Eaha te parau mau no nia i te mau otaro o te Miti Avaava?

Hau atu i te 50 matahiti aˈenei, ua aratai te hoê ofai i taorahia e te hoê tiai mamoe Bédouin i roto i te hoê ana i te mea ta vetahi pae i parau te itearaa ihipǎpǎ rahi roa ˈˈe o te senekele 20. Ua faaroo te Bédouin i te parariraa te hoê farii repo i te ofai. I to ˈna imiraa, ua itea mai ia ˈna te taoˈa matamua o tei parauhia te mau otaro o te Miti Avaava.

UA HUTI mai teie mau otaro i te ara-maite-raa e ua faatupu i te mârôraa i roto i te mau aivanaa e te mau huru vea atoa. I rotopu i te taata, ua rahi te taa-ore-raa e te parau hape. No te mǎtaˈu e e faaite mai te mau otaro i te tahi mau mea o te haaparuparu i te faaroo o te mau Kerisetiano e o te mau ati Iuda atoa i parauhia ˈi e e hunaraa parau rahi tei ravehia. Eaha râ te auraa mau o teie mau otaro? I muri aˈe e 50 e e tiahapa matahiti, e nehenehe anei tatou e ite i te mau tupuraa?

Eaha te mau otaro o te Miti Avaava?

E mau parau papai ati Iuda no tahito ra te mau otaro o te Miti Avaava, mea na roto i te reo Hebera te rahiraa, te reo Aramea te tahi, e te reo Heleni te toea. Ua hau atu i te 2 000 matahiti to te rahiraa o teie mau otaro e mau tâpû parau, no mua ˈˈe ïa i te fanauraa o Iesu. I roto i te mau otaro matamua tei noaa mai i te mau Bédouins, te vai ra e hitu parau papai roroa ua rau te huru ino. A paheruhia ˈi te tahi atu â mau ana, ua itehia mai te tahi atu â mau otaro e tau tausani tâpû otaro. I roto i te mau matahiti 1947 e 1956, 11 ana e otaro to roto tei itehia i pihai aˈe ia Qoumrân, i te hiti Miti Avaava.

I te faanahoraahia te mau otaro e te mau tâpû parau atoa, fatata e 800 parau papai tei noaa mai. Fatata  e 25 %, aore ra hau rii noa i te 200 parau papai, e mau hohoˈa ïa o te papai bibilia Hebera. E mau papai ati Iuda e ere i to te Bibilia no tahito ra te tahi atu â mau parau papai, te mau apokiripha e te mau pseudépigraphes. *

Te tahi mau otaro tei faatupu roa ˈˈe i te anaanatae o te mau aivanaa, e mau papai ïa aita i matauhia na mua ˈˈe. Te vai ra te mau tatararaa no nia i te ture ati Iuda, te tahi mau ture taa maitai no te nunaa o te pǔpǔ iti faaroo e noho ra i Qoumrân, te mau pehepehe e te mau pure o te rituria, tae noa ˈtu te tahi mau buka no nia i te hopea o te taata e o te ao o te horoa mai i te tahi mau manaˈo no nia i te tupuraa o te parau tohu bibilia e te mau mahana hopea. Te vai atoa ra te tahi mau tatararaa bibilia taa ê, e mau hohoˈa tahito roa ˈˈe teie o te mau parau faataa o tera e tera irava no teie tau o te mau papai bibilia.

Na vai i papai i te mau otaro o te Miti Avaava?

Ia au i te mau ravea rau no te tataio mahana i te mau parau mana no tahito ra, ua papai-faahou-hia aore ra ua papaihia te mau otaro i rotopu i te senekele toru H.T.T. e te senekele matamua T.T. Ua parau te tahi mau aivanaa e ua hunahia te mau otaro i roto i te mau ana e te mau ati Iuda no Ierusalema hou te haamouraa o te hiero i te matahiti 70 T.T. Ua itea mai râ i te rahiraa o te mau aivanaa e maimi ra i te mau otaro e aita teie manaˈo e tuati ra i te mau mea i papaihia i roto i te mau otaro. Mea rahi te mau otaro e faaite ra i te mau manaˈo e te mau peu matau taa ê roa i to te mau aratai haapaoraa i Ierusalema. Ia au i teie mau otaro, i manaˈo na te hoê nunaa e ua faarue te Atua i te mau tahuˈa e te taviniraa i roto i te hiero i Ierusalema e ua faariro oia i ta ratou haamoriraa ei pǔpǔ iti faaroo i roto i te medebara mai te hoê huru mono taviniraa i te hiero. E au ra e aita te mau aratai o te hiero no Ierusalema i huna i te hoê haaputuraa to roto atoa taua mau otaro ra.

