E noaa te oaoa i te feia e rave i te Parau a te Atua

“Ua ite tatou e teie tairururaa, o te tahi â ïa faanahoraa a Iehova no te faaineine ia tatou ia rave hau atu â i te ohipa a te Basileia,” o ta te hoê ïa o te feia orero i parau i te omuaraa o te tairururaa mataeinaa a te mau Ite no Iehova “Feia rave i te Parau a te Atua.” Ua na ô â oia e: “Ua faaineine tatou ia tatou iho ia haapiihia no nia i te oraraa utuafare oaoa, ia faaitoitohia ia vai fatata noa i te faanahonahoraa a Iehova, ia turaihia ia tapea i to tatou itoito i roto i te taviniraa i te Basileia, e ia haamanaˈohia e mea faufaa ia vai ara noa.”

MAI te hopea avaˈe Me 2000 mai, ua tairuru atu te mau mirioni feia rave i te Parau a te Atua e to ratou mau hoa i te mau tausani vahi na te ao nei no te farii i te haapiiraa bibilia ora. Eaha ta ratou i haapii i roto i taua tairururaa e toru mahana ra?

Mahana matamua—Eiaha e haamoe i ta Iehova i rave

I roto i te oreroraa parau omuaraa, ua titau te peretiteni i te feia e faaroo ra ia fafa i te mau haamaitairaa e roaa mai na roto i te haamoriraa tahoêhia a Iehova i roto i te mau tairururaa. Ua haapapuhia te feia atoa i tae mai e e rahi atu â to ratou faaroo e e paari atu â to ratou taairaa e o Iehova.

Ua ite ‘te Atua e ao to ˈna’ eaha ta tatou e hinaaro e oaoa ˈi tatou iho. (Timoteo 1, 1:11) No reira, ua haamataratara te oreroraa parau “E hopoi mai te raveraa i te hinaaro o te Atua i te oaoa” e te faataa ra te Parau a Iehova, te Bibilia, i te huru oraraa maitai roa ˈˈe. (Ioane 13:17) Ua faaite te tahi nau uiuiraa manaˈo i te mau Ite no Iehova taime roa nafea te raveraa i te hinaaro o te Atua i roto i te mau huru tupuraa rau e horoa ˈi i te hoê auraa i to tatou oraraa. Ua haapapu te oreroraa parau i muri mai “A oaoa i te hamani maitai o Iehova” e, ei ‘feia pee i te Atua,’ e hinaaro te mau Kerisetiano e faahotu i “te mau mea maitatai atoa” i roto i to ratou oraraa. (Ephesia 5:1, 9) Te hoê ravea faahiahia e na reira ˈi, te pororaa ïa i te parau apî maitai e te faariroraa i te taata ei pǐpǐ.—Salamo 145:7.

Ua faaite te tumu parau “A faaitoito maite mai te mea ra e te ite ra outou i Tei ore e itea ia hiˈo ra” nafea te faaroo puai e tauturu ai ia tatou ia “hiˈo” i te Atua itea ore. Ua faataa te taata orero nafea te feia e haapao i ta te varua e ite maite ai i te mau huru maitatai o te Atua, tae noa ˈtu i to ˈna aravihi i te ite eaha ta tatou e manaˈo ra. (Maseli 5:21) Ua faaite tei titorotorohia i te mau taahiraa avae ta ratou i rave no te faatupu i te faaroo puai aˈe e te tuu i te mau faufaa pae varua i te parahiraa matamua i roto i to ratou oraraa.

Ua hope te rururaa poipoi e te oreroraa parau tumu, “A arue ia Iehova—Te Ihotaata rave i te mau ohipa faahiahia.” Ua tauturu te reira i te feia e faaroo ra ia taa e ia rahi noa ˈtu ta tatou e haapii no nia ia Iehova, e rahi noa ˈtu te tumu e arue ai tatou ia ˈna ei Ihotaata e rave i te mau ohipa faahiahia. Ua parau te taata orero e:  “Ia hiˈo tatou i te mau ohipa poieteraa taa ê a te Atua e te mau mea faahiahia ta ˈna e rave ra no tatou i teie nei, e turai te mauruuru aau tae ia tatou ia arue ia ˈna. Ia feruriruri tatou i te mau semeio ta ˈna i faatupu no to ˈna nunaa i mutaa ihora, e hinaaro tatou e arue ia ˈna. Ia manaˈo tatou i te mau tǎpǔ no nia i te mau mea faahiahia te toe ra ia Iehova i te rave, e imi atoa tatou i te mau ravea no te faaite i te mauruuru.”

