Mai te aha te aano o to outou aroha?
Mai te aha te aano o to outou aroha?
“E aroha ˈtu oe i to taata-tupu, mai to aroha ia oe iho na.”—MATAIO 22:39.
1. Mai te peu e e hinaaro tatou ia Iehova, no te aha e tia ˈi ia aroha atoa tatou i to tatou taata-tupu?
I TE aniraahia ia Iesu eaha te ture rahi roa ˈˈe, ua pahono oia e: “Hinaaro oe i to Atua ia Iehova ma to aau atoa, e ma to [nephe] atoa, e ma to manaˈo atoa.” I muri iho, ua faahiti oia i te piti o te ture e au i te matamua: “E aroha ˈtu oe i to taata-tupu, mai to aroha ia oe iho na.” (Mataio 22:37, 39) Oia, na te aroha i te taata-tupu e faaite e e Kerisetiano tatou. Oia mau, ia hinaaro tatou ia Iehova, e tia ia tatou ia aroha i to tatou taata-tupu. No te aha? No te mea e faaite tatou i to tatou hinaaro i te Atua na roto i te faarooraa i ta ˈna Parau, e te faaue maira ta ˈna Parau ia aroha tatou i to tatou taata-tupu. No reira, ia ore tatou e aroha i to tatou mau taeae e mau tuahine, e ere ïa to tatou i te hinaaro mau i te Atua.—Roma 13:8; Ioane 1, 2:5; 4:20, 21.
2. Eaha te huru aroha ta tatou e faaite i nia i to tatou taata-tupu?
2 I to Iesu parauraa e ia aroha tatou i to tatou taata-tupu, e ere ïa i te hoê noa auhoaraa. E te manaˈo ra oia i te hoê aroha taa ê i te here e vai ra i roto i te utuafare aore ra i rotopu i te hoê tane e te hoê vahine. Te parau ra oia no nia i te huru aroha o Iehova i ta ˈna mau tavini pûpûhia e to ratou hinaaro ia ˈna. (Ioane 17:26; Ioane 1, 4:11, 19) Ua tu te manaˈo o te hoê papai parau ati Iuda—o te paraparau ra ma te maramarama, mai ta Iesu i haroaroa—e to Iesu ia hinaaro tatou i te Atua ‘ma te aau, ma te ite, e ma te puai atoa.’ (Mareko 12:28-34) Ua tano oia. Ua taaihia te hinaaro i te Atua e te aroha i te taata-tupu ta te hoê Kerisetiano e faahotu i to tatou aau e to tatou maramarama. E hotu te reira i roto i te aau e e arataihia e te feruriraa.
3. (a) Nafea to Iesu faataaraa i te hoê “haapii ture” e e tia ia faaano oia i to ˈna manaˈo i to ˈna taata-tupu? (b) Nafea te parabole a Iesu e au ai i te mau Kerisetiano i teie mahana?
3 Ia au i te faatiaraa a Luka, i to Iesu parauraa e ia aroha tatou i to tatou taata-tupu, ua ui “te hoê haapii ture” e: “O vai hoi to ˈu taata-tupu?” Ua pahono Iesu na roto i te hoê parabole. E tairihia te hoê taata, e eiâhia, e fatata i te pohe, e e faaruehia i te pae eˈa. Na mua, e haere noa mai te hoê tahuˈa e i muri iho, te hoê ati Levi. Eita raua e tâuˈa ia ˈna. I muri iho, e haere mai te hoê taata Samaria, e ite oia i te taata i pepe, e e hamani maitai oia ia ˈna. O na toru, o vai te taata-tupu o tei pepe? Mea maramarama maitai te pahonoraa. (Luka 10:25-37) Eita e ore e ua huru ê te haapii ture i te faarooraa ia Iesu i te parauraa e e nehenehe te hoê taata Samaria e riro ei taata-tupu maitai aˈe i te hoê tahuˈa e te hoê ati Levi. Papu maitai, te tauturu ra Iesu i te haapii ture ia aroha rahi atu â oia i to ˈna taata-tupu. E aroha atoa te mau Kerisetiano mai tera. A hiˈo na o vai ma ta ratou e aroha.
