Aamu

Taviniraa ma te aau atoa noa ˈtu te mau tamataraa

FAATIAHIA E RODOLFO LOZANO

Ua fanauhia vau i Mehiko, i roto i te oire o Gómez Palacio, i te tuhaa fenua o Durango, i te 17 no Setepa 1917. Te tupu maitai ra te orureraa hau i Mehiko. Noa ˈtu e ua hope te orureraa hau i te matahiti 1920, ua tamau noa te mau faahuehueraa i te vahi ta matou e faaea ra e mau matahiti i te maoro, e ua fifi roa te oraraa.

I TE hoê taime, i to Mama faarooraa e e tupu te hoê aroraa i rotopu i te mau orure hau e te nuu, ua tapea oia ia ˈu e to ˈu na taeae e toru e na tuahine e piti i te fare tau mahana i te maoro. Aita i rahi ta matou maa e amu, e te haamanaˈo ra vau ia tapuni mâua to ˈu tuahine apî aˈe i raro aˈe i te roi. I muri aˈe i te reira, ua faaoti Mama e hopoi ia matou te mau tamarii i te mau Hau Amui, i muri mai ïa to ˈu papa e haere mai ai ia matou ra.

Ua tae atu matou i Kalifonia i te matahiti 1926, maa taime iti hou te mau Hau Amui a roohia ˈi i te topatari rahi. Ua haere noa matou e faaea i te mau vahi atoa e itehia te ohipa, mai te San Joaquin Valley, Santa Clara, Salinas, e King City. Ua haapii matou i te rave i te ohipa i roto i te mau faaapu e te ooti i te mau huru hotu e maa tupu atoa. Noa ˈtu e ua riro to ˈu apîraa ra ei tau ohiparaa rohirohi, e taime au mau tera i roto i to ˈu oraraa.

Iteraa i te parau mau bibilia

I te avaˈe Mati 1928, ua haere mai te hoê Taata haapii Bibilia, mai tei parauhia na te mau Ite no Iehova, i ǒ matou. E taata parau Paniora huru paari oia, o Esteban Rivera to ˈna iˈoa. Ua putapû vau i te upoo parau o te buka iti ta ˈna i vaiiho mai, oia hoi “Teihea te feia pohe?,”  oia atoa i tei papaihia i roto. Noa ˈtu e mea apî au, ua tamau vau i te haapii i te Bibilia e te amui e te Feia haapii Bibilia. I muri aˈe, ua riro atoa mai to ˈu mama e to ˈu tuahine Aurora ei feia itoito o te arue ia Iehova.

I ropu i te mau matahiti 1930, ua patuhia te hoê Piha a te Basileia i San José no te amuiraa reo Beretane. I te mea e e rave rahi feia parau Paniora e rave ra i te ohipa i roto i te mau aua faaapu i taua vahi ra, ua haamata matou i te poro ia ratou e te faatere i te Haapiiraa o Te Pare Tiairaa. Ua na reira matou ma te tauturu a te mau Ite parau Paniora no San Francisco mai, fatata e 80 kilometera i te atea. Ia maoro rii, fatata e 60 tei haere mai i te mau putuputuraa reo Paniora i roto i te Piha a te Basileia no San José.

I te pae hopea, i te 28 no Febuare 1940, ua faataipe au i to ˈu pûpûraa na Iehova na roto i te bapetizoraa i roto i te pape i te hoê tairururaa i San José. I te matahiti i muri mai, ua nominohia vau ei pionie, oia ei tavini taime taatoa a te mau Ite no Iehova. E i te avaˈe Eperera 1943, ua titauhia vau e haere atu i Stockton, te hoê oire fatata 130 kilometera i te atea, e haamau i te hoê amuiraa reo Paniora. I taua tau ra, te tavini ra vau ei tiaau peretiteni o te amuiraa reo Beretane no San José, e te haapao atoa ra vau i te mau Ite parau Paniora i ǒ. I muri aˈe i to ˈu faanahoraa e ia haapao vetahi ê i teie mau hopoia, ua haere atu vau i Stockton.

