Te hoê parau faaite taa ê

I TE hopea o te apooraa matahiti a te Watch Tower Bible and Tract Society of Pennsylvania i te 7 no Atopa 2000, ua horoa te peretiteni o John E. Barr no te Tino Aratai i te hoê parau faaite taa ê. Ua niuhia teie parau faaite i nia i te mau oreroraa parau i hohorahia e Theodore Jaracz e Daniel Sydlik i te omuaraa i taua mahana ra.—A hiˈo i te mau api 12-16 e te 28-31 o teie vea.

Ma te horoa i te hoê manaˈo faufaa roa, ua parau Taeae Barr e: “E mau faufaa teitei aˈe e mea rahi roa ˈtu â te mau hopoia tei horoahia na ‘te tavini haapao maitai’ e ta ˈna Tino Aratai i ta te mau taatiraa e au i te ture. I roto i te mau faaotiraa i haamauhia i roto i te pǎpǎ ture a taua mau taatiraa e au i te ture taitahi ra, te faataahia ra te mau mea e tano no ratou. Ua nomino râ to tatou Fatu, o Iesu Mesia, i te pǔpǔ o te tavini haapao maitai ei tiaau i ta ˈna ‘mau taoˈa’ atoa, aore ra mau faufaa o te Basileia i ǒ nei i te fenua nei.”—Mataio 24:45-47.

Ua na ô â Taeae Barr no nia i te taatiraa no Pennsylvanie e: “Mai to ˈna iho â haamanaraahia i te matahiti 1884 mai â, e tuhaa faufaa ta te Watch Tower Bible and Tract Society of Pennsylvania i rave i roto i to tatou tuatapaparaa no teie tau. E mauhaa e au i te ture noa râ teie ta “te tavini haapao maitai e te paari” e faaohipa ia titauhia ra.”

I roto i ta raua mau oreroraa parau, ua faataa na Taeae Sydlik e Jaracz e e ere no te mea e na “te tavini haapao maitai e te paari” e tiaau ra i te mau taoˈa atoa a te Fatu i te fenua nei, eita ïa ta te pǔpǔ o te tavini e nehenehe e nomino i te mau taata aravihi o te “mamoe ê atu” no te haapao i te tahi mau hopoia tiaauraa matauhia. (Ioane 10:16) Aita atoa e tumu bibilia e titau ra ia riro te mau melo atoa o te apooraa tiaauraa a te mau taatiraa e au i te ture e faaohipahia ra e te mau Ite no Iehova, ei mau Kerisetiano faatavaihia.

Ua parau o Taeae Barr i te feia e faaroo ra e aita i maoro aˈenei, ua vaiiho te tahi mau taeae no te Tino Aratai a te mau Ite no Iehova, o tei tavini na ei melo no te apooraa tiaauraa e no te tomite faatere, ma te aau tae i ta ratou mau hopoia i roto i te mau taatiraa atoa e faaohipahia ra e “te tavini haapao maitai e te paari” i te mau Hau Amui. Ua maitihia te tahi mau taeae o te mau mamoe ê atu e nehenehe e tiaturihia no te mono ia ratou.

Mea maitai mau â teie faaotiraa. E rahi atu â ïa te taime o te mau melo o te Tino Aratai no te faaineine i te maa pae varua, a haapao atu ai i te mau hinaaro pae varua o te fetii taeae na te ao nei.

Ei parau hopea, ua na ô te peretiteni i te feia e faaroo ra ma te oaoa e: “E rave rau hopoia tiaauraa e te au i te ture tei horoahia na te mau tiaau aravihi, . . . te haa ra râ ratou paatoa i raro aˈe i te aratairaa pae varua a te Tino Aratai. . . . E ani anaˈe ïa ia Iehova na roto i te pure ia haamaitai mai oia i ta tatou mau tutavaraa amui e faatupu i to ˈna hinaaro, no te tura e te hanahana o to ˈna iˈoa rahi.”