Here i roto i te utuafare
4. Ihea te hoê Kerisetiano e faatupu na mua ˈi i te aroha?
4 E here te mau Kerisetiano i te mau melo o to ratou utuafare—e here te vahine faaipoipo i ta ˈna tane, e here te tane i ta ˈna vahine, e here te mau metua i te mau tamarii. (Koheleta 9:9; Ephesia 5:33; Tito 2:4) Oia mau, te vai ra te taairaa o te here i roto i te rahiraa o te mau utuafare. I teie râ mahana, te faaite ra te mau faaipoiporaa i taa, te hamani-ino-raa i te mau vahine faaipoipo, e te haapao-ore-raa aore ra te rave-ino-raa i te mau tamarii e te fifi ra te utuafare, e eita paha te mau manaˈo hohonu no te utuafare e navai ia vai hoê noa te utuafare. (Timoteo 2, 3:1-3) Ia manuïa mau to ratou oraraa utuafare, e tia i te mau Kerisetiano ia faatupu i te aroha mai to Iehova e to Iesu.—Ephesia 5:21-27.
5. E ani te mau metua i ta vai tauturu no te aratai i ta ratou mau tamarii, e eaha te mau faahopearaa no te rahiraa?
5 E hiˈo te mau metua Kerisetiano i ta ratou mau tamarii ei tufaa no ǒ mai ia Iehova ra, e e ani ratou i ta ˈna tauturu no te aratai i ta ratou mau tamarii. (Salamo 127:3-5; Maseli 22:6) Mea na reira ratou e faahotu ai i te aroha Kerisetiano, o te tauturu ia ratou ia paruru i ta ratou mau tamarii i te mau mana viivii o te nehenehe e faaturori i te feia apî. Ei faahopearaa, mea rahi te mau metua Kerisetiano tei ite i te hoê â oaoa e to te hoê mama i te mau Pays-Bas. I muri aˈe i te mataitairaa i te bapetizoraa o ta ˈna tamaiti—te hoê o na 575 taata tei bapetizohia i te mau Pays-Bas i te matahiti i mairi aˈenei—ua papai oia i te mea i muri nei: “I taua taime ra, ua hoona ta ˈu mau tutavaraa o na matahiti e 20 i mairi. I teie nei, ua aramoina te taime e te puai atoa, tae noa ˈtu te mauiui, te tutavaraa, e te oto.” Auê oia i te oaoa e ua maiti ta ˈna tamaiti i te tavini ia Iehova. I roto i na 31 089 taata poro tei tapaohia i te mau Pays-Bas i te matahiti i mairi aˈenei, mea rahi o tei haapiihia e to ratou mau metua ia hinaaro ia Iehova.
6. Nafea te aroha Kerisetiano e tauturu ai i te haapaari i te taairaa o te faaipoiporaa?
6 Ua parau Paulo e e ‘taairaa tahoêraa tia roa te aroha,’ e e nehenehe te reira e paruru i te hoê faaipoiporaa tae noa ˈtu i roto i te mau taime vero. (Kolosa 3:14, MN, 18, 19; Petero 1, 3:1-7) I to te hoê tane i Rurutu, te hoê motu iti fatata e 700 kilometera i te atea ia Tahiti, haamataraa i te haapii i te Bibilia e te mau Ite no Iehova, ua patoi uˈana ta ˈna vahine. I te pae hopea, ua rave te vahine i te mau tamarii, ua faarue ia ˈna, e ua haere e faaea i Tahiti. Ua faaite noa râ te tane i to ˈna here na roto i te hapono-tamau-raa i te moni na ˈna e te taniuniuraa no te ui e e ohipa anei ta ˈna aore ra ta te mau tamarii e hinaaro. No reira, ua rave maitai roa ino oia i ta ˈna mau hopoia Kerisetiano. (Timoteo 1, 5:8) Ua pure oia ma te tuutuu ore ia tahoê faahou to ˈna utuafare, e i te pae hopea, ua hoˈi atu ta ˈna vahine. I muri iho, ua hamani maitai atura ta ˈna tane ia ˈna ma te ‘here, te faaoromai, e te mǎrû.’ (Timoteo 1, 6:11) I te matahiti 1998, ua bapetizohia oia e i muri aˈe, ua oaoa roa oia i te fariiraa ta ˈna vahine e haapii i te Bibilia. O te hoê ïa teie o na 1 351 haapiiraa i faaterehia i te tuhaa fenua e haapaohia ra e te amaa no Tahiti i te matahiti i mairi aˈenei.
