Ia mau maite outou ma te nehenehe e te tiaturi papu

“Te hoê ohipa maitai roa”

MAI te haamataraa mai â o to ratou tuatapaparaa no teie tau, ua haapao maitai roa te mau Ite no Iehova i te hoê o te mau parau tohu a Iesu Mesia: “E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” (Mataio 24:14) A fatata mai ai te matahiti 1914—te haamataraa o te “anotau hopea”—ua rave te Feia haapii Bibilia haavare ore ma te tiaturi papu i te hoê ohipa haapiiraa na te ao atoa nei aita e faaauraa tei niuhia i nia i te mau Papai Moˈa.—Timoteo 2, 3:1.

Ia naea ta ratou tapao e faaite haere i te parau apî maitai e ati aˈe te fenua nei, ua faaohipa teie mau tavini a Iehova i te hoê ravea apî, te itoito, e te putapû. No te ite hau atu â, e hoˈi ïa tatou i muri.

Te hoê ravea apî no te faaite haere i te parau apî maitai

Tei te avaˈe Tenuare ïa o te matahiti 1914. A feruri na e te parahi ra outou i roto i na 5 000 taata i roto i te hoê piha rururaa poiri i te oire no New York. I mua ia outou, te vai ra te hoê paruai teata rahi. E fa mai te hoê taata rouru hinahina e pereue to ˈna i nia i te paruai. Ua ite aˈena outou i te mau hohoˈa teata vava, tera râ, te paraparau ra teie taata, e e nehenehe outou e faaroo i ta ˈna e parau ra. Te ite râ outou i te hoê ohipa anohaa apî, e mea otahi te poroi. Te taata orero, o Charles Taze Russell ïa, te peretiteni matamua o te Taiete Watch Tower, e te hohoˈa teata, o te “Photo-Drame de la Création” ïa.

Ua taa ia C. T. Russell e o te mau pataraa hohoˈa teata hautiuti te ravea maitai roa e naeahia ˈi te mau nahoa taata. No reira, i te matahiti 1912, ua haamata oia i te faaineine i te “Photo-Drame de la Création.” I te pae hopea, ua oti mai te hoê pataraa hohoˈa teata hautiuti ore e te mea hautiuti e vau hora, ma te mau û e te ravea haapurororaa reo.

Ma te patahia i roto e maha tuhaa, ua faahaere te “Photo-Drame” i te feia mataitai mai te tau o te poieteraa, i te roaraa o te tuatapaparaa o te taata e tae roa ˈtu i te taime faahiahia roa ˈˈe o te opuaraa a te Atua ra o Iehova no te fenua e te huitaata i te hopea o te Faatereraa Tausani Matahiti a te Mesia. Tau matahiti te mairi hou te faaohiparaa i taua noâ ravea anohaa ra e manuïa ˈi i te pae tapihoo. Tera râ, e mau mirioni taata tei ite i te “Photo-Drame de la Création” ma te tamoni ore!

Ua faaineinehia te tahi mau haruharuraa upaupa navenave e e 96 haruharuraa oreroraa parau atoa no te “Photo-Drame.” Ua faaohipahia te tahi mau hohoˈa nehenehe o te faaiteite ra i te tuatapaparaa o te ao. Ua titau-atoa-hia tau hanere hohoˈa apî penihia e papaihia. Mea peni-rima-hia ma te haapao maitai te tahi o te mau hohoˈa teata hautiuti ore e te mea hautiuti ma te mau û. E ua ravehia te reira e rave rahi taime, no te mea i muri  aˈe, e 20 anairaa taatoa i roto e 4 tuhaa tei oti mai. Ua nehenehe atura ïa e pata hoê tuhaa o te “Photo-Drame” i roto e 80 oire taa ê i te mau huru mahana atoa!

Te tereraa

Nafea te tereraa te pataraa hohoˈa o te “Photo-Drame”? “Ua haamata te Darama e te hoê hohoˈa hautiuti o te pata ra ia Taeae Russell,” ta Alice Hoffman, Vahine haapii Bibilia, ïa i parau. “A fa mai ai oia i nia i te paruai e a hautiuti ai to ˈna utu, ua faaterehia te hoê matini faataˈi pehe . . . e ua faaroo matou i to ˈna reo ma te au.”

Ma te faahitihiti i te mau hohoˈa pata-vitiviti-hia, te haamanaˈo ra o Zola Hoffman e: “Te parahi noa ra vau ma te maere rahi a mataitai ai matou i te faahohoˈaraa o te mau mahana poieteraa. I roto, te vai ra te mau lili e uaa mǎrû noa ra i mua i to matou mata.”

