Te faaoraraa i te mau pepe tamaˈi

TEI roto na o Abraham i te hoê pǔpǔ tamaˈi e 20 matahiti i te maoro. * Ua faaea râ oia i te aro e eita oia e haere faahou i te tamaˈi. Oia mau, tei rotopu te tahi o to ˈna mau enemi no mutaa iho i to ˈna mau hoa piri roa ˈˈe i teie nei. Na te aha i faataui ia ˈna? Na te Bibilia. Ua horoa te reira i te tiaturiraa e te aau maramarama na Abraham, e ua tauturu atu ia hiˈo i te mau ohipa a te taata ia au i te hiˈoraa a te Atua. Ua faaore te Bibilia i to ˈna hinaaro e aro, e ua haamata oia i te faaora i to ˈna peapea, to ˈna oto, to ˈna riri e to ˈna inoino. Ua itea mai ia ˈna e te vai ra te raau maitai roa i roto i te Bibilia no te rapaau i te mafatu.

Nafea te Bibilia e tauturu ai i te hoê taata ia faaora i te mau pepe i te pae aau? Aita te reira i taui i tei roohia i nia ia Abraham. Ua faatuea râ te taioraa e te feruriruriraa i te Parau a te Atua i to ˈna manaˈo i nia i to te Atua Poiete. I teie nei, e tiaturiraa to ˈna no a muri aˈe, e e mau tapao apî faufaa ta ˈna. Ua riro te mau mea faufaa na te Atua ei mea faufaa na ˈna. I te haamataraa i te na reira, ua haamata te mau pepe i roto i to ˈna aau i te ora mai. Mea na reira to Abraham tautururaahia ia taui.

Toparaa ˈtu i roto i te tamaˈi tivira

Ua fanauhia o Abraham i te mau matahiti 1930 i Afirika. I muri aˈe i te piti o te tamaˈi rahi, ua faaterehia to ˈna fenua e te hoê hau tapiri puai roa, e rave rahi râ o to Abraham fenua tei hinaaro ra i te tiamâraa. I te matahiti 1961, ua apiti atu o Abraham i te hoê pǔpǔ no te tiamâraa tei faatupu i te tamaˈi e te hau tapiri puai roa.

“Ua riro ratou ei enemi no matou. Ua opua ratou e haapohe ia matou, no reira matou i rave ai e haapohe ia ratou,” o ta Abraham ïa e faataa ra.

Mea pinepine to Abraham faaûraa i te ati, no reira, i te matahiti 1982, i muri aˈe e 20 matahiti aroraa tamauhaa, ua horo ê oia i Europa. Fatata to ˈna e 50 matahiti i taua tau ra, e no te rahi o to ˈna taime, ua feruri oia i to ˈna oraraa. Eaha ˈtura to ˈna mau moemoeâ? Eaha ta to a muri aˈe e hopoi mai? Ua farerei o Abraham i te tahi mau Ite no Iehova e ua haamata aˈera i te haere i ta ratou mau putuputuraa. Te haamanaˈo ra oia e i Afirika tau matahiti na mua ˈˈe, ua taio oia i te hoê api parau i horoahia mai e te hoê Ite. Te faataa ra te api parau i te hoê paradaiso e fatata roa i te tupu i te fenua  nei e te hoê hau i te raˈi o te faatere i te huitaata. E nehenehe mau anei te reira e riro ei parau mau?

Te na ô ra Abraham e: “Maoti te Bibilia, ua haapii au e ua mâuˈa te mau matahiti atoa i ravehia no te tamaˈi. Te faatereraa hoê roa o te hamani maitai i te taata ma te parau-tia, o te Basileia o te Atua ïa.”

Aita i maoro i muri aˈe i to Abraham bapetizoraahia ei Ite no Iehova, ua horo te hoê taata o Robert te iˈoa mai Afirika ˈtu e i te oire no Europa e faaeahia ra e Abraham. Ua aro o Robert e o Abraham i roto i te hoê â tamaˈi, i na pae taa ê roa râ. Ua ui maere pinepine o Robert no nia i te fa mau o te oraraa. E taata faaroo oia, e no te mea ua taio oia i te tahi mau tuhaa o te Bibilia, ua ite oia e o Iehova te iˈoa o te Atua. I to te mau Ite no te amuiraa a Abraham pûpûraa e tauturu ia Robert ia taa maitai aˈe i te Bibilia, ua farii oioi oia.

