E nehenehe outou e faaruru i te toaruaruraa!

I PAPAI na te hoê taata paari e: “Ua tarapape anei to aau i te mahana e ati ai ra? E iti roa to oe itoito.” (Maseli 24:10, MN) Mai te peu e ua toaruaru aˈena outou, e farii paha outou i teie mau parau.

Aita hoê aˈe i paruruhia i te mau faahopearaa o te toaruaruraa. Hoê aore ra e piti mahana paha i muri iho e ore ai te toaruaruraa iti. Mai te peu râ te mauiui ra te aau aore ra te inoino ra tatou, e nehenehe te fifi e vai maoro atu â. No te mea e ua taiâ te tahi mau Kerisetiano, o tei tavini hoi ma te haapao maitai ehia matahiti, ua faaea roa ratou i te haere i te mau putuputuraa a te amuiraa e i roto i te taviniraa.

Mai te peu e te toaruaru ra outou, a faaitoito! Ua faaruru te tahi mau tavini haapao maitai i mutaa iho ma te manuïa i te toaruaruraa, e maoti te tauturu a te Atua, e nehenehe atoa outou.

Ia haamauiui vetahi ê i to outou aau

Eiaha e manaˈo e ua paruruhia outou i te tahi mau parau aore ra mau ohipa feruri-ore-hia. E nehenehe râ outou e patoi i te vaiiho i te mau huru tia ore o vetahi ê ia haafifi i ta outou taviniraa ia Iehova. Mai te peu e ua haamauiui te hoê taata i to outou aau, mea maitai ia hiˈo outou ua nafea o Hana, te mama o Samuela, i roto i te hoê tupuraa faatoaruaru.

E hinaaro i te rahi to Hana i te tamarii, eita râ e noaa ta ˈna. Ua fanau aˈena o Penina, te piti o te vahine a Elikana, i te tamaroa e te tamahine. Maoti i te tâuˈa i te tupuraa peapea o Hana, ua hiˈo o Penina ia ˈna mai te hoê enemi e no to ˈna huru ua “oto” o Hana e ‘aita i amu i te maa.’—Samuela 1, 1:2, 4-7.

I te hoê mahana, ua haere o Hana i te sekene e pure. Ite atura o Eli, te tahuˈa rahi o Iseraela, e te hautiuti ra to ˈna utu. I te mea e aita oia i ite e te pure ra o Hana, ua manaˈo aˈera o Eli e ua taero oia. “A fea râ una e pee ai to taero?” ta ˈna ïa i ui. “E haapae ê atu i ta oe uaina.” (Samuela 1, 1:11-14) E nehenehe anei outou e feruri i te huru o Hana? Ua haere oia i te sekene ia noaa mai te faaitoitoraa. Papu maitai e aita oia i manaˈo e e pari-hape-hia oia e te hoê o te mau taata mana roa ˈˈe i Iseraela!

E nehenehe hoi o Hana e toaruaru roa i teie huru tupuraa. E nehenehe o ˈna e faarue oioi i te sekene, ma te horeo eiaha roa ˈtu e hoˈi mai a tavini noa ˈi o Eli i reira ei tahuˈa rahi. Aita râ, ua haafaufaa maitai oia i to ˈna taairaa e o Iehova. Ua ite oia e eita o Iehova e mauruuru ia na reira oia. O te sekene te pu o te haamoriraa viivii ore. Ua tuu o Iehova i to ˈna iˈoa i reira. E noa ˈtu to ˈna huru tia ore, o Eli ta Iehova i maiti ei tia no ˈna.

Te horoa maira te pahonoraa paieti a Hana i te pariraa a Eli i te hoê hiˈoraa maitai roa no tatou i teie mahana. Aita oia i vaiiho e ia pari-hape-hia oia, ua pahono râ oia ma te faatura rahi. “E ere tena, e tau fatu,” ta ˈna ïa i pahono. “E vahine aau mihi noa ra vau: aita vau i inu i te uaina e te mea taero, ua faaite hua râ vau i tau hinaaro i mua i te aro o Iehova. Eiaha oe e parau i to tavini vahine nei, e e vahine haapao ore; no roto hoi i te rahi o to ˈu nei ati, e to ˈu nei oto, ta ˈu i parau iho nei.”—Samuela 1, 1:15, 16.

