A tauturu ia vetahi ê ia au to ratou haerea ia Iehova

‘I ore ai matou i faaea i te pure ia outou, e te aniraa ˈtu e ia au to outou haereaia Iehova i te mau mea atoa e mauruuru ai ra, ia tupu te mau ohipa maitatai ia outou.’—KOLOSA 1:9, 10.

1, 2. Eaha iho â râ te nehenehe e riro ei tumu no te oaoa e te mauruuru?

 “TE FAAEA nei mâua i roto i te hoê nohoraa tavere i roto i te hoê fare faaapu. Maoti to mâua oraraa ohie, mea rahi atu â to mâua taime no te faaite i te parau apî maitai i te taata. Ua haamaitai-rahi-hia mâua i te fanaˈoraa taa ê e tauturu i te taata e rave rahi ia pûpû i to ratou oraraa na Iehova.”—Nau tavini taime taatoa faaipoipo i Afirika Apatoa.

² Eita anei outou e parau atoa e e hopoi mai te tautururaa ia vetahi ê i te oaoa? Te tamata noa ra vetahi pae i te tauturu i te feia maˈi, te feia e erehia ra, aore ra e moemoe ra—a ite atu ai i te oaoa i te na reiraraa. Ua papu i te mau Kerisetiano mau e o te faaiteraa i te ite i te Atua ra o Iehova e ia Iesu Mesia ia vetahi ê te tauturu rahi roa ˈˈe ta ratou e nehenehe e horoa. Mea na reira noa vetahi ê e farii ai i te hoo o Iesu, e faatupu ai i te hoê taairaa maitai e te Atua, e nehenehe atu ai e fanaˈo i te ora mure ore.—Ohipa 3:19-21; 13:48.

3. Eaha te huru tauturu e au ia haapao tatou?

³ Eaha râ no nia i te tautururaa i te feia e tavini aˈena ra i te Atua a pee atu ai i “Te Eˈa”? (Ohipa 19:9, MN) Aita e feaaraa, e anaanatae rahi to outou ia ratou, aita râ paha outou i ite nafea ia rave hau atu â aore ra ia tauturu atu â ia ratou. Aore ra e au ra paha e te taotia ra to outou huru oraraa ia outou no te tauturu ia ratou, a faaiti atu ai i te oaoa e nehenehe e noaa mai ia outou. (Ohipa 20:35) No nia i na tuhaa e piti, e nehenehe tatou e haapii mai na roto i te buka Kolosa.

4. (a) Ua papai atu Paulo i to Kolosa i roto i teihea mau huru tupuraa? (b) Eaha te taairaa o te reira e o Epaphera?

⁴ I to te aposetolo Paulo papairaa ˈtu i te mau Kerisetiano i Kolosa, tei Roma oia i roto i te fare tapearaa, e nehenehe râ te taata e haere e hiˈo ia ˈna. Mai ta outou e nehenehe e manaˈo, ua faaohipa Paulo i to ˈna tiamâraa taotiahia no te poro i te Basileia o te Atua. (Ohipa 28:16-31) E nehenehe te mau hoa Kerisetiano e haere e hiˈo ia Paulo, peneiaˈe ia vetahi atoa tei tapeahia e o ˈna i te tahi mau taime. (Kolosa 1:7, 8; 4:10) O Epaphera te hoê, e taata poro evanelia itoito oia no te oire o Kolosa i Pherugia, i te vahi papu teitei hitia o te râ o Ephesia i Asia Iti (Turekia i teie tau). Maoti o Epaphera i haamauhia ˈi te hoê amuiraa i Kolosa, e ua haa oia no te mau amuiraa i na oire tapiri o Laodikea e Hierapoli. (Kolosa 4:12, 13) No te aha Epaphera i reva ˈi e hiˈo ia Paulo i Roma, e eaha ta tatou e nehenehe e haapii na roto i te pahonoraa a Paulo?

