E hinaaro rahi anei to outou i te mau haamanaˈoraa a Iehova?
E hinaaro rahi anei to outou i te mau haamanaˈoraa a Iehova?
“Te haapao nei tau varua i ta oe mau [haamanaˈoraa]; hinaaro rahi hoi to ˈu i te reira.”—SALAMO 119:167; MN.
1. Ihea iho â râ e itea mai ai ia tatou te mau faahitihitiraa i te mau haamanaˈoraa a Iehova?
TE HINAARO ra o Iehova ia oaoa to ˈna nunaa. Oia mau, no te fanaˈo i te oaoa mau, mea titauhia ia au to tatou haerea i te ture a te Atua e ia haapao i ta ˈna mau faaueraa. No reira oia e horoa mai ai i te mau haamanaˈoraa. E rave rahi taime te papairaahia te reira i roto i te Bibilia, i roto iho â râ i te Salamo 119, tei papaihia paha e Hezekia, te tamaiti hui arii apî no Iuda. E haamata teie himene nehenehe ma teie mau parau: “E ao to te feia haavare ore i te eˈa, o tei au te haerea i te ture a Iehova. E ao to tei haapao i ta ˈna [mau haamanaˈoraa], o tei imi ia ˈna ma te aau atoa ra.”—Salamo 119:1, 2; MN.
2. Nafea te mau haamanaˈoraa a te Atua i taaihia ˈi i te oaoa?
2 E ‘au to tatou haerea i te ture a Iehova’ na roto i te titauraa i te ite mau i ta ˈna Parau e te faaohiparaa ˈtu i roto i te oraraa. I te mea râ e mea tia ore tatou, e hinaaro ïa tatou i te mau haamanaˈoraa. Te faaite ra te taˈo Hebera tei hurihia ei “mau haamanaˈoraa” e e rave te Atua e ia haamanaˈo to tatou feruriraa i ta ˈna ture, mau parau faaue, mau faatureraa, e mau faaueraa. (Mataio 10:18-20) E oaoa noa tatou ia tamau tatou i te haapao i taua mau haamanaˈoraa ra, no te mea e tauturu te reira ia tatou ia ape i te mau marei pae varua o te faatupu i te ati e te oto.
Ia au roa tatou i te mau haamanaˈoraa a Iehova
3. Ia au i te Salamo 119:60, 61, eaha ta tatou e nehenehe e tiaturi?
3 Mea faufaa roa te mau haamanaˈoraa a te Atua no te papai salamo tei himene e: “Te haapeepee nei au, aore i faatautau, i te haapaoraa i ta oe ra mau parau. Ua haaatihia vau i te marei a te paieti ore; aita râ i moe ta oe ture ia ˈu nei.” (Salamo 119:60, 61) E tauturu te mau haamanaˈoraa a Iehova ia tatou ia faaruru i te hamani-ino-raa no te mea ua papu ia tatou e e nehenehe ta to tatou Metua i te raˈi e tâpû i te taura taotiaraa ta te mau enemi e taamu ra ia tatou. I te taime faataahia, e tatara mai oia ia tatou i taua mau haafifiraa ra ia nehenehe tatou e rave i te ohipa pororaa i te Basileia.—Mareko 13:10.
4. Ia nafea ïa tatou i mua i te mau haamanaˈoraa a te Atua?
4 I te tahi taime, e faatitiaifaro te mau haamanaˈoraa a Iehova ia tatou. Ia mauruuru noa ïa tatou i taua faatitiaifaroraa ra, mai ta te papai salamo i rave. Ua parau oia i te Atua na roto i te pure e: “O ta oe [mau haamanaˈoraa], o ta ˈu ïa e popou . . . I hinaaro atu ai au i ta oe ra mau [haamanaˈoraa].” (Salamo 119:24, 119; MN) Mea rahi aˈe ta te Atua mau haamanaˈoraa ia tatou i te papai salamo. Te haamanaˈo maira tau hanere irava o te mau Papai Hebera e vai ra i roto i te mau Papai Heleni, eiaha noa i te mau faaueraa a Iehova i to ˈna nunaa i raro aˈe i te Ture, i ta ˈna atoa râ mau opuaraa no nia i te amuiraa Kerisetiano. Ia ite te Atua e mea tano ia haamanaˈo mai ia tatou i te tahi mau mea tei taaihia i ta ˈna mau ture, e mauruuru tatou i taua aratairaa ra. E ia ‘au roa tatou i te mau [haamanaˈoraa] a Iehova,’ e ape ïa tatou i te mau faahemaraa a te hara o te haapeapea i to tatou Atua Poiete e o te faaere ia tatou i to tatou oaoa.—Salamo 119:31; MN.
