Ua pee maite anei outou i te parau mau?

‘Ia taui outou na roto i te faaapîraa i to outou maramarama, ia nehenehe outou iho e tamata eaha mau na te hinaaro o te Atua, te maitai, te au e te tia roa.’—ROMA 12:2, MN.

1, 2. No te aha e ere i te mea ohie ia riro ei Kerisetiano mau i teie mahana?

 E ERE i te mea ohie ia riro ei Kerisetiano mau i teie mau mahana hopea nei, teie anotau “ati rahi faaruru atâ.” (Timoteo 2, 3:1, MN) Oia mau, ei peeraa i te hiˈoraa o te Mesia, e tia ia vî teie nei ao ia tatou. (Ioane 1, 5:4) A haamanaˈo na eaha ta Iesu i parau no nia i te eˈa Kerisetiano: “E tomo na te uputa pirihao; te atea nei hoi te uputa e te aano nei te eˈa e tae atu ai i te pohe; e e rave rahi tei na reira i te tomo. Te apǐapǐ râ o te uputa e te piri hoi o te eˈa e tae atu ai i te ora, e te iti hoi o te feia i ite atu i te reira!” Ua parau atoa oia e: “Ia hinaaro te taata i te pee mai ia ˈu ra, e faarue oia ia ˈna iho, a rave ai i tana [pou haamauiuiraa] i te mau mahana atoa, a pee mai ai ia ˈu.”—Mataio 7:13, 14; Luka 9:23; MN.

² Ua itea anaˈe ia ˈna te eˈa piri o te ora, to muri mai tautooraa a te hoê Kerisetiano, te faaearaa ïa i nia iho. No te aha te reira e riro ai ei tautooraa? No te mea ïa e e riro tatou, no to tatou pûpûraa e bapetizoraa, ei fa o te mau ravea haavare a Satani, aore ra mau opuaraa patatoa. (Ephesia 6:11) E haapao maitai oia i to tatou mau paruparu e e imi oia i te faaohipa ˈtu i roto i ta ˈna tutavaraa e tuino i to tatou ea pae varua. Ua tamata hoi oia i te nenei ia Iesu, e vaiiho noa anei ïa oia ia tatou?—Mataio 4:1-11.

Te mau ravea haavare a Satani

3. Nafea to Satani oomoraa i te mau feaaraa i roto i te feruriraa o Eva?

³ Te hoê ravea ta Satani e faaohipa, o te oomoraa ïa i te mau feaaraa i roto i to tatou feruriraa. E imi oia i te mau vahi paruparu o to tatou haana tamaˈi pae varua. I te omuaraa roa, ua faaohipa oia i taua ravea ra i nia ia Eva, a ui ai e: “Oia ïa, ua parau mai te Atua e, Eiaha orua e amu i to te mau raau atoa o te ô nei?” (Genese 3:1) Te na ô ra ïa o Satani e: ‘E riro mau anei e ua tuu mai te Atua i te hoê opaniraa mai teie i nia ia orua? E tapea noa anei oia i te hoê mea maitai roa no orua? Eaha ïa, ua ite hoi te Atua e i te mahana mau e amu ai orua i to te raau, e araara mai to orua mata e e riro orua mai te Atua ra te huru, i te ite i te maitai e te ino!’ Ua ueue ïa Satani i te huero o te feaaraa e ua tiai oia e ia tupu.—Genese 3:5.

4. E nehenehe tatou e roohia e teihea mau feaaraa i teie mahana?

⁴ Nafea Satani e faaohipa ˈi i teie ravea i teie mahana? Ia faarue tatou i ta tatou taioraa bibilia, ta tatou iho haapiiraa, ta tatou mau pure, e ta tatou taviniraa e mau putuputuraa Kerisetiano, e nehenehe tatou e roohia e te mau feaaraa e faahitihia e vetahi ê. Ei hiˈoraa: “Nafea tatou e ite ai e o te parau mau teie i haapiihia e Iesu?” “O te mau mahana hopea mau anei teie? Inaha hoi, tei te senekele 21 aˈena tatou.” “Tei te uputa anei tatou o Aramagedo, aore ra mea atea â?” Ia hiti noa mai teie mau feaaraa, eaha ta tatou e nehenehe e rave no te faaore atu?

5, 6. Eaha te tia ia tatou ia rave ia fa noa mai te feaaraa?

