Te mau Ite no Iehova—E haere ra i mua ma te tiaturi papu!

Parau faataa o te apooraa matahiti

I TEIE mau mahana o te tiaturi ore e te feaa, e taa ê te mau Ite no Iehova ei mau Kerisetiano e tiaturiraa papu to ratou. Ua faataa-maitai-hia te reira i te apooraa matahiti a te Watch Tower Bible and Tract Society of Pennsylvania, tei tupu i te piha tairururaa a te mau Ite no Iehova i Jersey City, i New Jersey, i te Mahana maa 7 no Atopa 2000. *

I roto i ta ˈna mau parau omuaraa, ua na ô te peretiteni ra o John E. Barr, melo no te Tino Aratai a te mau Ite no Iehova, e: “I roto i na miria taata o te fenua nei, ua ite e te tiaturi ra tatou e ua faateronohia te Mesia ra o Iesu, te Tamaiti here a Iehova, i nia i te raˈi i teie nei, e te arii ra oia i roto i to ˈna mau enemi.” Ua faataahia teie tiaturiraa papu i roto i na parau faataa oaoa e ono no te ao atoa mai.

Te upootiaraa i nia i te peu tahutahu maoti te parau mau bibilia i Haïti

E ite-rahi-hia te peu tahutahu i Haïti. “E pinepine,” ta John Norman te tiaau o te Tomite Amaa ïa i faatia, “e rave te taata i te peu vaudou no te paruru ia ratou.” Ua feaa te manaˈo o te hoê tahuˈa tahutahu i to ˈna ereraa i te hoê avae i roto i te hoê ati. ‘Nafea te reira i tupu ai mai te peu e te paruru ra te mau varua ia ˈu?’ ta ˈna ïa i ui maere. Mai e rave rahi atu â, ua haapiihia teie taata i te parau mau e te mau Ite no Iehova e ua tauturuhia ia faarue roa i te peu tahutahu. E itehia e e tupu â te maraaraa i Haïti maoti te rahiraa taata i tae mai i te oroa Haamanaˈoraa i te poheraa o te Mesia i te 19 no Eperera 2000, ua tataimaha ïa te numera o te feia poro i te Basileia i taua fenua ra.

Te itoito rahi i te tuhaa fenua aano o Korea

I Korea, e 40 % o te mau Ite no Iehova tei roto i te taviniraa taime taatoa. “Na roto i teie pǔpǔ i te rahi,” ta Milton Hamilton te tiaau o te Tomite Amaa ïa i parau, “e porohia ta matou tuhaa fenua e hau atu i te 47 mirioni taata fatata hoê taime i te avaˈe.” Mea faahiahia roa te maraaraa i roto i te mau amuiraa reo aparaa rima. I roto i te hoê tuhaa haaati reo aparaa rima, e 800 haapiiraa bibilia i te fare o te taata teie e faaterehia nei. I te faito au noa, hoê ïa haapiiraa i te taata poro hoê. Te mea peapea, te tuu-noa-hia ra te mau taeae apî i roto i te fare tapearaa no to ratou tiaraa amui ore. Mea rave-maitai-hia râ teie mau Kerisetiano haapao maitai, e e pinepine, e horoahia te tahi mau ohipa o te titau i te tiaturi na ratou.

 Te haapaoraa i te mau mea e titauhia e te maraaraa i Mehiko

I Mehiko, e 533 665 feia poro i te Basileia tei horoa i ta ratou tapura taviniraa i te avaˈe Atete 2000, e numera rahi roa ˈˈe teie. Te rahiraa taata i tae mai i te oroa Haamanaˈoraa, ua hau atu ïa i te tataitoru taua numera ra. “Ta matou fa i teie matahiti, te paturaa ïa e 240 Piha a te Basileia hau,” ta Robert Tracy te tiaau o te Tomite Amaa ïa i parau. “Tera râ,” ta ˈna ïa i parau â, “mea rahi atu â ta matou e hinaaro ra.”

E hiˈoraa maitai roa to te feia apî i roto i te mau Ite no Iehova i Mehiko. Teie ta te hoê perepitero Katolika i parau no nia i te hoê taata apî: “E hinaaro vau hoê noa ˈˈe taata mai ia ˈna te huru i roto i ta ˈu mau pǐpǐ. Ua faahiahia vau i tera mau taata no to ratou hinaaro papu e ta ratou faaohiparaa i te Bibilia ma te paari. Ua araivavao ratou no te Atua, tae noa ˈtu i mua i te pohe.”

