Mau uiraa a te feia taio

Eaha te manaˈo o te mau Kerisetiano mau i te peu matauhia e te tahi mau taata e horoa i te tahi mau hohoˈa o te mau porotarama roro uira, mea hoo hoi, na vetahi ê?

E tamata paha te vetahi ma te hape i te faatia i teie peu na roto i te faahitiraa i te mau parau a Iesu: “I horoa-noa-hia mai ta outou, e horoa noa hoi outou.” Oia mau, aita Iesu e parau ra no nia i te horoa-noa-raa i te mau hohoˈa o te tahi mau papai aore ra mau porotarama roro uira (logiciel) te vai ra te fatu, e mau faatureraa tei haamauhia no nia i te faaohiparaa ˈtu. Te auraa o ta ˈna parau, e horoa noa ïa i roto i te taviniraa. Ua faaue Iesu i te mau aposetolo e haere na te mau oire e te mau oire rii e poro i te Basileia, e faaora i te feia maˈi, e e tiavaru i te mau demoni. E tia i te mau aposetolo ia ‘horoa noa’ eiaha e faaaufau.—Mataio 10:7, 8.

No te mea te rahi noa ˈtura te mau matini roro uira a te mau taiete e ta te taata iho, mea rahi o tei hinaaro i te tahi porotarama roro uira. Mea hoo mai hoi te reira. Parau mau, te hamani ra te tahi mau taata i te tahi mau porotarama o ta ratou e horoa ma te tamoni ore ma te parau e e nehenehe e hamani i te hohoˈa e horoa ˈtu ai na vetahi ê. Tera râ, te hoohia ra te rahiraa o te mau porotarama roro uira i roto i te tapihooraa. No te faaohipa i te fare anei aore ra i te ohipa, e manaˈohia e e hoo mai e e aufau te feia faaohipa i te porotarama roro uira. Ia rave aore ra ia hamani te hoê taata i te hohoˈa o te hoê porotarama oti noa ma te ore e aufau, eita ïa e au i te ture, mai te nenei-rahi-raa i te mau hohoˈa buka, noa ˈtu mea horoa noa.

 E parau faatia te horoahia no te faaohipa i te rahiraa o te mau porotarama roro uira (tae noa ˈtu i te mau hauti), mea titauhia ïa ia haapao te fatu e te taata faaohipa i te mau faanahoraa e te mau taotiaraa taa ê o te reira. Ia au i tera rahiraa parau faatia, hoê noa taata te nehenehe e tamau e e faaohipa i te porotarama—mea matauhia e e tamauhia te reira i nia hoê noa matini roro uira i te fare anei, i roto i te hoê taiete aore ra i te hoê fare haapiiraa. Ia au i te tahi mau parau faatia, e nehenehe te taata faaohipa e fanaˈo i te hoê hohoˈa ta ˈna e haapae na ˈna iho, eiaha râ o ˈna e hamani i te tahi mau hohoˈa na vetahi ê. Ia hinaaro te fatu e horoa i te porotarama taatoa (tae noa ˈtu i te parau faatia e te mau parau haamaramaramaraa), e nehenehe ta ˈna. Aita faahou râ to ˈna e tiaraa e faaohipa ˈtu. E ere hoê huru parau faatia, e tia ïa i te hoê taata o te hoo mai i te hoê porotarama aore ra ua horoahia mai ia imi eaha te mau titauraa a taua parau faatia taa ê ra.

Mea rahi te mau fenua e rave ra i te mau parau faaau no nia i te tiaraa fatu o te paruru i te mau “tauhaa maramarama,” mai te mau porotarama roro uira, e te tamata ra i te rave e ia faaturahia te mau ture o te tiaraa fatu. Ei hiˈoraa, ua faataa The New York Times o te 14 no Tenuare 2000 e “ua haru te mau mutoi no Heremani e no Danemata i te tahi mau melo o te mea ta ratou i parau e e pǔpǔ rahi eiâ porotarama roro uira” o tei hamani e tei opere i te mau hohoˈa tia o te reira e o te mau hauti, e o tei hoo atoa ˈtu i te tahi na roto i te Internet.