Tamataraahia te hapa ore

Mai te matahiti 1940 mai â, ua titau-tamau-hia vau i mua i te tomite no te tau faehau, i te mau taime atoa râ, ua faaturahia to ˈu tiaraa patoi no te manaˈo haava. I muri rii noa ˈˈe i to te mau Hau Amui ôraa i roto i te piti o te tamaˈi rahi i te avaˈe Titema 1941, ua puai atu â te faaheporaa a te tomite no te tau faehau. I te pae hopea, i te matahiti 1944, ua tuuhia vau i roto i te fare tapearaa. A tiai ai au i te haavaraa, ua tapeahia vau i roto i te hoê piha i raro i te fenua e te tahi feia ohipa ino. I to ratou iteraa e e Ite no Iehova vau, e rave rahi tei ui mai eaha te faahopearaa o te mau ohipa ino ta ratou i rave i nia i to ratou tiaraa i mua i te Atua.

Ua aufau te tahi mau Ite no San José i ta ˈu moni faaoraraa ia nehenehe au ia tuuhia a tiai atu ai i te haavaraa. Ua farii te hoê paruru no Los Angeles o te tia no te feia e faatia ia ratou i roto i te mau haavaraa no te mau tiaraa tivira, e rave i ta ˈu parururaa ma te tamoni ore. Ua faaoti te haava e tuu ia ˈu ia faarue râ vau i te taviniraa pionie, ia rave i te ohipa, e ia tia ˈtu i mua i te feia mana a te hau i te mau avaˈe atoa. Aita vau i farii i taua faaotiraa ra, no reira vau i faautuahia ˈi e piti matahiti tapearaa i te fare tapearaa no te motu McNeil i te tuhaa fenua o Washington. I  ǒ, ua faaohipa vau i to ˈu taime no te faahohonu maitai i te Bibilia. Ua haapii atoa vau i te patapata i te matini. Aita i tia e piti matahiti, ua tuuhia vau no te haerea maitai. Ua rave oioi atura vau i te mau faanahoraa no te tamau i roto i te taviniraa pionie.

Faaaanoraa i te ohipa

I te tau toetoe 1947, ua tonohia vau e tavini i roto i te feia parau Paniora no Colorado City, i Texas, e te hoê hoa pionie. No te toetoe râ, ua haere mâua i San Antonio e haamahanahana ia mâua. I ǒ râ, ua ûa rahi noa e ua mau aˈera ta mâua taviniraa i tera e tera fare. Aita i maoro, ua pau aˈera ta mâua moni. E mau hebedoma i te maoro, ua ora noa mâua i te tâpû faraoa e te pota ota e te ti luzerne. Ua hoˈi to ˈu hoa i te fare, ua faaea mai râ vau. I to te mau Ite parau Beretane iteraa i to ˈu mau hinaaro pae tino, ua haamata aˈera ratou i te tauturu mai ia ˈu.

I te tau uaaraa tiare i muri mai, ua hoˈi au i ta ˈu tuhaa taviniraa i Colorado City, e i te pae hopea, ua haamauhia te hoê amuiraa iti reo Paniora. I muri iho, ua haere au e faaea i Sweetwater, i Texas, i reira to ˈu tautururaa i te haamau i te tahi atu amuiraa reo Paniora. I Sweetwater, ua tae mai ta ˈu rata e titau mai e haere i te 15raa o te piha a te Haapiiraa bibilia no Gileada a te Watchtower no te faaineineraa mitionare o te haamata i te 22 no Febuare 1950. I muri aˈe i te faatuiteraa i taua tau veavea ra i te tairururaa no te mau nunaa rau i te Yankee Stadium a te oire no New York, ua faaea vau e toru avaˈe i te pu rahi a te mau Ite no Iehova i Brooklyn. I reira, ua fanaˈo vau i te haapiiraa no ta ˈu hopoia i te amaa no Mehiko.