Ua haamata te rururaa avatea e te oreroraa parau “Eiaha e rohirohi i te rave i te mea maitai roa,” tei haamanaˈo i te feia atoa e faaroo ra e te haapapu ra te mau hepoheporaa o teie nei ao e ua fatata roa mai te hopea. (Timoteo 2, 3:1) Na roto râ i te oreraa e faarue, e haapapu tatou e ‘no te feia tatou i noaa te faaroo, e ora ˈtu ai te [nephe].’—Hebera 10:39; MN.

Eaha te aˈoraa bibilia i horoahia no nia i te oraraa utuafare? Ua haamata te oreroraa parau tatuhaahia matamua o te tairururaa—“A faaroo i te Parau a te Atua”—e te tuhaa “Ia maiti outou i te hoê hoa faaipoipo.” Ua riro te maitiraa i te hoê hoa faaipoipo ei hoê o te mau faaotiraa hoata ore roa ˈˈe ta te taata e rave. No reira, e hinaaro te mau Kerisetiano e tiai e ia paari ratou e faaipoipo atu ai, e e tia ia ratou ia faaipoipo ‘ia au noa i te Fatu.’ (Korinetia 1, 7:39) Ua tauaparau to muri mai tuhaa no nia i te hinaaro o Iehova ia manuïa te mau utuafare Kerisetiano atoa ei pǔpǔ puai i te pae varua, e ua horoa i te mau ravea au ia faaohipahia ia raeahia te reira. Ua haamanaˈo te tuhaa hopea i te mau metua e e haamata te haapiiraa i ta ratou mau tamarii ia here i te Atua na roto i to te mau metua here ia ˈna.

Ua tauturu mai te mau manaˈo i vauvauhia i roto i te oreroraa parau “A ara i te mau parau haapararehia e te afai parau” ia ite tatou e noa ˈtu e e tupu te tahi mau mea maere, ei haerea paari to tatou, eiaha e vare noa, ia faaroo tatou i te mau parau faataa faahoruhoru. Mea maitai aˈe no te mau Kerisetiano e paraparau no nia i te mea ta ratou e ite e e parau mau—te parau apî maitai o te Basileia. Mea rahi tei manaˈo e mea tamahanahana roa e te faaitoito atoa to muri mai oreroraa parau, “Te faarururaa i ‘te hoê tara i roto i te tino.’” Ua tauturu te reira ia ratou ia ite e noa ˈtu te mau ati tamau ta tatou e farerei, e nehenehe ta Iehova e haapuai ia tatou na roto i to ˈna varua moˈa, ta ˈna Parau, e to tatou huitaeae Kerisetiano. Ua noaa rahi mai te faaitoitoraa na roto i tei farereihia e te aposetolo Paulo i te reira pae.—Korinetia 2, 12:7-10; Philipi 4:11, 13.

Ua hope te mahana matamua e te oreroraa parau “E pee maite anaˈe i te faanahonahoraa a Iehova.” Ua hiˈopoahia e toru tuhaa  i reira te faanahonahoraa a te Atua i te haere-maitai-raa i mua: (1) te maramaramaraa pae varua no ǒ mai ia Iehova ra tei rahi noa ˈtu, (2) te taviniraa ta te Atua i horoa mai na tatou, e (3) te mau faatanoraa i te mau raveraa i te pae faanahonahoraa i te taime au. Ua parau atura te taata orero ma te tiaturi e: “Te oaoa ra tatou i te mea e vai ra i mua ia tatou.” Ua ui oia e: “Te vai ra anei te hoê noa ˈˈe feaaraa e ua tano tatou i te tapea-maite-raa i to tatou tiaturiraa e tae noa ˈtu i te hopea?” (Hebera 3:14) Mea papu maitai te pahonoraa. Ua aratai te reira i te faaiteraa i te hoê buka rairai apî E nehenehe oe e riro ei hoa no te Atua! E riro te reira ei tauturu haapiiraa puai no te tauturu i te mau taata aita i haere rahi i te haapiiraa aore ra aita i ite maitai i te taio, ia haapii no nia ia Iehova.