Te faataa ra o Robert e: “Mai te omuaraa iho â, ua putapû vau i te huru e faaohipa ˈi te mau Ite i te mau iˈoa o Iehova e o Iesu, a faaite ai e e mau taata taa ê raua. Te au ra te reira i ta ˈu i taio aˈena i roto i te Bibilia. Mea mâ atoa ia ahu te mau Ite i te ahu e mea maitai ratou i nia ia vetahi ê, aita e hiˈoraa eaha te nunaa. Ua haaputapû roa taua mau mea ra ia ˈu.”

Te riroraa te mau enemi ei hoa

Ua riro na enemi tahito ra o Robert e o Abraham ei mau hoa rahi i teie nei. Te tavini nei raua ei feia poro taime taatoa i roto i te hoê â amuiraa a te mau Ite no Iehova. “A tupu ai te tamaˈi, ua ui maere pinepine au nafea e nehenehe ai i te mau taata no te mau fenua tapiri—hoê â hoi haapaoraa ta te rahiraa—e riri te tahi i te tahi,” o ta Abraham ïa e faataa ra. “Hoê â ekalesia ta mâua Robert, ua haere râ mâua e tamaˈi te tahi i te tahi. I teie nei, e Ite no Iehova mâua e piti, e ua tahoê to mâua faaroo ia mâua.”

“O te reira te taa-ê-raa,” o ta Robert ïa e parau atoa ra. “Tei roto mâua i te hoê faaroo i teie nei o te faariro ia mâua ei melo o te hoê huitaeae mau. Eita roa ˈtu mâua e haere faahou i te tamaˈi.” Ua ohipa puai roa te Bibilia i nia i te mafatu o teie mau enemi tahito. Ua vaiiho mǎrû noa te riri e te inoino i te parahiraa na te tiaturi e te auhoaraa.

I te taime iho a haere ai Abraham e o Robert i te tamaˈi, te tia ra te tahi atu na taurearea e piti i na pae taa ê o te tahi atu tamaˈi i rotopu i na fenua tapiri e piti. Aita i maoro ua ohipa te Bibilia mai te hoê raau maitai roa no te faaora atoa i to raua mafatu. Nafea?

E taparahi—A pohe atu ai i roto i te hamani-ino-raa

Ua haapiihia ia Gabriel, tei arataihia i roto i te hoê utuafare faaroo, e tei roto to ˈna fenua aiˈa i te mauiui o te hoê tamaˈi moˈa. No reira, i te 19raa o to ˈna matahiti, ua rave oia i ta ˈna tau faehau ma te aau tae e ua ani e ia tuuhia oia i te vahi aroraa. I te roaraa 13 avaˈe, tei roto oia i te aroraa uˈana roa ˈˈe, i te tahi mau taime hoê noa kilometera e te afa i te atea i te enemi. “Te haamanaˈo nei au i te hoê taime taa maitai,” o ta ˈna ïa e parau ra. “Ua faaite mai ta matou tomana e e aro mai te enemi i taua po ra. Ua hitahita roa matou no reira matou i faaohipa ˈi i ta matou  pupuhi fenua e ia ao aˈe te po.” Ua faariro oia i te mau taata no te fenua tapiri ei enemi no ˈna, e au ia ratou te pohe. “To ˈu manaˈo, te haapoheraa ïa i te rahiraa ta ˈu e nehenehe. E, mai te rahiraa o to ˈu mau hoa, te hinaaro ra vau e pohe i roto i te hamani-ino-raa.”

Ia maoro rii râ, aita o Gabriel i vare faahou. Ua horo ê oia i nia i te mouˈa, ua haere omoe atu i te hoê fenua amui ore, e ua fano atu i Europa. Ua tamau oia i te ui i te Atua no te aha te oraraa e fifi roa ˈi, e ua riro anei te mau fifi ei faautuaraa a te Atua. Ua farerei atura oia i te mau Ite no Iehova, tei faaite atu maoti te Bibilia no te aha e rahi roa ˈi te fifi i roto i te oraraa i teie mahana.—Mataio 24:3-14; Timoteo 2, 3:1-5.

