E hau no te mileniuma apî?

UA HAAMATA te matahiti o te ao atoa nei no te taˈere o te hau i Pari e i te oire no New York i te 14 no Setepa 1999. Na te Apooraa Rahi a te mau Nunaa Amui i faaite haere i te reira no te matahiti 2000. Ua titau maite o Federico Mayor, te faatere rahi tahito o te UNESCO, “ia haamauhia te hoê pǔpǔ no te hoê taˈere o te hau aita e haavîraa uˈana na te fenua atoa nei.”

E parau paari ta te UNESCO, oia hoi “i te mea e e haamata te mau tamaˈi i roto i te feruriraa o te taata, i roto ïa i te feruriraa o te taata e tia ˈi ia faatiahia te mau parururaa i te hau.” Ia au i te reira, e hinaaro te faanahonahoraa e faatupu i te hoê taˈere o te hau maoti “te haapiiraa, te tauaparauraa, e te haa-amui-raa.” Ua faataa o Mayor Tane e eita e navai “ia riro ei taata hau, aore ra ei taata paturu i te hau, ei taata faatupu râ i te hau.”

Tera noa râ, aita roa ˈtu te matahiti 2000 i riro ei matahiti hau. Ua faataa maitai te tuatapaparaa no teie tau—tae noa ˈtu te mau ohipa i tupu i te matahiti 2000—e eita e noaa i te taata i te arai i te tamaˈi e te haavîraa uˈana noa ˈtu ta ratou mau tutavaraa haavare ore.

E tano râ ia tapao e ua taaihia te hau i te haapiiraa. Fatata a 2 700 matahiti aˈenei, ua tohu te peropheta Isaia e: “E te mau tamarii atoa na oe ra, e haapiihia ïa e Iehova, e e hau rahi to te mau tamarii na oe ra.” (Isaia 54:13) Ua ite atea taua noâ peropheta ra i te hoê tau e tairuru ai te mau taata o te mau nunaa atoa i te haamoriraa mau a te Atua ra o Iehova ia haapiihia ratou i to ˈNa mau eˈa. Eaha te faahopearaa? “E tiapai ratou i ta ratou ˈoˈe ei auri arote, e ta ratou mau mahae ei tipi tope raau; e ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi.” (Isaia 2:2-4) Ia au i taua parau tohu ra, na te ao atoa nei, te rave ra te mau Ite no Iehova i te hoê ohipa haapiiraa, o tei tauturu aˈena i te mau mirioni taata ia tinai i te riri i te nunaa e te opu ê, te tumu hoi o te rahiraa o te mau tamaˈi.

Aita e tamaˈi faahou i raro aˈe i te faatereraa a te Basileia o te Atua, o te haamau i te hau e te panoonoo ore mure ore i nia i te fenua. (Salamo 72:7; Daniela 2:44) I reira ïa e tupu ai te mau parau a te papai salamo: “A hiˈo i ta Iehova i rave! te pau ta ˈna i rave i te fenua nei! Ua faaore oia i te tamaˈi e tae roa aˈenei i te hopea fenua!”—Salamo 46:8, 9.