⁵ Ua horoa o Iakobo i te aˈoraa e au ia faaohipahia i to ˈna papairaa e: “Te ere ra râ te hoê o outou i te [paari, e tamau oia i te ani] i te Atua ra, o tei horoa hua mai . . . i te taata atoa ra, ma te patoi ore; e e horoahia mai ta ˈna. E [tamau râ oia i te ani] ma te faaroo, eiaha e feaa, o tei feaa ra, e au ïa i te aru miti i patuhia e te mataˈi e fetoitoi aˈera. Eiaha hoi te reira taata e manaˈo e, e faufaa ta ˈna e noaa [ia Iehova] ra: e taata aau  piti ïa, e te papu ore i to ˈna atoa ra mau haerea.”—Iakobo 1:5-8; MN.

⁶ Eaha ïa te tia ia tatou ia rave? Ia “tamau” ïa tatou “i te ani” i te faaroo e te maramarama “i te Atua” i roto i te pure e ia haapuai i ta tatou mau tutavaraa i roto i ta tatou iho haapiiraa no nia i te mau ui-maere-raa aore ra te mau feaaraa atoa. E nehenehe atoa tatou e ani i te tauturu a te feia faaroo puai, ma te ore roa ˈtu e feaa e e horoa mai Iehova i te turu ta tatou e hinaaro ra. Ua parau atoa o Iakobo e: “E tena na, e auraro atu outou i te Atua. E patoi atu i te Diabolo, e na ˈna e maue ê atu. E haafatata ˈtu i te Atua, e na ˈna e haafatata mai ia outou na.” Oia, e pee to tatou mau feaaraa a haafatata ˈtu ai tatou i te Atua na roto i te haapiiraa e te pure.—Iakobo 4:7, 8.

7, 8. Eaha te tahi mau titauraa tumu no te faataa i te huru haamoriraa i haapiihia e Iesu, e o vai te haapao ra i teie mau titauraa?

⁷ A rave na, ei hiˈoraa, i te uiraa: Nafea tatou e ite ai e te haapao ra tatou i te huru haamoriraa ta Iesu i haapii? No te pahono i te reira, eaha te mau titauraa e tia ia hiˈopoahia? Te faaite ra te Bibilia e ei aroha mau to te mau Kerisetiano mau te tahi i te tahi, e tia ˈi. (Ioane 13:34, 35) E tia ia ratou ia faaraa i te iˈoa o te Atua, o Iehova. (Isaia 12:4, 5; Mataio 6:9) E e tia ia ratou ia faaite i taua iˈoa ra.—Exodo 3:15; Ioane 17:26.

⁸ Te tahi atu tapao o te faataa i te haamoriraa mau, o te faaturaraa ïa i te Parau a te Atua, te Bibilia. O te buka otahi tera o te faaite i te huru o te Atua e ta ˈna mau opuaraa. (Ioane 17:17; Timoteo 2, 3:16, 17) Hau atu â, e poro te mau Kerisetiano mau i te Basileia o te Atua ei tiaturiraa hoê roa e ora ˈi te taata e a muri noa ˈtu i nia i te fenua paradaiso. (Mareko 13:10; Apokalupo 21:1-4) E faataa ê mai ratou ia ratou iho i te mau ohipa politita haapiˈo a teie nei ao e to ratou huru oraraa viivii. (Ioane 15:19; Iakobo 1:27; 4:4) O vai i teie mahana tei haapao mau i teie mau titauraa? Te haapapu ra te mau tupuraa e hoê noa pahonoraa e vai ra—te mau Ite no Iehova.

Eaha ïa mai te peu e e vai noa mai te mau feaaraa

9, 10. Eaha ta tatou e nehenehe e rave no te faaruru i te mau feaaraa e vai noa mai?

⁹ Eaha ïa mai te peu e ua î roa tatou i te feaaraa? E nafea ïa tatou? Te horoa maira te arii paari ra o Solomona i te pahonoraa: “E tau tamaiti, ia farii mai oe i ta ˈu nei parau, e ia vaiiho maite i ta ˈu parau i pihai iho ia oe; ia fariu mai i to tariˈa i te paari; e ia imi to aau i te ite ra; ia titau hua oe i te haapao maitai, e ia faateitei i to reo ia noaa te ite ra; ia imi hua oe ia ˈna mai te ario ra, e ia paheru hua oe ia ˈna, mai te taoˈa hunahia ra; e ite ïa oe i te mǎtaˈu ia Iehova, e noaa ïa ia oe te ite i te Atua.”—Maseli 2:1-5.

