Te faaoraraa no te feia e maiti i te maramarama
Te faaoraraa no te feia e maiti i te maramarama
“O Iehova to ˈu maramarama e to ˈu ora: o vai hoi ta ˈu e mǎtaˈu atu?”—SALAMO 27:1.
1. Eaha te mau faanahoraa faaora ta Iehova e rave?
O IEHOVA te Tumu o te maramarama o te mahana o te atuatu ra i te ora i nia i te fenua. (Genese 1:2, 14) O o ˈna atoa te Atua Poiete i te maramarama pae varua, o te faaore ra i te poiri pohe o te ao a Satani. (Isaia 60:2; Korinetia 2, 4:6; Ephesia 5:8-11; 6:12) E nehenehe te feia e maiti i te maramarama e parau e te papai salamo e: “O Iehova to ˈu maramarama e to ˈu ora: o vai hoi ta ˈu e mǎtaˈu atu?” (Salamo 27:1a) Mai tei tupu râ i te tau o Iesu, e nehenehe noa te feia o te maiti i te poiri e tiaturi i te hoê haavaraa au ore.—Ioane 1:9-11; 3:19-21, 36.
2. I tahito ra, eaha tei tupu i nia i te feia i faarue i te maramarama a Iehova e i nia i te feia i faaroo i ta ˈna parau?
2 I te tau o Isaia, ua faarue te rahiraa o te nunaa o te faufaa a Iehova i te maramarama. Ei faahopearaa, ua ite mata o Isaia i te haamouraahia te basileia apatoerau o Iseraela ei nunaa. E i te matahiti 607 H.T.T., ua haamouhia o Ierusalema e to ˈna hiero e ua hopoi-tîtî-hia to Iuda mau taata. Ua faaitoitohia râ te feia i faaroo i ta Iehova parau ia patoi i te taivaraa i taua tau ra. No nia i te matahiti 607 H.T.T., ua tǎpǔ Iehova e e ora ˈtu te feia e faaroo ia ˈna. (Ieremia 21:8, 9) I teie mahana, e nehenehe tatou o te hinaaro ra i te maramarama e haapii rahi mai na roto i tei tupu i taua tau ra.—Ephesia 5:5.
Te oaoa o te feia i roto i te maramarama
3. I teie mahana, e nehenehe tatou e tiaturi i te aha, o vai “te nunaa parau-tia” ta tatou e here, e o vai te “oire etaeta” o taua “nunaa” ra?
3 “E oire etaeta to tatou; o te ora ta te Atua e haapao ei patu e ei paruru. A iriti na outou i te mau uputa, ia tomo mai te [nunaa] parau-tia, o tei haapao i te parau mau ra, i roto.” (Isaia 26:1, 2; MN) Tera ta te feia i tiaturi ia Iehova i parau ma te oaoa rahi. Ua faariro te mau ati Iuda haapao maitai i te tau o Isaia ia Iehova, eiaha te mau atua hape o te feia o to ratou fenua, mai te Tumu hoê mau o te panoonoo ore. I teie mahana, tera atoa to tatou tiaturiraa. Hau atu â, mea here na tatou “te nunaa parau-tia” o Iehova—‘te Iseraela o te Atua.’ (Galatia 6:16; Mataio 21:43) Mea here atoa na Iehova teie nunaa no to ratou haerea haapao maitai. Ma ta ˈna haamaitairaa, e “oire etaeta” to te Iseraela o te Atua, e faanahonahoraa e au i te hoê oire o te paturu ra e te paruru ra ia ratou.
4. Teihea huru feruriraa mea maitai ia faatupu tatou?
4 Ua taa maitai i te feia i roto i teie “oire” e “o tei ore i aueue te manaˈo ra, e riro [Iehova] i te tiai ia ˈna, e ei hau rahi roa te hau, o oia i tiaturi ia [Iehova] ra.” E turu Iehova i te feia e hinaaro e tiaturi ia ˈna e e haapao i ta ˈna mau faaueraa tumu parau-tia. No reira te feia haapao maitai i Iuda i pee ai i te aˈoraa a Isaia: “E tiaturi outou ia Iehova, eiaha e faaea; e haapuraa taea-ore-hia hoi te Fatu ra o Iehova.” (Isaia 26:3, 4; Salamo 9:10; 37:3; Maseli 3:5) No te feia mai tera to ratou huru feruriraa, o “Iehova” te Haapuraa papu hoê roa. E fanaˈo ratou i te “hau” tamau e o o ˈna.—Philipi 1:2; 4:6, 7.