Tauturu mau no to Kolosa

5. No te aha Paulo i papai ai i te mau mea ta ˈna i rave no to Kolosa?

⁵ No te tauaparau e o Paulo no nia i te mau ohipa e tupu ra i roto i te amuiraa no Kolosa, ua rave o Epaphera i te hoê tere fifi roa i Roma. Ua faaite atu oia i te faaroo, te here o taua mau Kerisetiano ra, e ta ratou mau tutavaraa e poro i te evanelia. (Kolosa 1:4-8) Eita râ e ore e ua faaite atoa oia i to ˈna haapeapearaa no te mau mana iino e haamǎtaˈu ra i te huru pae varua o to Kolosa. Ua pahono o Paulo na roto i te hoê rata faauruahia o tei patoi i te tahi mau manaˈo ta te mau orometua haapii haavare e haaparare ra. Ua onoono iho â râ oia i nia i te tuhaa faufaa ta Iesu Mesia e rave. *  Tera noa anei ta ˈna tauturu, te onoonoraa i nia i te mau parau mau faufaa o te Bibilia? Nafea ˈtu â oia e nehenehe ai e tauturu i to Kolosa, e eaha te mau haapiiraa e huti mai no nia i te tautururaa ia vetahi ê?

6. Eaha ta Paulo i haamataratara i roto i ta ˈna rata i to Kolosa?

⁶ Ei omuaraa i ta ˈna rata, ua faaite Paulo i te hoê huru tauturu ta tatou paha e haamoe. E ravea mau teie no te horoa i te tauturu mai te hoê vahi atea ˈtu, inaha mea atea Paulo raua o Epaphera i te oire no Kolosa. Ua parau Paulo e: “Te haamaitai nei mâua i te Atua, i te Metua o to tatou Fatu o Iesu Mesia, ma te pure tamau â ia outou.” Oia, e mau pure taa maitai teie no te mau Kerisetiano i Kolosa. Ua parau â Paulo e: “I ore atoa ˈi matou i faaea ˈi i te pure ia outou, mai te mahana mai â i ite ai matou ra, e te aniraa ˈtu e ia faaîhia mai outou i te ite i to ˈna ra hinaaro, i te paari i te mau mea atoa, e te ite varua ra.”—Kolosa 1:3, 9.

7, 8. Eaha te faahiti-pinepine-hia i roto i ta tatou iho mau pure e i ta te amuiraa?

⁷ Ua ite tatou e o Iehova “tei faaroo i te pure,” e nehenehe ïa tatou e tiaturi e e aau tae to ˈna e faaroo i ta tatou mau pure tei pûpûhia ia au i to ˈna hinaaro. (Salamo 65:2; 86:6; Maseli 15:8, 29; Ioane 1, 5:14) Ia pure râ tatou no vetahi ê, eaha te huru o ta tatou mau pure?

⁸ E pinepine paha tatou i te manaˈonaˈo e i te pure no ‘to tatou mau taeae atoa i te ao nei.’ (Petero 1, 5:9) Aore ra e paraparau paha tatou ia Iehova no nia i te mau Kerisetiano e vetahi ê atu e noho ra i te hoê fenua tei roohia i te ati. A faaroo ai te mau pǐpǐ no te senekele matamua no te tahi atu vahi e e oˈe to Iudea, eita e ore e ua pûpû ratou e rave rahi pure no to ratou mau taeae na mua ˈˈe atoa ratou i afai atu ai i te moni tauturu. (Ohipa 11:27-30) I to tatou tau, e faaroo-pinepine-hia te mau pure no nia i te mau taeae atoa aore ra te hoê pǔpǔ taeae rahi i te mau putuputuraa Kerisetiano, i reira e rave rahi e hinaaro ai e maramarama e e parau “Amene.”—Korinetia 1, 14:16.

Ia papu ta tatou mau pure

9, 10. (a) Eaha te mau hiˈoraa e faaite ra e mea tano ia pure no te tahi mau taata taa maitai? (b) Nafea te pure-taa-ê-raahia no Paulo?

⁹ Te horoa mai ra râ te Bibilia i te tahi mau hiˈoraa o te mau pure papu atu â no te tahi mau taata taa maitai. A feruri na i te tatararaa a Iesu i roto i te Luka 22:31, 32. Tei pihai iho oia i na 11 aposetolo haapao maitai. E hinaaro ratou paatoa i te turu a te Atua i roto i te mau taime fifi e haere maira, e ua pure Iesu no ratou. (Ioane 17:9-14) Tera râ, ua taparuparu taa ê o Iesu no te pǐpǐ ra o Petero. Te tahi atu â mau hiˈoraa: Ua pure o Elisaia e ia tauturu te Atua i te hoê taata taa maitai, ta ˈna tavini. (Mau arii 2, 6:15-17) Ua pure te aposetolo Ioane e ia maitai noa o Gaio i te pae tino e te pae varua. (Ioane 3, 1, 2) E ua faataehia te tahi atu â mau pure no te tahi mau pǔpǔ taata taa maitai.—Ioba 42:7, 8; Luka 6:28; Ohipa 7:60; Timoteo 1, 2:1, 2.