Te hapa ore i roto i te arepurepu i Sierra Leone

Mai te avaˈe Eperera 1991 mai â, i te tupuraa te tamaˈi tivira i Sierra Leone, e mau tausani taata tei taparahi-pohe-hia aore ra tei pepe. “Ua hepohepo roa te taata i te tamaˈi e te mau fifi,” ta Bill Cowan te tiaau o te Tomite Amaa ïa i parau. “I teie nei, mea rahi o tei ore na hoi i tâuˈa i ta matou poroi, e faaroo maira ma te anaanatae. E pinepine, e haere noa mai te taata i ta matou mau Piha a te Basileia no te faaroo i ta ratou putuputuraa matamua. E pinepine, e tapeahia te mau taeae i nia i te purumu no te ani i te hoê haapiiraa bibilia.” Noa ˈtu te arepurepu tamau o te fenua, te hotu ra te ohipa pororaa i te Basileia i Sierra Leone.

Hoê porotarama paturaa rahi i Afirika Apatoa

I teie mahana, te hinaarohia ra tau tausani Piha a te Basileia i te tuhaa fenua e haapaohia ra e te amaa no Afirika Apatoa. Tau hanere piha tei hamani-aˈena-hia. “Maoti i te putuputu i roto i te hoê fare nainai aore ra i raro aˈe i te hoê tumu raau, mai na mua ˈˈe, e nehenehe to tatou mau taeae e ruru i roto i te hoê piha au maitai e te mau parahiraa e tano,” ta John Kikot, melo o te Tomite Amaa, ïa i parau. “Noa ˈtu e mea au noa te hamaniraa o te rahiraa o teie mau Piha a te Basileia, e pinepine, e taa ê te reira ei mau fare nehenehe roa ˈˈe i to ratou fenua. I te tahi mau vahi, ua itehia e i muri aˈe i te paturaa i te hoê Piha a te Basileia, e hau atu te amuiraa i te tataipiti i te matahiti i muri mai.

Te hoê ui Ite apî i Ukraine

I te roaraa o te matahiti taviniraa 2000, ua tapao teie fenua i te hoê numera rahi roa ˈˈe 112 720 feia poro. Ua hau atu i te 50 000 o teie mau taata tei haapii i te parau mau bibilia i na matahiti e pae i mairi aˈenei. “Oia mau, ua faatupu mai Iehova i te hoê ui Ite taurearea apî no te faaite i to ˈna iˈoa!” ta John Didur te tiaau o te Tomite Amaa ïa i parau. “I na matahiti e piti i mairi aˈenei,” ta ˈna ïa i parau â, “ua opere matou hau atu i te 50 mirioni vea, e tuea ïa e te huiraatira o te fenua. I te avaˈe hoê, i te faito au noa, e tae mai ta matou hoê tausani rata na te mau taata e anaanatae ra o te hinaaro ra i te tahi atu â mau haamaramaramaraa.”

Te tahi atu â mau tuhaa faahiahia o te porotarama

Ua hohora o Daniel Sydlik, melo o te Tino Aratai, i te hoê oreroraa parau au roa. Ua niuhia te tumu parau “Eaha te taa-ê-raa i rotopu i te Tino Aratai e te hoê taatiraa e au i te ture,” i roto i teie nei vea, i nia i taua vauvauraa ra o te horoa mai i te parau apî.

Ua hohora o Theodore Jaracz no te Tino Aratai i te hoê oreroraa parau o te haaferuri, teie te upoo parau “Mau tiaau e mau tavini tauturu nomino-teotaratia-hia.” Ua niuhia te hoê o te mau tumu parau i roto i teie nei vea i nia i taua oreroraa ra.

I te apooraa matahiti, ua vauvau-atoa-hia te hoê oreroraa parau anaanatae roa no nia i te irava o te matahiti 2001 e David Splane, melo o te Tino Aratai. Ua niuhia te reira i nia i te mau parau a te aposetolo Paulo: “Ia mau maite â outou ma te nehenehe, e te î [i te tiaturi papu] i te mau hinaaro atoa o te Atua ra.” (Kolosa 4:12; MN) Ua faaoti papu te mau Ite no Iehova na te ao nei e na reira a poro ai ratou ma te haapao maitai i te parau apî maitai o te Basileia o te Atua e ati aˈe te fenua nei.—Mataio 24:14.

[Nota i raro i te api]