Piti o te mahana—A tamau i te faaite i te mau ohipa faahiahia a te Atua

I muri aˈe i te hiˈopoaraa i te irava mahana, ua haere te piti o te mahana tairururaa i mua e te oreroraa parau tatuhaahia “Te mau tavini i te Parau a te Atua.” Ua huti te tuhaa matamua i te ara-maite-raa i nia i to teie nei manuïaraa o ta tatou ohipa pororaa na te ao atoa nei. Te haafifihia ra râ to tatou faaoromai i roto i teie ohipa e te rahiraa o te patoi ra i te poroi a te Basileia. Ua faataa te tahi nau feia poro taime roa nafea to ratou tapearaa i to ratou oaoa i roto i te taviniraa na roto i te haapuairaa i to ratou feruriraa e to ratou mafatu no te faaruru i te anaanatae ore aore ra te patoiraa. Ua haamanaˈo te piti o te tuhaa i te feia i tairuru e te tutava ra te mau Ite no Iehova i te farerei i te taata i te mau vahi atoa, ma te faanahohia e ma te faanaho-ore-hia. E ua faataa te tuhaa hopea i te anairaa ravea rahi e nehenehe ai te mau Kerisetiano atoa e faaaano i ta ratou iho taviniraa. Ua haapapu te taata orero e no te rave i te reira, e tia ia tuu i te Basileia o te Atua na mua roa, noa ˈtu e e faatupu te na reiraraa i te fifi e te haapaeraa ia ˈna iho.—Mataio 6:19-21.

I te mea e te ora nei tatou i roto i te hoê ao î roa i te nounou mâha ore i te mau mea materia, ua tano maitai te oreroraa parau “A faahotu i te paieti e te mauruuru.” Ma te niu i te tahi o ta ˈna mau tatararaa i nia i te Timoteo 1, 6:6-10, 18, 19, ua faaite te taata orero nafea te paieti e tauturu ai i te mau Kerisetiano ia ape i te nounou moni, o te nehenehe e haafariu ê ia ratou e e faatupu i te mau mauiui e rave rahi. Ua onoono oia e noa ˈtu eaha to tatou  huru i te pae o te moni, ua taaihia te oaoa i to tatou taairaa e o Iehova e i to tatou ea maitai i te pae varua. Mea rahi tei putapû roa i te mau manaˈo i vauvauhia i roto i te oreroraa parau “Eiaha tatou e faahaama i te Atua.” Ua haamataratarahia te mea e eita roa ˈtu Iehova e haamoe i to ˈna mau Ite haapao maitai. E tauturu te hiˈoraa faito ore o Iesu Mesia—‘hoê â hoi o ˈna huru i nanahi, i teie nei mahana, e a muri noa ˈtu’—i te feia e rave rahi ia tamau i te horo i te hororaa no te ora ma te faaoromai.—Hebera 13:8.

Ei faahoperaa i te rururaa poipoi, o te oreroraa parau ïa o te bapetizoraa—te hoê iho â taime faahiahia i roto i te mau putuputuraa rahi a te mau Ite no Iehova. Mea oaoa mau ia hiˈo atu i te feia no pûpû noa ˈtura ia ratou iho ia pee i te taahiraa avae o Iesu na roto i te hopuraa i te pape o te bapetizoraa! (Mataio 3:13-17) Ua rave rahi aˈena te feia e na reira ra i te ohipa ei feia rave i te parau a te Atua. Hau atu â, ia bapetizohia ratou, e riro mai ratou ei tavini faatoroahia no te parau apî maitai, o te oaoa rahi i te iteraa e te apiti ra ratou i roto i te faaraaraa i te iˈoa o Iehova.—Maseli 27:11.

E aˈoraa papu maitai tei horoahia i roto i te oreroraa parau “Mea faufaa te feruriraa paari no te ‘ite i te maitai e te ino.’” Mea hape roa ino ta to teie nei ao faitoraa i te maitai e te ino. No reira tatou e hinaaro ai e tiaturi i te mau ture a Iehova. (Roma 12:2) Ua faaitoitohia te taatoaraa e haa puai ia noaa te maramarama mau i te mau eˈa o te Atua e te paari. I reira to tatou puai feruriraa e mataro ai i te faataa ê “i te maitai e te ino” maoti te  faaohipa-tamau-raa.—Hebera 5:11-14.

