Ua faanaho Paulo i te ohiraa ô no te tauturu i te feia moˈa

O TE mau faufaa pae varua te mea matamua ta te mau Kerisetiano mau e haapao. Mea faufaa atoa râ na ratou e haapao i te maitairaa i te pae tino o vetahi ê. Ua haapao pinepine ratou i te feia e faaruru ra i te fifi. Na te aroha taeae e turai i te mau Kerisetiano ia tauturu i te mau hoa faaroo e ere ra.—Ioane 13:34, 35.

No to ˈna aroha i to ˈna mau taeae e mau tuahine pae varua i faanaho ai te aposetolo Paulo i te hoê ohiraa faufaa i roto i te mau amuiraa i Ahaia, Galatia, Makedonia, e te mataeinaa o Asia. No te aha hoi? Nafea te faanahoraahia te porotarama tautururaa? Ua nafea te taata? E no te aha tatou e anaanatae ai i te ohipa i tupu?

Te tupuraa o te amuiraa no Ierusalema

I muri aˈe i te Penetekose 33 T.T., ua faaea ˈtu te mau ati Iuda e te mau peroseluto no te tahi mau vahi mai tei riro mai ei pǐpǐ i te Penetekose, i Ierusalema no te tahi area taime no te ite hau atu â no nia i te faaroo mau. Ia titauhia ra, ua tauturu te mau hoa haamori ma te oaoa i te haapao i taua faaearaa mai roa ra. (Ohipa 2:7-11, 41-44; 4:32-37) Ua faatupu paha te arepurepuraa tivira i te ereraa rahi atu â a faanaho ai te mau ati Iuda here aiˈa i te hoê orureraa hau e te faahuehueraa. Ia ore râ hoê noa ˈˈe pǐpǐ a te Mesia e pohe i te poia, ua tufahia te mau taoˈa na te mau ivi e ere ra i te mau mahana atoa. (Ohipa 6:1-6) Ua hamani ino uˈana o Heroda iho i te amuiraa, e i ropu i te mau matahiti 40 T.T., ua tupu te oˈe i Iudea. Te mau faahopearaa o teie mau mea atoa i nia i te mau pǐpǐ a Iesu, e “pohe” ïa, e “ati rahi,” e e “haruraa i ta [ratou] taoˈa,” ia au i ta Paulo i parau.—Hebera 10:32-34; Ohipa 11:27–12:1.

I te area 49 T.T., mea ino noâ te tupuraa. No reira, i muri aˈe i te faaauraa i te parau e e haapao o Paulo i te mau Etene i roto i ta ˈna pororaa, ua faaitoito o Petero, Iakobo, e o Ioane ia ˈna ia ‘haamanaˈo i te taata rii.’ Tera ïa te ohipa ta Paulo i tutava i te rave.—Galatia 2:7-10.

Te faanahoraa i te ohiraa faufaa

Na Paulo i tiaau i te hoê afata faufaa no te mau Kerisetiano veve i Iudea. I te area 55 T.T., ua na ô oia i to Korinetia e: “I te parau i te taoˈa aufau na te feia moˈa ra, o ta ˈu â hoi i poroi i te mau [amuiraa] i Galatia ra, e na reira atoa outou. Ia tae [i] te mahana matamua o te hebedoma ra, e vaiiho aˈe outou atoa e ati noa ˈˈe i te tahi pae moni i roto i te vairaa ra, ia au i ta te Atua haamanuïaraa ia ˈna ra . . . O te au râ ia outou ra, o ta ˈu ïa e tono ma te leta ei hopoi  i ta outou taoˈa horoa noa i Ierusalema.” (Korinetia 1, 16:1-3; MN) Hoê matahiti i muri aˈe, ua parau o Paulo e te amui maira o Makedonia e o Ahaia. E i te haponoraahia te faufaa i noaa mai i Ierusalema, e au ra e te faaite ra te tiaraa ˈtu te vetahi pae no te mataeinaa o Asia e ua tauturu atoa mai te mau amuiraa no taua tuhaa fenua ra.—Ohipa 20:4; Korinetia 2, 8:1-4; 9:1, 2.