Te faahaehaaraa i te mau enemi o te Atua
5, 6. (a) Nafea o Babulonia i tahito ra i faahaehaahia ˈi? (b) Nafea o “Babulonia Rahi” i faahaamahia ˈi?
5 E nafea ïa te feia tiaturi ia Iehova e faaruru ra i te ati? Eiaha ratou e mǎtaˈu. E faatia Iehova i te tahi mau mea no te hoê taime, i te pae hopea râ, e horoa mai oia i te ravea, e e roohia te feia e faatupu i te ati i ta ˈna haavaraa. (Tesalonia 2, 1:4-7; Timoteo 2, 1:8-10) A rave na i te hiˈoraa o te hoê “oire teitei.” E na ô Isaia e: “Ua faahaehaa [Iehova] i te feia parahiraa teitei; te oire teitei ra, ua tuuhia e ana i raro: ua tuu oia ia ˈna i raro roa i te repo; ua faafaito oia ia ˈna i raro i te vari ra. E taataahihia oia e te avae; te avae o te taata haehaa, te taahi o te feia veve.” (Isaia 26:5, 6) O Babulonia paha te oire teitei e parauhia ra i ǒ nei. Eita e ore e ua haamauiui taua oire ra i te nunaa o te Atua. Eaha râ tei tupu i nia ia Babulonia? I te matahiti 539 H.T.T., ua topa oia i te rima o to Medai e to Peresia. Auê te haama e!
6 I to tatou nei tau, te faataa maitai ra te mau parau tohu a Isaia i te ohipa i tupu i nia ia “Babulonia Rahi” mai te matahiti 1919 mai. Ua topa taua oire teitei ra ma te haama i taua matahiti ra i to ˈna faaheporaahia e tuu i te nunaa o Iehova mai te faatîtîraa pae varua mai. (Apokalupo 14:8) Mea haama roa ˈtu â te ohipa i tupu i muri iho. Ua ‘taataahi’ taua pǔpǔ iti Kerisetiano ra i tei tapea na ia ratou. I te matahiti 1922, ua haamata ratou i te faaite haere i te hopea o te Amuiraa faaroo Kerisetiano e tae maira, ma te haavevo i na faaotoraa pu e maha a te melahi o te Apokalupo 8:7-12 e na pohe e toru i tohuhia i roto i te Apokalupo 9:1–11:15.
“E haerea tia mau to te feia parau-tia”
7. Eaha te aveia ta te feia e fariu i nia i te maramarama a Iehova e fanaˈo, e e tiaturi ratou ia vai e eaha ta ratou e poihere?
7 E faaora Iehova i te feia e fariu i nia i ta ˈna maramarama, e e aratai ia ratou, mai ta Isaia e faaite i muri iho: “E haerea tia mau to te feia parau-tia; ua faatitiaifaro roa oe, e tei hau i te parau-tia e, i te haerea o te feia parau-tia ra. Tei ta oe ra parau faaau matou, e Iehova, i te tiairaa matou ia oe; e ia manaˈo matou ia oe e to oe ra iˈoa, o te hinaaro ïa o to matou aau.” (Isaia 26:7, 8) E Atua parau-tia o Iehova, e mea titauhia ia haapao te feia e haamori ia ˈna i ta ˈna mau ture tia. Ia na reira ratou, e aratai Iehova ia ratou, ma te haamanina i to ratou eˈa. Na roto i te peeraa i ta ˈna aratairaa, e faaite te feia haehaa e te tiaturi ra ratou ia Iehova e te poihere ra i to ˈna iˈoa—to ˈna ‘haamanaˈoraa.’—Exodo 3:15, MN.
