Aamu

Turuhia e Iehova i te roaraa o to ˈu oraraa

FAATIAHIA E FORREST LEE

No haru noa ˈtura te mutoi i ta mâua mau matini faataˈi pehe e mau papai bibilia. Ua faaohipa te feia patoi i te Piti o te Tamaˈi Rahi no te turai i te hoê tavana rahi apî no Kanada e faaoti e mea tia ore te ohipa a te mau Ite no Iehova. Ua tupu te reira i te 4 no Tiurai 1940.

MA TE ore e toaruaru no te ohipa i tupu, ua ohi mâua i te tahi atu â mau papai i te vahi i vaiihohia ˈi e ua tamau aˈera i ta mâua pororaa. E haamanaˈo noa vau i ta Papa i parau i taua taime ra: “Eita ïa tâua e faaea ohie noa. Ua faaue mai Iehova ia tatou e poro.” I taua taime ra, e tamaiti itoito vau 10 matahiti. Teie râ, i teie â mahana, e haamanaˈoraa tamau noâ te faaotiraa papu a Papa e to ˈna itoito rahi no te taviniraa nafea to tatou Atua o Iehova e turu ai i to ˈna feia taiva ore.

I te tapea-faahou-raa te mutoi ia mâua, aita noa ratou i rave i ta mâua mau papai, ua tuu atoa râ ia Papa i roto i te fare tapearaa, a vaiiho ai ia Mama o oia anaˈe e e maha tamarii. Ua tupu te reira i te avaˈe Tetepa 1940 i roto i te Saskatchewan. Aita i maoro i muri aˈe, ua tiavaruhia vau i rapae i te fare haapiiraa no to ˈu peeraa i to ˈu manaˈo haava haapiihia ia au i te Bibilia e te oreraa e haamori i te reva aore ra e himene i te himene aiˈa. Ua mâmâ mai ta ˈu tapura ohipa i to ˈu faahaereraa i ta ˈu tau haapiiraa i mua na roto i te papairaa rata, e ua apiti hau atu â vau i roto i te ohipa pororaa.

I te matahiti 1948, ua titauhia ia haere te mau pionie, te mau tavini taime taatoa a te mau Ite no Iehova, i te pae hitia o te râ o Kanada. Haere atura ïa vau ei pionie i Halifax, i Nouvelle-Écosse, e i Cape Wolfe, i nia i te motu Prince-Édouard. I te matahiti i muri mai, ua farii au i te titauraa e ohipa e piti hebedoma i te amaa a te mau Ite  no Iehova i Toronto. Ua riro na hebedoma ei ono matahiti taviniraa hoona. I te pae hopea, ua farerei au ia Myrna, hoê â hoi to mâua here ia Iehova, e ua faaipoipo mâua i te avaˈe Titema 1955. Ua haere mâua e faaea i Milton, i Ontario, e aita i maoro, ua haamauhia te hoê amuiraa i ǒ. Ua riro te tahua i raro o to mâua nohoraa ei Piha a te Basileia.

Te hinaaro e faaaano i ta mâua taviniraa

I te mau matahiti i muri mai, ua fanau mâua e ono tamarii te tahi i muri aˈe i te tahi ma te huru vitiviti. O to mâua tamahine o Miriam te matahiapo. Haere mai ai o Charmaine, o Mark, o Annette, o Grant, e te hopea o Glen. Mea pinepine, ia hoˈi mai au i te fare mai te ohipa mai, e ite au i te mau tamarii rii e parahi ra i raro na te hiti o te haapûpûraa auahi, e o Myrna e taio atura i te Bibilia, e faataa ra i te mau aamu bibilia e e haaputa ra i te here mau ia Iehova i roto i to ratou mafatu. Auaa ta ˈna tauturu î i te here i noaa ˈi i to mâua mau tamarii atoa te hoê ite bibilia maitai i te apî-roa-raa ra.

