Te faatia ra te feia poro i te Basileia

Te farii ra te Lettonie i te parau apî maitai

TE FAAITE maitai ra te Bibilia e e hinaaro te Atua “i te taata atoa ia ora, e ia noaa te ite i te parau mau.” (Timoteo 1, 2:4) I teie nei, te faaroo mai ra te feia ehia matahiti to ratou patoiraa i te faaroo i te parau apî maitai! I Lettonie, mai i te tahi atu mau vahi o te fenua, te farii nei te feia ua rau te matahiti e te huru oraraa i te poroi, mai ta te mau aamu i muri nei e faaite ra.

• I Rēzekne, te hoê oire i te pae hitia o te râ o Lettonie, ua ani te hoê mama e ta ˈna tamahine apî i te tahi mau aveia i te hoê vahine i nia i te purumu. I muri aˈe i to ˈna horoaraa ˈtu i te haamaramaramaraa, ua titau manihini te vahine, e Ite no Iehova hoi, ia raua i te mau putuputuraa a te mau Ite.

I te mea e mea au na te mama e te tamahine te haapaoraa, ua faaoti raua e haere i te putuputuraa. I nia i te purumu, ua faaau raua i te parau e ia ite raua i te tahi mea tano ore, e faarue oioi raua i te putuputuraa. I te mea râ e mea anaanatae roa te putuputuraa, aita roa ˈtu te manaˈo e faarue i ô mai i roto i to raua feruriraa. Ua farii raua i te haapii i te Bibilia e ua haamata i te haere tamau i te mau putuputuraa. I roto noa e toru avaˈe, ua faaite raua i te hinaaro e haere i roto i te pororaa, e te tiai ru noa ra raua i te bapetizoraa.

• I roto i te hoê oire i te pae tooa o te râ o Lettonie, ua farerei te hoê Ite ia Anna, e 85 matahiti, o tei anaanatae mau e tei farii i te hoê haapiiraa bibilia. Ua patoi ta ˈna tamahine e te tahi atu mau melo utuafare ia ˈna ma te uˈanana. Aita râ o Anna i vaiiho e ia faataupupu te reira aore ra to ˈna matahiti rahi e te ea paruparu ia ˈna ia tamau i ta ˈna haapiiraa bibilia.

I te hoê mahana, ua parau o Anna i ta ˈna tamahine e fatata oia i te bapetizohia. “Ia bapetizohia oe, e afai au ia oe i te fare ruau,” ta te tamahine a Anna ïa i pahono. Aita râ teie haamǎtaˈuraa i tapea ia Anna. No to ˈna paruparu, ua bapetizohia oia i to ˈna fare.

Eaha te huru o te tamahine a Anna? Ua taui to ˈna haerea e ua faaineine i te hoê maa taa ê na to ˈna mama i muri aˈe i te bapetizoraa. I muri iho, ua ui oia i to ˈna mama e, “I teie nei e ua bapetizohia oe, eaha to oe huru?” Te pahonoraa a Anna? “E au vau i te hoê aiû fanau apî!”

• I te avaˈe Titema 1998, ua farerei e piti Ite i te hoê ofitie a te nuu faatuhaahia a te mau hau amui Soviétique. I te mea e tiaturi oia i te hoê Atua Poiete, ua farii oia i te hoê haapiiraa bibilia, e ua apiti atoa mai ta ˈna vahine i muri aˈe. Ua haere oioi raua i mua e aita i maoro, ua riro mai raua ei feia poro bapetizo-ore-hia. I te tau veavea i muri mai, ua bapetizohia te ofitie tahito. Ua riro te hinaaro rahi o teie nau taata faaipoipo i te mau mea pae varua ei faaitoitoraa no te taatoaraa i roto i te amuiraa. Hau atu â, ua haa raua i roto i te faariroraa i te hoê fare faaearaa no reira ei Piha a te Basileia nehenehe.