Te iteraa i te panoonoo ore i roto i te hoê ao atâta

E NEHENEHE te hoê taata o te haere na te hoê vahi ua pue noa te ofai paaina e pohe. Eita anei râ outou e tauturuhia mai te peu e e tapura fenua ta outou o te faaite i te mau vahi e ofai paaina to reira? Hau atu â, a feruri na e ua haapiihia na outou nafea ia faataa i te mau ofai paaina rau. Papu maitai, e faaiti rahi mai taua ite ra i te atâtaraa e pepe aore ra e pohe.

E nehenehe te Bibilia e faaauhia i taua tapura fenua ra e haapiiraa to nia iho nafea ia faataa i te mau ofai paaina. E paari faaauraa ore to roto i te Bibilia o te tauturu mai nafea ia ape i te mau mea atâta e ia faaafaro i te mau fifi e tupu mai i roto i te oraraa.

A tapao na i teie parau tǎpǔ tamahanahana i roto i te Maseli 2:10, 11 [MN]: “Ia ô mai te paari i roto i to aau na, e ia riro te ite ei mea maitai ia oe ra; na te haapao maitai e tiai ia oe i reira; e na te [haroaroaraa] e faaora ia oe.” E ere te paari e te haroaroaraa e parauhia ra i ǒ nei no ǒ mai i te taata ra no ǒ mai râ i te Atua ra. “O tei faaroo mai râ [i te paari o te Atua] ra, e parahi noa ïa ma te ora, e faaea noa oia ma te mǎtaˈu ore i te ino.” (Maseli 1:33) E hiˈo mai tatou nafea te Bibilia e paruru atu â ˈi ia tatou e e tauturu ai ia ape i te mau fifi e rave rahi.

Te aperaa i te mau ati pohe

Ia au i te mau numera tei neneihia aita i maoro aˈenei e te Organisation mondiale de la santé (OMS), fatata 1 171 000 taata i te matahiti tei pohe i roto i te mau ati purumu na te fenua taatoa. Fatata e 40 mirioni taata ê atu tei pepe, e e hau rii atu i te 8 mirioni o te faaruru ra i te paruparu taime maoro.

Noa ˈtu e aita e parururaa 100 % ia faahoro tatou i te pereoo, e nehenehe tatou e paruruhia ˈtu â ia auraro tatou i te mau ture purumu. Te na ô ra te Bibilia no nia i te feia mana toroa, o te haamau ra e o te rave ra ia faaohipahia te mau ture purumu, e: “Ia auraro maite te taata atoa i te feia mana toroa ra.” (Roma 13:1) E faaiti mai te feia faahoro pereoo o te faaroo i teie aˈoraa i te ati purumu, e ta ˈna mau faahopearaa e pinepine mea ino roa.

O te faatura i te ora te tahi atu faaitoitoraa ia faahoro i te pereoo ma te haapao maitai. Te na ô ra te Bibilia no nia i te Atua ra o Iehova e: “Tei ia oe hoi te tumu o te ora.” (Salamo 36:9) No reira, e ô te ora na te Atua. Aita ïa to tatou e tiaraa e tatara i taua ô ra i te hoê taata aore ra e ore e faatura i te ora, e parau mau, to tatou iho atoa.—Genese 9:5, 6.

Parau mau, no te faatura i te ora o te taata, mea tia ia hiˈo tatou e mea atâta ore anei to tatou pereoo e to tatou fare i te faito e nehenehe. I Iseraela no tahito ra, o te panoonoo ore te mea matamua e haapaohia i roto i te mau tuhaa atoa o te oraraa. Ei hiˈoraa, ia hamanihia te hoê fare, e titau te Ture a te Atua ia hamanihia te hoê paruru  no te tapoˈi fare—mea rahi hoi te ohipa utuafare e ravehia i reira. “Ei paruru ta oe e hamani no nia iho; o te taa mai te hoê taata i raro, o te viivii to fare ia oe i te toto.” (Deuteronomi 22:8) Ia topa te hoê taata i raro no te mea aita teie ture o te parururaa i haapaohia, e faahape te Atua i te fatu fare. Aita e feaaraa, e faaiti mai te faaohiparaa i te manaˈo tumu î i te here i roto i teie ture i te mau ati i te vahi raveraa ohipa aore ra i roto i te faaanaanataeraa.