Ua puta roa ino te hiˈoraa o te itoito rahi o to ˈu papa no te taviniraa i roto i to ˈu feruriraa e to ˈu mafatu. (Maseli 22:6) No reira, i te matahiti 1968, i te titauraahia te mau utuafare Ite no Iehova e haere i Marite no Ropu e Apatoa e tauturu i roto i te ohipa pororaa, ua hinaaro to mâua utuafare e pahono i te titauraa. I taua taime ra, e 5 e tae atu i te 13 matahiti to to mâua mau tamarii, e aita hoê o matou i ite i te reo Paniora. No reira, a pee ai i te aratairaa i horoahia, ua rave au i te hoê tere i tau fenua e hiˈopoa i te mau huru oraraa. I to ˈu hoˈiraa i te fare, ei utuafare, ua feruri matou i roto i te pure i ta matou mau maitiraa e ua faaoti aˈera e haere i Nicaragua.

Te taviniraa i Nicaragua

I te avaˈe Atopa 1970, tei roto matou i to matou fare apî, e i roto e toru hebedoma, ua horoahia mai te hoê tuhaa iti na ˈu i roto i te porotarama i te hoê putuputuraa a te amuiraa. Ua tutava vau i te rave i ta ˈu tuhaa ma ta ˈu parau Paniora haihai roa e i te pae hopea, ua titau vau i te amuiraa taatoa e haere mai i to matou fare no te cerveza i te Mahana maa i te hora 9:30 i te poipoi. Te hinaaro ra vau e parau servicio, te taˈo no taviniraa, ua titau râ vau i te taata atoa e haere mai e inu i te pia. E tautooraa mau te haapiiraa i te reo!

I te omuaraa, e papai au i te hoê vauvauraa parau i nia i to ˈu rima e e faahiti noa vau i te reira a haere atu ai i te hoê fare. E parau vau e: “E apeehia te buka e te hoê haapiiraa bibilia tamoni ore i to oe fare.” Ua parau mai te hoê taata tei farii i te pûpûraa, i muri aˈe e e tia ia ˈna ia haere mai i ta matou mau putuputuraa ia taa ia ˈna eaha ta ˈu e tamata ra i te faaite ia ˈna. Ua riro mai teie taata  ei Ite no Iehova. Mea papu mau ïa e na te Atua e faatupu i te mau huero o te parau mau i roto i te mau mafatu haehaa, mai ta te aposetolo Paulo iho â i faˈi!—Korinetia 1, 3:7.

I muri aˈe fatata e piti matahiti i te oire pu ra o Managua, ua titauhia matou e haere i te pae apatoa o Nicaragua. I reira, ua haa matou e te amuiraa i Rivas e te mau pǔpǔ moemoe o te feia anaanatae no taua mau vahi ra. Ua apee mai o Pedro Peña, te hoê Ite matahiapo haapao maitai, i to matou haereraa e hiˈo i teie mau pǔpǔ. Tei nia te hoê i te hoê motu mouˈa auahi i nia i te roto Nicaragua, hoê anaˈe utuafare Ite no Iehova to reira.

Noa ˈtu e mea iti ta ratou i te pae materia, ua tutava hua teie utuafare i te faaite i te mauruuru no to matou tere. I te ahiahi i tae atu ai matou, ua faaineinehia te hoê amuraa maa na matou. Ua faaea matou hoê hebedoma, e e rave rahi o to reira feia here mea au na ratou te Bibilia tei vahi i ta ratou maa na matou. Ua oaoa matou e ua tae mai 101 taata i te oreroraa parau bibilia no te taatoaraa i te Tapati.

Te manaˈo nei au e ua ite-roa-hia te mana paturu o Iehova i to matou opuaraa i te tahi atu taime e haere e hiˈo i te hoê pǔpǔ feia anaanatae i nia i te mau mouˈa fatata i te otia o Costa Rica. I te mahana i opua ˈi matou e reva, ua haere mai o Pedro e tii ia ˈu, te tarava ra râ vau ma te pohehia i te malaria. “Eita ta ˈu e nehenehe e haere Pedro,” o ta ˈu ïa i parau atu. Ua tuu oia i to ˈna rima i nia i to ˈu rae e ua pahono maira e: “E fiva i te rahi to oe, e tia râ ia oe ia haere mai! Te tiai maira te mau taeae.” Ua faahiti atura oia i te pure aau tae roa ˈˈe ta ˈu i faaroo aˈenei.