¹⁰ Te haamataratara ra te mau rata a Paulo i te tumu parau o te mau pure taa maitai roa. Ua ani oia e ia purehia no ˈna aore ra no ˈna e to ˈna mau apiti. Te na ô ra te Kolosa 4:2, 3 e: “E tamau maite i te pure, e faaitoito i te reira ma te haamaitai i te Atua: e ma te pure atoa hoi ia matou, ia iriti te Atua i te opani parauraa na matou, ia parau matou i te parau aro o te Mesia, i tapeahia ˈi au nei.” A rave atoa i teie mau hiˈoraa: Roma 15:30; Tesalonia 1, 5:25; Tesalonia 2, 3:1; Hebera 13:18.

11. I Roma, te pure ra o Epaphera no vai?

¹¹ Hoê â huru no te apiti o Paulo i Roma. “O Epaphera, . . . no ǒ na ia outou, te aroha ˈtu nei ia outou, e te tautoo-maite-raa i te pure ia outou aita e faaea.” (Kolosa 4:12) E nehenehe te taˈo tei hurihia ei ‘tautooraa’ e faataahia mai te hoê “tutavaraa puai,” mai ta te hoê taata faaetaeta tino i roto i te mau hauti no tahito ra. Ua pure uˈana noa anei o Epaphera no te feia faaroo na te ao atoa nei aore ra no te feia haamori mau atoa e ati aˈe i Asia Iti? Ua faaite o Paulo e ua pure taa ê o Epaphera no to Kolosa. Ua ite o Epaphera i to ratou fifi. Aita tatou i ite i to ratou iˈoa atoa e to ratou mau fifi, e nehenehe râ tatou e feruri i te tahi mau tupuraa. Peneiaˈe,  te aro ra te taata apî ra o Lino i te mana o te mau philosophia e parare ra e te hinaaro ra paha o Rupho i te puai no te patoi i te mau peu tahito au roa ta ˈna i rave na i roto i te haapaoraa ati Iuda. I te mea e e tane faaroo ore ta ˈna, ua hinaaro anei o Peresi i te faaoromai e te paari no te aratai i ta ˈna mau tamarii i roto i te Fatu, e ua hinaaro anei o Asunekerito, o te faaruru ra i te hoê maˈi pohe, i te tamahanahanaraa hau? Oia, ua matau o Epaphera i te feia o ta ˈna amuiraa, e ua pure maite oia no ratou no te mea ua hinaaro raua o Paulo e ia au te haerea o taua feia pûpûhia ra ia Iehova.

12. Nafea tatou e haapapu atu â ˈi i ta tatou mau pure o tatou anaˈe?

¹² Te taa ra anei ia outou te hiˈoraa no tatou—nafea ia tauturu ia vetahi ê? Mai tei faaitehia ˈtu, e pinepine e ere te mau pure i mua i te taata i te mau putuputuraa Kerisetiano i te mea taa maitai, i te mea e ua rau te taata e faaroo ra. Area ta tatou mau pure tatou noa iho aore ra e te utuafare, e nehenehe ïa tatou e haapapu. I te tahi taime, e ani paha tatou i te Atua ia aratai e ia haamaitai oia i te mau tiaau ratere aore ra te mau tiai mamoe pae varua atoa, eita anei tatou e nehenehe e haapapu? Ei hiˈoraa, no te aha e ore ai e faahiti i te iˈoa o te tiaau haaati e tere maira i roto i ta tatou amuiraa aore ra o te taeae faatere i ta tatou haapiiraa buka a te amuiraa i roto i te pure? Te faaite ra te Philipi 2:25-28 e te Timoteo 1, 5:23 i te haapeapearaa o Paulo no te ea o Timoteo e o Epapherodito. E nehenehe atoa anei tatou e faaite i te hoê â anaanatae i te feia maˈi ua ite tatou i to ratou iˈoa?