Te tinairaa i te mau peu matau mâha ore o te haapohe

Ia au i te OMS, i teie nei, te vai ra hau atu i te hoê miria taata puhipuhi avaava i te ao nei, e e fatata e maha mirioni taata e pohe nei i te matahiti hoê no te avaava. Te manaˈohia ra e e maraa teie numera i nia fatata i te 10 mirioni i te roaraa o na 20 e tae atu i te 30 matahiti i mua. E mau mirioni feia puhipuhi avaava ê atu, e te feia atoa e rave ra i te mau raau taero “mǎrû,” o te tuino i to ratou ea e to ratou oraraa no ta ratou mau peu matau mâha ore.

Aita te Parau a te Atua e parau roa ra no nia i te raveraa i te avaava e te raau taero, e nehenehe râ ta ˈna mau faaueraa tumu e paruru ia tatou i teie mau peu. Ei hiˈoraa, te aˈo maira te Korinetia 2, 7:1 e: “E tamâ hua tatou ia tatou iho i te mau viivii atoa o te tino e te varua.” Aita e feaaraa, e haaviivii te avaava e te raau taero i te tino na roto i te mau taoˈa taero atâta e rave rahi. Hau atu â, e hinaaro te Atua ia “moˈa” to tatou tino, oia hoi ia ore ia viivii e ia mâ. (Roma 12:1) Eita anei outou e parau atoa e e faaiti mai te faaohiparaa i teie mau faaueraa tumu i te hoê fifi atâta rahi no to tatou ora?

Te faaoreraa i te mau peu matau atâta

Mea rahi te taata o te tamaa e o te inu hua nei. I roto i te mau faahopearaa o te tamaa-hua-raa, te vai ra te omaha tihota, te mariri ai taata, e te maˈi mafatu. E aratai te inu-hua-raa i te ava i te tahi atu â mau fifi, mai te hiaai mâha ore i te ava, te cirrhose, te mau utuafare amahamaha, e te mau ati purumu. I te tahi aˈe pae, mea ino atoa te hinaaro-hua-raa e haapararai e e nehenehe e aratai atu i te huru tamaaraa arepurepu atâta no te ora, mai te anorexie mentale.

E ere te Bibilia i te hoê buka rapaauraa, te horoa ra râ oia i te manaˈo paari taa maitai no nia i te faufaaraa ia tamaa e ia inu ma te au noa. “E faaroo mai, e tau tamaiti, ia paari oe; e e aratai i to aau i te aratia. Eiaha oe e amui atoa i te feia i taero i te uaina ra; i roto i te feia oehamu tiaâ ra; o te taero ava hoi e te oehamu tiaâ ra, e veve ïa.” (Maseli 23:19-21) Te parau ra râ te Bibilia e ia riro te tamaaraa e te inuraa ei mea au maitai. “Ua amu anaˈe te taata i te maa e ua inu i te pape, e ua rave oia i te maitai no ta ˈna ra ohipa, e mea ho-mai-hia mai ïa e te Atua.”—Koheleta 3:13.

Te faaitoito atoa ra te Bibilia i te hoê huru faito noa i mua i te faaetaetaraa tino, ma te parau e ‘e faufaa iti haihai to te haamataro i ta te tino.’ Ma te na ô atoa râ: “Area te paieti ra, e faufaa ïa to te reira i te mau mea atoa nei, e maitai tei faaitehia mai no te reira i teie nei ao e te ao a muri atu.” (Timoteo 1, 4:8) E ui paha outou e, ‘Nafea e faufaahia ˈi i te paieti i teie nei?’ Mea rahi te mau ravea. Hau atu i te horoa i te hoê tuhaa pae varua faufaa roa i to tatou oraraa, e faahotu te paieti i te mau huru maitatai mai te aroha, te oaoa, te hau, e te hitahita ore—e faatupu teie mau mea atoa i te manaˈo e te ea maitai.—Galatia 5:22, 23.

Mau faahopearaa mauiui o te taatiraa tia ore

I teie mahana, aita to te mau mirioni taata e hitahita ore faahou i te pae morare. O te maˈi pee SIDA te hoê o te mau faahopearaa. Ia au i te OMS, ua hau atu i te 16 mirioni tei pohe mai te haamataraa mai o te maˈi pee SIDA, e i teie mahana, fatata e 34 mirioni e VIH, te tirotiro o te faatupu i te SIDA, to ratou. Ua peehia e rave rahi i te SIDA no te ohipa taiata, te mau patia viivii i faaohipahia e te feia e rave ra i te raau taero, aore ra te mau pâmuraa toto viivii.