7. Ia au i te hoê taata i Helemani, eaha tei haapaari i to ˈna faaipoiporaa?
7 I Helemani, ua patoi te hoê tane i te anaanataeraa ta ˈna vahine i te parau mau bibilia e ua manaˈo roa oia e te hinaaro ra te mau Ite no Iehova e haavare ia ˈna. I muri aˈe râ, ua papai atu oia i te Ite o tei farerei i ta ˈna vahine i te taime matamua: “Mauruuru i to oe faafarereiraa i ta ˈu vahine e te mau Ite no Iehova. I te haamataraa, ua peapea vau no te mea ua faaroo vau e rave rahi mau mea tia ore no nia ia ratou. I teie nei râ, no te mea ua haere au i te mau putuputuraa e ta ˈu vahine, ua taa ia ˈu e ua hape au. Ua ite au e te faaroo ra vau i te parau mau, e na te reira i haapaari atu â i to mâua faaipoiporaa.” I roto i na 162 932 Ite no Iehova i Helemani—e na 1 773 i te mau motu e haapaohia ra e te amaa no Tahiti—mea rahi te mau utuafare tei tahoêhia i roto i te hinaaro i te Atua.
E aroha i to tatou mau taeae Kerisetiano
8, 9. (a) Na vai e haapii maira ia aroha tatou i to tatou mau taeae, e eaha ta te aroha e turai ia tatou ia rave? (b) A horoa i te hoê hiˈoraa nafea te aroha e nehenehe ai e tauturu i te mau taeae ia turu te tahi i te tahi.
8 Teie ta Paulo i parau i te mau Kerisetiano no Tesalonia: “Ua haapiihia hoi outou iho e te Atua i te aroha ia outou iho.” (Tesalonia 1, 4:9) Oia, e aroha te feia i ‘haapiihia e Iehova’ te tahi i te tahi. (Isaia 54:13) Te itehia ra to ratou aroha na roto i te ohipa, mai ta Paulo i parau: ‘Ei auraro aroha to outou ia outou iho.’ (Galatia 5:13; Ioane 1, 3:18) Te na reira ra ratou, ei hiˈoraa, ia haere ratou e hiˈo i te mau taeae e mau tuahine maˈi, ia faaitoito i te feia e taiâ ra, e ia turu i tei paruparu. (Tesalonia 1, 5:14) Te paturu ra to tatou aroha mau Kerisetiano i te ruperupe o to tatou paradaiso pae varua.
9 I roto i te amuiraa no Ancón—hoê o na 544 amuiraa i Équateur—ua faaohipa roa te mau taeae i to ratou aroha. No te hoê fifi i te pae faanavairaa faufaa, aita ta ratou e ohipa aore ra e moni ohipa faahou, no reira, ua faaoti aˈera te feia poro e imi i te moni na roto i te hooraa ˈtu i te maa i te feia ravaai no taua vahi ra ia hoˈi ratou i te fare i muri aˈe i te hoê po ravaairaa. Ua haa amui te taatoaraa, tae noa ˈtu te mau tamarii. E haamata ratou i te hora 1 i te aahiata ia ineine te maa no te hora 4 i te aahiata, ia hoˈi mai te feia ravaai. Ua tufahia te moni i noaa mai i te mau taeae i rotopu ia ratou ia au i to ratou mau hinaaro. Ua faaite teie tauturu te tahi i te tahi i te aroha mau Kerisetiano.