Eaha te tiaraa o te amuiraa Kerisetiano i roto i teie ohipa? Ua na ô Iesu e: “E tuu atu i ta Kaisara ra ia Kaisara, e ta te Atua ra, e tuu atu ïa i te Atua.” (Mareko 12:17) Mea titauhia ïa ia auraro te mau Kerisetiano i te mau ture o te fenua o te ore e patoi ra i te ture a te Atua. Teie ta te aposetolo Paulo i papai no nia i te mau faatereraa: “Ia auraro maite te taata atoa i te feia mana toroa . . . O tei mârô atu i te toroa ra, ua mârô ïa i tei haapaohia e te Atua ra: e te feia e mârô ra, e noaa ïa te faahapa ia ratou iho.”—Roma 13:1, 2.

E ere na te mau matahiapo i roto i te amuiraa Kerisetiano e hiˈopoa i te mau roro uira a vetahi ê, mai te mea ra e ua faatiahia ratou e faataa e e faaohipa i te mau ture o te tiaraa fatu. Te tiaturi nei e te haapii nei râ ratou eiaha te mau Kerisetiano e rave i te mau mea e ere na ratou e ia tutava ratou i te auraro i te ture. E paruru te reira i te mau Kerisetiano eiaha ratou e faautuahia ei feia ofati ture, e maoti te reira e fanaˈo ai ratou i te hoê manaˈo haava maitai i mua i te Atua. Ua papai Paulo e: “No reira i parauhia ˈi e, ia auraro outou e tia ˈi; e ere hoi no te pohe anaˈe ra, no te [manaˈo haava] atoa hoi.” (Roma 13:5; MN) Oia atoa, ua faaite o Paulo i te hinaaro o te mau Kerisetiano mau na roto i teie mau parau: “Ua ite mau hoi matou e, te tia nei to matou [manaˈo haava], i te opuaraa e ei haapao maitai ta matou i te mau mea atoa nei.”—Hebera 13:18; MN.

[Tumu parau tarenihia i te api 29]

E hoo mai te tahi mau taiete e mau fare haapiiraa i te tahi mau parau faatia no te feia faaohipa rau o te faataa ehia taata e faatiahia ia faaohipa i te porotarama. I te matahiti 1995, ua hiˈopoa te mau amuiraa a te mau Ite no Iehova i te hoê tumu parau o te horoa ra i teie aˈoraa:

“E tuu te rahiraa o te mau taiete o te faaineine e o te hoo atu i te mau porotarama roro uira i te tahi mau parau o te tiaraa fatu, e horoa ˈtu ai i te hoê parau faatia o te faataa nafea te mau porotarama e nehenehe ai e faaohipahia ma te au i te ture. E pinepine, ia au i te parau faatia, eita ta te taata faaohipa e nehenehe e horoa i te mau hohoˈa o te porotarama na vetahi ê; oia mau, ia na reira oia, e ofati ïa oia i te ture nunaa rau o te tiaraa fatu. . . . E hoo atu te tahi mau taiete rarahi i te tahi mau roro uira ua tamau-aˈena-hia te mau porotarama i roto e te vai ra te parau faatia. Eita râ te tahi mau fare toa roro uira e horoa i te mau parau faatia no te mea e mau hohoˈa eita e au i te ture te mau porotarama ta ratou i tamau aˈena, e tapao faaite ïa e e ofati te taata e hoo mai i te reira i te ture ia faaohipa oia i te mau porotarama. No reira, eiaha te mau Kerisetiano e faaô aore ra e faaî i te mau tapura poroi uira te vai ra te fatu (mai te mau papai a te Taiete) e o te hamanihia ra te mau hohoˈa ma te ore e ani i te parau faatia a te mau fatu.”