Nafea tatou e faahotu ai i te maitai morare

TE FAATAA ra te mau titionare no teie tau i te “maitai morare” mai “te maitai-roa-raa i te pae morare; te hamani maitai.” O te hoê ïa “ohipa e e manaˈo tia; hoê huru hamani maitai.” Te na ô ra te taata papai titionare ra o Marvin R. Vincent e te faataa ra te auraa tahito tumu o te taˈo Heleni tei hurihia ei “maitai morare” i te “maitai-roa-raa huru rau.” No reira iho â ïa i parauhia ˈi i te hoê taime aore ra i te tahi atu e mau maitai morare te mau huru faahiahia mai te mata ara, te itoito, te haavîraa ia ˈna iho, te parau-tia, te aau aroha, te tamau-noa-raa, te haerea tia, te haehaa, e te haapao maitai. Ua faataa-atoa-hia te maitai morare mai te “faaau-maite-raa i te hoê ture parau-tia.”

Ia faaau tatou i ta vai ture o te maitai-roa-raa, te hamani maitai, e te parau tia? “Ia au i te feia paturu rahi i te philosophia morare,” ta te vea Newsweek ïa i parau, “ua faariro te manaˈo tiaturi ore i faatupuhia e te Siècle des Lumières i te mau manaˈo atoa i te mea maitai e te mea ino ei mau tumu parau ta te taata e maiti ia au i ta ˈna, ta to ˈna aau e au aˈe, aore ra i te taˈere.” Na te mau mea anei râ ta te taata e au aˈe e faataa i te mea maitai e te mea ino? Eita. No te faahotu i te maitai morare, e hinaaro tatou i te hoê ture e nehenehe e tiaturihia no nia i te mea maitai e te mea ino—te hoê ture o te faataa e mea maitai aore ra mea ino tera ohipa, tera haerea, aore ra tera huru.

Te Tumu mau hoê o te mau ture morare

Hoê anaˈe Tumu mau o te mau ture morare—te Atua ra o Iehova tei poiete i te huitaata. I muri rii noa ˈˈe i to ˈna poieteraa i te taata matamua ra o Adamu, ua horoa te Atua ra o Iehova i teie faaueraa i te tane ra: “E amu noa oe i to te mau raau atoa o te ô nei; area i to te raau e ite ai i te maitai e te ino, eiaha oe e amu i te reira;  ei te mahana e amu ai oe i te reira, e pohe ïa oe.” (Genese 2:16, 17) Ua mairi te Atua ra o Iehova i taua iˈoa otahi ra no te raau no te faaite e to ˈna anaˈe te tiaraa e faataa eaha te mea maitai e eaha te mea ino no ta ˈna mau mea ora i poiete. O te mau ture a te Atua no te maitai e te ino ïa te niu o te haavaraa, aore ra faitoraa, i te mau ohipa, mau manaˈo, e mau huru o te hoê taata. Aita anaˈe taua mau ture ra, eita ta tatou e nehenehe e faataa ma te tano i te maitai e te ino.

Te tuu ra te faaueraa no nia i te raau e ite ai i te maitai e te ino i te hoê maitiraa i mua ia Adamu e ia Eva—e faaroo aore ra eiaha e faaroo. Te auraa o te maitai morare no raua, te faarooraa ïa i taua faaueraa ra. I muri aˈe, ua faaite â Iehova eaha te mea e mauruuru ai oia e eaha te mea eita oia e au, e ua haapapai oia i te reira no tatou i roto i te Bibilia. No reira, te auraa e faahotu i te maitai morare, te haapaoraa ïa tatou i te mau ture parau-tia a Iehova i roto i te mau Papai.

A haamatau roa i te mau ture a te Atua

I te mea e ua faataa te Atua ra o Iehova i te mau ture o te maitai e te ino e ua faaite mai i te reira i roto i te Bibilia, eita anei e tia ia haamatau roa ˈtu tatou? Ua papai te aposetolo Paulo e: “Te mau Papai atoa, e mea faaurua ïa e te Atua e e mea faufaa ei haapiiraa, ei faahaparaa, ei faatitiaifaroraa i te mau mea, ei aˈoraa ma te parau-tia ra, ia aravihi roa te taata no te Atua, ia ineine roa no te mau ohipa maitatai atoa ra.”—Timoteo 2, 3:16, 17, MN.