Te ohipa i Mehiko

Ua tae atu vau i te oire o Mexico i te 20 no Atopa 1950. Fatata e piti hebedoma i muri aˈe, ua nominohia vau ei tiaau o te amaa, te hoê hopoia ta ˈu i amo e maha matahiti e te afa i te roa. Ua riro te mea ta ˈu i farerei i roto i te taviniraa pionie, te fare tapearaa, i Gileada, e i Brooklyn ei mea maitai roa. I to ˈu taeraa ˈtu i Mehiko, ua ite oioi au e mea hinaarohia ia patu i te huru pae varua o to tatou mau taeae e tuahine no reira. Te vai ra iho â râ te hinaaro e tauturu ia ratou ia tapea i te mau ture morare teitei o te Parau a te Atua.

I te mau fenua Marite Latino, e tae noa ˈtu i Mehiko, e peu matauhia e te mau hoa apiti e faaea noa ma te ore e faaipoipo i mua i te ture. Ua vaiiho noa te mau haapaoraa o te Amuiraa faaroo Kerisetiano, te Ekalesia Katolika Roma iho â râ, ia rahi noa ˈtu teie peu o te ore e au i te Bibilia. (Hebera 13:4) No reira, ua riro mai te tahi pae ei melo o te mau amuiraa a te mau Ite no Iehova, noa ˈtu e aita ratou i faaipoipo i mua i te ture. I teie nei, ua faanahohia e ia faatitiaifaro taua mau taata ra i te mau mea i roto e ono avaˈe. Aita anaˈe eita ratou e farii-faahou-hia ei Ite no Iehova.

No te rahiraa, mea ohie te faatitiaifaroraa i to ratou oraraa. Te titau-noa-hia ra ratou e faatiamâ i to ratou taatiraa na roto i te faaipoiporaa. E huru tupuraa fifi aˈe to te tahi pae. Ei hiˈoraa, ua faaipoipo te tahi e piti e tae noa ˈtu e toru taime ma te ore i noaa te faataaraa i mua i te ture. I te pae hopea, i te auraa te oraraa o te nunaa o Iehova i te pae faaipoiporaa e te mau haapiiraa o te Parau a te Atua, ua fanaˈohia te mau haamaitairaa pae varua faahiahia i roto i te mau amuiraa.—Korinetia 1, 6:9-11.

I taua tau ra, mea haehaa roa te faito haapiiraa raita i Mehiko. Hou aˈena a tae mai ai au i te matahiti 1950, ua haamata te amaa i te faanaho i te mau piha haapiiraa taio e papai i roto i te mau amuiraa. I teie nei, te faanaho-faahou-hia ra teie mau piha, e ua ravehia e ia tapaohia te reira i mua i te hau. Mai te matahiti 1946 mai â, i te haamataraa te mau tapaoraa iˈoa, hau atu i te 143 000 taata i Mehiko tei haapiihia i te taio e te papai i roto i te mau piha haapiiraa a te mau Ite!

Mea taotia roa te mau ture i Mehiko i te haapaoraa. I te mau matahiti i mairi aˈenei râ, ua tupu te mau tauiraa rahi i te reira pae. I te matahiti 1992, ua haamauhia te hoê ture apî no nia i te mau haapaoraa, no reira i te matahiti 1993, ua tapaohia te mau Ite no Iehova ei haapaoraa faanahohia.

 No ˈu, ua riro teie mau tauiraa ei oaoaraa rahi, te hoê mea aita vau i manaˈo e e tupu na mua ˈˈe. I te roaraa e rave rahi matahiti, ua haere tamau vau i te mau piha ohipa a te hau e ua farerei au i te hoê huru feruriraa manaˈo ino. Mea au roa râ te iteraa nafea teie mau mea i te haapaoraahia e te Tuhaa tuatiraa e te Ture a ta matou amaa, aita ˈtura i rahi faahou te mau faataupupuraa i te ohipa pororaa i teie nei.

Taviniraa e te hoê hoa mitionare

I to ˈu taeraa mai i Mehiko, te vai aˈena ra e rave rahi feia faatuitehia no te mau piha haapiiraa no Gileada no mua ˈtu i teie fenua. Hoê o ratou, o Esther Vartanian ïa, te hoê Ite Aramenia tei haamata i te taviniraa pionie i Vallejo i Kalifonia i te matahiti 1942. Ua faaipoipo mâua i te 30 no Tiurai 1955, e ua tamau noa mâua i roto i ta mâua tuhaa taviniraa i Mehiko. Ua faaea noa Esther i roto i te ohipa mitionare i te oire o Mexico, e te noho ra mâua i te amaa i reira to ˈu tamau-noa-raa i te tavini.