5. Nafea tatou e hinaaro rahi ai i te mau haamanaˈoraa a Iehova?
5 Nafea tatou ia hinaaro i te mau haamanaˈoraa a Iehova? “Te haapao nei tau varua i ta oe mau [haamanaˈoraa]; hinaaro rahi hoi to ˈu i te reira,” ta te papai salamo ïa i himene. (Salamo 119:167; MN) E rahi to tatou hinaaro i te mau haamanaˈoraa a Iehova mai te peu e e faariro e e farii tatou i te reira mai te aˈoraa a te hoê Metua o te anaanatae mau ra ia tatou. (Petero 1, 5:6, 7) E hinaaro tatou i ta ˈna mau haamanaˈoraa, e e rahi to tatou hinaaro i te reira ia ite tatou e e faufaahia ˈtu tatou.
Te tumu e hinaaro ai tatou i te mau haamanaˈoraa a te Atua
6. Eaha te hoê tumu e hinaaro ai tatou i te mau haamanaˈoraa a Iehova, e eaha te tauturu ia tatou ia mehara ˈtu?
6 Hoê tumu e hinaaro ai tatou i te mau haamanaˈoraa a Iehova, oia hoi e moe ia tatou te tahi mau mea. Te na ô ra te hoê buka ite rahi (The World Book Encyclopedia) e: “E pinepine, te moe noa ˈtura i te taata te mau mea a mairi ai te tau. . . . Ua farerei aˈena paha outou i te hoê tupuraa e ua moe ia outou te hoê iˈoa aore ra te tahi atu â parau. . . . E parauhia teie ereraa taime poto o te mehara, o te tupu pinepine, te itea-ore-raa mai. E faaau te mau aivanaa i te reira i te tamataraa i te imi i te hoê taoˈa tei tuu-hape-hia i roto i te hoê piha tei huehia. . . . Hoê ravea maitai e haamanaˈo maitai ai outou i te hoê parau iti, o te faahohonuraa ïa i te reira maoro i muri aˈe i to outou manaˈoraa e ua ite maitai roa outou i te reira.” E tauturu mai te haapiiraa hohonu e te faahiti-faahou-raa ia mehara tatou i te mau haamanaˈoraa a te Atua e ia haapao atu no to tatou iho maitai.
7. No te aha e hinaaro-rahi-aˈe-hia ˈi te mau haamanaˈoraa a te Atua i teie mahana i na mua ˈˈe?
7 E hinaaro hau atu â tatou i te mau haamanaˈoraa a Iehova i teie mahana i na mua ˈˈe no te mea ua naea i te ino te mau faito teitei roa ˈˈe i roto i te tuatapaparaa o te taata. Ia haapao tatou i te mau haamanaˈoraa a te Atua, e noaa mai ia tatou te ite hohonu e hinaarohia ia ore tatou e hema i te mau eˈa iino o te ao. “Ite rahi to ˈu i to tau mau orometua atoa ra,” ta te papai salamo ïa i parau, “no te mea te feruri nei au i ta oe [mau haamanaˈoraa]. Ite rahi to ˈu i to te feia tahito ra; no te mea te haapao nei au i ta oe parau [faaue]. Te tapea nei au i o ˈu pue avae i te mau eˈa iino atoa ra, ia haapao vau i ta oe parau.” (Salamo 119:99-101; MN) Na roto i te haapaoraa i te mau haamanaˈoraa a te Atua, e ape tatou i “te mau eˈa iino atoa” e i te riro mai te mau rahiraa taata tei ‘haapourihia te manaˈo, e tei taa ê i te ora a te Atua.’—Ephesia 4:17-19.