Ua faataa anei o Hana i to ˈna manaˈo? E. Ua paraparau râ oia ia Eli ma te ite i te peu, aita i faahapa ˈtu no ta ˈna pariraa hape. Ua pahono  atura Eli ia ˈna ma te mǎrû: “Ia ora na oe i te haerea; e ia faatia mai hoi te Atua no Iseraela i ta oe i ani atu ia ˈna ra.” I te afaroraa te mau mea, ‘ua haere ihora o Hana, e ua amu ihora i te maa, e aita ˈtura to ˈna mata i hana.’—Samuela 1, 1:17, 18.

Eaha ta tatou e haapii ra na roto i teie aamu? Ua ohipa oioi o Hana no te faaafaro i te hoê taa-ore-raa, ma te faatura hohonu râ. Ei faahopearaa, ua tapea oia i te hoê taairaa maitai e o Iehova e o Eli. E pinepine e arai te aparauraa maitai ma te ite i te peu i te mau fifi haihai eiaha ia rahi roa!

E tia ia parauhia e no te faaafaro i te mau peapea e o vetahi ê, e titauhia ia haehaa e ia faaau maitai na pae e piti. Ia ore te hoê hoa faaroo e farii i ta outou mau tutavaraa e faaafaro i te hoê peapea, e tia ia outou ia vaiiho e na Iehova e haapao atu, ma te tiaturi e e faaafaro oia i te reira i te taime e ma te ravea ta ˈna iho i maiti.

Ua ere anei outou i te hoê fanaˈoraa taa ê i roto i te taviniraa?

Ua peapea roa te vetahi no te mea ua tia ia ratou ia vaiiho i te hoê fanaˈoraa taa ê hinaarohia i roto i te taviniraa a te Atua. Ua oaoa ratou i te tavini i to ratou mau taeae, e i to ratou vaiihoraa i teie fanaˈoraa taa ê, ua manaˈo ratou e e ere faahou ratou i te mea faufaa no Iehova aore ra no ta ˈna faanahonahoraa. Mai te peu e tera atoa to outou manaˈo, e noaa ia outou te haroaroa ia rave outou i te hiˈoraa o te taata papai bibilia ra o Mareko, tei mairi-atoa-hia o Ioane Mareko.—Ohipa 12:12.

Ua apee o Mareko ia Paulo e ia Baranaba i roto i to raua tere mitionare matamua, i ropu râ i te tere, ua faarue oia ia raua e ua hoˈi i Ierusalema. (Ohipa 13:13) I muri aˈe, ua hinaaro o Baranaba e rave ia Mareko i roto i te tahi atu tere. Te na ô ra râ te Bibilia e: ‘Aita Paulo i manaˈo e, e mea au ia aratai atoa ia ˈna i to ratou tere, o tei faarue mai ia ratou i Pamephulia ra, aore i haere atoa i taua ohipa ra.’ Aita o Baranaba i mauruuru. Te na ô â ra te faatiaraa e: “Tupu atura hoi te mârô rahi ia raua iho, e taa ê atura raua, rave atura Baranaba ia Mareko, fano atura i Kupero. O Paulo râ, apiti atura ïa ia Sila, e reva ˈtura.”—Ohipa 15:36-40.

Eita e ore e ua peapea o Mareko i te faarooraa e aita te aposetolo faaturahia ra o Paulo i hinaaro ia haa raua e ua peapea o Paulo raua o Baranaba no ta raua mârôraa i to ˈna aravihi. Aita râ te aamu i hope atura.