8. Eaha te huru feruriraa maitai ta Isaia i faaite?
8 Ua poihere Isaia i te iˈoa o Iehova. O ta ˈna ïa e faaite i muri iho: “Tau aau tei hinaaro ia oe i te po ra; e tau varua i roto roa ra tei imi ia oe i te poipoi roa ra; ua itea anaˈe ta oe mau faaauraa parau i te fenua nei, te haapii nei to te ao nei i te parau-tia i reira.” (Isaia 26:9) Ua hinaaro Isaia ia Iehova ‘ma to ˈna aau’—ma to ˈna nephe taatoa. E feruri tatou e te faaohipa ra te peropheta i te taime maniania ore o te po no te pure ia Iehova, no te faaite atu i to ˈna mau manaˈo hohonu roa ˈˈe e no te imi ma te uˈanana i te aratairaa a Iehova. Auê ïa hiˈoraa maitai e! Hau atu â, ua haapii mai o Isaia i te parau-tia na roto i te mau ohipa haavaraa a Iehova. No reira, te haamanaˈo maira oia ia tatou i te faufaaraa ia vai ara noa no te haroaroa i te hinaaro o Iehova.
E maiti vetahi pae i te poiri
9, 10. Eaha te mau ohipa hamani maitai ta Iehova i rave no to ˈna nunaa taiva, eaha râ to ratou huru?
9 Ua hamani maitai rahi Iehova ia Iuda, tera noa râ, e ere o te taatoaraa tei farii atu. E pinepine, ua maiti te rahiraa e orure i te hau e e taiva eiaha râ e pee i te maramarama o te parau mau a Iehova. Ua na ô Isaia e: “Faaherehere noâ i te taata paieti ore ra, e ore â oia e haapii i te parau-tia; ei te fenua parau-tia ra oia e rave ai i te parau-tia ore, e ore hoi e haapao i te hanahana o Iehova.”—Isaia 26:10.
10 I te tau o Isaia a paruru ai to Iehova rima ia Iuda i to ˈna mau enemi, ua patoi te rahiraa i te farii i te reira. I to ˈna haamaitairaa ia ratou i to ˈna hau, aita te nunaa i faaite i te mauruuru. No reira Iehova i faarue ai ia ratou ia tavini noa ˈtu i ‘te mau fatu ê,’ i vaiiho atu ai e ia hopoi-tîtî-hia te mau ati Iuda i Babulonia i te matahiti 607 H.T.T. (Isaia 26:11-13) I te pae hopea râ, hoê toea o te nunaa tei hoˈi i to ratou fenua tumu ma te aˈohia.
11, 12. (a) Eaha tei tupu i nia i te feia i tapea ia Iuda i muri aˈe? (b) I te matahiti 1919, eaha tei tupu i nia i te feia i tapea na i te mau tavini faatavaihia a Iehova i muri aˈe?
11 Eaha ïa no nia i te feia i tapea na ia Iuda? E pahono Isaia na roto i te hoê parau tohu: “Ua pohe ratou, e ore e ora faahou; e faahepo pohe anaˈe ïa, e ore ratou e tia faahou mai i nia: i tii mai ai oe, i rave haapohe roa ˈi ia ratou; e ua faaore roa oe i te manaˈoraa ia ratou.” (Isaia 26:14) Oia, i muri aˈe i to ˈna toparaa i te matahiti 539 H.T.T., aita to Babulonia e tiaturiraa no a muri aˈe. I muri aˈe, ua mou roa te oire. E ‘faahepo-pohe-hia’ oia, e e riro to ˈna hau emepera rahi ei aai. E faaararaa ïa teie no te feia e tiaturi ra i te mau taata mana o teie nei ao!
12 I tupu na te tahi mau tuhaa o teie parau tohu i to te Atua vaiihoraa e ia hopoi-tîtî-hia i te pae varua ta ˈna mau tavini faatavaihia i te matahiti 1918 e to ˈna faatiamâraa ia ratou i muri aˈe i te matahiti 1919. Mai reira mai, mea peapea te oraraa no a muri aˈe o te feia i tapea na ia ratou, te Amuiraa faaroo Kerisetiano iho â râ. Te mau haamaitairaa râ i faataahia no te nunaa o Iehova, mea rahi mau â ïa.
“Ua faarahi oe i te nunaa nei”
13, 14. Eaha te mau haamaitairaa rahi ta te mau tavini faatavaihia a Iehova i fanaˈo mai te matahiti 1919 mai?