Ei hiˈoraa, a hiˈo na i te taa-ore-raa ta Kunihito, tei faaitehia i roto i te tumu parau na mua ˈtu, i faaruru a faaite ai oia i te haehaa ia au i te hiˈoraa a ta ˈna taˈere. I muri aˈe, ua tauturu te hoê faahohonuraa i te mau ture o te mau Papai ia ˈna ia pee i te hoê haerea faito aˈe. Te faaitoito ra iho â te Bibilia i te haehaa, e te aˈo maira eiaha e tiaturi rahi roa ia tatou iho e eiaha e faateoteo. (Maseli 11:2; Mika 6:8) I to ˈna râ faataa-poto-raa i te mau huru aravihi no “te toroa [tiaau],” ua parau te aposetolo Paulo no nia i te “hinaaro uˈana” i taua fanaˈoraa taa ê ra. (Timoteo 1, 3:1; MN) E tia i teie “hinaaro uˈana” ia tupu eiaha noa ma te faaoru ore aore ma te teoteo ore, ma te ore atoa râ e faahaehaa faufaa ore ia tatou.

Eaha ta te Bibilia e parau ra no nia i te maitai morare i te pae tapihooraa? I roto i te ao tapihooraa i teie mahana, e peu matauhia te faaohiparaa i te mau ravea tia ore aore ra te oreraa e tâuˈa i te mau faatureraa e te mau ture i te pae tute a te hau. Noa ˈtu râ eaha ta vetahi pae e rave ra, te faaue ra te ture o te Bibilia e ‘haapao maitai tatou i te mau mea atoa’ e tia ˈi. (Hebera 13:18) No reira, e faahotu tatou i te maitai morare na roto i te faaiteraa i te hoê haerea tia e te pae tahi ore i nia i te mau paoti ohipa, te mau rave ohipa, te mau aimamau, e te mau faatereraa a te ao. (Deuteronomi 25:13-16; Roma 13:1; Tito 2:9, 10) Papu maitai, e faatupu te haerea tia i te tiaturi e te aau tae. E pinepine, e arai te papairaa i te mau parau faaau i te mau taa-ore-raa e te mau haafifiraa e nehenehe e fa mai no te “tupuraa manaˈo-ore-hia.”—Koheleta 9:11, MN; Iakobo 4:13, 14.

O te parau o te faaahuraa e te faaneheneheraa te tahi atu tuhaa e hinaaro ai tatou e faahotu i te maitai morare. E taui te maitiraa i te ahu ia au i te taˈere, e e nehenehe e puai te faaheporaa e pee i te mau peu e te mau hinaaro apî roa ˈˈe. No te aha hoi tatou e pee ai i te mau ohipa apî atoa e fa mai? Te aˈo maira te Bibilia ia tatou “eiaha e faaau atu i teie nei ao.” (Roma 12:2) Maoti i te faahiti i te tahi mau ture, ua papai te aposetolo Paulo ma te faauruahia e: ‘E te mau vahine ra, ia faanehenehe ia ratou iho i te ahu e au ra, ma te faaieie ore, e te haapao maitai; eiaha ma te rouru firi, e te auro, e te poe, e te ahu taoˈa rahi ra. Ma tei au râ i te mau vahine i mau i te paieti ra.’ (Timoteo 1, 2:9, 10) E au teie ture faufaa i te mau tane e te mau vahine atoa. Parau mau, ua rau te huru faaneheneheraa ia au i te taˈere aore ra i ta outou iho e au.

Te faataa atoa ra te Bibilia i te mau peu morare tia ore ta te Atua e faahapa maitai ra. I roto i te Korinetia 1, 6:9, 10, te taio nei tatou i te faaararaa: “Eaha! aita outou i ite e e ore te feia parau-tia ore e parahi i te basileia o te Atua? Eiaha e vare; e ore hoi te taiata, e te haamori idolo, e te faaturi, e te mahu, e te paia, e te eiâ,  e te nounou taoˈa, e te taero ava, e te faaino, e te haru e ore anaˈe ïa e parahi i te basileia o te Atua.” Ua tauturu teie irava ia Maria, tei faaitehia i roto i te tumu parau na mua ˈtu, ia ite e ia au i te ture o te maitai-roa-raa morare i haamauhia e te Atua Poiete, mea ino to ˈna taairaa e o Juan e e tia ia ˈna ia tâpû i te reira ia fanaˈo oia i te farii maitai a te Atua. Papu maitai, no te faahotu i te maitai morare, mea hinaarohia ia haamatau maitai tatou i te mau ture a Iehova.