Noa ˈtu e te vai ra paha te hoê pǔpǔ papai parau i Qoumrân, peneiaˈe ua haaputuhia e rave rahi o te mau otaro i te tahi atu vahi e ua hopoihia i reira e te feia faaroo. I roto i te hoê auraa, e haaputuraa papai rahi te mau otaro o te Miti Avaava. Mai te mau vairaa buka atoa, ua rau te mau manaˈo i roto i te haaputuraa, aita râ te reira e faaite ra i te mau manaˈo faaroo o te feia taio. Mea papu râ e te hohora ra taua mau papai ra, mea rahi hoi te mau hohoˈa e vai ra, i te mau faufaa e te mau tiaturiraa taa ê o te pǔpǔ.

E Esséniens anei te feia e noho ra i Qoumrân?

Mai te peu e ua haaputuhia teie mau otaro i Qoumrân, o vai ma ïa te feia e noho ra i reira? O te orometua haapii ra o Eleazar Sukenik, tei noaa mai e toru otaro no te Hebrew University i Ierusalema i te matahiti 1947, te taata matamua i parau e na te hoê pǔpǔ Esséniens teie mau otaro.

E pǔpǔ iti faaroo ati Iuda te mau Esséniens, tei faaitehia e na taata papai no te senekele matamua ra o Josèphe, o Philon no Alesanederia, e o Pline te Matahiapo. Nohea mai te mau Esséniens, mea hamani-noa-hia ïa te manaˈo, e au ra râ e ua fa mai ratou i te tau arepurepu i muri iho i te orure hau a te mau Maccabées i te senekele piti H.T.T. * Ua faatia o Josèphe i to ratou oraraa i taua area tau ra i to ˈna faahohonu-maitai-raa nafea to ratou manaˈo faaroo i taa ê ai i to te mau Pharisea e te mau Sadukea. Ua faaite o Pline i te vahi nohoraa o te hoê pǔpǔ Esséniens i te hiti Miti Avaava i rotopu ia Ieriko e ia Ene-gedi.

Te parau ra te orometua haapii ra o James VanderKam, te hoê aivanaa no te mau otaro o te Miti Avaava, e “e tuhaa iti noa te mau Esséniens e noho ra i Qoumrân no te pǔpǔ Essénien rahi aˈe,” ua manaˈo o Josèphe e ua fatata ratou i te maha tausani. Noa ˈtu e aita e tano roa ra e te mau faataaraa atoa, e au ra e e tano aˈe te faataaraa a te mau papai no Qoumrân i te mau Esséniens i te tahi atu pǔpǔ ati Iuda matauhia no taua area tau ra.

Ua parau te tahi pae e ua haamata te Kerisetianoraa  i Qoumrân. Teie râ, mea rahi te mau taa-ê-raa faahiahia e nehenehe e tapaohia i rotopu i te mau manaˈo faaroo o te pǔpǔ iti faaroo no Qoumrân e to te mau Kerisetiano matamua. Te faaite ra te mau papai no Qoumrân i te tahi mau faatureraa etaeta roa no nia i te Sabati e te hoê tapitapi hua no te viivii-ore-raa i te pae o te oroa. (Mataio 15:1-20; Luka 6:1-11) E nehenehe atoa e na reira i te parau no nia i te faataa-ê-raa mai te mau Esséniens i te totaiete, ta ratou tiaturiraa i te oraraa faataahia e te nephe pohe ore, e ta ratou haafaufaaraa i te faaea-taa-noa-raa e te mau manaˈo miterio i te apitiraa ˈtu i te mau melahi i roto i ta ratou haamoriraa. Te faaite ra te reira e aita ratou e farii ra i te mau haapiiraa a Iesu e ta te mau Kerisetiano matamua.—Mataio 5:14-16; Ioane 11:23, 24; Kolosa 2:18; Timoteo 1, 4:1-3.