O te herpès, te blennorragie, te hépatite B e C,  e te syphilis te tahi atu â mau faahopearaa o te mau peu morare ore. Noa ˈtu e aita teie mau taˈo o te ihi maˈi i faaohipahia i te tau bibilia, ua ite te taata eaha te mau melo i ino i te tahi mau maˈi purumu matauhia i taua tau ra. Ei hiˈoraa, te faataa ra te Maseli 7:23 i te faahopearaa riaria o te poreneia mai ‘te putaraa te paraia i te hoto.’ E pinepine, e tuino te syphilis e te hépatite i te paraia aore ra te upaa. Oia, e aˈoraa tano maitai e te î i te here to roto i te Bibilia e ‘haapae i te toto e te poreneia’!—Ohipa 15:28, 29, MN.

Te marei o te nounou moni

Ia moni-oioi-hia ratou, e faaû te taata e rave rahi i te mau ati rahi e ta ratou moni. Te mea peapea, e pinepine e pau te moni i te faaûraa i te reira. Te na ô ra râ te Bibilia i te tavini a te Atua e: ‘A rave to ˈna iho rima i te mea maitai, ia faufaahia ta ˈna ia horoa na tei ere ra.’ (Ephesia 4:28) Parau mau, eita tei rave puai i te ohipa e riro noa ei taata moni. Tera râ, e hau to ˈna feruriraa, e faatura oia ia ˈna, e peneiaˈe e moni ta ˈna e pûpû atu no te hoê ohipa maitai.

Te faaara ra te Bibilia e: ‘Area te feia e mârô e ia rahi te taoˈa, e roohia ïa i te ati, e te marei, e te nounou maamaa e rave rahi, e ino ai te taata ra, e topa taue ai te taata i roto i te ino rahi faarue roa ra, e te pohe mure ore. O te nounou moni hoi te tumu o te mau ino atoa nei, ua patiatia pupu roa te tahi pae ia ratou iho i te oto e rave rahi i te titau-noa-raa i te reira.’ (Timoteo 1, 6:9, 10) Eita e nehenehe e huna e mea rahi ‘o te mârô ra e ia rahi te taoˈa’ e monihia ra. Maoti râ teihea pau? E ere anei i te mea mau e te fifihia ra to ratou  ea, to ratou utuafare, to ratou huru pae varua, e to ratou taotoraa atoa?—Koheleta 5:12.

E taa i te hoê taata paari e ‘e ere tei te taoˈa na ˈna ra to ˈna ora.’ (Luka 12:15) Mea faufaa te moni e te tahi mau taoˈa i roto i te rahiraa o te mau totaiete. Inaha, te na ô ra te Bibilia e “e haapuraa tei te moni,” teie râ “te maitai o te paari ia noaa, na te reira e horoa mai i te ora i te feia fatu ra.” (Koheleta 7:12) E nehenehe te ite e te paari mau e tauturu ia tatou i roto i te mau huru tupuraa atoa, i roto iho â râ i te mau tumu parau no nia i to tatou oraraa, eiaha râ te moni.—Maseli 4:5-9.

Ia paruru te paari anaˈe ia tatou

E fatata te paari mau i te ‘faaora i to ˈna mau fatu’ ma te hoê ravea aita i itehia aˈenei—te parururaa i roto i te “ati rahi” e piri roa maira ia haamou te Atua i te feia iino. (Mataio 24:21) I taua taime ra, e faarue te taata i ta ratou moni i roto i te mau aroâ mai “te mea viivii ra,” ia au i te Bibilia. No te aha? No te mea ua taa ia ratou na roto i te hoê tupuraa mauiui e eita te auro e te ario e faaora ia ratou i “te mahana e riri ai Iehova ra.” (Ezekiela 7:19) Area te “feia rahi roa” ra o tei haapao maitai i te ‘haapue i te taoˈa na ratou i nia i te raˈi’ na roto i te tuuraa i te mau faufaa pae varua i te parahiraa matamua i roto i to ratou oraraa, e faufaahia ïa i ta ratou haapueraa papu e e fanaˈo i te ora mure ore i nia i te hoê fenua paradaiso.—Apokalupo 7:9, 14; 21:3, 4; Mataio 6:19, 20.

