“E faaau i to outou hororaa”

A FERURI na e tei nia outou i te hoê tahua tuaro î roa i te taata tei oaoa roa. Te haere ra te mau maona na nia i te mahora. Te tutuô ra te nahoa a fa mai ai ta ratou mau aito. To reira te mau haava no te rave ia faaohipahia te mau ture. A tupu ai te mau tataˈuraa, mea anoi noa te tutuôraa no te upootiaraa e te oto no te inoino. Te popou-puai-hia ra te feia upootia!

Te mataitai ra outou, eiaha i te hoê haa tuaro no teie tau, te hoê râ i tupu fatata a 2 000 matahiti aˈenei i te Ariariraa no Korinetia. I ǒ nei, i te mau piti matahiti atoa mai te senekele ono H.T.T. atu e i te senekele maha T.T., e tupu te mau Hautiraa tuiroo i te Ariariraa. E rave rahi mahana e faaanaanatae ai te tupuraa i to Heleni taatoa. E ere te mau hautiraa i te mau tataˈuraa tuaro noa. E taipe te mau maona no te faaineineraa a te nuu. E horoahia te mau korona rauere na te feia upootia, tei faaidolohia ei mau aito. Mea rahi ta ratou mau ô, e e horoa te oire i te hoê tino moni rahi na ratou no te oraraa taatoa.

Ua matau maitai te aposetolo Paulo i te mau Hautiraa i te Ariariraa i pihai ia Korinetia e ua faaau i te hororaa Kerisetiano no te ora i te hoê tataˈuraa tuaro. Na roto i te parauraa no nia i te feia horo, te feia taputô, e te feia moto, te faataa maitai ra oia i te mau utua o te hoê faaineineraa maitai, te mau tutavaraa aratai-maitai-hia, e te faaoromai. Parau mau, ua matau atoa te mau Kerisetiano ta ˈna i papai atu i te mau hautiraa. Eita e ore e i tia na vetahi pae i rotopu i te mau nahoa e tutuô ra i nia i te tahua. No reira, ua taa oioi ia ratou te mau faahohoˈaraa a Paulo. Eaha ïa no tatou i teie mahana? To roto atoa tatou i te hoê hororaa—no te ora mure ore. Nafea tatou e faufaahia ˈi i te mau faahitihitiraa a Paulo i taua mau tataˈuraa ra?

‘Te tôraa ma te haapao i te ture’

Mea etaeta roa te mau titauraa no te tapaoraa iˈoa i te mau hautiraa no tahito ra. Na te hoê vea e faaite o vai te maona taitahi i te feia mataitai e e tuô e: ‘Te vai ra anei te hoê o te pari i teie taata i te tahi ohipa ino? E eiâ anei oia aore ra e taata ino e te faufau i roto i to ˈna oraraa e ta ˈna mau peu?’ Ia au i te Archaeologia Graeca, “aita hoê aˈe taata matauhia no ta ˈna mau ohipa iino, aore ra tei [piri] atu i taua huru taata ra, e faatiahia i roto i te tataˈuraa.” E eita te feia o te ofati i te mau ture o te hautiraa e faatia-faahou-hia ia apiti i roto i te mau tataˈuraa.

Na teie mea e tauturu mai ia taa ia tatou te mau parau a Paulo: “E te taata hoi ia tô ra, ia ore râ oia ia tô ma te haapao i te ture ra e ore ïa oia e faakoronahia.” (Timoteo 2, 2:5) Oia atoa, i roto  i te hororaa no te ora, mea hinaarohia ia faaî tatou i te mau titauraa a Iehova, ma te auraro maite i te mau ture morare teitei mai tei faataahia i roto i te Bibilia. Te faaara maira râ te Bibilia e: “Ino noâ te manaˈo o to te taata aau mai to ˈna tamariiriiraa mai â.” (Genese 8:21) No reira, i muri aˈe atoa i te haamataraa i te hororaa, mea titauhia ia haapao maitai tatou i te tô noa ma te haapao i te mau ture no te fanaˈo noa i te farii maitai a Iehova e te ora mure ore.

O te here i te Atua te tauturu rahi roa ˈˈe ia na reira. (Mareko 12:29-31) E turai taua here ra ia hinaaro tatou e faaoaoa ia Iehova e e ohipa ia au i to ˈna hinaaro.—Ioane 1, 5:3.