¹⁰ E ere anei teie manaˈo i te mea maere? Mai  te peu e te hinaaro mau ra tatou e haapao maitai i te paari o te Atua, e “noaa” ia tatou “te ite i te Atua.” Oia, e noaa ia tatou te ite i te Arii e Fatu o te ao taatoa ia hinaaro mau tatou e farii e e poihere i ta ˈna mau parau. E titau te reira ia fariu atu i nia ia Iehova na roto i te pure e te haapiiraa ia tatou iho. E nehenehe te mau taoˈa huna o ta ˈna Parau e faaore i te mau feaaraa atoa e e tauturu mai ia tatou ia ite i te maramarama o te parau mau.

11. Nafea te tavini a Elisaia i te rooraahia i te feaaraa?

¹¹ Te vai ra te hoê hiˈoraa papu maitai nafea te pure i tauturu ai i te hoê tavini a te Atua e mǎtaˈu ra e e feaa ra i roto i Te mau arii 2, 6:11-18. Te ere ra te tavini a Elisaia i te haroaroa pae varua. Aita oia e ite ra e te vai noa mai ra te mau nuu o te raˈi no te tauturu i te peropheta a te Atua e haaatihia ra e te nuu Arama. No to ˈna mǎtaˈu, ua tuô aˈera te tavini e: “Auê, e tau fatu e! eaha tatou nei?” Nafea to Elisaia pahonoraa? “Eiaha e mǎtaˈu, e rahi to tatou e iti to ratou.” Nafea râ te manaˈo o te tavini e haapapuhia ˈi? Aita hoi oia e ite ra i te mau nuu o te raˈi.

12. (a) Nafea te mau feaaraa o te tavini i te faaoreraahia? (b) Nafea tatou e nehenehe ai e faaore i te mau feaaraa atoa ta tatou e farerei?

¹² “Ua pure atura Elisaia, na ô atura, E Iehova e, teie ta ˈu parau ia oe, e faaaraara oe i to ˈna mata ia ite oia. Ua faaaraara aˈera Iehova i te mata o taua taata apî ra; ite atura oia; e inaha, ua î te mouˈa i te puaahorofenua, e te pereoo auahi, i te haaatiraa ia Elisaia ra.” I roto i taua tupuraa ra, ua rave Iehova e ia ite te tavini i te mau nuu o te raˈi e paruru ra ia Elisaia. Eiaha râ tatou e manaˈo e e tauturuhia tatou e te Atua mai teie i teie mahana. A haamanaˈo, aita ta teie tavini a te peropheta e Bibilia taatoa no te haapii ia puai mai to ˈna faaroo. E Bibilia ta tatou. Ia faaohipa maitai tatou i te reira, e na reira atoa to tatou faaroo i te haapuaihia. Ei hiˈoraa, e feruriruri paha tatou i nau faataaraa ia Iehova i roto i ta ˈna tiripuna i te raˈi. Ia au i te reira, aita e feaaraa e e faanahonahoraa mau â ta Iehova i te raˈi e paturu ra i ta ˈna mau tavini i roto i te ohipa haapiiraa na te ao atoa nei i teie mahana.—Isaia 6:1-4; Ezekiela 1:4-28; Daniela 7:9, 10; Apokalupo 4:1-11; 14:6, 7.

A ara i te mau opuaraa a Satani!

13. Na roto i teihea mau ravea e tamata ˈi Satani i te haaparuparu i to tatou mau-maite-raa i te parau mau?

¹³ Eaha te tahi mau ravea ê atu a Satani no te haaparuparu i to tatou ea pae varua e to tatou mau-maite-raa i te parau mau? Hoê o te reira, o te huru morare ore ïa, ma te rau atoa o to te reira tupuraa. I roto i te ao no teie tau maamaahia i te peu taatiraa, e tupuraa no te mau mahana atoa  te mea e parauhia ra te hoê liaison, (te hoê parau mǎrû aˈe no taiataraa) aore ra te hoê po taotoraa (taiataraa ma te haapeapea ore) no te hoê ui nounou navenave e hinaaro mau ra e arearea aita e hiˈoraa i te haamâuˈaraa. Te faaitoito nei te mau hohoˈa teata, te afata teata, e te mau hohoˈa video i teie huru oraraa. Ua î roa te mau vea, te Internet iho â râ i te hohoˈa faufau. Te tiai mai ra te faahemaraa i te feia e hinaaro ra e ite atu.—Tesalonia 1, 4:3-5; Iakobo 1:13-15.