13. Eaha te mau huru tupuraa e tano ia faahiti atoa i roto i ta tatou iho mau pure?

¹³ Parau mau, eiaha roa ˈtu tatou e faaô i roto i te oraraa o vetahi ê, e tano râ na roto i ta tatou mau pure, ia faaite tatou i te anaanatae mau i te feia ta tatou i matau e e haapao ra. (Timoteo 1, 5:13; Petero 1, 4:15) Ua ere paha i te hoê taeae i ta ˈna ohipa, e eita ta tatou e nehenehe e horoa i te tahi atu ohipa na ˈna. E nehenehe râ tatou e faahiti i to ˈna iˈoa e e onoono i nia i to ˈna fifi i roto i ta tatou iho mau pure. (Salamo 37:25; Maseli 10:3) Ua matau anei tatou i te hoê tuahine taa noa e ruhiruhia oia i teie nei aita e tane e aita e tamarii no te mea ua faaoti oia e faaipoipo “i roto noa i te Fatu”? (Korinetia 1, 7:39, MN) I roto i ta outou mau pure o outou anaˈe, no te aha e ore ai e ani ia Iehova ia haamaitai e ia tauturu ia ˈna ia haapao maitai noa oia i ta ˈna taviniraa? Te tahi atu hiˈoraa, ua aˈo paha e piti matahiapo i te hoê taeae tei hara. No te aha raua toopiti e ore ai e faahiti i to ˈna iˈoa i roto i ta raua mau pure o raua anaˈe i te tahi taime?

14. Nafea te mau pure taa maitai e taaihia ˈi i te tautururaa ia vetahi ê?

¹⁴ Mea rahi ta outou mau ravea no te faaô, i roto i ta outou iho mau pure, i te feia ta outou i matau, o te hinaaro ra i te turu a Iehova, ta ˈna tamahanahanaraa, to ˈna paari, e to ˈna varua moˈa, aore ra te hoê o to ˈna mau hotu. No te atea aore ra te tahi atu â mau tupuraa, eita paha ta outou e nehenehe e tauturu roa ˈtu i te pae materia. Eiaha râ e haamoe i te pure no to outou mau taeae e mau tuahine. Ua ite outou e te hinaaro ra ratou ia au to ratou haerea ia Iehova, i te tauturu atoa râ no te na reira e a muri noa ˈtu. O ta outou ïa mau pure te hoê ravea.—Salamo 18:2; 20:1, 2; 34:15; 46:1; 121:1-3.

A haa i te haamahanahana ia vetahi ê

15. No te aha tatou e anaanatae ai i te tuhaa hopea o te rata na to Kolosa?

¹⁵ Papu maitai, e ere o te pure uˈana taa maitai te ravea hoê roa no te tauturu ia vetahi ê, tei herehia iho â râ. O ta te buka Kolosa ïa e haamaramarama maitai maira. Ia au i te mau aivanaa e rave rahi, i  muri aˈe i to Paulo horoaraa i te aveia i te pae haapiiraa e te aˈoraa e au ia faaohipahia, ua papai atoa oia i te mau aroharaa. (Kolosa 4:7-18) I te tahi aˈe pae, ua itea aˈena ia tatou e e mau aˈoraa faahiahia to roto i teie tuhaa hopea o te buka, e mea rahi atu â te haapiiraa e huti mai.

16, 17. Eaha ta tatou e nehenehe e parau no nia i te mau taeae i papaihia i roto i te Kolosa 4:10, 11?

¹⁶ Ua papai Paulo e: “Te aroha ˈtu nei Arisetareho i tapea-atoa-hia mâua nei ia outou, e te tamaiti a te tuahine o Baranaba ra o Mareko, (o tei poroihia ˈtu ia outou na; i tae atu oia i ǒ na ia outou na, e ite maitai mai:) e o Iesu hoi, o tei parauhia o Iuseto ra, no te peritome ratou. O ratou anaˈe ra tei rave atoa mai i te ohipa i te basileia o te Atua nei; e o ratou tei haamahanahana mai ia ˈu nei.”—Kolosa 4:10, 11.