“E haapae tatou i te mau mea teimaha atoa”

I roto i te mau hautiraa no tahito ra, eita te feia horo e teimaha i te ahu aore ra te mauhaa. “I te mau hororaa, . . . mea matauhia e te feia tataˈu ia haere tahaa mai,” ta te buka The Life of the Greeks and Romans ïa e parau ra. Aita anaˈe e ahu, e vitiviti ïa te mau maona, e ohie i te hauti, e te faaau ohie. Eita te puai e mâuˈa no te teimaha faufaa ore. Ua manaˈo paha o Paulo i te reira i to ˈna papairaa ˈtu i te mau Kerisetiano no Hebera e: “E haapae tatou i te mau mea teimaha atoa, e . . . a horo tamau maite ai i teie nei hororaa i mua ia tatou nei.”—Hebera 12:1.

Eaha te mea teimaha e nehenehe e faataupupu ia tatou i roto i te hororaa no te ora? Te hinaaro paha e haapue i te mau taoˈa materia faufaa ore aore ra e ora i te hoê huru oraraa moni rahi. E hiˈo paha te vetahi i te faufaa ei panoonoo ore aore ra ei tumu o te oaoa. E faataupupu paha taua mea “teimaha” roa ra i te hoê taata horo e tae noa ˈtu i te hoê faito eita te Atua e haapao roa ia ˈna i te pae hopea. (Luka 12:16-21) E nehenehe te ora mure ore e riro mai te hoê tiaturiraa atea. ‘E tae mai iho â te ao apî i te hoê mahana,’ ta te hoê taata paha ïa e feruri, ‘a tiai noa ˈtu ai râ, e nehenehe tatou e fanaˈo i te mau mea ta teie ao e pûpû maira.’ (Timoteo 1, 6:17-19) E nehenehe teie huru manaˈo nounou taoˈa e haafariu ê i te hoê i te hororaa no te ora aore ra e faataupupu atu eiaha e haamata.

I roto i te Aˈoraa i nia i te mouˈa, ua parau Iesu e: “E ore te taata e tia ia faaroo i te fatu toopiti; e riro oia i te au ore atu i te hoê, e te hinaaro atu i te tahi; e aore ra, e riro i te au atu i te hoê, e te faarue taue i te tahi. O outou nei hoi, e ore e tia ia faaroo i te Atua e te Mamona.” I muri aˈe i to ˈna parauraa e te haapao ra Iehova i te mau hinaaro o te mau animara e o te mau raau tupu e mea faufaa aˈe te taata i taua mau mea ra, ua aˈo oia e: “E teie nei, eiaha outou e tapitapi noa, a na ô ai ra, Eaha ta matou ia amu? e, Eaha ta matou ia inu? e Eaha to matou ahu ia ahu? (Te imi nei hoi te mau Etene i taua mau mea atoa nei:) ua ite hoi to outou Metua i te ao ra, e ia noaa taua mau mea ra ia outou e tia ˈi. E mata na râ outou i te imi i te basileia o te Atua, e te parau-tia na ˈna; e amui-atoa-hia mai taua mau mea ra ia outou.”—Mataio 6:24-33.

“A horo tamau maite”

E ere te mau hororaa atoa no tahito ra i te mau hororaa vitiviti. Te atea o te hoê hororaa te parauhia dolichos, fatata ïa e 4 kilometera. E tamataraa fifi roa teie i te puai e te faaoromai. I te matahiti 328 H.T.T, ia au i te tutuu, i to ˈna upootiaraa i roto i teie hororaa, ua horo atu te hoê maona o Ageas te iˈoa e tae roa ˈtu i to ˈna oire tumu o Argos no te faaite e ua noaa ia ˈna te re. I taua mahana ra, ua horo oia fatata 110 kilometera i te atea!

 E hororaa atea atoa ta te mau Kerisetiano o te tamata i to tatou faaoromai. Mea titauhia ia tamau noa i roto i teie hororaa e tae noa ˈtu i te hopea no te fanaˈo i te farii maitai a Iehova e te re o te ora mure ore. Mai tera te hororaa a Paulo. I te pae hopea o to ˈna oraraa, ua nehenehe oia e parau e: “I tô na vau i te tôraa maitai, ua oti to ˈu hororaa, i mau maite na vau i te parau. E teie nei, te vaiihohia ra te korona o te parau-tia no ˈu.” (Timoteo 2, 4:7, 8) Mea titauhia ia ‘faaoti’ tatou, mai ia Paulo, i ta tatou hororaa. Ia iti mai to tatou faaoromai no te mea noa e mea atea aˈe te hororaa i ta tatou i manaˈo i te haamataraa, eita ïa e noaa mai ta tatou utua. (Hebera 11:6) Auê ïa te peapea e, inaha, ua fatata roa tatou i te reni tapaeraa!