A haapii noa ˈtu â ˈi Gabriel i te Bibilia, ua ite noa ˈtu â oia e o te parau mau to roto. “Ua haapii au e e nehenehe tatou e ora i nia i te hoê fenua paradaiso. Mea maere mau â, o te reira iho ta ˈu i hinaaro noa ra i to ˈu tamariiraa ra.” Ua tamahanahana te Bibilia ia Gabriel e ua tamǎrû i to ˈna mafatu tei horuhoru noa na. Ua haamata aˈera to ˈna mau pepe hohonu roa ˈˈe i te pae aau i te ora mai. No reira, i te taime a farerei ai oia ia Daniel, te hoê enemi tahito, aita faahou to Gabriel e riri. Eaha râ tei turai ia Daniel ia haere i Europa?

“Mai te peu e te vai mau ra oe, a tauturu mai na!”

Ua arataihia o Daniel ei Katolika e i te 18raa o to ˈna matahiti, ua titauhia oia no te tau faehau. Ua tonohia oia e aro i roto i te hoê â tamaˈi e o Gabriel i te tahi atu râ pae. I pihai iho i te vahi aroraa, te faahoro ra o Daniel i te hoê pereoo tamaˈi i to ˈna topitaraahia. Ua pohe to ˈna mau hoa, ua pepe ino e ua tapeahia oia. Ua faaea oia e mau avaˈe i roto i te fare maˈi e te hoê aua hou a hopoi-ê-hia ˈi i te hoê fenua amui ore. No to ˈna moemoe e te veve, ua feruri oia e haapohe ia ˈna iho. Ua pure Daniel i te Atua e: “Mai te peu e te vai mau ra oe, a tauturu mai na!” Ia poipoi aˈe iho â, ua haere mai te mau Ite no Iehova e hiˈo ia ˈna e ua nehenehe ia ratou e pahono i ta ˈna mau uiraa e rave rahi. I te pae hopea, ua tere atu oia i Europa ei taata horo ê. Ua amui faahou â Daniel e te mau Ite e ua haapii i te Bibilia. Ua tamǎrû te mea ta ˈna e haapii ra i to ˈna hepohepo e to ˈna inoino.

E mau hoa rahi o Gabriel e o Daniel i teie nei, i tahoêhia i roto i te hoê huitaeae pae varua ei Ite no Iehova bapetizohia. “Ua tauturu mai to ˈu here ia Iehova e te ite i te Bibilia ia hiˈo i te mau mea mai ia ˈna. E ere faahou o Daniel i te enemi no ˈu. Tau matahiti aˈenei, e oaoa roa vau i te taparahi pohe ia ˈna. Ua haapii mai te Bibilia ia ˈu i te ohipa ê roa—te ineineraa i te pohe no ˈna,” o ta Gabriel ïa e parau ra.

“Ua ite au i te mau taata haapaoraa ê e nunaa ê i te taparahiraa te tahi i te tahi,” o ta Daniel ïa e parau ra. “E te vai ra te mau taata hoê â haapaoraa i na pae e piti o te tamaˈi e haapohe ra te tahi i te tahi. I to ˈu iteraa i te reira, ua manaˈo vau e no te Atua te hape. I teie nei,  ua ite au e o Satani to muri mai i te mau tamaˈi atoa. E mau hoa faaroo mâua o Gabriel i teie nei. Eita roa ˈtu mâua e aro faahou!”

“E mea ora hoi te parau a te Atua, e te puai rahi”

No te aha o Abraham, Robert, Gabriel, e o Daniel i taui roa ˈi? Nafea te noaaraa ia ratou i te faaore roa i te riri e te inoino i aˈa roa i roto i to ratou mafatu?

