‘Te ora no to oe ra pito’

TE TIATURIHIA ra e na te mau horuhoruraa, mai te mǎtaˈu, te oto, te feii, te inoino, te riri, e te manaˈo faahapa e faatupu e rave rahi roa mau maˈi o te huitaata. No reira, mea tamahanahana mau â te parau a te Bibilia e te ‘mǎtaˈu ia Iehova,’ o “te ora ïa no to oe ra [pito], o te haamǎrû ïa no to oe ra mau ivi”!—Maseli 3:7, 8; MN.

Na te mau ivi e paturu ra i te tino. No reira, te faaohipa ra te Bibilia i te taˈo “ivi” ei faahohoˈaraa i te taata iho—o te faaruru ra iho â râ i te mau manaˈo hohonu o te aau. Nafea râ te mǎtaˈu ia Iehova e riro ai ei ‘ora no to oe ra pito’?

Ua rau te manaˈo o te mau aivanaa bibilia no nia i te taˈo ra “pito” i roto i teie irava. Te na ô ra te hoê taata tatara parau e no te mea “tei ropu [oia] i te tino,” e faahohoˈa paha te “pito” i te taatoaraa o te mau melo faufaa roa. Te na ô ra te tahi atu aivanaa e te auraa paha o te taˈo “pito,” o te taura pito ïa, ia au i te Ezekiela 16:4. Mai te peu e te reira iho â, te haamataratara ra paha te Maseli 3:8 e e hinaaro hope tatou i te Atua—mai te hoê feto ravea ore e hinaaro hope roa i to ˈna mama no te tamaa. Te tahi atu râ manaˈo, oia hoi te faataa ra paha te “pito” i te mau uaua iˈo e te mau tuatiraa uaua o te tino. Ia au i te mau irava tapiri, peneiaˈe mea taa ê roa teie mau tuhaa i te “mau ivi”—te mau vaehaa paari aˈe o te tino.

Noa ˈtu eaha te auraa taa maitai, teie te mea papu: E haerea paari te faaiteraa i te mǎtaˈu tura ia Iehova. E nehenehe te faaohiparaa i te mau ture a te Atua e faatupu i te ea maitai o to tatou tino i teie nei. Hau roa ˈtu â, e hopoi mai te reira i te farii maitai a Iehova, o te aratai i te ora mure ore ma te ea tia roa—o te tino e o te aau—i roto i ta ˈna ao apî e tae maira.—Isaia 33:24; Apokalupo 21:4; 22:2.

[Faaiteraa i te fatu o te hohoˈa i te api 32]

Dr. G. Moscoso/SPL/Photo Researchers