Ua taea te parau apî maitai o te hau i te fenua mouˈa o Chiapas

“I roto i te taparahiraa taata ino roa ˈˈe ta te taata e haamanaˈo i te tuhaa fenua o Chiapas, ua haapohehia e 45 feia faaapu parururaa ore, 13 tamarii to roto, e te hoê pǔpǔ taata . . . tamauhaa.” Mea na reira te vea ra “El Universal” i te faatiaraa i tei tupu i Acteal, i te tuhaa fenua o Chiapas, i te 22 no Titema 1997.

TE TUHAA fenua i apatoerau roa ˈˈe i Mehiko, i pihai i te Guatemala, o Chiapas ïa. No te hoê tuatapaparaa roa o te veve e te ereraa rahi, ua faanaho te hoê pǔpǔ Indien Maya tumu i te hoê orureraa hau tamauhaa i te avaˈe Tenuare 1994, ma te iˈoa o te Ejército Zapatista de Liberación Nacional (EZLN, nuu a Zapata no te tiamâraa o te nunaa). Ua faataupupu te mau faaauraa parau no te hoê ravea hau. Ua faatupu te mau aroraa a te mau orure hau e a te nuu a te faatereraa atoa i te maniiraa toto e te pohe. Ua turai te arepurepu i te feia faaapu e rave rahi ia faarue i te tuhaa fenua e ia horo i te vahi maitai.

I roto i teie huru tupuraa papu ore, te vai ra te hoê pǔpǔ taata mea au na ratou te hau tei tapea i te tiaraa amui ore i roto i te aroraa politita. Ma te itoito, e huti ratou i te ara-maite-raa i nia i te Basileia o te Atua ei tiaturiraa hoê roa no te faatitiaifaro i te mau fifi e farereihia ra e te taata, i ǒ ratou iho e na te ao atoa nei. (Daniela 2:44) O vai ratou? Te mau Ite no Iehova. Ei auraroraa i te faaueraa a Iesu, ua tutava ratou i te hopoi i te parau apî maitai o te Basileia o te Atua i te mau vahi atea roa ˈˈe o te fenua mouˈa o Chiapas. (Mataio 24:14) Mai te aha te huru te pororaa i roto i taua mau huru tupuraa ra, e eaha te mau hopea?

“E Ite no Iehova vau”

Te rave ra o Adolfo, te hoê taurearea tei riro mai ei taata poro i te Basileia aita i maoro aˈenei, i te ohipa i te hoê mahana i te hoê pu radio i Ocosingo. Patoto-puai-hia mai nei i te opani. Tomo mai nei te hoê pǔpǔ taata ua ahuhia te upoo e toro mai nei i te pupuhi i nia i to ˈna upoo. Ua horo ratou i roto i te piha haapurororaa, faaohipa hua ˈtura i te mau tauihaa, e faaara ˈtura na roto i te radio e ua opua ratou e faatupu i te tamaˈi e te faatereraa.

A fariu atu ai i nia ia Adolfo, ua faaue atu te mau taata tamauhaahia e amui mai i roto i ta ratou pǔpǔ. “E Ite no Iehova vau,” o ta Adolfo ïa i pahono atu noa ˈtu e aitâ oia i bapetizohia ˈtura. Ua faataa oia e o te Basileia o te Atua te tiaturiraa hoê roa no te hau, e ua patoi papu atu oia i te ahu faehau e te pupuhi e horoahia maira na ˈna. I to ratou iteraa i to ˈna tiaraa etaeta, ua tuu ratou ia ˈna ia haere. Ia haamanaˈo oia i tei tupu, e parau Adolfo e: “Ua haapaari mau â taua ohipa ra i to ˈu faaroo.”

I te pae hopea, ua mǎrû rii mai te huru tupuraa, tei raro aˈe noa ra râ te tuhaa fenua i te tiaauraa a te nuu. Noa ˈtu râ te reira, ua farii Adolfo ma te oaoa i te titauraa a te  mau matahiapo o te amuiraa no reira e ohipa e te hoê pǔpǔ Kerisetiano moemoe i taua vahi ra. I te mau vahi hiˈopoaraa ua na reira ˈtu oia i te haere, ua faatura te mau faehau ia ˈna ia faaite atu oia e e Ite no Iehova oia. Ua bapetizohia oia i muri aˈe e ua mauruuru oia i te tautururaa i taua pǔpǔ moemoe ra ia riro mai ei amuiraa Ite no Iehova. “I teie nei e ua bapetizohia vau,” o ta Adolfo ïa e parau ra, “e nehenehe au e parau ma te papu roa ino e e Ite no Iehova vau!”

“Ua haapuai Iehova ia matou”

I muri noa ˈˈe i to te EZLN parauraa i roto i te radio e e faatupu ratou i te tamaˈi e te faatereraa, ua horo ê to te oire. Ua faataa o Francisco, te hoê tavini taime taatoa, aore ra pionie, nafea to Iehova haapuairaa ia raua ta ˈna vahine no te mau mea ta raua e farerei atu.