I muri iho, ua parau vau e: “A haere a tii i te hoê fresco (te hoê vaiharo maa hotu) na oe. E ineine au i roto fatata hoê ahuru minuti.” E piti utuafare Ite te faaea ra i te vahi ta mâua i tere atu, e ua haapao maitai ratou ia mâua. I te poipoi aˈe, ua haere matou e poro e o ratou, noa ˈtu e te paruparu noa râ vau e e fiva to ˈu. Mea faaitoito mau â te iteraa hau atu i te hoê hanere taata i tae mai no ta matou putuputuraa i te Tapati!

Te reva faahou ra

I te matahiti 1975, ua fanauhia te 7raa o to mâua tamarii, o Vaughn. I te matahiti i muri mai, mea titauhia ia hoˈi matou i Kanada, no te fifi moni. E ere i te mea ohie ia faarue i te Nicaragua no te mea ua ite mau matou i te mana paturu o Iehova i to matou faaearaa i ǒ. I te taime a reva ˈi matou, hau atu i te 500 taata o te tuhaa fenua o ta matou amuiraa e haere ra i te mau putuputuraa.

Na mua ˈtu â, i to to mâua tamahine o Miriam e to ˈu nominoraahia ei pionie taa ê i Nicaragua, ua ui mai Miriam ia ˈu e: “Papa, mai te peu noa ˈtu e e titauhia ia hoˈi oe i Kanada, e vaiiho mai anei oe ia ˈu i ǒ nei?” Aita roa ˈtu vau i manaˈo noa ˈˈe ra e reva, no reira vau i parau atu ai e: “Eaha hoi e ore ai!” No reira, i to matou revaraa, ua faaea ˈtu o Miriam e tamau noa i ta ˈna taviniraa taime taatoa. I muri aˈe, ua faaipoipo oia ia Andrew Reed. I te matahiti 1984, ua haere raua i te 77raa o te piha no Gileada, te haapiiraa mitionare a te mau Ite no Iehova, e vai ra i Brooklyn, i New York, i taua taime ra. Te tavini ra o Miriam e ta ˈna tane i te Repupirita Dominicaine i teie nei, a faatupu ai i te hoê hinaaro i faahotuhia i roto ia ˈna e te mau mitionare maitatai roa i Nicaragua.

Na roto i taua taime ra, te ama noa râ te mau parau a Papa ra “eita ïa tâua e faaea ohie noa,” i roto i to ˈu mafatu. No reira, i te matahiti 1981, i te navairaa te moni ta mâua i haaputu no te hoˈi i Marite no Ropu, ua reva faahou matou, i teie taime, i Costa Rica. A tavini ai matou i ǒ, ua titauhia matou e tauturu i te paturaa o ta ratou amaa apî. I te matahiti 1985 râ, ua hinaaro to mâua tamaiti o Grant i te rapaauraa a te taote, no reira matou i hoˈi ai i Kanada. Ua faaea ˈtu o Glen i Costa Rica e ohipa i roto i te paturaa i te amaa, area o Annette e o Charmaine ra, te tavini ra ïa ei  pionie taa ê. Aita roa ˈˈe to roto ia matou tei faarue ia Costa Rica i manaˈo aˈenei e ore roa ˈtu e hoˈi faahou mai.

Faarururaa i te ati

Ua hiti mai te 17 no Tetepa 1993 ma te maramarama e te mahana maitai. Te tamau ra mâua to mâua tamaroa matahiapo o Mark i te mau iri tapoˈi fare. Te haa ra mâua te tahi i pihai i te tahi e te paraparau ra i nia i te mau tumu parau pae varua, mai ta mâua i matau. Aita vau i ite mea nafea, ua ofera vau e ua taviri atura i raro i te tapoˈi fare. I te hoˈiraa mai to ˈu hiroa, o te mau mori anaana e te mau taata ahu uouo anaˈe ta ˈu e ite ra. Tei roto vau i te piha feia pepe o te fare maˈi.