Ua taio, ua feruriruri, ua haapii teie mau taata taitahi i te parau mau i roto i te Bibilia, ‘e mea ora hoi te reira, e te puai rahi.’ (Hebera 4:12) Te Tumu o te Bibilia, o te Atua hoi tei poiete i te huitaata, o te ite nafea ia ohipa i nia i te mafatu o te hoê taata e hinaaro mau ra e faaroo e e haapii, ia rave oia i te maitai. “Te mau Papai atoa, e mea faaurua ïa e te Atua e e mea faufaa ei haapiiraa, ei faahaparaa, ei faatitiaifaroraa i te mau mea, ei aˈoraa ma te parau-tia ra.” Ia farii te taata taio ia arataihia oia e te Bibilia, e noaa mai ia ˈna te hoê anairaa manaˈo faufaa e ture apî. E haamata oia i te haapii nafea Iehova e hiˈo ai i te mau mea. E hopoi mai teie raveraa i te mau maitai e rave rahi, tae noa ˈtu i te faaoraraa i te mau pepe tamaˈi.—Timoteo 2, 3:16, MN.

Te faataa ra te Parau a te Atua e aita e fenua, e nunaa, aore ra e pǔpǔ taata mea maitai aˈe aore ra mea ino aˈe i te tahi. “E ore te Atua e haapao i te huru o te taata. O tei mǎtaˈu râ ia ˈna, e o tei rave i te parau-tia i te mau fenua atoa ra, o te itehia mai ïa e ana.” E tauturu-mǎrû-hia te taata taio o te farii i te reira ia faaruru i te mau manaˈo hohonu o te riri i te nunaa aore ra te fenua ê.—Ohipa 10:34, 35.

Te faaite ra te mau parau tohu bibilia e fatata roa te Atua i te mono i teie nei faanahoraa o te faatereraa taata na roto i to ˈna Basileia Mesia. Maoti teie faatereraa, ‘e faaore te Atua i te tamaˈi e tae roa aˈenei i te hopea fenua.’ E faaorehia te mau faanahonahoraa o te paturu i te tamaˈi e te turai i te taata ia aro. E faatia-faahou-hia te feia i pohe i roto i te tamaˈi e e horoahia ˈtu te ravea e ora ˈi i nia i te hoê fenua paradaiso. Aita e taata e horo ê i mua i te hoê taata aro aore ra te hoê taata faahepo.—Salamo 46:9; Daniela 2:44; Ohipa 24:15.

No nia i te mau taata e ora i te reira tau, te na ô ra te Bibilia e: “E patu ratou i te fare, e na ratou iho e parahi; e na ratou e tanu i te ô vine, a amu ai i te maa i reira. E ore ratou e patu, e na vetahi ê e parahi . . . E ore hoi ratou e ohipa faufaa ore noa; e ore ratou e faafanau i te tamarii pohe noa.” Aita e ino aore ra e pepe eita e faaorahia. E faaore mǎrû noa te faahoturaa i te faaroo i taua tiaturiraa ra i te oto e te peapea i roto i te mafatu o te hoê taata.—Isaia 65:21-23.

E raau maitai mau te Bibilia no te mafatu. Te faaora aˈena ra ta ˈna mau haapiiraa i te mau pepe tamaˈi. Te tahoêhia ra te tahi mau enemi tahito i roto i te hoê huitaeae na te ao atoa nei. E haere â teie faaoraraa i mua i roto i te faanahoraa apî a te Atua e ia ore roa ino te riri e te inoino, te peapea e te oto i roto i te mafatu o te huitaata. Te tǎpǔ ra te Atua Poiete e “e ore hoi tei mutaaihora e manaˈohia, e ore e faatupu-faahou-hia i roto i te aau.”—Isaia 65:17.

[Nota i raro i te api]

[Parau iti faaôhia i te api 4]

“Maoti te Bibilia, ua haapii au e ua mâuˈa te mau matahiti atoa i ravehia no te tamaˈi”

[Parau iti faaôhia i te api 5]

E nehenehe te Bibilia e ohipa puai roa i nia i te mafatu o te mau enemi tahito

[Parau iti faaôhia i te api 6]

Ua vaiiho mǎrû noa te riri e te inoino i te parahiraa na te tiaturi e te auhoaraa

[Parau iti faaôhia i te api 6]

Ia farii te taata taio ia arataihia oia e te Bibilia, e noaa mai ia ˈna te hoê anairaa manaˈo faufaa e ture apî

[Hohoˈa i te api 7]

Te tahoêhia ra te tahi mau enemi tahito i roto i te hoê huitaeae na te ao atoa nei

[Faaiteraa i te fatu o te hohoˈa i te api 4]

Aua feia i horo ê: UN PHOTO 186811/J. Isaac