10, 11. Nafea tatou e faaite ai i te aroha i te mau taeae ta tatou i ore i matau?
10 Aita râ to tatou aroha i taotiahia i te mau Kerisetiano ta tatou i matau. Ua parau te aposetolo Petero e: “E aroha ˈtu i te hui taeae.” (Petero 1, 2:17) E aroha tatou i to tatou mau taeae e mau tuahine atoa no te mea e mau hoa haamori anaˈe ratou i te Atua ra o Iehova. O te tau fifi paha te hoê taime maitai no te faaite i teie aroha. Ei hiˈoraa, i te roaraa o te matahiti taviniraa 2000, ua tuino te mau pape pue rahi i te fenua Mozambique, e ua vaiiho mai te hoê tamaˈi tivira tamau i Angola i te taata e rave rahi i roto i te veve. Mea rahi o na 31 725 taeae i Mozambique e o na 41 222 i Angola tei roohia i teie mau ati. No reira, ua hapono te mau Ite no te fenua tapiri o Afirika Apatoa e rave rahi mau mea no te tauturu i to ratou mau taeae i roto i te ati i taua nau fenua ra. Ua faaite to ratou aau tae e horoa i ta ratou “taoˈa rahi” na to ratou mau taeae e erehia ra, i to ratou aroha.—Korinetia 2, 8:8, 13-15, 24.
11 Te ite-atoa-hia ra te aroha ia turu te mau taeae i te mau fenua e rave rahi i te paturaa i te mau Piha a te Basileia e te mau Piha tairururaa i te mau fenua e ere i te mea navai roa. Te vai ra te hoê hiˈoraa i te mau motu Solomona. Noa ˈtu te arepurepu rahi, ua tapao te mau motu Solomona i te hoê numera rahi roa ˈˈe 1 697 taata poro oia hoi te hoê maraaraa e 6 % i te matahiti i mairi aˈenei. Ua opua ratou e hamani i te hoê Piha tairururaa. Noa ˈtu e mea rahi tei faarue i te fenua, ua haere atu te mau rima tauturu no Auteralia e turu i te paturaa. I te pae hopea, ua titauhia ia hoˈi te mau rima tauturu i muri aˈe noa râ i to ratou haapiiraa i te mau taeae no reira ia faaoti i te niu. Mai Auteralia ˈtu te haponoraahia ˈtu te tino auri hamani-aˈena-hia o te piha, e ia oti anaˈe teie fare nehenehe no te haamoriraa—i te hoê tau, mea rahi te mau paturaa e faarue-noa-hia—e faaiteraa maitai ïa te horoahia i te iˈoa o Iehova e i te aroha o te mau taeae.
Mai te Atua, e aroha tatou i to te ao
12. Nafea tatou e pee ai ia Iehova i roto i to tatou huru i nia i te feia e ere hoê â to tatou faaroo?
12 E here noa anei tatou i to tatou utuafare e to tatou mau taeae? Eita ïa mai te peu e e ‘pee tatou i te Atua.’ Ua parau Iesu e: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ephesia 5:1; Ioane 3:16) E hamani maitai tatou, mai te Atua ra o Iehova, i te taata atoa ma te aroha—te feia atoa e ere hoê â to tatou faaroo. (Luka 6:35, 36; Galatia 6:10) I roto iho â râ i teie tuhaa, te poro ra tatou i te parau apî maitai o te Basileia e te faaite ra tatou i te ohipa aroha rahi ta te Atua i rave no tatou ia vetahi ê. Maoti te reira e nehenehe ai te feia e faaroo e ora.—Mareko 13:10; Timoteo 1, 4:16.
13, 14. Eaha te tahi mau aamu e ua faaite te tahi mau taeae i te aroha i te feia e ere i te Ite, noa ˈtu te tahi haafifiraa rahi?