I te matahiti 1947, ua tae mai Esther no ta ˈna tuhaa taviniraa mitionare matamua i Monterrey, i Nuevo León, i Mehiko. Hoê noa amuiraa e 40 Ite i Monterrey, i te taime râ a tonohia ˈi oia i te oire o Mexico i te matahiti 1950, e maha ïa amuiraa to ǒ. I ta matou amaa i pihai ia Mexico, te vai ra i teie nei e piti tamarii no te mau utuafare ta Esther i haapii i te Bibilia a tavini ai oia i Monterrey.

I te matahiti 1950, o te rahiraa o te oire te tuhaa fenua a te mau mitionare i Mexico. E haere ratou i te tahi pae o ta ratou tuhaa fenua na raro aore ra na nia i te mau pereoo utaraa taata tahito roa e te tomo roa. I to ˈu taeraa mai i te hopea matahiti 1950, e hitu amuiraa e vai ra. I teie nei, ua maraa te reira i nia fatata 1 600 e ua hau atu i te 90 000 feia poro i te Basileia i Mexico, e i te matahiti i mairi aˈenei, ua hau atu i te 250 000 taata tei tae mai i te oroa Haamanaˈoraa i te pohe o te Mesia i reira! I te roaraa o te mau matahiti, ua noaa ia mâua Esther te fanaˈoraa taa ê e tavini i roto e rave rahi o teie mau amuiraa.

 Ia haamata mâua Esther i te hoê haapiiraa bibilia, e tamata iho â mâua i te faaanaanatae mai i te metua tane o te utuafare ia ô mai te utuafare taatoa. No reira, ua ite mâua e rave rahi utuafare rarahi i te taviniraa ia Iehova. Te tiaturi nei au e hoê o te mau tumu o te maraaraa oioi o te haamoriraa mau i Mehiko, te mea ïa e e pinepine te mau utuafare taatoa i te amui tahi i roto i te haamoriraa mau.

Ua haamaitai Iehova i te ohipa

Mai te matahiti 1950 mai â, mea faahiahia te maraaraa o te ohipa i Mehiko, i te pae o te numera e te mau tauiraa i roto i te faanahonahoraa atoa. E oaoaraa mau te horoa-rii-raa i te rima i te maraaraa, te haaraa e te hoê nunaa farii maitai e te oaoa.

Ua haere mai o Karl Klein, o te tavini ei melo o te Tino Aratai a te mau Ite no Iehova, e ta ˈna vahine o Margaret, e hiˈo ia matou i roto i te hoê tere faafaaearaa tau matahiti aˈenei. Te hinaaro ra Taeae Klein e fafa i te huru o te ohipa i roto i ta matou tuhaa fenua i Mehiko, no reira oia e o Margaret i haere mai ai i roto i te Amuiraa no San Juan Tezontla, i pihai ia Mexico, i reira mâua e haere ai i taua tau ra. Mea nainai ta matou piha, fatata e 4,5 metera i te aano e e 5,5 metera i te roa. I to matou taeraa ˈtu, fatata e 70 taata tei tae aˈena ˈtu, e mea fifi roa ia tia noa ˈtu i roto. Te parahi ra te feia paari i nia i te mau parahiraa, te mea apî aˈe i nia i te mau parahiraa roa, e te mau tamarii rii i nia i te mau tâpû tima aore ra i raro.

Ua putapû roa Taeae Klein no te mea ua ineine te Bibilia a te mau tamarii atoa, e te hiˈo ra ratou i te mau irava bibilia e te taeae orero. I muri aˈe i te oreroraa parau no te taatoaraa, ua paraparau Taeae Klein i nia i te Mataio 13:19-23 e ua na ô e i Mehiko, mea rahi te “repo maitai” ta Iesu i faahiti. I teie nei, e hitu o te mau tamarii e vai ra i roto i te feia i tae mai i taua mahana ra teie e rave nei i te ohipa i roto i te paturaa rahi no te faarahi i ta matou amaa i pihai ia Mexico. Te tavini nei te tahi atu i te Betela, e e rave rahi e pionie ratou!