Tae mai nei te oreroraa parau tatuhaahia “A rohi i te faahotu i te huru pae varua.” Ua ite te mau Kerisetiano mau e mea faufaa ia faahotu e ia tapea i te ea pae varua. E titau te reira ia haa puai—ia taio, ia haapii, e ia feruriruri. (Mataio 7:13, 14; Luka 13:24) E faaohipa atoa te feia e haapao i ta te varua i “te mau pure atoa ra, e te ani ra.” (Ephesia 6:18) E itea mai ia tatou e e faaite ta tatou mau pure i te faito hohonu o to tatou faaroo, to tatou paieti, te faito maitai o to tatou ea pae varua, e oia atoa eaha ta tatou e faariro ra ei “mau mea i hau i te maitai ra.” (Philipi 1:10) Ua haapapu-atoa-hia te faufaaraa e faatupu i te taairaa mahanahana e te î i te here e o Iehova mai tei fanaˈohia e te hoê aiû faaroo e te hoê metua tane maitai. Eita tatou e pee noa i te hoê haapaoraa—noa ˈtu e o te haapaoraa mau tera—e hinaaro râ tatou e patu i te hoê faaroo puai, ‘mai te huru ra e te hiˈo ra tatou i te Atua.’—Hebera 11:6, 27.

Ua tauaparauhia te tumu parau o te haereraa i mua i te pae varua i roto i te oreroraa parau “Ia itehia e ua haere outou i mua.” Ua hiˈopoahia e toru tuhaa o taua haereraa i mua ra: (1) te rahiraa mai te ite, te maramarama, e te paari, (2) te faahoturaa i te mau hotu o te varua o te Atua, e (3) te amoraa i ta tatou mau hopoia ei melo utuafare.

I te hoperaa te oreroraa parau hopea o taua mahana ra, “E haere anaˈe maoti te Parau a te Atua o te maramarama noa ˈtura,” ua oaoa roa te feia i tairuru i te fariiraa i te hoê buka apî, La prophétie d’Isaïe, lumière pour tous les humains 1. O te matamua tera o na buka e piti o te faahohonu i te buka bibilia a Isaia i tera e tera pene. “E poroi to roto i te buka a Isaia na tatou i teie mahana,” o ta te taata orero ïa i haapapu. Ua na ô â oia e: “Oia, mea rahi te mau parau tohu i roto tei tupu i te tau o Isaia. . . . Mea rahi râ te mau parau tohu a Isaia teie e tupu nei i teie mahana, e e tupu te tahi pae i roto i te ao apî tǎpǔhia a te Atua.”

Toru o te mahana—Ei feia rave outou i te Parau a Iehova

Ua haamata te mahana hopea o te tairururaa e te hoê tauaparauraa i te irava mahana. To muri mai, o te oreroraa parau tatuhaahia ïa “Te parau tohu faufaa a Zephania no te feia e rave ra i te hinaaro o te Atua.” Ua faaite na tuhaa e toru o teie oreroraa parau e, mai ta ˈna i rave i te tau o Iuda te etaeta, e hopoi mai Iehova i te ahoaho i nia i te feia e patoi nei i te faaroo i ta ˈna aˈoraa. No te mea te hara ra ratou i te Atua, e perehahu ratou ma te ravea ore mai te mau matapo e ore e itea mai ia ratou te faaoraraa. Area te mau Kerisetiano mau ra, e tamau ïa ratou i te imi ia Iehova ma te taiva ore, e e faatapunihia ratou i te mahana o te riri o te Atua. Hau atu â, te fanaˈo aˈena nei ratou i te mau haamaitairaa  e rave rahi i teie nei. Te fanaˈo nei ratou i te ravea haamaitairaa e paraparau i te “reo ateate” o te parau mau bibilia. (Zephania 3:9, MN) Ua haapapu te taata orero e: “Te paraparauraa i te reo ateate, e ere noa ïa te tiaturiraa i te parau mau e te haapiiraa i te reira ia vetahi ê, te faaau-atoa-raa râ i to tatou haerea i te mau ture e te mau faaueraa tumu a te Atua.”