13 Ua haamaitai te Atua i te huru feruriraa tatarahapa o ta ˈna mau tavini faatavaihia i te matahiti 1919 e ua faarahi oia ia ratou. Na mua, ua haapaohia te haaputuputuraa o te toea o te Iseraela o te Atua, e i muri aˈe to te “feia rahi roa” o te mau “mamoe ê atu” tei haamata. (Apokalupo 7:9; Ioane 10:16) Ua tohuhia teie mau haamaitairaa i roto i te parau tohu a Isaia: “Ua faarahi oe i te [nunaa] nei, e Iehova; ua faarahi oe i te [nunaa] nei; ua faateiteihia oe: ua faaene oe i te otia o te fenua nei i te atea ê ra. E Iehova, i te atiraa ra to ratou imiraa ia oe ra; ua ani ratou ma te faahaehaa ra i reira, te iri ra te aˈo na oe i nia ia ratou.”—Isaia 26:15, 16; MN.
14 I teie mahana, ua ati te fenua i te mau otia o te Iseraela o te Atua, e ua amuihia mai te feia rahi roa i teie nei, e ono mirioni e tiahapa ratou e rave atoa ra i te ohipa pororaa i te parau apî maitai. (Mataio 24:14) E haamaitairaa tera a Iehova! E e faahanahanahia to ˈna iˈoa! Te faaroohia ra taua iˈoa ra i teie mahana i roto e 235 fenua—o te hoê ïa tupuraa faahiahia o ta ˈna parau tǎpǔ.
15. Eaha te tia-faahou-raa taipe tei tupu i te matahiti 1919?
15 Ua hinaaro o Iuda i te tauturu a Iehova no te tiamâ mai i te faatîtîraa i Babulonia. Aita anaˈe, eita ïa ratou e matara mai. (Isaia 26:17, 18) Oia atoa, e haapapuraa te tiamâraa te Iseraela o te Atua i te matahiti 1919 e ua turu Iehova ia ratou. Aita anaˈe o ˈna, eita ïa e manuïa. E no te tauiraa maere roa o to ratou tupuraa i faaau ai Isaia i te reira i te hoê tia-faahou-raa: “To oe ra mau taata pohe, e ora ïa; to ratou mau tino pohe, e tia faahou ïa: a ara, a himene, e tei parahi i te repo e! e au hoi to oe ra hau i te hau o te mau raau rii ra; e haapuai mai hoi te fenua i te feia i pohe ra.” (Isaia 26:19; Apokalupo 11:7-11) Oia, mai te mea ra e e ora faahou mai te feia i pohe no te rave faahou i te ohipa!
Parururaa i te mau taime atâta
16, 17. (a) I te matahiti 539 H.T.T., eaha tei titauhia i te mau ati Iuda ia rave no te ora ˈtu i te toparaa o Babulonia? (b) Eaha paha te “mau piha” i teie mahana, e nafea tatou e faufaahia ˈi i te reira?
16 E hinaaro noa te mau tavini a Iehova i ta ˈna parururaa. E fatata râ oia i te faatoro i to ˈna rima no te taime hopea i nia i te ao a Satani, e e hinaaro to ˈna feia haamori i ta ˈna tauturu mai tei ore i itehia aˈenei. (Ioane 1, 5:19) Te faaara mai ra Iehova ia tatou no nia i taua taime atâta ra: “Haere mai, e au mau taata e; a tomo i roto i to mau piha ra, a opani mai i to mau uputa ia oe ra; a faatapuni ai ia oe iho e vahi iti aˈe, ia hoê aˈe amoraa mata, e ia pee ê atu taua tahoo nei. Inaha hoi, te haere maira Iehova mai to ˈna ra vahi, e faautua i to te fenua nei i ta ratou hara: e na te fenua e faaite mai i te toto i manii i nia ia ˈna ra, e ore hoi oia e tapoˈi faahou i to ˈna mau taata taparahihia ra.” (Isaia 26:20, 21; Zephania 1:14) Ua faaite teie faaararaa i te mau ati Iuda nafea ia ora ˈtu ia topa o Babulonia i te matahiti 539 H.T.T. Ua faaea noa te feia i faaroo i te reira i roto i to ratou mau fare, aita ratou i noaa i te mau faehau upootia i roto i te mau aroâ.