No ta te Bibilia e parau ra, teie ta ˈu mau parau matamua: “Eiaha ei toto, eiaha ei toto!” (Ohipa 15:28, 29) Mea haamahanahana mau te faarooraa ia Charmaine e parau e: “Eiaha e haapeapea, Papa. Tei ǒ nei matou paatoa.” Ua faaroo vau i muri aˈe e ua ite te mau taote i ta ˈu parau rapaauraa, e aita i mârôhia aˈenei e faaohipa i te toto. Ua fati to ˈu aî e ua paruparu roa vau, aita aˈenei ta ˈu i nehenehe e huti i te aho o vau iho.

Ma te ore e hautiuti, te hinaaro ra vau hau atu â i mutaaiho ia paturuhia vau e Iehova. Aita te mataˈi e tae ra i te mau uaua o te reo no te mea ua tâpûhia te uaua mataˈi no te patia i te hoê tuio hutiraa aho. Aita ta ˈu i nehenehe e paraparau. E hiˈo te taata i nia i to ˈu utu e taa ˈi eaha ta ˈu e tamata ra i te parau.

Ua maraa vave te mau haamâuˈaraa. Tei roto hoi ta ˈu vahine e te rahiraa o ta ˈu mau tamarii i te taviniraa taime taatoa, e te ui maere ra vau e e titauhia anei ia vaiiho ratou i teie taviniraa no te haapao i teie mau hopoia pae moni. Teie râ, ua noaa ta Mark ohipa tei tauturu, i roto noa e toru hebedoma, i te haapee i te rahiraa o teie haamâuˈaraa. Ei faahopearaa, ua nehenehe te taatoaraa e faaea i roto i te taviniraa taime taatoa taa ê atu ta ˈu vahine e o vau.

Ua poˈi roa te papai o to ˈu piha fare maˈi i te mau hanere tareta e rata no na fenua taa ê e ono. Te turu mau maira Iehova ia ˈu. Ua tauturu atoa te amuiraa i to ˈu utuafare na roto i te horoaraa i te maa na ratou i te roaraa o te hoê tuhaa o na avaˈe e pae e te afa tei roto vau i te rapaauraa rahi. I te mau mahana atoa, e faaea mai te hoê matahiapo Kerisetiano i te avatea taatoa ia ˈu ra, a taio mai ai i te Bibilia e te mau papai bibilia, e a faatia atoa mai ai i te mau aamu faaitoito. E piti melo o to ˈu utuafare te faaineine i te mau putuputuraa atoa a te amuiraa e o vau, aita ïa vau i mairi aˈenei i te maa varua faufaa roa.

Tei te fare maˈi noa râ vau, ua faanahohia e ia haere au i te hoê mahana tairururaa taa ê. Ua faataa te pǔpǔ rave ohipa o te fare maˈi i te hoê utuutu  maˈi toroa e e te hoê vahine anohaa no te hutiraa aho o te apee mai ia ˈu i te mahana taatoa. Auê ïa oaoaraa i te parahi-faahou-raa i rotopu i te mau taeae e mau tuahine Kerisetiano! Eita roa ˈtu e moehia ia ˈu te mau hanere o ratou e tia ra te tahi i muri mai i te tahi e tiai ra i te aroha mai ia ˈu.

Te atuaturaa i te huru pae varua

Fatata hoê matahiti i muri aˈe i te ati, ua nehenehe ia ˈu e hoˈi i te fare e to ˈu utuafare, noa ˈtu e te titau noa râ vau i te utuuturaa e 24 hora i te mahana. Maoti te hoê pereoo i faanaho-taa-ê-hia, ua nehenehe ia ˈu e haere i te mau putuputuraa, mea varavara hoi au i te mairi atu. E tia râ ia ˈu ia faˈi e mea tutava ia haere. Mai to ˈu hoˈiraa mai i te fare, ua nehenehe ia ˈu e haere i te mau tairururaa mataeinaa atoa.

I te pae hopea, i te avaˈe Fepuare 1997, ua nehenehe faahou â ta ˈu e paraparau ma te taotiahia râ. E faaroo te tahi o ta ˈu mau tuati ma te mauruuru ia faataa ˈtu vau i to ˈu tiaturiraa niuhia i nia i te Bibilia. Ua taio te hoê tuati i te buka taatoa Les Témoins de Jéhovah: Prédicateurs du Royaume de Dieu i mua ia ˈu e te tahi atoa ˈtu mau papai a te Watch Tower. E papai au na te taata na roto i te raveraa i te hoê raau iti no te patapata i te roro uira. Noa ˈtu e mea rohirohi roa ia patapata mai teie, mea hoona râ ia rave noa i te taviniraa.