Ua tiai ru te feia i tairuru i te darama “E mau hiˈoraa o te faaara no to tatou nei tau.” Ua faaite teie darama ma te mau ahu no taua tau ra nafea to te mau tausani Iseraela poheraa i te hiti o te Fenua Tǎpǔhia no te mea ua haamoe ratou ia Iehova e ua hema i te mau vahine etene i te poreneia e te haamoriraa hape. I te omuaraa, ua feaapiti hoê o te feia tumu e hautihia ra—o Iamina—i rotopu i te haviti o te vahine Moabi e to ˈna paieti ia Iehova. Ua ite-maitai-hia te haaferuriraa hape e te haavare a Zimeri te paieti ore, oia atoa te faaroo e te paieti o Phinehasa. Ma te oraora maitai, ua faataahia te atâtaraa o te amuimuiraa e te feia e ore e here ia Iehova.

Ua faaauhia to muri noa mai oreroraa parau, “Eiaha outou e riro ei feia faaroo e moina noa te parau,” i nia i te darama. Ua faaite te hoê faahohonuraa i te Korinetia 1, 10:1-10 e e tamata Iehova i to tatou faaroo no te faataa e e au anei ia tatou ia farii i te hoê tufaa i roto i te ao apî. No te tahi pae, ua patu roa te mau hinaaro o te tino i te mau fa pae varua i te hiti i teie nei a fatata ˈi tatou i te tomo atu i roto i te faanahoraa apî. Ua faaitoitohia te taatoaraa eiaha e faarue i te ravea e ‘ô ai i roto i te faaearaa o Iehova.’—Hebera 4:1.

No nia te oreroraa parau no te taatoaraa i te tumu parau ra “Te tumu e haapao maite ai tatou i te mau ohipa faahiahia a te Atua.” E faaite te mau “ravea taa ê” a Iehova i to ˈna paari e to ˈna mana i nia i te mau mea materia i poietehia e haaati ra ia tatou. (Ioba 37:14) Ua navai noa tau uiuiraa hohonu a Iehova no te faahoruhoru ia Ioba i te mana o te Atua Poiete puai hope. E faatupu atoa Iehova i te mau “ravea taa ê” no ta ˈna mau tavini haapao maitai. Ua faaoti te taata orero e: “Mea rahi roa te mau tumu e haapao maitai ai tatou i te mau ravea taa ê a Iehova—ta ˈna i rave i mutaa ihora, ta ˈna e rave ra i roto i te mea ta ˈna i poiete e haaati ra ia tatou i teie mahana, e ta ˈna e tǎpǔ e rave arauaˈe iho.”

I muri aˈe i te hoê haapotoraa i te haapiiraa o Te Pare Tiairaa, ua vauvauhia te oreroraa parau hopea o te tairururaa. Ua haamataratara teie oreroraa parau haaputapû teie to ˈna upoo parau “E haafaufaa rahi anaˈe i ta tatou haamaitairaa ei feia rave i te Parau a te Atua” e e hinuhinuraa te riroraa ei feia rave i te Parau a te Atua. (Iakobo 1:22) Ua haamanaˈohia te feia e faaroo ra e e fanaˈoraa taa ê otahi ta tatou ei feia rave i te Parau a te Atua, e ia maoro noa ˈtu â tatou i te faaohipa i te reira, e rahi noa ˈtu â tatou i te haafaufaa ˈtu. Ua faaitoitohia te feia atoa i tairuru ia faaite e ua haapuaihia ratou ma te faufaa e teie tairururaa mataeinaa na roto i to ratou hinaaro e riro ei feia rave i te Parau a te Atua i nia i te faito rahi roa ˈˈe. Tera anaˈe te ravea e ite ai i te oaoa rahi roa ˈˈe.

[Tumu parau tarenihia/Hohoˈa i te api 25]

E nehenehe oe e riro ei hoa no te Atua!

I te Mahana pae i te avatea, ua matara mai te hoê buka rairai apî E nehenehe oe e riro ei hoa no te Atua! Te hinaaro-rahi-hia ra te haapiiraa bibilia ohie i te mau vahi e rave rahi o te ao nei, e e faaohipahia teie buka rairai no te haamâha i teie hinaaro. E riro te reira ei haamaitairaa rahi no te mau taata aita i haere rahi i te haapiiraa e aita i ite maitai i te taio.

[Tumu parau tarenihia/Hohoˈa i te api 26]

La prophétie d’Isaïe, lumière pour tous les humains

Ua oaoa roa te feia i tairuru i te fariiraa i te buka I o na buka e piti La prophétie d’Isaïe, lumière pour tous les humains. I roto i teie buka, ua onoonohia i nia i te faufaaraa o te huru tano o te parau tohu a Isaia no to tatou tau.