14. No te aha te tahi mau Kerisetiano i topa ˈi i te mau opuaraa a Satani?

¹⁴ Ua roohia te tahi mau Kerisetiano i te hinaaro e ite e ua haaviivii ratou i to ratou feruriraa e to ratou aau i te mataitairaa i te mau hohoˈa huru faufau e tae noa ˈtu i te mau hohoˈa faufau roa ino. Ua vaiiho ratou ia ratou iho ia topa ˈtu i roto i te marei au maitai a Satani. Ua aratai pinepine te reira i te iriraa pae varua. Aita teie mau taata i vai ‘aruaru noa i te ino ra.’ Aita ratou i riro ei ‘taata paari i te ite ra.’ (Korinetia 1, 14:20) I te mau matahiti atoa, e amo te mau tausani taata i te utua o te oreraa e auraro i te mau faaueraa tumu e te mau ture o te Parau a te Atua. Aita ratou i haapao maitai i te ahuraa e te tamau-maitai-raa i to ratou “haana tamaˈi atoa a te Atua ra.”—Ephesia 6:10-13; Kolosa 3:5-10; Timoteo 1, 1:18, 19.

A poihere i te mea e vai ra ia tatou ra

15. No te aha e mea fifi na te tahi pae ia mauruuru i ta ratou tufaa pae varua?

¹⁵ “E ite ïa outou i te parau mau, e na te parau mau outou e faatiamâ,” o ta Iesu ïa i parau. (Ioane 8:32) Ua titauhia te rahiraa o te mau Ite e haapae i to ratou huru oraraa tahito e te mau taairaa i te pae haapaoraa. No reira, e ineine aˈe paha ratou i te mauruuru i te tiamâraa ta te parau mau e hopoi mai. Area râ, mea fifi paha na te tahi feia apî i arataihia e te mau metua tei roto i te parau mau ia mauruuru i ta ratou tufaa pae varua. Aita ratou i riro aˈenei ei melo o te haapaoraa hape aore ra ei feia no teie nei ao e ta ˈna onoonoraa e imi i te navenave, ta ˈna rave-hua-raa i te raau taero, e to ˈna morare ore. Ei faahopearaa, aita ratou e ite ra i te taa-ê-raa rahi i rotopu i ta tatou paradaiso pae varua e te ao viivii a Satani. Peneiaˈe e hema ˈtu te tahi pae i te hinaaro e tamata i te mea taero a te ao no te fafa roa ˈtu eaha ta ratou i ere!—Ioane 1, 2:15-17; Apokalupo 18:1-5.

16. (a) Eaha te mau uiraa e tia ia tatou ia uiui ia tatou iho? (b) Eaha te haapiihia e te faaitoitohia ra ia tatou ia rave?

¹⁶ Mea faufaa mau anei ia haapaapaa tatou i to tatou mau manimani rima no te ite eaha te mauiui? Eita anei ta tatou e nehenehe e haapii mai na roto i tei roohia i nia ia vetahi ê? Mea faufaa anei ia fariu atu tatou i nia i “te vari” o teie nei ao no te ite e ua ere anei tatou i te hoê mea? (Petero 2, 2:20-22) Ua haamanaˈo Petero i te mau Kerisetiano no te senekele matamua tei riro na ei melo o te ao a Satani e: “To tatou hoi maa taime i mairi aˈe i to tatou oraraa nei, atire ïa i te raveraa i to te Etene hinaaro, a rave ai i te peu tiaâ ra, e te hinaaro tia ore ra, e te inu rahi i te uaina ra, e te amuiraa hauti ra, e te faataero i te ava ra, e te mau peu atâta a te idolo ra.” Papu maitai e aita e faufaa ia tamata tatou i te “peu  faufau” a te ao no te ite mai te aha te hairiiri e raeahia e te oraraa. (Petero 1, 4:3, 4, MN) Area râ, te haapiihia ra tatou i te mau faito morare teitei a Iehova i ta tatou mau Piha a te Basileia o te riro ei mau fare haapiiraa bibilia. E te faaitoitohia ra tatou ia faaohipa i to tatou puai feruriraa no te haapapu ia tatou iho e tei roto tatou i te parau mau e te pee maite ra tatou i te parau mau.—Iosua 1:8; Roma 12:1, 2; Timoteo 2, 3:14-17.