A haapii ma te aau

Te maitai morare, e ere noa ïa i te haapaeraa i te mea ino. E puai morare to te reira. E hamani maitai to te hoê taata maitai morare. “E tia i te maitai morare,” ia au i te hoê orometua haapii, “ia haapiihia ma te aau e ma te upoo atoa.” Te faahoturaa i te maitai morare, e ere noa ïa i te haamatau-maitai-raa i te Parau a te Atua. E titau te reira ia feruriruri tatou i tei papaihia i roto ia î to tatou aau i te mauruuru ia Iehova e ia turaihia ia faaohipa i te mau faaueraa tumu bibilia i roto i to tatou oraraa.

“Te rahi roa nei to ˈu hinaaro i ta oe ra ture!” ta te papai salamo ïa i parau. “O to ˈu ïa manaˈoraa i te mau mahana atoa nei.” (Salamo 119:97) E ua papai te arii Davida e: “Te manaˈo nei tau aau i te anotau tahito ra; te imi nei au i te mau ravea hanahana na oe ra; te feruri noa nei au i te mau ohipa a to rima ra.” (Salamo 143:5) Ia faariro atoa ïa tatou i te feruriruriraa na roto i te pure ei tuhaa faufaa o ta tatou haapiiraa i te Bibilia e te mau papai bibilia.

Parau mau, e tautooraa paha ia faanaho i te taime no te haapii hohonu e te feruriruri. E titau râ te tapiraa i te maitai morare ia faaherehere tatou i te taime i nia i te tahi atu â mau ohipa. (Ephesia 5:15, 16) E faaherehere o Aaron, e 24 matahiti, i te taime i te mau mahana atoa, e tia oia i nia e 30 minuti na mua ˈˈe i tei matauhia e ana. Te faatia ra oia: “I te omuaraa, e taio noa vau i te Bibilia afa hora i te roa. No teie roa nei te taaraa ia ˈu te faufaaraa ia feruriruri. No reira i teie nei, e rave au i te afaraa o taua taime ra no te manaˈonaˈo i ta ˈu i taio noa ˈtura. Mea haamaitai mau â te reira.” E nehenehe te feruriruriraa e ravehia i te tahi atu â taime. I roto i te hoê himene ia Iehova, ua na ô Davida e: “Ia imi [au] ia oe i te mau araraa ra.” (Salamo 63:6) E te faatia ra te Bibilia e: “Ua reva ˈtura Isaaka i roto i te aua i te ahiahi e [feruriruri].”—Genese 24:63; MN.

No te faahotu i te maitai morare, mea faufaa roa ia feruriruri tatou, no te mea e tauturu mai te reira ia manaˈo tatou mai ia Iehova. Ua ite o Maria, ei hiˈoraa, e e opani te Atua i te poreneia. No te ‘riaria râ i te ino e te ati atu i te maitai,’ ua tia ia ˈna ia feruriruri i te mau irava bibilia faufaa. (Roma 12:9) Ua tauturuhia oia ia taa ia ˈna te faufaaraa ia rave i te mau tauiraa i muri aˈe i te taioraa i te Kolosa 3:5 o te aˈo maira ia ‘uumi i to tatou mau melo i te mau mea, mai te faaturi, te parau faufau ra, te paia ra, te hinaaro tia ore ra, e te nounou taoˈa.’ I tia na ia Maria ia uiui e: ‘Teihea huru hinaaro e taati e tia ia ˈu ia uumi? Eaha te mau mea o te nehenehe e faatupu i te mau hinaaro viivii e tia ia ˈu ia ape? E mau tauiraa anei e tia ia ˈu ia rave i roto i to ˈu huru i nia i te tane?’

I roto i te feruriruriraa, e tia atoa ia hiˈopoa i te faahopearaa o te hoê ohipa. Ua aˈo Paulo i  te mau Kerisetiano ia haapae i te poreneia e ia faatupu i te hitahita ore “ia ore roa te hoê ia rave i te hapa e te mea tia ore i tana taeae.” (Tesalonia 1, 4:3-7) Teie te mau uiraa maitatai e feruriruri tatou: ‘Eaha te tuino e tupu i nia ia ˈu, to ˈu utuafare, e vetahi ê ia rave au i teie ohipa? Eaha te faahopearaa i nia i to ˈu huru pae varua, to ˈu aau, e to ˈu tino? Eaha tei tupu i nia ia vetahi ê o tei ofati i te ture a te Atua i mutaa ihora?’ Ua haapaari atu â teie manaˈonaˈoraa i te aau o Maria, e e nehenehe te reira e tupu i nia ia tatou.