“Ua faaoti mâua e imi i te haapuraa i te hoê vahi e toru hora ia haerehia ˈtu na raro. E amuiraa to ǒ, e farerei ïa mâua i te mau taeae. Aita i maoro, ua tae i te taime o ta matou tairururaa haaati tei opuahia e faatupu i Palenque. Aita mâua ta ˈu vahine i hinaaro e mairi i te putuputuraa taa ê na te mau pionie, ua faaroo râ mâua e ua tâpûhia te purumu e haere atu i te tairururaa e te EZLN. Ua faaoti mâua e haere na roto atu i te uru raau, o te titau ïa e iva hora.  Ua taeahia e mâua te putuputuraa na te mau pionie ta mâua i fanaˈo maitai e oia atoa te porotarama taatoa o te tairururaa.

“I to mâua hoˈiraa i te fare, ua itea mai ia mâua e ua paapaa to mâua fare e ua eiâhia ta mâua mau animala. Hoê noa pute ahu rii tei toe mai. Ua peapea mâua no ta mâua i ere, ua farii râ te mau taeae no Ocosingo ia mâua i roto i to ratou fare ma te maitai. Ua faaite atoa mai ratou ia mâua nafea ia rave i te tahi mau ohipa aita matou ei feia faaapu, i rave aˈenei na mua ˈˈe. Ua haapii mai te hoê taeae ia ˈu nafea ia pata i te hohoˈa, te tahi atu nafea ia tataî i te tiaa. Mea na reira to mâua ta ˈu vahine faatamaaraa ia mâua iho e tae roa mai i teie nei, ma te ore e faaea i te taviniraa pionie. Ia feruri mâua i tei tupu, e nehenehe mâua e ite e, noa ˈtu e e ere i te mea ohie no mâua ia faaoromai, ua haapuai Iehova ia mâua.”

Mau hotu o te ohipa pororaa

Aita te mau Ite no te tuhaa fenua o Chiapas i vaiiho ia faataupupu te tau fifi e te ati i to ratou apitiraa i roto i te tutavaraa taa ê e hopoi i te parau apî maitai i te taata na taua vahi ra. Ei hiˈoraa, i te avaˈe Eperera e Me 1995, ua apiti ratou i te mau hoa Kerisetiano no te ao atoa nei i roto i te hoê opereraa api parau, o Te parau apî o te Basileia n° 34 ma te upoo parau tano roa No te aha e rave rahi fifi i roto i te oraraa?

I te tau opereraa—i te hoê vahi parauhia Pueblo Nuevo—ua itea mai ia Ciro, te hoê pionie tamau, te hoê utuafare tei faaite i te anaanatae. I to ˈna hoˈiraa ˈtu e toru mahana i muri aˈe, ua nehenehe ia ˈna e haamata i te hoê haapiiraa Bibilia e o ratou. I to Ciro râ e te hoê hoa hoˈi-faahou-raa ˈtu e faahaere i te haapiiraa e te utuafare i mua, aita te metua tane o te utuafare i te fare. Area râ, te tiai ra te hoê pǔpǔ taata ua ahuhia te upoo ia ˈna no te hamani ino atu. Ua ui ratou ia Ciro e to ˈna hoa eaha ta raua e imi ra e ua haamǎtaˈu mai e haapohe ia raua. I muri aˈe i to raua pureraa ia Iehova i roto ia raua iho, ua faataa na Kerisetiano ma te itoito e ua haere mai raua e haapii i te utuafare i te Bibilia. I reira, ua vaiiho te mau taata i ahuhia te upoo ia haere ratou. No te tahi tumu, aita roa ˈtu te metua tane o te fare i hoˈi mai i te fare i taua mahana ra.

I te hoê mahana, fatata e toru matahiti i muri aˈe, ua maere o Ciro i te iteraa ˈtu i te taata e tia ra i to ˈna pae opani. Ua oaoa mau â o Ciro i te faarooraa e ua bapetizohia te utuafare taatoa e tei roto ratou i te hoê amuiraa i Guatemala! Te tavini atoa ra hoê o te mau tamahine ei pionie tamau.

Te mauruuru no te maa varua

Noa ˈtu te fifi tamau i Chiapas, te faataa ra te hoê tiaau mataeinaa e te taa mau ra i te mau Ite no taua vahi ra te faufaaraa o te mau haaputuputuraa. (Hebera 10:24, 25) Te faatia ra oia i  tei tupu aita i maoro aˈenei i te hoê mahana tairururaa taa ê tei tapurahia ia haamata i te poipoi roa ia nehenehe tei tae mai e hoˈi i te fare ma te huru maitai a ao noa ˈi. Noa ˈtu e e tia i te rahiraa o ratou ia haere na raro e toru hora na roto mai i te uru raau e tae atu ai i te vahi tairururaa, te parahi ra te mau taata atoa i te hora 7. I roto i te feia e faaroo ra, te vai ra e ono melo o te pǔpǔ EZLN, tei faaroo e tei haapopou, e au ra hoi e ua au roa ratou i te porotarama. Ua haere atoa mai ratou na raro e toru hora e tae mai ai i te tairururaa. E piti ahuru o ratou tei tae atoa mai i te oroa haamanaˈoraa i te pohe o te Mesia i faatupuhia i roto i te hoê Piha a te Basileia.