8. Nafea tatou e ineine maitai aˈe ai i te faaruru ma te manuïa i te mau tamataraa i te faaroo?
8 Mea hinaaro-atoa-hia te mau haamanaˈoraa a te Atua no te mea e faaitoito te reira ia tatou ia faaoromai i to tatou mau fifi e rave rahi i teie nei “tau hopea.” (Daniela 12:4) Aita anaˈe taua mau haamanaˈoraa ra, e riro ïa tatou ei mau “taata e moina noa te parau ia faaroo ra.” (Iakobo 1:25) Area te haapiiraa hohonu i te Bibilia tatou anaˈe e i roto i te amuiraa maoti te mau papai a “te tavini haapao maitai e te paari,” e tauturu ïa ia tatou ia faaruru i te mau tamataraa i to tatou faaroo ma te manuïa. (Mataio 24:45-47) Maoti taua mau faanahoraa pae varua ra e nehenehe ai tatou e ite eaha te tia ia tatou ia rave e mauruuru ai Iehova ia farerei tatou i te mau huru tupuraa fifi roa.
Te tuhaa faufaa roa a ta tatou mau putuputuraa
9. O vai ma “te mau ô taata,” e nafea ratou e tauturu ai i te mau hoa faaroo?
9 I nia i te tahi faito, te haapaohia ra to tatou hinaaro i te mau haamanaˈoraa a te Atua i te mau putuputuraa Kerisetiano, i reira te haapiiraa e horoahia ˈi e te mau taeae i nominohia. Ua papai te aposetolo Paulo e i to Iesu ‘revaraa i nia ra e tiaa rahi tîtî ta ˈna i aratai, e ua horoa mai i te [“mau ô,” MN] taata nei.’ Ua parau â Paulo e: “Ua haapao [te Mesia] i te tahi pae ei aposetolo; e te tahi pae ei peropheta; e te tahi pae ei haapii evanelia; e te tahi pae ei tiai e ei orometua; ei faaau i te feia moˈa i te ohipa ra e orometua, ia tupu i te maitai te tino o te Mesia ra.” (Ephesia 4:8, 11, 12) Ia mauruuru ïa tatou i teie “mau ô taata”—te mau matahiapo i nominohia—o te huti nei i to tatou ara-maite-raa i nia i te mau haamanaˈoraa a Iehova ia amui tatou no te haamoriraa!
10. Eaha te manaˈo faufaa o te Hebera 10:24, 25?
10 E turai te mauruuru no te mau faanahoraa a te Atua ia tatou ia tae mai i ta tatou na pae putuputuraa a te amuiraa i te mau hebedoma atoa. Na Paulo i haamataratara i te faufaaraa ia amui tamau tatou. Ua papai oia e: “E haapao maite â tatou te tahi i te tahi, a faaaraara ˈtu ai ia rahi te aroha, o te rave i te mau ohipa maitatai ra: eiaha hoi e faarue i to tatou haaputuputuraa, mai ta te tahi pae ra peu, e faaitoito râ; e ia rahi atu â te faaitoito, no te mea te hiˈo na outou i taua mahana ra i te fatataraa mai.”—Hebera 10:24, 25.
11. Nafea tatou e faufaahia ˈi i ta tatou mau putuputuraa i te mau hebedoma atoa?
11 Ua taa anei ia outou eaha te faufaa o ta tatou mau putuputuraa no tatou? E haapuai te Haapiiraa o Te Pare Tiairaa i te mau hebedoma atoa i to tatou faaroo, e tauturu ia tatou ia faaau atu i te mau haamanaˈoraa a Iehova, e faaitoito ia tatou i mua i ‘te varua o teie nei ao.’ (Korinetia 1, 2:12; Ohipa 15:31) I te Putuputuraa no te Taatoaraa, e hohora te mau taeae orero i te haapiiraa o te Parau a te Atua, tae noa ˈtu i te mau haamanaˈoraa a Iehova e te mau “parau o te ora mure ore” faahiahia a Iesu. (Ioane 6:68; 7:46; Mataio 5:1–7:29) E haamaitaihia to tatou aravihi i te haapii i te Haapiiraa o te Taviniraa Teotaratia. Mea faufaa roa te Putuputuraa no te Taviniraa no te tauturu ia tatou ia haamaitai i ta tatou faaiteraa i te parau apî maitai na te mau fare, i roto i te mau hoˈi-faahou-raa e farerei, te mau haapiiraa Bibilia i te fare, e te tahi atu mau huru taviniraa. Na roto i te hoê pǔpǔ iti aˈe i te Haapiiraa Buka a te amuiraa, mea rahi aˈe to tatou taime maitai no te faahiti pinepine i te mau haamanaˈoraa a te Atua.