Aita hoê aˈe i faahepohia ia horoa hau aˈe i tei maraa ia ˈna. Ia faito maoti, ia riro ta ratou taoˈa rahi ei turu atu i te feia moˈa i roto i te veve i Ierusalema e i Iudea. (Korinetia 2, 8:13-15) “E horoa te taata atoa i ta ˈna i opua i roto i to ˈna aau,” ta Paulo ïa i parau, “eiaha ma te nounou, e mai te mea e no te titau: o te taata horoa noa hoi ta te Atua e hinaaro.”—Korinetia 2, 9:7.

Ua faaite te aposetolo i te tahi tumu maitai e horoa noa ˈi, i to Korinetia. ‘No ratou i riro mai ai Iesu ei veve, ia rahi ta ratou taoˈa’ i te pae varua. (Korinetia 2, 8:9) Eita e ore e ua hinaaro ratou e pee i to ˈna huru feruriraa horoa noa. Hau atu â, i te mea e ua faataoˈa te Atua ia ratou “no te mau horoaraa atoa,” e tano maitai ïa ia tauturu ratou i te haapao i te mau hinaaro o te feia moˈa.—Korinetia 2, 9:10-12.

Huru o te feia i apiti

E nehenehe tatou e haapii rahi mai no nia i te horoa-noa-raa na roto i te hiˈopoaraa i te huru o te feia i apiti i roto i te porotarama tautururaa i te feia moˈa no te senekele matamua. Aita noa te ohiraa faufaa e faaite ra i te tapitapi no te mau hoa haamori ia Iehova e vevehia ra. Te auraa atoa râ, e taairaa taeae to rotopu i te mau Kerisetiano ati Iuda e Etene. Te auraa o te pûpûraa e te fariiraa i te mau ô, o te auhoêraa ïa e te auhoaraa i rotopu i teie mau Etene e mau ati Iuda. Ua tufa ratou i te pae materia e i te pae varua atoa.—Roma 15:26, 27.

I te omuaraa, aita o Paulo i ani i te mau Kerisetiano no Makedonia ia horoa atoa—mea veve roa atoa hoi ratou. Ua ‘parau onoono noa râ ratou e e horoa atoa ratou.’ Inaha, noa ˈtu e te faaruru ra ratou i ‘te veve e te pohe rahi,’ ua horoa ‘rahi atu â ratou i tei tia ia ratou’ ma te oaoa! (Korinetia 2, 8:1-4) E au ra e to roto atoa te mau pariraa e te pee ra ratou i te hoê haapaoraa tia ore i te aro o to Roma, i to ratou tamataraa rahi. Te taa ra ïa ia tatou e ua aroha ratou i to ratou mau taeae no Iudea, e faaruru ra i te hoê â mau fifi.—Ohipa 16:20, 21; 17:5-9; Tesalonia 1, 2:14.

Noa ˈtu e ua faahiti o Paulo i te itoito matamua o to Korinetia no te ohiraa faufaa no te faaitoito i to Makedonia, ua iti mai te aau tae i Korinetia. I teie nei, te faahiti ra te aposetolo i te aau horoa o to Makedonia no te faaitoito i to Korinetia. Ua taa ia ˈna e mea titauhia ia haamanaˈo oia ia ratou e tera te taime e faaoti ai ratou i te ohipa ta ratou i haamata na hoê matahiti na mua ˈtu. Eaha tei tupu?—Korinetia 2, 8:10, 11; 9:1-5.

Ua haamata o Tito i te ohiraa faufaa i Korinetia, ua tupu mai râ te tahi mau fifi o tei faataupupu i ta ˈna mau tutavaraa. I muri aˈe i to raua Paulo paraparauraa i Makedonia, ua hoˈi o Tito e e piti taeae e faaitoito i te amuiraa i Korinetia e e faaoti i te ohiraa faufaa. Ua manaˈo paha vetahi pae e i tamata na Paulo i te taviri i to Korinetia. No reira paha oia i tono ai e toru tane e faaoti i te ohiraa faufaa e i horoa ˈi i te tahi mau aˈoraa na ratou taitahi. “Te ara nei hoi matou i teie, ia ore roa te hoê ia faaino mai ia matou i taua taoˈa rahi i tuuhia ˈtu e matou  nei,” ta Paulo ïa i parau. “I te haapao-atea-maite-raa i te mea tia, eiaha i mua i te aro o te Fatu anaˈe ra, i mua atoa râ i te aro o te taata.”—Korinetia 2, 8:6, 18-23; 12:18.