Ua faauehia te tahi atu taurearea no roto i te pǔpǔ iti feia tamaˈi e ta ˈna feia rarahi e tiai i te hoê tuhaa o te uru raau. I to ˈna tapaeraa ˈtu i te oire iti, ua itea mai ia ˈna e ua horo ê te taata atoa, e mau Ite no Iehova hoi te rahiraa o ratou. Ua faaea aˈera oia i roto i te hoê o te mau fare i faaruehia. I te mea e aita ta ˈna ohipa i rahi, ua rave mai oia i te tahi mau buka ta ˈna i ite mai i roto i te fare e ua haamata aˈera i te taio. O te mau papai hoi tera a te Watch Tower i vaiihohia e te mau Ite. I roto i to ˈna moemoe, e taime to te taurearea no te feruriruri i ta ˈna e taio ra. Ua faaoti aˈera oia e e tia ia ˈna ia taui i to ˈna oraraa e ia faarue i te mau mauhaa. I te neheneheraa iho â ia ˈna, ua itea mai ia ˈna te mau Ite e ua haamata aˈera i te hoê haapiiraa Bibilia. I roto e ono avaˈe, te faaite ra oia i te parau apî maitai ia vetahi ê. I teie nei, e mau Kerisetiano bapetizohia oia e e toru melo o to ˈna utuafare tei faahoa na e te pǔpǔ iti feia tamaˈi.

Te iteraa i te hoê paeau maitai

Noa ˈtu te rahi o te fifi e farereihia, ua faatupu te tamaˈi i te hoê hopea maitai i nia i te haerea o te taata i mua i te ohipa pororaa. Te faatia ra te hoê matahiapo no te oire iho i reira te aroraa i te haamataraa e: “Fatata e pae mahana i muri aˈe i te haamataraa te tamaˈi, ua faanaho matou i te ohipa pororaa i roto mai e i rapae mai atoa i te oire. Te hinaaro mau ra te taata e faaroo mai ia matou. Ua vaiiho matou e rave rahi papai Bibilia e ua haamata tau haapiiraa Bibilia. I te hoê vahi, mea rahi tei patoi na i te parau mau, no te aroraa râ, e faaroo ratou i teie nei, e haapii i te Bibilia, e e haere mai i te mau putuputuraa e te mau tairururaa.”

Te oaoa ra te mau taeae e ua nehenehe ia ratou e tapea i ta ratou mau ohipa teotaratia noa ˈtu te mau huru tupuraa papu ore roa. Ma te ite i te mau nuu a te faatereraa e i te EZLN, ua tamau ratou i te faatupu i ta ratou mau tairururaa tei haapuai ia ratou i te pae varua. Ua riro atoa te mau tere o te mau tiaau ratere ei faaitoitoraa puai e tamau i te ohipa pororaa. Ma te faahiahia, ua tae atoa mai te faaitoitoraa mai roto mai i tei ô atu i roto i te tamaˈi tei turai pinepine i te mau Ite ia tamau i ta ratou ohipa pororaa.

Noa ˈtu e ua iti rii mai te mau ati e te mau fifi ta te taata i Chiapas i faaoromai, i te roaraa o te tau, aita râ i hope. Noa ˈtu â, te hoê mea papu—ua faaoti maite te mau Ite no Iehova e tamau noa i ta ratou mau tutavaraa e hopoi i te parau apî maitai o te hau no roto mai i te Parau a te Atua, te Bibilia, i te taata ma te tuutuu ore. (Ohipa 10:34-36; Ephesia 6:15) Ua ite ratou, mai te peropheta Ieremia tei parau e “e ere tei te taata iho to ˈna haerea; e ere hoi tei taua taata e haere ra i te haapao i to ˈna taahiraa.” (Ieremia 10:23) O te Basileia o te Atua anaˈe, faaterehia e ta ˈna Tamaiti o Iesu Mesia, te nehenehe e hopoi mai i te ravea e ore ai te parau-tia ore e te veve na te ao nei.—Mataio 6:10.

[Hohoˈa fenua/Hohoˈa i te api 9]

(Hiˈo i te papai)

Ooˈa no Mehiko

CHIAPAS

GUATEMALA

Moana Patitifa

[Faaiteraa i te tumu]

Mountain High Maps® Copyright © 1997 Digital Wisdom, Inc.

[Hohoˈa i te api 9]

Mau Ite e haere ra i roto i te taviniraa i te fenua mouˈa o Chiapas