Te hinaaro noâ ra Paulo e o Sila i te hoê hoa ratere. I to raua taeraa ˈtu i Lusetera, ua itea ia raua te hoê taata no te mono ia Mareko, te taurearea ra ïa o Timoteo. I te taime i maitihia ˈi oia, e piti aore ra e toru matahiti noa paha to Timoteo bapetizoraahia. I te tahi aˈe pae, e melo o Mareko no te amuiraa Kerisetiano mai to ˈna haamauraahia mai â—mea maoro aˈe ïa oia ia Paulo iho. Teie râ, o Timoteo tei fanaˈo i te hopoia.—Ohipa 16:1-3.

Eaha te huru o Mareko i to ˈna faarooraa e na te hoê taata apî aˈe e ere i te mea aravihi roa i mono ia ˈna? Aita te Bibilia e faaite ra. Te faaite ra râ te reira e ua haa noa o Mareko i roto i te taviniraa a Iehova. Ua fanaˈo oia i te mau hopoia e vai ra no ˈna. Aita oia i nehenehe e tavini e o Paulo raua o Sila, ua nehenehe râ oia e reva na muri ia Baranaba i Kupero, te fenua tumu o Baranaba, e tuhaa taviniraa na ˈna. Ua haa atoa o Mareko e o Petero i Babulonia. I te pae hopea, ua nehenehe oia e haa e o Paulo—e o Timoteo—i Roma. (Kolosa 1:1; 4:10; Petero 1, 5:13) I muri aˈe, ua faauruahia o Mareko no te papai hoê o na Evanelia e maha!

E haapiiraa faufaa mau to roto i teie aamu. Aita o Mareko i peapea roa no te mea ua ere o ˈna i te hoê fanaˈoraa taa ê, a ore atu ai i mauruuru i te tahi atu â ta ˈna e nehenehe e fanaˈo. Ua haa noa o Mareko i roto i te taviniraa a Iehova e ua haamaitai Iehova ia ˈna.

No reira, mai te peu e ua ere outou i te hoê fanaˈoraa taa ê, eiaha e toaruaru. Ia tapea outou i te hoê huru maitai e ia haa noa outou, e noaa ia outou te tahi atu â mau fanaˈoraa taa ê. Mea rahi te tia ia rave i roto i te ohipa a te Fatu.—Korinetia 1, 15:58.

 Ua toaruaru te hoê tavini haapao maitai

E ere i te mea ohie ia aro puai no te faaroo. I te tahi taime, e nehenehe outou e toaruaru. E faahapa atoa paha outou ia outou iho e te toaruaru ra outou, ma te manaˈo e eiaha roa ˈtu te hoê tavini haapao maitai a te Atua ia na reira. A feruri na ia Elia, hoê o te mau peropheta maitai roa i Iseraela.

I to Iezebela, te arii vahine no Iseraela tei faaitoito roa ino i te haamoriraa ia Baala, faarooraa e ua haapohe o Elia i te mau peropheta a Baala, ua horeo oia e haapohe ia Elia. Ua faaû o Elia i te mau enemi rahi aˈe ia Iezebela, ma te tupu taue râ ua toaruaru roa oia e ua hinaaro e pohe. (Mau arii 1, 19:1-4) Eaha hoi tei tupu? Ua moe ia ˈna te hoê mea.

Ua moe ia Elia i te fariu i nia ia Iehova, te Tumu o to ˈna puai. Na vai hoi i horoa i te mana na Elia e faatia i tei pohe e e faaû i te mau peropheta a Baala? Na Iehova. Papu maitai, e nehenehe ta Iehova e horoa i te puai no ˈna no te faaû i te riri o te arii vahine ra o Iezebela.—Mau arii 1, 17:17-24; 18:21-40; Korinetia 2, 4:7.

E nehenehe te tiaturi o te hoê ia Iehova e aueue no te hoê taime poto noa. Mai ia Elia, e hiˈo paha outou i te tahi taime i te hoê fifi ma te manaˈo taata maoti i te faaohipa i “te paari no nia maira” no te faaruru atu. (Iakobo 3:17) Aita râ Iehova i faarue ia Elia no teie hape taime poto.