¹⁷ I reira, te faaite ra o Paulo i te iˈoa o te tahi mau taeae faahiahia. Ua parau oia e tei rotopu ratou i te mau ati Iuda tei peritomehia. Mea rahi te mau ati Iuda tei peritomehia i Roma, e e mau Kerisetiano te vetahi i teie nei. Area ra te feia ta Paulo i faahiti, ua tauturu ïa ia ˈna. Aita paha ratou i haamarirau i te amui e te mau Kerisetiano Etene, e eita e ore e ua poro ratou e o Paulo ma te oaoa i to te Etene.—Roma 11:13; Galatia 1:16; 2:11-14.

18. Nafea to Paulo haapopouraa i te vetahi tei vai na i pihai iho ia ˈna?

¹⁸ A tapao na i te tatararaa a Paulo: “O ratou tei haamahanahana mai ia ˈu nei.” Ua rave oia i te hoê taˈo Heleni e itehia ra i teie noa taime i roto i te Bibilia. Mea rahi te feia huri o te iriti atu ei “tamahanahanaraa.” Te vai ra râ te tahi atu taˈo Heleni (pa·ra·ka·leˈo) tei huri-pinepine-hia ei “tamahanahanaraa.” Ua faaohipa Paulo i te reira i te tahi atu vahi i roto i teie noa rata, eiaha râ i roto i te Kolosa 4:11.—Mataio 5:4; Ohipa 4:36; 9:31; Korinetia 2, 1:4; Kolosa 2:2; 4:8.

19, 20. (a) Eaha te auraa o te parau ta Paulo i faaau i te mau taeae e tauturu ra ia ˈna i Roma? (b) Nafea taua mau taeae ra i tauturu ai ia Paulo?

 ¹⁹ Eita e ore e aita noa te feia ta Paulo i faahiti i te iˈoa i horoa i te tahi parau tamahanahanaraa. I te tahi taime, e faaohipahia te taˈo Heleni tei hurihia ei “haamahanahana” i roto i te mau buka a to te ao no te hoê raau o te tamǎrû i te mauiui. Te na ô ra te Parole vivante e: “Auê ïa tauturu mau ratou no ˈu!” e te Stapfer: “Ua riro ratou ei tauturu rahi no ˈu.” Eaha ta taua mau taeae Kerisetiano i pihai iho ia Paulo ra i rave no te tauturu ia ˈna?

²⁰ E nehenehe Paulo e farii i te mau ratere, mea rahi râ te mau mea eita e noaa ia ˈna i te rave, mai te hooraa mai i te mau mea faufaa ta ˈna e hinaaro—te maa e te ahu no te tau toetoe. Nafea te noaaraa ia ˈna te mau otaro no te haapii aore ra to ˈna hooraa mai i te mau mea no te papai? (Timoteo 2, 4:13) Eita anei outou e nehenehe e feruri e na taua mau taeae ra i haapao i te mau hinaaro o Paulo, mai te hooraa mai i te mau mea no ˈna? Ua hinaaro paha oia e hiˈopoa e e faaitoito i te hoê amuiraa. I te mea hoi e ua tapeahia oia, eita ïa ta ˈna e nehenehe, no reira, na taua mau taeae paha i tere atu no Paulo no te faatae atu i te mau poroi e no te faahoˈi mai i te mau parau faataa. Auê ïa haamahanahanaraa mau e!

21, 22. (a) No te aha tatou e anaanatae ai i te mau parau i roto i te Kolosa 4:11? (b) Eaha te tahi mau ravea e pee ai tatou i te hiˈoraa o te feia i parahi i pihai iho ia Paulo?

²¹ Te faaite maira te mea ta Paulo i papai no nia i te riroraa ei ‘haamahanahanaraa’ nafea tatou e tauturu ai ia vetahi ê. Te au ra paha to ratou haerea ia Iehova no nia i ta ˈna mau ture morare, te haere ra paha ratou i te mau putuputuraa Kerisetiano, e te rave ra i te ohipa pororaa. No reira, e au mau ia ratou ta tatou mau parau haamauruururaa. E nehenehe anei râ tatou e rave hau atu â, e riro ei ‘haamahanahanaraa’ mai tei na reira i nia ia Paulo?