13 A rave na i te hiˈoraa o na pionie taa ê e maha i Népal. Ua tonohia ratou i te hoê oire i te pae apatoa tooa o te râ o te fenua, e i na matahiti e pae i mairi, ua faaite ratou i to ratou aroha na roto i te pororaa ma te faaoromai i roto i te oire e te mau oire iti moemoe. No te poro i ta ratou tuhaa fenua, e pinepine ratou i te tere na nia i te pereoo taataahi ehia hora i roto i te veavea ua hau atu i te 40 teteri. Ua horoa mai to ratou aroha e “te tamau-maite-raa i te parau maitai” i te mau faahopearaa maitatai i te faanahoraahia te hoê pǔpǔ haapiiraa buka i te hoê o te mau oire iti. (Roma 2:7) I te avaˈe Mati 2000, e 32 taata tei haere mai e faaroo i te oreroraa parau no te taatoaraa a te tiaau haaati. Ua tapao te fenua Népal i te hoê numera rahi roa ˈˈe e 430 taata poro i te matahiti i mairi aˈenei—te hoê ïa maraaraa e 9 %. Oia mau, te haamaitai ra Iehova i te itoito e te aroha o te mau taeae i taua fenua ra.
14 I Colombie, ua haere te mau pionie taa ê no te hoê taime e poro i te mau Indiens Wayuu. No reira, ua tia ia ratou ia haapii i te hoê reo apî, ua haamaitaihia râ to ratou haapaoraa ˈtu ma te here i taua mau taata ra i te haereraa mai e 27 e faaroo i te hoê oreroraa parau no te taatoaraa noa ˈtu te ûa puai. Ua faatupu te itoito î i te here mai teie o teie mau pionie i te hoê maraaraa e 5 % i Colombie e te hoê numera rahi roa ˈˈe 107 613 taata poro. I Danemata, ua hinaaro te hoê tuahine ruhiruhia e faaite i te parau apî maitai ia vetahi ê, tera râ, e paruparu oia. Ma te ore e toaruaru, ua papai oia i te rata na te feia i anaanatae. I teie mahana, te papai ra oia i te rata i na 42 taata e te faatere ra 11 haapiiraa bibilia. Tei roto oia i na 14 885 taata poro tei tapaohia i Danemata i te matahiti i mairi aˈenei.
A aroha i to outou mau enemi
15, 16. (a) Ia au i te parau a Iesu, mai te aha te aano o to tatou aroha? (b) Nafea to te tahi mau taeae haapao ohiparaa ma te here e te hoê taata tei nenei i te mau pariraa haavare i nia i te mau Ite no Iehova?
15 Ua parau Iesu i te haapii ture e e nehenehe te hoê taata Samaria e hiˈohia ei taata-tupu. I roto i ta ˈna Aˈoraa i nia i te mouˈa, ua haere atu â Iesu i mua i to ˈna na ôraa e: “Ua faaroo hoi outou e i parauhia mai i tahito ra, E aroha ˈtu oe i to taata-tupu, e e riri atu i to enemi. Te parau atu nei râ vau ia outou, E aroha ˈtu i to outou mau enemi; e faaora ˈtu i tei tuhi mai ia outou; e hamani maitai atu i te feia i riri mai ia outou; e pure hoi i te feia i parau ino mai e tei hamani ino mai ia outou; ia riro outou ei tamarii na to outou Metua i te ao ra.” (Mataio 5:43-45) Ia patoi atoa mai te hoê taata ia tatou, e tutava tatou i te rave e ‘ia pohe noa te ino i te maitai.’ (Roma 12:19-21) I te taime e nehenehe, e faaite tatou i te parau mau, ta tatou taoˈa faufaa roa ˈˈe, ia ˈna.