Te na ô atoa ra o Karl F. Klein no te Tino Aratai a te mau Ite no Iehova, mea au hoi na ˈna te upaupa, e: “I te taime atoa a patahia ˈi teie mau hohoˈa, e faaroohia te tahi mau upaupa navenave roa, mai te Narcisse e te Humoresque tuiroo.”

Te vai ra ˈtu â te mau mea eita e moehia. “I te tahi taime, ua tupu te tahi mau hape arearea,” ta Clayton J. Woodworth, te tamaiti, ïa e haamanaˈo ra. “I te hoê taime, te faaterehia ra te pehe ‘A maue mai te manu i nia i to outou mouˈa,’ e o te hohoˈa o te hoê gigantosaurus rahi ïa, te hoê animara i te rahi no mua ˈˈe i te diluvi, tei fa mai i nia i te paruai”!

Hau atu â i te “Photo-Drame de la Création” matauhia, te vai ra na anairaa “Eurêka-Drame.” (A hiˈo i te tumu parau tarenihia.) E mau oreroraa parau haruharuhia te hoê e te mau pehe upaupa. E mau pehe e e mau hohoˈa hautiuti ore atoa te tahi atu. Noa ˈtu e aita e hohoˈa hautiuti to te “Eurêka-Drame,” ua manuïa rahi te reira i te mau tuhaa fenua e ere i te mea taata roa.

Te hoê mauhaa puai no te pororaa

I te hopea o te matahiti 1914, ua patahia te “Photo-Drame” i mua hau atu i te 9 000 000 taata taatoa i Marite Apatoerau, Europa, e i Auteralia. Noa ˈtu e mea iti te Feia haapii Bibilia, aita ratou i ere i te tiaturi papu i hinaarohia no te faaite haere i te parau apî maitai maoti teie ravea apî. Ua horoa ratou ma te oaoa i te moni e titauhia no te tarahu i te mau vahi e tano no teie mau pataraa hohoˈa teata. Mea na reira to te “Photo-Drame de la Création” raveraa i te hoê ohipa rahi, na roto i te faaiteraa i te Parau e te mau opuaraa a te Atua i te feia mataitai.

I roto i te hoê rata na C. T. Russell, ua papai te hoê taurearea e: “Ua riro to ˈu iteraa no te taime matamua i ta outou Darama ei taime faufaa roa i roto i to ˈu oraraa; aore ra, e tia ia parau vau e ei taime faufaa i roto i to ˈu iteraa i te Bibilia.” Teie ta te hoê vahine faaipoipo i parau: “Ua fatata vau i te ere i to ˈu faaroo e ua manaˈo vau e ua faaorahia vau e te ‘Photo-Drame de la Création’ tei patahia i ǒ nei i te tau veavea i mairi aˈenei. . . . I teie nei, te ite ra vau i taua hau ra ta te ao e ore e nehenehe e horoa mai e o ta ˈu e tapea noa no ta ˈna mau taoˈa atoa.”

Teie ta Demetrius Papageorge, tei riro maoro ei melo rave ohipa o te pu rahi a te Taiete, i parau: “E ohipa maitai roa te ‘Photo-Drame,’ ia hiˈohia e mea iti roa te Feia haapii Bibilia e ta ratou moni. Ua fanaˈo mau â te reira i te turu a te varua o Iehova!”

[Tumu parau tarenihia/Hohoˈa i te mau api 8, 9]

Te “Eurêka-Drame”

E vau avaˈe i muri aˈe i te pataraahia te “Photo-Drame” no te taime matamua, ua taa i te Taiete te faufaaraa ia faaineine i te tahi atu hohoˈa o te reira tei parauhia te “Eurêka-Drame.” A pata-noa-hia ˈi te “Photo-Drame” taatoa i roto i te mau oire rarahi, te horoa ra te “Eurêka” i te hoê â poroi faufaa i roto i te mau oire iti e te mau mataeinaa. Ua parauhia e ua horoa te hoê anairaa o te “Eurêka-Drame” i “te hoê ravea maitai roa na te mau tuahine” no te pororaa. No te aha? No te mea 14 kilo noa to te afata vairaa pehe. Parau mau, no te hoê faaiteiteraa, mea titau-atoa-hia ia amo i te matini faataˈi pehe.