Ua horo o Elia i Bere-seba e haere atura i te medebara, ma te manaˈo e eita oia e itehia i reira. Ua ite râ Iehova ia ˈna. Ua tono oia i te hoê melahi no te tamahanahana ia ˈna. Ua ara te melahi e ia fanaˈo o Elia i te pane eu apî e te pape haumǎrû. I muri aˈe i to Elia taoto-rii-raa, ua faaue te melahi ia ˈna e haere i te mouˈa i Horeba, fatata e 300 kilometera i te atea, i reira oia e faaitoito-faahou-hia ˈi e Iehova.—Mau arii 1, 19:5-8.

I te mouˈa Horeba, ua ite mata o Elia i te hoê faaiteraa i te mana o Iehova, o te haapaari i to ˈna faaroo. I muri iho, ma te reo mǎrû e te haihai, ua haapapu Iehova ia ˈna e e ere o o ˈna anaˈe. Tei pihai iho Iehova ia ˈna, e e 7 000 o to ˈna mau taeae atoa, noa ˈtu e aita oia i matau ia ratou. I te pae hopea, ua horoa Iehova i te hoê ohipa na ˈna. Aita oia i faarue i ta ˈna peropheta ia Elia.—Mau arii 1, 19:11-18.

Te vai ra te tauturu

Mai te peu e e toaruaru rii outou i te tahi taime, e ite outou e e maitai aˈe outou ia faafaaea rii outou aore ra ia amu i te maa maitai. I te hoê taime, ua itea ia Nathan H. Knorr, i tavini na ei melo o te Tino Aratai a te mau Ite no Iehova e tae noa ˈtu i to ˈna poheraa i te matahiti 1977, e e pinepine, e iti roa mai te mau fifi rarahi i muri aˈe i te hoê po taotoraa maitai. Ia vai noa râ te fifi, eita paha e tano teie ravea—e hinaaro outou i te tauturu no te aro i te toaruaruraa.

Ua tono o Iehova i te hoê melahi no te faaitoito ia Elia. I teie mahana, te horoa ra te Atua i te faaitoitoraa na roto i te mau matahiapo e te tahi atu â mau Kerisetiano paari. E nehenehe mau â te mau matahiapo e ‘riro ei faarǔrǔraa i te vero.’ (Isaia 32:1, 2) No te fanaˈo râ i ta ratou faaitoitoraa, mea tia ia ani atu tatou. Noa ˈtu to ˈna toaruaruraa, ua haere o Elia i te mouˈa i Horeba ia noaa ia ˈna te haapiiraa no ǒ mai ia Iehova ra. E noaa ia tatou te haapiiraa o te patu na roto i te amuiraa Kerisetiano.

Ia farii tatou i te tauturu e ia faaruru ma te itoito i te mau fifi, mai te mau manaˈo mauiui aore ra te ereraa i te fanaˈoraa taa ê, e turu ïa tatou ia Iehova i roto i te hoê tumu parau faufaa. Eaha taua tumu parau ra? Ua parau o Satani e e tavini te taata ia Iehova no to ratou noa iho maitai. Aita Satani e mârô ra e e tavini tatou i te Atua ia maitai te mau mea atoa i roto i to tatou oraraa, te faahua parau ra râ oia e e faaea tatou i te tavini i te Atua ia fifihia tatou. (Ioba, pene 1 e te 2) Na roto i te rave-tamau-raa ma te aueue ore i te taviniraa a Iehova noa ˈtu te toaruaruraa, e nehenehe tatou e tauturu i te pahono i te pariraa haavare a te Diabolo.—Maseli 27:11.

Ua fifihia na o Hana, o Mareko, e o Elia e ua  ere i te oaoa no te hoê taime poto. Ua faaruru râ ratou i to ratou mau fifi e ua ora i te hoê oraraa ruperupe. Maoti te tauturu a Iehova, e nehenehe atoa outou e faaruru i te toaruaruraa!