E ere to tatou iˈoa i te hoê noa titeti

17. Nafea tatou e riro ai ei Ite aravihi no Iehova?

¹⁷ Mai te peu e e pee maite tatou i te parau mau, e imi tatou i te ravea e opere ai i te reira ia vetahi ê i te mau taime atoa e tano. E ere ïa te auraa e e tamata tatou i te faahepo i te feia aita e anaanatae ra. (Mataio 7:6) Eiaha râ tatou ia haama haere noa i te faaite e e Ite no Iehova tatou. Ia faaite noa mai te hoê taata i te hoê anaanatae iti haihai na roto i te faahitiraa i te hoê uiraa haavare ore aore ra i te fariiraa i te hoê papai bibilia, e ineine noa tatou i te faataa ˈtu i to tatou tiaturiraa. Papu iho â ïa e ia vai noa ta tatou te tahi mau papai i nia ia tatou noa ˈtu teihea tatou—i te fare anei, i te ohipa, i te haapiiraa, i te fare toa, aore ra i te mau vahi faaanaanataeraa.—Petero 1, 3:15.

18. Nafea te faaite-maitai-raa e e Kerisetiano tatou e riro ai ei mea maitai roa i roto i to tatou oraraa?

¹⁸ Ia faaite maitai tatou e e Kerisetiano tatou, e haapuai tatou i to tatou parururaa i mua i te mau aroraa huna a Satani. Ia tupu te hoê oroa mahana fanauraa aore ra Noela aore ra te hoê taviriraa i te piha ohipa, e pinepine te mau hoa ohipa i te parau e, “A vaiiho atu ia ˈna. E Ite no Iehova oia.” No taua noâ tumu ra, eita te taata e faatia haere noa i te mau parau hauti faufau i mua ia tatou. No reira, ia faaite tatou i to tatou tiaraa Kerisetiano, mea maitai roa ïa i roto i to tatou oraraa, mai ta te aposetolo Petero atoa i faataa: “E na vai outou e hamani ino mai, ia pee outou i te mea maitai? E ia pohe â outou i te parau-tia ra, e ao â to outou.”—Petero 1, 3:13, 14.

19. Nafea tatou e ite ai e tei te mau mahana hopea roa tatou?

¹⁹ Te tahi atu â vahi maitai ia pee maite tatou i te parau mau, e papu roa ïa ia tatou e o te mau mahana hopea teie o te faanahoraa o te mau mea nei. E ite tatou e mea rahi te mau parau tohu bibilia teie e taea nei i to ratou taime faahiahia roa ˈˈe i to tatou nei tau. * Te haapapu-maite-hia ra te faaararaa a Paulo e “ia tae i te mau mahana hopea, e tupu mai te mau ati rahi faaruru atâ,” na roto i te mau tupuraa mehameha o te senekele i mairi aˈenei. (Timoteo 2, 3:1-5, MN; Mareko 13:3-37) Teie te upoo parau o te hoê tumu parau no nia i te senekele 20 i roto i te hoê vea huru apî, “E haamanaˈohia te reira mai te tau o te ohipa taehae.” Te na ô ra te tumu parau e: “Ua riro te matahiti 1999 ei matahiti taparahi taata roa ˈˈe o te afa hopea o te senekele taparahi taata roa ˈˈe.”

20. E taime teie no teihea ohipa?

²⁰ E ere teie i te taime no te feaa. Te ite-maite-hia ra te haamaitairaa a Iehova i nia i te ohipa haapiiraa bibilia rahi roa ˈˈe i ravehia aˈenei na te ao atoa ei faaiteraa i te mau nunaa. (Mataio 24:14) A pee maite i te parau mau e a opere i te reira ia vetahi ê. Tei ta outou e rave nei i teie nei to outou ora mure ore no a muri aˈe. Ia toaruaru outou, eita e au i te haamaitairaa a Iehova. (Luka 9:62) O te taime râ teie ia “itoito outou, eiaha e aueue, ia rahi â te rave i te ohipa a te Fatu eiaha e faaea, ua ite hoi outou e, e ere i te mea faufaa ore te ohipa a te Fatu ta outou e rave na.”—Korinetia 1, 15:58.

[Nota i raro i te api]

Te haamanaˈo ra anei outou?

• Nafea tatou e faaore ai i te mau feaaraa?

• Eaha ta tatou e haapii mai na roto i te hiˈoraa o te tavini a Elisaia?

• E tia ia tatou ia ara tamau i teihea mau faahemaraa morare?

• No te aha e tia ˈi ia faaite maitai tatou e e Ite no Iehova tatou?

[Uiraa haapiiraa]

[Hohoˈa i te api 10]

E nehenehe te haapiiraa bibilia e te pure tamau e tauturu ia tatou ia faaore i te mau feaaraa

[Hohoˈa i te api 11]

Ua faaorehia te mau feaaraa o te tavini a Elisaia na roto i te hoê orama

[Hohoˈa i te api 12]

E haapiihia tatou i te mau faito morare teitei a Iehova i te mau Piha a te Basileia mai teie noa i Bénin