12, 13. Nafea te nunaa o te Atua i te hoê fenua no Asia i faaite ai i te mauruuru no te mau putuputuraa Kerisetiano?
12 E haamanaˈo mai te tae-tamau-raa i te mau putuputuraa a te amuiraa ia tatou i te mau faaueraa a te Atua e e tauturu mai ia puai noa tatou i te pae varua i mua i te tamaˈi, te fifi i te pae faanavairaa faufaa, e te tahi atu â mau tamataraa i to tatou faaroo. Ua ite maitai na 70 Kerisetiano no te hoê fenua no Asia, tei tiahihia i rapaeau i to ratou fare e tei tia ˈtura ia noho i roto roa i te uru raau, i te faufaaraa o te mau putuputuraa. Ua faaoti papu ratou e amui tamau noa, no reira, ua hoˈi ratou i to ratou oire tei vavahihia e te tamaˈi, ua tataratara i te mau mea e toea ra o te Piha a te Basileia, e ua hamani i te tahi atu i roto i te uru raau.
13 I muri aˈe i te faarururaa tau matahiti tamaˈi i te tahi atu vahi o taua noâ fenua ra, te tavini noa ra te nunaa o Iehova ma te itoito. Ua anihia i te hoê o te mau matahiapo i taua vahi ra e: “Eaha tei tauturu roa ˈˈe i te tahoê noa i te mau taeae?” Ta ˈna pahonoraa? “Aita roa ˈtu matou i vaiiho hoê noa ˈˈe putuputuraa, 19 matahiti i te maoro. I te tahi taime, no te topitaraa aore ra te tahi atu mau fifi, eita te tahi mau taeae e tae mai i te vahi putuputuraa, aita râ matou i faaore aˈenei i te hoê putuputuraa.” Ua taa maitai i teie mau taeae e mau tuahine here te faufaaraa ‘eiaha e faarue i ta ratou haaputuputuraa.’
14. Eaha ta tatou e nehenehe e haapii na roto i te peu matau a te ruhiruhia ra o Ana?
14 “Aore roa” te vahine ivi ra o Ana, e 84 matahiti, “i faarue i te hiero.” Ei faahopearaa, to reira oia i to te aiû ra o Iesu afairaahia ˈtu i muri iti noa ˈˈe i to ˈna fanauraa. (Luka 2:36-38) Ua faaoti papu anei outou eiaha e mairi i te mau putuputuraa? Te tutava maite ra anei outou i te tae i te mau rururaa atoa o ta tatou mau tairururaa? E horoa mai te haapiiraa faufaa i te pae varua e fanaˈohia ra i teie mau haaputuputuraa i te haapapuraa maramarama maitai e te haapao ra to tatou Metua i te raˈi i to ˈna nunaa. (Isaia 40:11) E faatupu atoa taua mau taime maitai ra i te oaoa, e e faaite to tatou taeraa mai i to tatou mauruuru i te mau haamanaˈoraa a Iehova.—Nehemia 8:5-8, 12.
Faataa-ê-hia e te mau haamanaˈoraa a Iehova
15, 16. Eaha te faahopearaa o te haapaoraa i te mau haamanaˈoraa a Iehova i nia i to tatou haerea?
15 E tauturu te haapaoraa i te mau haamanaˈoraa a te Atua i te faataa ê ia tatou i teie nei ao ino. Ei hiˈoraa, e paruru te haapaoraa i te mau haamanaˈoraa a te Atua ia tatou eiaha e rave i te peu taatiraa tia ore. (Deuteronomi 5:18; Maseli 6:29-35; Hebera 13:4) Ia faaau tatou ia tatou iho i te mau haamanaˈoraa a te Atua, e ore oioi noa te faahemaraa e haavare, e rave i te hoê haerea parau-tia ore, aore ra e eiâ. (Exodo 20:15, 16; Levitiko 19:11; Maseli 30:7-9; Ephesia 4:25, 28; Hebera 13:18) E tapea atoa te haapaoraa i te mau haamanaˈoraa a Iehova ia tatou eiaha e tahoo, e inoino, aore ra e faaino i te hoê taata.—Levitiko 19:16, 18; Salamo 15:1, 3.