A haapii na roto i te mau hiˈoraa

E haapiihia anei te maitai morare i roto i te hoê piha haapiiraa? Tau tausani matahiti to te feia feruri manaˈonaˈoraa i teie uiraa. Ua manaˈo te philosopho Heleni o Platon e e nehenehe. Area o Aristote ra, ua manaˈo ïa e e noaa mai te maitai morare maoti te faaohiparaa. Ua haapoto te hoê papai vea i te mârôraa i nia i te tumu parau mai teie: “Ei haapotoraa, eita te maitai morare e nehenehe e haapiihia o tatou anaˈe. Eita atoa e haapiihia i roto i te mau buka. E tupu mai te huru maitai na roto i te oraraa i roto i te mau nunaa taata . . . i reira te maitai morare e faaitoitohia ˈi e e haamauruuruhia ˈi.” Ihea râ tatou e ite ai i te mau taata maitai mau i te pae morare? Te pûpû ra te rahiraa o te mau taˈere i te tahi mau hiˈoraa o te maitai morare, i roto aˈe i ta ratou mau aai e mau aito, i roto râ i te Bibilia, mea rahi ïa te mau hiˈoraa mau.

To Iehova te hiˈoraa faahiahia roa ˈˈe o te maitai morare. E ohipa noa oia ma te maitai morare e e rave i te mea hapa ore e te maitai. E nehenehe tatou e faahotu i te maitai morare na roto i te ‘peeraa i te Atua.’ (Ephesia 5:1) E ua “vaiiho” mai o Iesu Mesia, te Tamaiti a te Atua, ‘i te [hiˈoraa] na tatou, ia pee [maite] tatou i to ˈna taahiraa avae.’ (Petero 1, 2:21; MN) Hau atu â, i roto i te Bibilia, te vai ra te mau aamu o te mau taata haapao maitai e rave rahi, mai ia Aberahama, Sara, Iosepha, Ruta, Ioba, e Daniela, e to ˈna na hoa Hebera e toru. Eiaha e haamoe i te mau hiˈoraa o te maitai morare o te mau tavini a Iehova no teie tau.

E nehenehe tatou e manuïa

E nehenehe mau anei tatou e manuïa i te raveraa i te mea maitai morare i te aro o te Atua? I te mea e ua raea tatou i te tia ore, i te tahi taime e tupu te hoê mârôraa puai i roto ia tatou i rotopu i te feruriraa e te tino—i rotopu i te hinaaro e rave i te mea maitai morare e e pee i to tatou mau hinaaro hara. (Roma 5:12; 7:13-23) E nehenehe râ e upootia mai maoti te tauturu a te Atua. (Roma 7:24, 25) Ua horoa mai Iehova i ta ˈna Parau e te mau papai bibilia. Maoti te haapiiraa hohonu i te mau Papai e te feruriruriraa na roto i te pure i te reira, e nehenehe to tatou aau e riro ei mea viivii ore. No roto mai te mau manaˈo, mau parau, e mau ohipa maitai morare i te hoê aau viivii ore. (Luka 6:45) Ia au i te mau hiˈoraa o te Atua ra o Iehova e o Iesu Mesia, e nehenehe tatou e patu i te hoê huru paieti. E papu maitai, e haapii rahi tatou na roto i te feia e tavini ra i te Atua ma te haapao maitai i teie mahana.

Ua aˈo te aposetolo Paulo i ta ˈna feia taio ia “haamanaˈo” noa i te maitai morare e te tahi atu â mau mea haamaitai. Ia na reira tatou, papu maitai e e haamaitai mai te Atua. (Philipi 4:8, 9) Maoti te tauturu a Iehova e manuïa ˈi tatou i te faahotu i te maitai morare.

[Hohoˈa i te api 6]

A feruriruri atoa ia haapii outou i te Bibilia

[Hohoˈa i te api 7]

A patu i te hoê huru paieti na roto i te peeraa i te Mesia ra o Iesu