16 I Ukraine, te faaite ra te hoê tumu parau i roto i te vea ra Kremenchuk Herald e e pǔpǔ iti faaroo atâta te mau Ite no Iehova. E ere teie i te parau hoata no te mea i Europa tera ta te vetahi e parau no nia i te mau Ite no Iehova ia manaˈo te taata e e tia ia taotiahia aore ra ia opanihia te mau ohipa a te mau Ite. No reira, ua farereihia te taata nenei e ua anihia ia ˈna ia nenei i te hoê parau faaite o te faatitiaifaro i te tumu parau. Ua farii oia, i roto râ i te parau faaite, ua nenei oia i te hoê tatararaa e faataa ra e ua niuhia te tumu parau matamua i nia i te tupuraa mau. Ua farerei faahou te mau taeae haapao ia ˈna ma te mau haamaramaramaraa hau. I te pae hopea, ua taa i te taata nenei e mea hape te tumu parau matamua, e ua nenei atura i te hoê parau o te faaore i te matamua. O te ohiparaa e oia ma te haavare ore e te maitai te ravea î i te here i afaro ai teie tupuraa, e e faahopearaa maitai tei noaa mai.
Nafea tatou e faahotu ai i te aroha?
17. Eaha te faaite ra e e ere i te mea ohie noa ia hamani maitai ma te here ia vetahi ê?
17 Ia fanauhia mai te hoê aiû, e oioi roa to ˈna mau metua i te here ia ˈna. E ere te faaiteraa i te here i nia i te taata paari i te mea ohie noa. No reira paha te Bibilia e haamanaˈo noa mai ai ia aroha tatou te tahi i te tahi—mea faahotu teie mea. (Petero 1, 1:22; 4:8; Ioane 1, 3:11) Ua ite Iesu e e tamatahia to tatou aroha i to ˈna parauraa e ia faaore tatou i te hara a to tatou taeae ‘ia hitu ahuru i te hituraa.’ (Mataio 18:21, 22) Ua faaitoito atoa mai Paulo ia tatou ia “faaoromai te tahi i te tahi.” (Kolosa 3:12, 13) No reira iho â ïa tatou i parauhia ˈi e: “E tapi i te aroha”! (Korinetia 1, 14:1) Nafea tatou e na reira ˈi?
18. Eaha te tauturu ia tatou ia faahotu i te aroha ia vetahi ê?
18 A tahi, e nehenehe tatou e haamanaˈo noa i to tatou hinaaro i te Atua ra o Iehova. E faaitoitoraa puai teie no te aroha i to tatou taata-tupu. No te aha? No te mea ia na reira tatou, o to tatou Metua i te raˈi ïa te haamaitaihia, te faahanahanahia e te aruehia. (Ioane 15:8-10; Philipi 1:9-11) A piti, e nehenehe tatou e tamata i te hiˈo i te mau mea mai ia Iehova. I te mau taime atoa e hara ˈi tatou, te hara ra tatou ia Iehova; tera râ, e faaore tamau noa oia i ta tatou mau hara e e aroha noa oia ia tatou. (Salamo 86:5; 103:2, 3; Ioane 1, 1:9; 4:18) Ia faahotu tatou i te manaˈo o Iehova, e aau tae ïa to tatou i te aroha ia vetahi ê e i te faaore i ta ratou mau hapa. (Mataio 6:12) A toru, e nehenehe tatou e hamani maitai ia vetahi ê mai ta tatou e hinaaro ia na reira atoa mai ratou. (Mataio 7:12) Ei taata tia ore, e hinaaro pinepine tatou ia faaorehia ta tatou mau hara. Ei hiˈoraa, ia parau tatou i te hoê mea o tei haamauiui ia vetahi ê, e hinaaro tatou ia haamanaˈo ratou e e hara te taata atoa e te arero i te tahi taime. (Iakobo 3:2) Ia hinaaro tatou ia hamani maitai vetahi ê ia tatou ma te here, ia na reira atoa ïa tatou i nia ia ratou.