Te mauiui rahi nei au no te mau uaua uira. E au ra râ hoi e ia paraparau vau i te mau parau mau bibilia ia vetahi ê aore ra ia faaroo vau ia taiohia mai te reira, e ite au i te tahi maa maitai. I te tahi taime, e poro vau na nia i te purumu e ta ˈu vahine o te turu mai, e te auvaha no ˈu ia hinaaro vau i te tauturu. Tau taime to ˈu neheneheraa e tavini ei pionie tauturu. E ite au i te oaoa i te taviniraa ei matahiapo Kerisetiano, ia haafatata mai iho â râ te mau taeae ia ˈu i te mau putuputuraa aore ra ia haere mai e hiˈo ia ˈu i te fare e ia nehenehe au e tauturu e e faaitoito atu.

E tia ia ˈu ia faˈi e mea ohie ia toaruaru. No reira, ia hepohepo noa ˈtu vau, e pure vave au ia noaa te oaoa. I te po e te ao, e pure au ia tamau noa Iehova i te turu mai ia ˈu. E haamahanahana mai iho â te hoê rata aore ra ia haere mai te hoê e hiˈo ia ˈu. E faaî atoa te taioraa i te hoê Pare Tiairaa aore ra te hoê A ara mai na! i to ˈu feruriraa i te mau manaˈo faaitoito. Ua taio mai tau tuati i teie mau vea. Mai to ˈu rooraahia i te ati, ua faaroo vau i te taioraa o te Bibilia taatoa i nia i te mau ripene e hitu taime. O te tahi ïa o te mau ravea rau i turu mai ai Iehova ia ˈu.—Salamo 41:3.

Maoti te tauiraa o to ˈu huru tupuraa i rahi ai to ˈu taime no te feruriruri nafea to tatou Orometua Rahi, o Iehova, e haapii ai ia tatou no te oraraa. E horoa mai oia i te ite mau i to ˈna hinaaro e ta ˈna opuaraa, te hoê taviniraa faufaa, te aˈoraa e oaoa ˈi te utuafare, e te haroaroaraa eaha te rave i roto i te ati. Ua haamaitai mai Iehova ia ˈu i te horoaraa mai i te hoê vahine haapao maitai e te faahiahia. Ua vai piri noa atoa mai to ˈu mau tamarii ia ˈu ma te taiva ore, e mea oaoa na ˈu e ua rave paatoa ratou i te taviniraa taime taatoa. Inaha, i te 11 no Mati 2000, ua faatuitehia to mâua tamaiti o Mark e ta ˈna vahine, o Allyson, e te 108raa o te Piha haapiiraa no Gileada e ua tonohia i Nicaragua. Ua tae atu mâua ta ˈu vahine i te faatuiteraa. E nehenehe mau ta ˈu e parau e ua taui te ati i to ˈu oraraa, eiaha râ i to ˈu mafatu.—Salamo 127:3, 4.

Te haamauruuru nei au ia Iehova no te paari ta ˈna i horoa mai ia nehenehe au e tutuu i te tufaa pae varua i noaa mai ia ˈu na to ˈu utuafare. E puaihia e e itoitohia vau ia hiˈo atu i to ˈu mau tamarii e tavini ra i to ratou Atua Poiete ma te hoê â huru feruriraa e to ˈu metua tane tei parau e: “Eita ïa tâua e faaea ohie noa. Ua faaue mai Iehova ia tatou e poro.” Oia mau, ua turu mai Iehova ia ˈu e to ˈu utuafare i te roaraa o to matou oraraa.

[Hohoˈa i te api 24]

E o Papa, to ˈu mau taeae, e to ˈu tuahine, i pihai i to matou pereoo nohoraa, i faaohipahia i te tau pionieraa. Tei te pae atau vau

[Hohoˈa i te api 26]

E ta ˈu vahine o Myrna

[Hohoˈa i te api 26]

Te hoê hohoˈa apî o to matou utuafare

[Hohoˈa i te api 27]

Te poro noa nei â vau na roto i te papairaa rata