Nafea tatou e fanaˈo ai i teie oraraa panoonoo ore no a muri aˈe? Ua pahono Iesu e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) E mau mirioni taata tei noaa ia ratou teie ite i roto i te Parau a te Atua, te Bibilia. Aita noa to ratou e tiaturiraa faahiahia no te oraraa a muri aˈe, te fanaˈo atoa ra râ ratou i te tahi faito hau e panoonoo ore i teie nei. Mai ta te papai salamo noa i parau: “E tiraha vau i raro ma te ora, e e taoto hoi; na oe anaˈe ra, e Iehova, i parahi ai au ma te ora.”—Salamo 4:8.

Ia manaˈo outou, te vai ra anei te tahi atu â tumu haamaramaramaraa o te nehenehe e tauturu i te faaiti mai i te mau ati i to outou ea e to outou ora mai ta te Bibilia e rave ra? Aita ˈtu e buka e mana to ˈna mai to te Bibilia, e aita ˈtu e buka o te nehenehe e tauturu ia outou ia ite i te panoonoo ore mau i roto i te hoê ao atâta i teie mahana. No te aha e ore ai e faahohonu atu â i te reira?

[Tumu parau tarenihia/Hohoˈa i te api 6]

Te ea e te panoonoo ore maitai aˈe—Maoti te Bibilia

No te haamoe i te mau tupuraa mau o te oraraa, e rave noa te hoê vahine apî o Jane * te iˈoa i te marijuana, te avaava, te cocaïne, te amphétamine, te LSD, e te tahi atu â mau raau taero. E inu hua atoa oia i te ava. No Jane, hoê â huru oraraa to raua ta ˈna tane. Ia hiˈohia, mea peapea to raua oraraa no a muri aˈe. I muri aˈe, ua farerei o Jane i te mau Ite no Iehova. Ua haamata oia i te haere i te mau putuputuraa Kerisetiano e i te taio i Te Pare Tiairaa e te vea apiti te A ara mai na!, ta ˈna i faaite atu i ta ˈna tane. Ua haamata ˈtura raua toopiti i te haapii i te Bibilia e te mau Ite. A taa ˈi ia raua te mau ture teitei a Iehova, ua haapae raua i te mau raau taero atoa. Te faahopearaa? “Ua hopoi mai to mâua oraraa apî i te oaoa rahi roa,” ta Jane ïa i papai tau matahiti i muri aˈe. “E mauruuru rahi to ˈu ia Iehova no te mana tamâ o ta ˈna Parau e no te oraraa tiamâ e te ruperupe ta mâua e nehenehe e ora i teie nei.”

Te faataa-maitai-hia ra te faufaaraa e riro ei rave ohipa haerea tia e te hiˈoraa o Kurt, o te haapao i te mau faanahoraa roro uira. Ua hinaarohia te hoê tauihaa apî, e ua faaue te paoti ohipa ia Kurt e haere e hoo mai ma te hoo tano noa. Ua itea mai ia Kurt te hoê taata tapihoo tano maitai, e ua faaauhia ˈtura te hoo. Ua hape râ te rave ohipa a taua taata tapihoo ra i te papairaa i te parau mâuˈaraa, fatata e 40 000 dala Marite iti aˈe i te hoo i faaauhia. I to ˈna iteraa i te hape, ua taniuniu o Kurt i te taiete, e ua parau te taata faatere e i roto i to ˈna toroa e 25 matahiti, aita oia i ite aˈenei i te hoê haerea tia mai teie te huru. Ua faataa o Kurt e te taraihia ra to ˈna manaˈo haava e te Bibilia. Te faahopearaa, ua ani te taata faatere e 300 vea o te A ara mai na! no nia i te haerea tia i roto i te tapihooraa no te horoa na to ˈna mau hoa rave ohipa. No Kurt, ua noaa ia ˈna te hoê parahiraa teitei aˈe maoti to ˈna haerea tia.

[Nota i raro i te api]

[Hohoˈa i te api 7]

“O vau to Atua ra, o Iehova; o tei faaite ia oe i te mea e maitai ai oe ra.”—ISAIA 48:17