19. Nafea tatou e imi ai i te tauturu a te varua moˈa no te faahotu i te aroha?
19 A maha, e nehenehe tatou e imi i te tauturu a te varua moˈa no te mea e hotu te aroha o te varua moˈa. (Galatia 5:22, 23) E pinepine, mea tupu ohie noa te mau auhoaraa, te mau manaˈo hohonu utuafare, e te taairaa here. E hinaaro râ tatou i te tauturu a te varua o Iehova no te faahotu i te here ia Iehova, te taairaa tia roa o te tahoêraa. E nehenehe tatou e imi i te tauturu a te varua moˈa na roto i te taioraa i te Bibilia faauruahia. Ei hiˈoraa, ia faahohonu tatou i te oraraa o Iesu, e ite tatou eaha to ˈna huru i nia i te taata, e e nehenehe tatou e haapii i te pee ia ˈna. (Ioane 13:34, 35; 15:12) Hau atu â, e nehenehe tatou e ani i te varua moˈa ia Iehova, i roto iho â râ i te mau tupuraa mea fifi roa no tatou ia hamani maitai ma te here. (Luka 11:13) I te pae hopea, e nehenehe tatou e tapi i te aroha ma te tapiri noa i te amuiraa Kerisetiano. E tauturu mai te amuiraa e te mau taeae e mau tuahine î i te here ia faahotu tatou i te aroha.—Maseli 13:20.
20, 21. Eaha te faaiteraa aroha faahiahia ta te mau Ite no Iehova i horoa i te roaraa o te matahiti taviniraa 2000?
20 I te matahiti i mairi aˈenei, ua tapaohia te hoê numera rahi roa ˈˈe e 6 035 564 taata poro i te parau apî maitai na te ao atoa nei. Ua rave te mau Ite no Iehova 1 171 270 425 hora no te haere e farerei i te taata no te faaite atu i taua parau apî maitai ra. No te aroha i faaruru ai ratou i te veavea, te ûa, e te toetoe a rave ai ratou i teie ohipa. Na te aroha i turai ia ratou ia tauaparau e te mau hoa haapiiraa, te mau hoa ohipa, e te feia ěê roa i nia i te purumu e i te tahi atu â mau vahi. Mea rahi tei ore i tâuˈa mai, ua patoi te tahi pae i to te mau Ite haereraa ˈtu e hiˈo ia ratou. Ua faaite râ te vetahi i te anaanatae, no reira i ravehia ˈi e 433 454 049 hoˈi-faahou-raa e farerei, e i faaterehia ˈi e 4 766 631 haapiiraa Bibilia. *
21 E faaiteraa anaˈe teie i te hinaaro o te mau Ite no Iehova i to ratou Atua e te aroha i to ratou taata-tupu! E ore roa ˈtu taua aroha ra e toetoe. Ua papu ia matou e e ravehia te hoê faaiteraa rahi atu â i te huitaata nei i te matahiti taviniraa 2001. Ia haamaitai noa ïa Iehova i ta ˈna feia haamori haapao maitai e te itoito a ‘rave ai ratou i te mau mea atoa i roto ia ratou ma te aroha.’—Korinetia 1, 16:14.
[Nota i raro i te api]
^ No nia i te tapura taatoa no te matahiti taviniraa 2000, a hiˈo i te mau api 18-21.
E nehenehe anei outou e faataa?
• Te pee ra tatou ia vai ia aroha tatou i to tatou taata-tupu?
• Mai te aha te aano o to tatou aroha?
• Eaha te tahi mau aamu e faaite ra i te aroha Kerisetiano?
• Nafea tatou e faahotu ai i te aroha Kerisetiano?
[Uiraa haapiiraa]
[Tapura i te mau api 18-21]
TAPURA NO TE MATAHITI TAVINIRAA 2000 A TE MAU ITE NO IEHOVA O TE AO ATOA
(Hiˈo i te papai)
[Hohoˈa i te api 15]
E nehenehe te aroha Kerisetiano e tahoê noa i te hoê utuafare
[Hohoˈa i te api 17]
E turai te aroha ia tatou ia faaite i to tatou tiaturiraa ia vetahi ê