²² Mai te peu e ua matau outou i te hoê tuahine o te haapao maite ra i te Korinetia 1, 7:37, i teie nei râ, aita e fetii i pihai iho ia ˈna, e nehenehe anei outou e titau manihini ia ˈna i te tahi mau ohipa a te utuafare, peneiaˈe ma te ani ia ˈna e haere mai e tamaa  aore ra i te tahi mau haaputuputuraa iti e te mau hoa aore ra te mau fetii? No te aha e ore ai e ani ia ˈna ia haere i te hoê tairururaa aore ra i te hoê tau faafaaearaa e to outou utuafare? Aore ra a ani ia ˈna ia apee ia outou i te hoê taime e tano ia haere outou e hoo mai i te maa. E au atoa te reira no te mau vahine aore ra te mau tane ivi, aore ra no te feia paha eita ta ratou e nehenehe e faahoro i te pereoo. E ite outou e mea maitai ia faaroo i to ratou aamu aore ra ia haapii mai ratou i te tahi mau mea matauhia mai te maitiraa i te hotu aore ra te ahu no te mau tamarii. (Levitiko 19:32; Maseli 16:31) O te auhoaraa piri roa iho â paha ïa te faahopearaa. No reira, eita paha ratou e haama i te ani i ta outou tauturu ia hinaaro ratou i te tahi raau i te fare raau, aore ra mai te reira te huru. Eita e ore e e haamahanahanaraa mau ta te mau taeae i pihai iho ia Paulo i Roma, i horoa, mai ta outou atoa. Te tahi atu â haamaitairaa, i taua tau ra e i teie mahana, o te haapaari-atu-â-raa ïa i te taairaa o te here e te faaotiraa papu atu â e tavini amui ia Iehova ma te haapao maitai.

23. Mea maitai ia rave tatou taitahi i te taime no te aha?

²³ E nehenehe tatou taitahi e feruri i te mau huru tupuraa i faahitihitihia i roto i teie tumu parau. E mau hiˈoraa noa teie, e nehenehe râ te reira e haamanaˈo mai ia tatou i te mau huru tupuraa mau i reira tatou e nehenehe ai e riro atu â ei ‘haamahanahanaraa’ no to tatou mau taeae e mau tuahine. Te manaˈo, e ere ïa ia pee tatou i te haerea o te feia tauturu. E ere te reira te fa a te mau taeae tei faahitihia i roto i te Kolosa 4:10, 11. E mau ‘hoa ohipa ratou no te basileia o te Atua.’ Ua taai-roa-hia te ohipa haamahanahanaraa i te reira. Mai te reira atoa ïa no outou.

24. Eaha te tumu matamua e pure ai tatou no vetahi ê e e imi ai i te haamahanahana ia ratou?

²⁴ E faahiti tatou i te iˈoa o vetahi ê i roto i ta tatou mau pure o tatou anaˈe e e tutava i te haamahanahana ia ratou no te mea: Te tiaturi nei tatou e te hinaaro ra to tatou mau taeae e mau tuahine ‘ia au to ratou haerea ia Iehova i te mau mea atoa e mauruuru ai oia ra.’ (Kolosa 1:10) Ua taaihia teie parau i te tahi atu ohipa ta Paulo i faaite a papai ai oia no nia i te mau pure a Epaphera no to Kolosa, oia hoi ‘ia mau maite â ratou ma te nehenehe, e te î i te mau hinaaro atoa o te Atua ra.’ (Kolosa 4:12) Nafea tatou iho e nehenehe ai e na reira? E ite atu tatou i mua nei.

[Nota i raro i te api]

Ua tapao anei outou?

• Nafea tatou e tauturu atu â ˈi i roto i ta tatou mau pure o tatou anaˈe?

• I roto i teihea auraa i riro ai te tahi mau Kerisetiano ei ‘haamahanahanaraa’ no Paulo?

• I roto i teihea mau tupuraa e nehenehe ai tatou e riro ei ‘haamahanahanaraa’?

• Eaha te tumu e pure ai tatou no to tatou mau taeae e tuahine e e imi ai i te haamahanahana ˈtu?

[Uiraa haapiiraa]

[Hohoˈa i te api 18]

E nehenehe anei outou e ani i te tahi atu Kerisetiano ia apee i to outou utuafare ia haere outou e ori?

[Faaiteraa i te tumu]

Courtesy of Green Chimney’s Farm