17 I teie mahana, te faahohoˈa ra paha te “mau piha” o te parau tohu i te mau ahuru tausani amuiraa a te nunaa o Iehova na te ao nei. E parururaa taua mau amuiraa ra i teie atoa mahana, i reira te mau Kerisetiano e ite ai i te panoonoo ore i rotopu i te mau taeae, e haapaohia ra ma te here e te mau matahiapo. (Isaia 32:1, 2; Hebera 10:24, 25) E parau mau iho â râ te reira no te mea te piri maira te hopea o teie faanahoraa o te mau mea e tei te auraroraa e ora ˈtu ai tatou.—Zephania 2:3.
18. Nafea Iehova e fatata ˈi i te ‘taparahi i te taehae i raro i te moana ra’?
18 E tohu o Isaia no nia i taua taime ra: “Ia tae i taua mahana ra e tahoo ai Iehova i te ˈoˈe maitai, e te rahi, e te etaeta no ˈna ra, i te leviatana, i te ophi maue ra; e te leviatana, te ophi piˈo ra; e ua taparahi hoi i te taehae i raro i te moana ra.” (Isaia 27:1) O vai te “leviatana” i teie nei tau? E au ra e o te “ophi tahito” ra o Satani iho, e ta ˈna faanahoraa ino o te mau mea, ta ˈna e faaohipa ra no te tamaˈi atu i te Iseraela o te Atua. (Apokalupo 12:9, 10, 17; 13:14, 16, 17) I te matahiti 1919, aita i mau faahou i te leviatana e tapea i te nunaa o te Atua. Ia maoro aˈe, e mou atoa oia. (Apokalupo 19:19-21; 20:1-3, 10) E “taparahi hoi [Iehova] i te taehae i raro i te moana ra.” Na mua ˈˈe i te reira, aita hoê aˈe mea ta te leviatana e tamata i te rave i nia i te nunaa o Iehova e manuïa roa. (Isaia 54:17) Mea tamahanahana mau â teie haapapuraa!
‘Te ô vine o te uaina maitai’
19. Eaha te huru tupuraa o te toea i teie mahana?
19 Ia au i teie maramarama atoa no ǒ mai ia Iehova ra, eita anei e tano roa ia oaoa tatou? Oia mau! E faataa o Isaia ma te nehenehe mau i te oaoa o te nunaa o Iehova ia papai oia e: “Ei te reira mahana, e himene outou ia ˈna ra, Te ô vine uteute [o te uaina maitai]: O vau teie, o Iehova, e tiai ia ˈna nei: e ninii au i te pape i nia ia ˈna e ore e faaea; e tiai au ia ˈna i te mau po nei, e te mau ao atoa nei ia ore oia ia rave-ino-hia.” (Isaia 27:2, 3; V.C.J.S.) Ua haapao Iehova i ta ˈna “ô vine,” oia te toea o te Iseraela o te Atua, e to ratou mau apiti e haa puai ra. (Ioane 15:1-8) Ua noaa mai te hotu o te faahanahana i to ˈna iˈoa e o te faaoaoa rahi i ta ˈna mau tavini i nia i te fenua.
20. Nafea Iehova e paruru ai i te amuiraa Kerisetiano?
20 E nehenehe tatou e oaoa roa e ua ore te riri o Iehova i ta ˈna mau tavini faatavaihia a vaiiho ai oia e ia faatîtîhia ratou i te pae varua i te matahiti 1918. E na ô Iehova iho e: “Aita o ˈu e riri: ahiri e raau taratara e te tataramoa tei tuuhia ia tamaˈi mai ia ˈu? e haere ïa vau na roto i te reira ra, e ama apipiti atoa ïa ia ˈu. Eiaha! o te tauturu ra o vau ta ˈna e haru mai, e faafaite mai tana tia ia ˈu! o vau ta ˈna e faafaite mai!” (Isaia 27:4, 5) Ia tamau noa ta ˈna mau ô vine i te faahotu rahi i “te uaina maitai,” e taataahi Iehova e e tanina i te auahi i te mau huru mana atoa e au i te aihere o te nehenehe e haapiˈo ia ratou. No reira, eiaha e vaiiho e ia tuino te hoê i te au-maitai-raa o te amuiraa Kerisetiano! E ‘haru anaˈe tatou paatoa i te tauturu a Iehova,’ ma te imi i ta ˈna farii maitai e ta ˈna parururaa. Ia na reira tatou, e faafaite tatou e te Atua—no te mea e mea faufaa roa te reira e faahiti atu Isaia e piti taime.—Salamo 85:1, 2, 8; Roma 5:1.