Aita e hunaraa parau, aita e otaro hunahia

I te mau matahiti i muri mai i te itearaa i te mau otaro o te Miti Avaava, e rave rau papai tei matara mai i nehenehe ai te mau aivanaa o te ao nei e fanaˈo i te mau mea matamua i itehia mai. Mea fifi roa ˈtu â râ no te mau tausani tâpû parau no roto mai i te hoê o te mau ana, tei parauhia te Ana 4. Tei roto te reira i te rima o te hoê pǔpǔ iti aivanaa no te mau fenua rau i Ierusalema Hitia o te râ (te hoê tuhaa o Ioridana i taua tau ra) i te Archaeological Museum no Paretetina. Aita e aivanaa ati Iuda aore ra Iseraela i roto i teie pǔpǔ.

Ua haamau te pǔpǔ i te hoê ture o te opani i te faaohiparaa i te mau otaro hou ratou a nenei ai i te mau faahopearaa haamanahia o ta ratou maimiraa. Mea taotiahia te numera o te mau aivanaa i roto i te pǔpǔ. Ia pohe te hoê melo o te pǔpǔ, hoê noa aivanaa apî te mono ia ˈna. No te rahi o te ohipa, mea hinaarohia te hoê pǔpǔ rahi aˈe, e i roto i te tahi mau tupuraa, te hoê ite rahi aˈe i na reo Hebera e Aramea tahito. Teie ta James VanderKam e parau ra: “Tau ahuru tausani tâpû parau, mea rahi roa ïa no na feia e vau, noa ˈtu te aravihi.”

I te tupuraa te Tamaˈi e ono mahana i te matahiti 1967, ua riro o Ierusalema Hitia o te râ e ta ˈna mau otaro i te faatereraa Iseraela, aita râ i tauihia te ture no te maimiraa i te otaro a te pǔpǔ. No te maoro o te neneiraa i te mau otaro o te Ana 4 e tau matahiti e tae atu tau ahuru matahiti, ua faaroohia te tahi mau aivanaa i te patoiraa. I te matahiti 1977, ua parau te orometua haapii o Geza Vermes no te Oxford University i te reira te turoriraa aivanaa numera hoê no te senekele 20. Ua haamata i te atutu te parau e te huna ra te Ekalesia Katolika ma te opua i te mau haamaramaramaraa o te mau otaro o te vavahi i te Kerisetianoraa.

I te mau matahiti 1980, ua maraa te numera o te pǔpǔ i te pae hopea i nia i te 20 aivanaa. I muri aˈe, i te matahiti 1990, i raro aˈe i te aratairaa a to ratou taata nenei rahi i nomino-apî-hia, o Emanuel Tov, no te Hebrew University i Ierusalema, ua rahi atu â te pǔpǔ, ua hau atu i te 50 aivanaa. Ua haamauhia te hoê porotarama etaeta no te opere i te mau neneiraa aivanaa atoa o te mau otaro e toe ra.

Ua itehia te hoê haere-mau-raa i mua ma te manaˈo-ore-hia i te matahiti 1991. A tahi, ua neneihia te buka A Preliminary Edition of the Unpublished Dead Sea Scrolls. Ua faaineinehia teie buka maoti te roro uira ma te faaohipa i te hoê buka faahororaa a te pǔpǔ. I muri iho, ua faaara te Huntington Library, i San Marino, i Kalifonia, e e opere ratou i ta ratou mau hohoˈa taatoa o te mau otaro na te mau aivanaa atoa. Aita i maoro, ua fanaˈo-ohie-hia te mau hohoˈa o te mau otaro aita i neneihia na mua ˈˈe maoti te neneiraa i te buka A Facsimile Edition of the Dead Sea Scrolls.

No reira, i na hoê ahuru matahiti i mairi aˈenei, te vai ra te taatoaraa o te mau otaro o te Miti Avaava no te rave i te mau hiˈopoaraa. E tapao faaite ïa e aita e hunaraa parau; e aita e otaro hunahia. I te mea e te operehia ra te mau neneiraa hopea haamanahia o te mau otaro, i teie nei noa ïa e haamata ˈi te faahohonu-maitai-raa. Ua fa mai te hoê ui aivanaa apî no te mau otaro. Eaha râ te auraa o teie maimiraa no te feia e haapii ra i te Bibilia?

[Nota i raro i te api]

[Hohoˈa i te api 3]

I roto atoa i teie mau ana i te hiti Miti Avaava te iteraahia te mau otaro no tahito ra

[Faaiteraa i te fatu o te hohoˈa i te api 3]

Tâpû otaro: Mau api 3, 4, e 6: Courtesy of Israel Antiquities Authority

[Faaiteraa i te fatu o te hohoˈa i te api 5]

Courtesy of Shrine of the Book, Israel Museum, Jerusalem