16 Na roto i te haapaoraa i te mau haamanaˈoraa a te Atua e vai moˈa aore ra e faataa-ê-noa-hia ˈi tatou no ta ˈna taviniraa. E mea faufaa hoi ia faataa ê mai tatou i teie nei ao! I to ˈna pureraa ia Iehova i te po hopea o to ˈna oraraa i nia i te fenua, ua taparuparu Iesu no ta ˈna mau pǐpǐ: “Ua tuu atu vau i ta oe parau ia ratou, e te riri nei to te ao nei ia ratou, no te mea e ere ratou i to teie nei ao, mai ia ˈu nei hoi e ere i to teie nei ao ra. Aore au i pure ia oe e ia hopoi ê atu oe ia ratou i teie nei ao, ia tiai mai râ oe ia ratou eiaha ei ino. E ere ratou i to teie nei ao, mai ia ˈu nei hoi e ere i to teie nei ao. E haamaitai oe ia ratou i te parau mau na oe; o to parau na te parau mau.” (Ioane 17:14-17) Ia tamau noa tatou i te poihere i te Parau a te Atua, o te faataa ê ia tatou no ta ˈna taviniraa moˈa.
17. Eaha te nehenehe e tupu ia ore tatou e tâuˈa i te mau haamanaˈoraa a te Atua, eaha ïa ta tatou e rave?
17 E hinaaro tatou, te mau tavini a te Atua, ia au noa tatou no ta ˈna taviniraa. Ia ore râ tatou e tâuˈa i te mau haamanaˈoraa a te Atua, e nehenehe tatou e riro i te varua o teie nei ao, e faaitoito-rahi-hia ra i roto i ta ˈna huru paraparau, mau papai, mau faaanaanataeraa, e to ˈna haerea. E papu maitai, eita tatou e hinaaro e riro ei taata nounou moni, faaahaaha, teoteo, mauruuru ore, viivii, iria, mârô, faateitei, e te hinaaro i te mau mea e navenave ai ra aore hinaaro i te Atua—te tahi noa mau huru teie o te feia tei atea ê i te Atua. (Timoteo 2, 3:1-5) I te mea e te ora nei tatou i roto roa ino i te tau hopea o teie faanahoraa ino o te mau mea, ia tamau ïa tatou i te pure no te ani i te tauturu a te Atua ia nehenehe tatou e haapao noa i te mau haamanaˈoraa a Iehova, e ‘faaau atu ai i to tatou haerea i ta ˈna parau.’—Salamo 119:9.
18. E turai te haapaoraa i te mau haamanaˈoraa a te Atua ia tatou ia rave i teihea mau taahiraa avae maitatai?
18 Eita noa te mau haamanaˈoraa a Iehova e faaara mai ia tatou no nia i te mea eiaha tatou e rave. E turai atoa te haapaoraa i ta ˈna mau haamanaˈoraa ia tatou ia rave i te mau ohipa maitatai, ia tiaturi noa ia Iehova, e ia here ia ˈna ma to tatou aau, to tatou nephe, to tatou manaˈo, e to tatou puai atoa. (Deuteronomi 6:5; Salamo 4:5; Maseli 3:5, 6; Mataio 22:37; Mareko 12:30) E faaitoito atoa te mau haamanaˈoraa a te Atua ia tatou ia aroha i to tatou taata-tupu. (Levitiko 19:18; Mataio 22:39) E faaite iho â râ tatou i te here i te Atua e te taata-tupu na roto i te raveraa i te hinaaro o te Atua e te horoaraa na vetahi ê i “te ite” faaora “i te Atua.”—Maseli 2:1-5.
Te haapaoraa i te mau haamanaˈoraa a Iehova, o te ora ïa!
19. Nafea tatou e faaite ai ia vetahi ê e mea maitai ia haapao i te mau haamanaˈoraa a Iehova?
19 Ia haapao tatou i te mau haamanaˈoraa a Iehova e ia tauturu ia vetahi ê ia na reira, e ora tatou e te feia atoa e faaroo mai ia tatou. (Timoteo 1, 4:16) Nafea tatou e nehenehe ai e faaite ia vetahi ê e mea maitai mau â ia haapao i te mau haamanaˈoraa a Iehova? Na roto ïa i te faaohiparaa i te mau faaueraa tumu Bibilia i roto i to tatou iho oraraa. Mea na reira te feia “[i au to ratou huru] no te ora mure ore” e ite papu ai e o te haerea e faataahia ra i roto i te Parau a te Atua te haerea maitai roa ˈˈe e tapi. (Ohipa 13:48; MN) E ite atoa ratou e ‘tei rotopu mau â te Atua ia tatou’ e e turaihia ratou ia apiti mai ia tatou i roto i te haamoriraa i te Arii e Fatu ra o Iehova.—Korinetia 1, 14:24, 25.