Te re

E horoahia te mau korona rauere tei faaunaunahia i te tiare na te feia i upootia i roto i te mau tataˈuraa Heleni no tahito ra. I roto i te mau Hautiraa pythiques e horoahia te hoê korona laurier na tei riro ia ratou te re. I roto i te mau Hautiraa olympiques, e horoahia te mau korona rauere olive oviri na ratou, i roto râ i te mau Hautiraa i te Ariariraa, te mau korona paina ïa. “No te faaanaanatae i te feia tataˈu,” ta te hoê aivanaa Bibilia ïa e parau ra, “e tuuhia te mau korona, te mau utua no te upootiaraa, e te mau amaa tamara i mua i to ratou aro i nia i te hoê airaa maa e vai ra i nia i te tahua tuaro, i te roaraa o te tataˈuraa.” No tei upootia, e hanahana rahi te tuuraa i te korona i nia i te upoo. Ia hoˈi oia i te fare, e haere oia ma te upootia na nia i te hoê pereoo puto na roto i te oire.

Ma te haamanaˈo i te reira, ua ui atu o Paulo i te feia taio no Korinetia e: “Aita outou i ite e, o te feia horo i te hororaa e horo paatoa ïa, hoê roa râ e rave i te berabeio? E faaau i to outou hororaa ia noaa te berabeio. . . . Ia noaa te korona tahuti noa i na reira ˈi ratou, area tatou ia noaa ïa te korona tahuti ore.” (Korinetia 1, 9:24, 25; Petero 1, 1:3, 4) Auê ïa taa-ê-raa e! Taa ê roa i te mau korona e maemae o te mau hautiraa no tahito ra, e ore roa ˈtu te re e tiai maira i te feia e faaoti i te hororaa no te ora, e tahuti.

Teie ta te aposetolo Petero i papai no nia i teie korona maitai roa: “Ia fa mai te Tiai rahi ra e noaa ïa ia outou te korona hanahana, o te ore roa e maheahea.” (Petero 1, 5:4) E nehenehe anei te mau huru re atoa ta teie ao e pûpû nei e faaauhia i te pohe-ore-raa, te re o te ora tahuti ore i roto i te hanahana i te raˈi e te Mesia?

I teie mahana, aita te rahiraa o te mau Kerisetiano e horo ra i faatavaihia e te Atua no te riro ei mau tamaiti pae varua na ˈna e aita ratou e tiaturi ra e haere i nia i te raˈi. Aita ïa ratou e horo ra no te re o te pohe-ore-raa. Te faataa atoa ra râ te Atua i te hoê re faaauraa ore na ratou. O te ora mure ore ïa i roto i te tia-roa-raa i nia i te hoê fenua paradaiso i raro aˈe i te faatereraa a te Basileia o te raˈi. Noa ˈtu eaha te re ta te hoê Kerisetiano horo e titau ra, ia horo ïa oia ma te faaotiraa papu e te itoito atu â i te tahi taata horo i roto i te hoê tataˈuraa tuaro. No te aha? No te mea e ore roa ˈtu te re e tahuti: “Teie hoi taua maitai ta ˈna i parau mai no tatou ra, o te ora mure ore.”—Ioane 1, 2:25.

Ma teie re faaauraa ore i mua i te Kerisetiano horo, nafea oia ia hiˈo i te mau faahemaraa a teie nei ao? Mai ia Paulo ïa o tei na ô e: “Oia mau ïa e mea faufaa ore atoa te mau mea atoa nei ia ˈu, i te maitai rahi ra i te ite i te Mesia i tau Fatu ra ia Iesu: e faarue ai au i te mau mea atoa ra.” Ia au i teie manaˈo, ua horo Paulo ma te uˈanana! “E au mau taeae, aore au i manaˈo ia ˈu iho nei, e ua noaa, hoê roa a ˈu mea e rave nei, i te haamoeraa i te mau mea i muri ra, e te titauraa ˈtu hoi i  tei mua, te nenei tia ˈtu nei au i te tapao, ia noaa te berabeio.” (Philipi 3:8, 13, 14) Ua horo o Paulo ma te tiatonu maite i te berabeio. Ia na reira atoa ïa tatou.