I to ˈu haereraa mai i Mexico, 11 noa melo tei te amaa. I teie nei, fatata 1 350 e ohipa ra i roto i te paturaa, fatata e 250 o ratou e patu ra i te amaa apî. Ia oti teie ohipa taatoa, peneiaˈe i te matahiti 2002, e nehenehe matou e farii fatata 1 300 taata hau i roto i te mau vahi faaaanohia. Ia feruri tatou e i te matahiti 1950, ua iti aˈe i te 7 000 feia poro i te Basileia na te fenua atoa, i teie nei râ, ua hau atu ïa i te 500 000! E î roa to ˈu mafatu i te oaoa i te iteraa nafea to Iehova haamaitairaa i te mau tutavaraa a to tatou mau taeae haehaa no Mehiko o tei haa puai i te arue ia ˈna.

Faarururaa i te hoê tautooraa rahi

Hoê o ta ˈu mau tautooraa rahi roa ˈˈe i teie mau tau i mairi, o te maˈi ïa. Ua riro noa na vau ei taata ea maitai. I te avaˈe Novema 1988 râ, ua roohia vau i te maˈi i roto i te roro o tei faaiti roa i ta ˈu mau ravea pae tino. Auaa Iehova, ua ora rii mai au na roto i te faaetaetaraa tino e te tahi atu â rapaauraa, aita râ te tahi mau tuhaa o to ˈu tino e ohipa ra mai ta ˈu e hinaaro. Te rapaau-noa-hia râ vau e te hiˈopoa-noa-hia râ e te taote eiaha to ˈu upoo ia mauiui ino roa e eiaha vau ia roohia i te tahi atu mau faahopearaa e vai noa râ.

Noa ˈtu e eita ta ˈu e nehenehe faahou e rave mai ta ˈu e hinaaro, te mauruuru nei au i te iteraa e ua nehenehe au e tauturu e rave rahi taata ia haapii no nia i te mau opuaraa a Iehova e ia riro ei tavini pûpûhia na ˈna. E oaoa atoa vau i te paraparau atu i te rahiraa taeae e tuahine Kerisetiano e haere mai e mataitai i ta matou amaa; te ite ra vau e ua faaitoito matou te tahi i te tahi.

Ua haapuai-rahi-hia vau i te iteraa e te mauruuru ra Iehova i ta tatou taviniraa ia ˈna e aita i faufaa ore te mea ta tatou i rave. (Korinetia 1, 15:58) Noa ˈtu to ˈu mau taotiaraa e te maˈi, ua haapao maitai au i te mau parau i roto i te Kolosa 3:23, 24: “E ta outou mau mea atoa e rave ra, e rave ma te aau atoa mai te mea e e na [Iehova], eiaha na te taata. Ua itea hoi e, e noaa mai ta outou ra utua i te aiˈa no ǒ mai [ia Iehova] ra.” I to ˈu haapaoraa i teie aˈoraa, ua haapii au i te tavini ia Iehova ma te aau atoa noa ˈtu te mau tamataraa.

[Hohoˈa i te api 24]

I te matahiti 1942, i to ˈu taviniraa ei pionie

[Hohoˈa i te api 24]

Ua haamata ta ˈu vahine i ta ˈna taviniraa mitionare i Mehiko i te matahiti 1947

[Hohoˈa i te api 24]

E o Esther i teie mahana

[Hohoˈa i te api 26]

I nia i te pae aui: To matou fetii o te Betela no Mehiko i te matahiti 1952, o vau to mua

I nia nei: Hau atu i te 109 000 tei farerei i nia i teie tahua no Mexico no te hoê tairururaa mataeinaa i te matahiti 1999

I raro i te pae aui: Ta matou amaa apî fatata roa i te oti