ra e: “E tena na, e te mau tamarii ra, e faaroo mai ia ˈu i teie nei, e haapao mai i te parau no roto i to ˈu nei vaha. Eiaha roa to aau e papae noa ˈtu i to ˈna ra eˈa; eiaha oe e haere na to ˈna ra mau eˈa. E rave rahi hoi tei hiˈa ia ˈna ma te paruparu; e feia rahi roa ra tei pohe roa ia ˈna. Tei te eˈa mau e tae ai i hade ra to ˈna utuafare, e tae roa ˈtu ai i raro i te vairaa o te feia i pohe ra.”—Maseli 7:24-27.

Papu maitai, te aˈoraa a Solomona, te fariu-ê-raa ïa i te mau eˈa pohe o te hoê taata morare ore e ia “ora” noa. (Maseli 7:2) E tano mau â teie aˈoraa no to tatou tau! Mea hinaaro-mau-hia ia ape i te mau vahi e haerehia e te feia e tiai ra i te haru i te pau ia ratou. E auraro anei ïa outou i ta ratou mau ravea na roto i te haereraa ˈtu i taua mau vahi ra? Oia mau, eaha outou e riro ai ei taata “aore e haapao” e e oere haere ai na te aroâ o te hoê taata “ê”?

Ua faahema te “vahine ê” ta te arii i ite i te taurearea ma te hoê titauraa e ‘faanavenave ia raua iho.’ Aita anei te mau taurearea e rave rahi—te mau potii iho â râ—i haavarehia mai teie? A hiˈo na râ: Ia tamata te hoê taata i te huti ia outou i roto i te haerea ino i te pae taatiraa, e here mau anei tera aore ra e hinaaro miimii? Eaha te hoê taata o te here mau i te hoê vahine e ume ai ia ˈna e ofati i ta ˈna haapiiraa Kerisetiano e to ˈna manaˈo haava? “Eiaha roa to aau e papae noa ˈtu” i taua mau eˈa ra, o ta Solomona ïa e faaitoito maira.

E pinepine e vahavai e te feruri-maitai-hia te mau parau a te hoê faahema. E tauturu mai te tapearaa i te paari e te maramarama i pihai ia tatou ia taa i te auraa mau. Ia ore roa ˈtu tatou e haamoe i ta Iehova i faaue mai, o te paruru ïa ia tatou. Ia tamau noa ïa tatou i te tutava i te ‘haapao i ta te Atua mau faaueraa, ia ora tatou,’ e a muri noa ˈtu.—Ioane 1, 2:17.

[Nota i raro i te api]

[Hohoˈa i te api 29]

Eaha to outou manaˈo i te mau ture a te mau metua?

[Hohoˈa i te api 31]

Te haapaoraa i te mau faaueraa a te Atua, o te ora ïa