20, 21. Maoti te mau haamanaˈoraa a te Atua e to ˈna varua moˈa e nehenehe ai tatou e rave i te aha?
20 Na roto i te haapii-tamau-raa i te mau Papai, te faaohiparaa i ta tatou e haapii ra, e te fanaˈo-hope-raa i te mau faanahoraa pae varua a Iehova, e rahi mai to tatou hinaaro i ta ˈna mau haamanaˈoraa. Ia haapaohia te reira, e tauturu teie mau haamanaˈoraa ia tatou ia ahu i “te huru taata apî o tei poietehia ia au i te hinaaro o te Atua ma te parau-tia e te haapao maitai mau.” (Ephesia 4:20-24, MN) E tauturu te mau haamanaˈoraa a Iehova e to ˈna varua moˈa ia tatou ia faaite i te here, te oaoa, te hau, te faaoromai, te mǎrû, te maitai, te faaroo, te mamahu, te hitahita ore—e mau huru maitatai teie tei taa ê roa i te mau huru o te ao e faaterehia ra e Satani! (Galatia 5:22, 23; Ioane 1, 5:19) No reira, e nehenehe tatou e mauruuru ia haamanaˈohia mai tatou i te mau titauraa a Iehova na roto i ta tatou haapiiraa Bibilia taitahi, te mau matahiapo i nominohia, e ta tatou mau putuputuraa e mau tairururaa.
21 No te mea e e haapao tatou i te mau haamanaˈoraa a Iehova, e noaa ia tatou te oaoa i roto atoa i te mauiui no te parau-tia. (Luka 6:22, 23) E fariu tatou i nia i te Atua no te tatara ia tatou i te mau huru tupuraa riaria roa ˈˈe. Mea faufaa iho â te reira i teie mahana, inaha te haaputuputuhia ra te mau nunaa atoa no “te tamaˈi i taua mahana rahi o te Atua Puai hope ra” i Aramagedo.—Apokalupo 16:14-16.
22. Eaha ta tatou faaotiraa papu no nia i te mau haamanaˈoraa a Iehova?
22 No te fanaˈo i te ô maitai rahi o te ora mure ore, mea titauhia ia hinaaro rahi tatou i te mau haamanaˈoraa a Iehova e ia haapao atu ma te aau atoa. Ia rave mai ïa tatou i te huru feruriraa o te papai salamo o tei himene e: “Te tia o ta oe [mau haamanaˈoraa], e mea mure ore ïa: e haapii mai ia ˈu i te reira ia ora vau.” (Salamo 119:144; MN) E ia faaite ïa tatou i te faaotiraa papu e itehia ra i roto i te mau parau a te papai salamo: “Te tiaoro nei au ia oe [Iehova]; e faaora oe ia ˈu; e haapao ïa vau i ta oe ra mau [“haamanaˈoraa,” MN].” (Salamo 119:146) Oia, na roto i te parau e te ohipa, ia haapapu tatou e e hinaaro rahi iho â to tatou i te mau haamanaˈoraa a Iehova.
Nafea outou ia pahono?
• Eaha te manaˈo o te papai salamo i te mau haamanaˈoraa a Iehova?
• No te aha tatou e hinaaro ai i te mau haamanaˈoraa a te Atua?
• Eaha te tuhaa a ta tatou mau putuputuraa no nia i te mau haamanaˈoraa a te Atua?
• Nafea te mau haamanaˈoraa a Iehova e faataa ê ai ia tatou i teie nei ao?
[Uiraa haapiiraa]
[Hohoˈa i te api 15]
E hinaaro rahi to te papai salamo i te mau haamanaˈoraa a Iehova
[Hohoˈa i te mau api 16, 17]
Ia au i te hiˈoraa o Ana, e ara anei tatou eiaha e mairi i te mau putuputuraa?
[Hohoˈa i te api 18]
E faataa ê te haapaoraa i te mau haamanaˈoraa a Iehova ia tatou ei mau taata mâ e te au no ta ˈna taviniraa