Haavaraa o te tia-faahou-raa o Iesu

“E nehenehe ta ˈu e parau roa ˈtu ia outou e ua papu roa ia tatou e i ora na Iesu . . . , aita râ i papu ia tatou e ua faatia mai anei te Atua ia ˈNa mai te pohe mai.” Tera ïa ta te taata toroa teitei a te Ekalesia no Beretane, te Arii epikopo no Canterbury, i parau.

AITA te aposetolo Kerisetiano ra o Paulo i feaa i te reira. I roto i te pene 15 o ta ˈna rata matamua faauruahia na te mau hoa Kerisetiano i Korinetia i tahito ra, ua papai o Paulo e: “Ua tuu atu hoi au ia outou i mutaa ihora, i tei noaa na ia ˈu ra, e i pohe te Mesia i ta tatou nei hara, mai tei te parau i papaihia ra; e i tanuhia hoi oia, e tia faahou maira i te rui toru, mai tei te parau i papaihia ra.”—Korinetia 1, 15:3, 4.

Na te faaroo i te tia-faahou-raa o Iesu Mesia i turai i ta ˈna mau pǐpǐ ia poro i te evanelia e ati aˈe te ao Heleni e Roma—“i te taata atoa i raro aˈe i teie nei raˈi.” (Kolosa 1:23) Oia mau, o te tia-faahou-raa o Iesu te niu mau o te faaroo Kerisetiano.

Mai te haamataraa mai râ, mea rahi tei ore i tiaturi i te tia-faahou-raa o Iesu. No te rahiraa o te mau ati Iuda, e parau faaino ta te mau pǐpǐ a Iesu e o te Mesia teie taata i patǐtǐhia. E no te rahiraa o to Heleni i haapiihia, mea au ore roa te manaˈo o te hoê tia-faahou-raa no te mea te tiaturi ra ratou e mea pohe ore te nephe.—Ohipa 17:32-34.

Te feia e feaa ra i teie nei tau

I te mau matahiti i mairi aˈenei, ua nenei te tahi mau aivanaa e parau ra e e Kerisetiano ratou, i te tahi mau buka e mau tumu parau e faaite ra e e fabula te tia-faahou-raa o Iesu e ua faatupu mai i te mârôraa uˈana i nia i teie tumu parau. I roto i ta ratou maimiraa i “te taata o te tuatapaparaa ra o Iesu,” e rave rau aivanaa te parau e mea feruri-noa-hia te mau faatiaraa Evanelia o te menema aita e taata to roto e te mau faraa a Iesu i muri aˈe i to ˈna tia-faahou-raa, ua hamanihia te reira ua maoro i muri aˈe i to ˈna poheraa no te paturu i te tahi mau parau no nia i to ˈna mana i te raˈi.

Ei hiˈoraa, a tapao na i te mau manaˈo o te aivanaa Heremani ra o Gerd Lüdemann, orometua haapii i te Faufaa Apî tei papai i te buka What Really Happened to Jesus—A Historical Approach to the Resurrection. Te parau ra oia e “e parau niu ore” te tia-faahou-raa o Iesu e tia i te taata atoa e “hiˈoraa aivanaa” to ratou “i te ao” ia patoi atu.

Te parau ra te orometua haapii ra o Lüdemann e e orama noa ta te aposetolo Petero i ite a fa ˈtu  ai te Mesia i faatiahia mai ia ˈna ra, no to Petero oto rahi e tatarahapa i te hunaraa ia Iesu. E ia au ia Lüdemann, e tupuraa “horuhoru roa” te faraa ˈtu Iesu i na 500 e tiahapa feia faaroo i te hoê taime. (Korinetia 1, 15:5, 6) Ei haapotoraa, mea rahi te mau aivanaa e faariro ra i te mau aamu bibilia no nia ia Iesu tei faatiahia ei anairaa tupuraa manaˈo-noa-hia tei faatupu i te pae varua i te tiaturi apî ia ratou iho e te itoito no te ohipa mitionare i roto i te mau pǐpǐ.

Parau mau, mea iti o te haapao atu i te mau mârôraa aivanaa. Tera râ, e tia ia anaanatae tatou paatoa i te hoê faahohonuraa i te tia-faahou-raa o Iesu. No te aha? No te mea mai te peu e aita oia i faatiahia mai, ua niuhia ïa te Kerisetianoraa i nia i te parau haavare. I te tahi aˈe pae, mai te peu e ua tupu mau iho â te tia-faahou-raa o Iesu i roto i te tuatapaparaa, ua niuhia ïa te Kerisetianoraa i nia i te parau mau. I roto i taua mau tupuraa ra, e ere noa ïa te mau parau a te Mesia te faatiahia, ta ˈna atoa râ mau parau tǎpǔ. Hau atu â, mai te peu e te vai ra te tia-faahou-raa, e ere ïa o te pohe te upootia rahi, o te enemi râ e nehenehe e pau.—Korinetia 1, 15:55.

[Faaiteraa i te fatu o te hohoˈa i te api 3]

No roto mai i te huriraa Self-Pronouncing Edition of the Holy Bible, to roto te King James Version e te Revised Version