Te opereraa i te mau ô

I te tau uaaraa tiare 56 T.T., ua ineine te moni i pûpûhia i te afaihia i Ierusalema. Ua apee o Paulo i te pǔpǔ tia i maitihia e te feia horoa. Te na ô ra te Ohipa 20:4 e: “Ua amui maira Sopatero i Berea ra i to ˈna tere, e Asia; to Tesalonia ra, o Arisetareho ïa e Sekunedo; to Derebe ra, o Gaio ïa e o Timoteo hoi; to Asia ra, o Tuhiko ïa e o Terophimo.” E au ra e o Luka atoa to roto ia ratou, na ˈna paha i tia ˈtu no te mau Kerisetiano i Philipi. No reira, e iva aˈe taata tei rave i teie ohipa faauehia.

“Eita e ore e e moni rahi tei haaputuhia no te ohiraa faufaa,” ta te aivanaa ra o Dieter Georgi ïa e parau ra, “no te mea aita i faufaa ore te mau tutavaraa hopea, ta Paulo atoa e te mau tia e rave rahi roa, no te tahi fifi e haamâuˈaraa.” Aita noa te pǔpǔ i maitihia no te haapapu i te panoonoo ore, no te paruru atoa râ ia Paulo i te mau huru pariraa atoa i te ohipa taviri. Ua tia ˈtu te feia i tonohia no te mau amuiraa Etene i mua i te feia moˈa i Ierusalema.

Ma te fano mai Korinetia ˈtu e i Suria, e tae atu te pǔpǔ i Ierusalema hou te oroa Pasa. Ua taui râ te faanahoraa i te moemoeraahia e taparahi ia Paulo. (Ohipa 20:3) Peneiaˈe ua opua to ˈna mau enemi e taparahi ia ˈna i nia i te moana.

E mau tapitapiraa ê atu to Paulo. Hou a reva ˈi, ua papai atu oia i te mau Kerisetiano i Roma ia pure ratou e ‘ia ora oia i te feia faaroo ore i Iudea ra, e ta ˈna e rave nei na to Ierusalema ra, ia farii-maitai-hia mai e te feia moˈa ra.’ (Roma 15:30, 31) Eita e ore e ua farii te feia moˈa i te mau ô ma te mauruuru rahi, ua tapitapi râ paha o Paulo no te peapea ta to ˈna taeraa ˈtu e nehenehe e faatupu i rotopu i te ati Iuda atoa.

Papu maitai e ua haamanaˈo te aposetolo i te feia rii. Aita te mau Papai e faaite ra afea te mau ô i te horoaraahia, atira noa ˈtu, ua faatupu to ˈna opereraa i te auhoêraa e ua nehenehe te mau Kerisetiano Etene e faaite i te mauruuru no te mau taoˈa pae varua ta to ratou mau hoa faaroo no Iudea i horoa ˈtu. Ua faatupu to Paulo haereraa i te hiero i muri iti aˈe i to ˈna taeraa ˈtu i Ierusalema i te hoê faahuehueraa e ua haruhia oia. I muri aˈe râ, ua nehenehe oia e poro i te mau tavana e te mau arii.—Ohipa 9:15; 21:17-36; 23:11; 24:1–26:32.

Ta tatou mau ô i teie mahana

Mai te senekele matamua mai, mea rahi te mau mea i taui—eiaha râ te mau faaueraa tumu. E faaara-maitai-hia te mau Kerisetiano no nia i te mau hinaaro i te pae moni. Mea maitai ia horoa ratou ma te aau tae i te mau huru ô atoa na te feia e ere ra, ma te turaihia e te here i te Atua e te taata-tupu.—Mareko 12:28-31.

Te faaite ra te mau ravea tautururaa i faanahohia no te feia moˈa i te senekele matamua ra e mea titauhia ia faanaho maitai e ia afaro roa te haapaoraa i taua mau ô ra. Parau mau, ua ite te Atua ra o Iehova i te mau mea e hinaarohia, e te rave ra oia i te mau faanahoraa no ta ˈna mau tavini ia nehenehe noa ratou e faaite i te parau apî maitai o te Basileia ia vetahi ê noa ˈtu te mau haafifiraa. (Mataio 6:25-34) E nehenehe râ ta tatou paatoa e rave i ta tatou tuhaa, noa ˈtu eaha to tatou huru tupuraa i te pae moni. Mea na reira ïa “tei noaa te mea rahi ra aita ta ˈna i rahi, e tei noaa te mea iti ra aita ta ˈna i iti.”—Korinetia 2, 8:15.