Te hiˈoraa maitai roa ˈˈe no tatou

I roto i te mau hautiraa no tahito ra, e umere-rahi-hia te mau aito. E papaihia te tahi mau pehepehe no nia ia ratou, e e nanaˈohia to ratou mau hohoˈa. Te na ô ra te vahine tuatapapa ra o Věra Olivová e e “î [ratou] i te hanahana e e tui roa to ratou roo.” E riro atoa ratou ei hiˈoraa no te ui aito api aˈe.

O vai ïa te “aito” o te horoa i te hiˈoraa maitai roa ˈˈe no te mau Kerisetiano? Te pahono ra o Paulo e: “A horo tamau maite ai i teie nei hororaa i mua ia tatou nei, ma te tiatonu maite to tatou mata ia Iesu, i te tumu e te faaoti i to tatou faaroo, o tei faaoromai i te [pou haamauiuiraa], aore i haapao i te haama, [no te oaoa] i tuuhia mai i mua i tana aro; e te parahi ra i teie nei i te pae atau i te terono o te Atua ra.” (Hebera 12:1, 2; MN) Oia, ia riro ia tatou te re i roto i ta tatou hororaa no te ora mure ore, mea hinaarohia ia tiatonu maite tatou ia Iesu Mesia, te Hiˈoraa no tatou. E nehenehe tatou e na reira na roto i te taio-tamau-raa i te mau evanelia e te feruriruriraa i te mau ravea e pee ai tatou ia ˈna. E tauturu taua faahohonuraa ra ia taa ia tatou e ua auraro Iesu Mesia i te Atua e ua haapapu e e faaroo puai to ˈna maoti to ˈna faaoromai. Ei utua no to ˈna faaoromai, ua noaa ia ˈna te farii maitai a te Atua ra o Iehova e te mau fanaˈoraa taa ê faahiahia e rave rahi.—Philipi 2:9-11.

Parau mau, o te aroha te huru maitai faahiahia roa ˈˈe o Iesu. “Ia horoa te taata i to ˈna iho ora no to ˈna ra mau taua, aita roa e taata aroha ê atu i tei reira.” (Ioane 15:13) Ua horoa oia i te hoê auraa hohonu atu â i te taˈo ra “aroha” na roto i te parauraa mai ia aroha tatou i to tatou atoa mau enemi. (Mataio 5:43-48) No to ˈna here i to ˈna Metua i te raˈi, ua ite o Iesu i te oaoa i te raveraa i te hinaaro o to ˈna Metua. (Salamo 40:9, 10; Maseli 27:11) Ia faariro tatou ia Iesu ei Hiˈoraa no tatou e ei hoê o tei haamau i te vitiviti no tatou i roto i te hororaa ma te uˈanana no te ora, e turai-atoa-hia tatou ia here i te Atua e to tatou taata-tupu e ia oaoa mau i roto i ta tatou taviniraa moˈa. (Mataio 22:37-39; Ioane 13:34; Petero 1, 2:21) A haamanaˈo e aita Iesu e ani maira i te hoê mea eita e maraa ia tatou. Te haapapu maira oia e: “Te mǎrû nei hoi au e te haehaa o te aau: e e noaa hoi te ora i to outou varua. Te mǎrû nei hoi ta ˈu zugo e te mâmâ nei ta ˈu hopoia.”—Mataio 11:28-30.

Mea hinaarohia ia tiatonu tatou, mai ia Iesu, i te re tei faataahia no te feia atoa o te mau papu e tae noa ˈtu i te hopea. (Mataio 24:13) Ia aro tatou ma te haapao i te mau ture, ia haapae i te mau mea teimaha atoa, e ia horo tamau noa, e nehenehe e papu ia tatou e e riro ia tatou te re. E turai te tapao i mua mai ia tatou ia haere i mua! E faaitoito faahou mai te reira ia tatou no te oaoa ta te reira e faahotu ra i roto ia tatou, te hoê oaoa o te faaohie atu â i ta tatou hororaa.

[Hohoˈa i te api 29]

E hororaa atea ta te hoê Kerisetiano o te titau i te faaoromai

[Hohoˈa i te api 30]

Taa ê roa i te mau maona faakoronahia, e nehenehe te mau Kerisetiano e tiai ru i te hoê re tahuti ore

[Hohoˈa i te api 31]

E riro te re i te feia atoa e mau papu e tae noa ˈtu i te hopea

[Faaiteraa i te fatu o te hohoˈa i te api 28]

Copyright British Museum