21. Nafea te fenua i apǐ ai i te ‘hotu’?
21 Teie â te mau haamaitairaa: “I te mau mahana a muri atu e toro ai te aˈa o Iakoba; e oteu hoi Iseraela, e e tupu, e apǐ hoi te fenua atoa nei i ta ˈna e faahotu ra.” (Isaia 27:6) Ua tupu teie irava mai te matahiti 1919 mai, e e faaiteraa faahiahia teie i te mana o Iehova. Ua apǐ te fenua i te ‘hotu,’ te maa maitai i te pae varua, i te mau Kerisetiano faatavaihia. I roto i te hoê ao viivii, te haapao noa ra ratou ma te oaoa i te mau ture teitei a te Atua. E te haamaitai noa ra Iehova ia ratou ma te faarahi ia ratou. Ei faahopearaa, te “haamori” ra to ratou mau mirioni hoa, te mau mamoe ê atu, i te Atua “i te rui e te ao.” (Apokalupo 7:15) Ia ore roa ˈtu ïa ia moe ia tatou te fanaˈoraa taa ê faahiahia e amu i te ‘hotu’ e e opere atoa na vetahi ê!
22. Eaha te mau haamaitairaa e fanaˈohia e te feia e farii i te maramarama?
22 I teie anotau fifi mau, ua ati hoi te fenua i te poiri e te mau etene i te poiri taˈotaˈo, aita anei tatou e mauruuru ra e te turama ra Iehova i to ˈna nunaa i te pae varua? (Isaia 60:2; Roma 2:19; 13:12) Taua maramarama ra no te feia atoa e farii i te reira, o te hau o te feruriraa ïa e te oaoa i teie mahana e tae noa ˈtu te ora mure ore i te tau a muri aˈe. E tano mau ïa ia faateitei tatou, te mau hoa o te maramarama, i to tatou aau no te arue ia Iehova e te papai salamo tei parau e: “O Iehova te tiai ia ˈu; e mǎtaˈu hoi au ia vai? Tiai ia Iehova; e faaitoito; e na ˈna e faaitoito mai to aau ra: e tena na, e tiai â oe ia Iehova.”—Salamo 27:1b, 14.
Te haamanaˈo ra anei outou?
• Eaha te tupu i nia i te feia e faatîtî ra i te nunaa o Iehova a muri aˈe?
• Eaha te maraaraa i tohuhia i roto i te Isaia?
• Ia faaea noa tatou i roto i teihea “mau piha,” e no te aha?
• No te aha te huru tupuraa o te nunaa o Iehova e riro ai ei arueraa ia ˈna?
[Uiraa haapiiraa]
[Tumu parau tarenihia i te api 22]
BUKA APÎ
Ua hohorahia te rahiraa o te mau parau o na tumu parau haapiiraa e piti i roto i te hoê oreroraa parau i te tairururaa mataeinaa 2000/2001. I te hopea o te oreroraa parau, ua faaitehia mai te hoê buka apî, teie te upoo parau La prophétie d’Isaïe, lumière pour tous les humains I. I roto i teie buka e 416 api, ua faahohonuhia tera e tera irava o na 40 pene matamua o te buka a Isaia.
[Hohoˈa i te api 18]
O te feia parau-tia noa te fariihia i roto i te “oire etaeta” a Iehova, oia ta ˈna faanahonahoraa
[Hohoˈa i te api 19]
Ua imi o Isaia ia Iehova “i te po”
[Hohoˈa i te api 21]
E paruru e e faahotu rahi Iehova i ta ˈna “ô vine”