“Ua tia mau â te Fatu i nia”

A feruri na i te oto rahi o te mau pǐpǐ a Iesu a haapohehia ˈi to ratou Fatu. E au ra e ua pohe roa to ratou tiaturiraa mai te tino ta Iosepha no Arimataio i tuu i roto i te menema. Ua pohe atoa te mau tiairaa atoa e e faatiamâ Iesu i te mau ati Iuda i te zugo Roma.

AHIRI e ua oti ïa parau, ua moe paha ïa te mau pǐpǐ a Iesu mai te mau pǐpǐ a te mau faahua Mesia e rave rahi. Te ora ra râ Iesu! Ia au i te mau Papai, ua fa ˈtu oia i ta ˈna mau pǐpǐ ra e rave rahi taime i muri iti noa ˈˈe i to ˈna poheraa. No reira vetahi o ratou i turaihia ˈi ia parau: “Ua tia mau â te Fatu i nia.”—Luka 24:34.

Ua titauhia ia paruru te mau pǐpǐ i to ratou faaroo ia Iesu ei Mesia. A na reira ˈi ratou, te faaite taa ê ra ratou e o to ˈna tia-faahou-raa mai te pohe mai te haapapuraa mau i to ˈna tiaraa Mesia. Oia mau, “uˈana maite atura to te mau aposetolo faaiteraa ˈtu i te tia-faahou-raa mai o te Fatu ra o Iesu.”—Ohipa 4:33.

Ahiri e ua haapapu aˈenei te hoê e e haavare teie tia-faahou-raa—peneiaˈe ma te rave e ia faˈi te hoê o te mau pǐpǐ e tera iho â aore ra ma te faaite e to roto noa te tino o Iesu i te menema—e ore ïa te Kerisetianoraa e manuïa i te omuaraa. Aita râ. Ua ite te mau pǐpǐ a Iesu e te ora ra te Mesia, no reira ratou i faaite haere ai i to ˈna tia-faahou-raa na te mau vahi atoa, e mea rahi tei riro mai ei feia faaroo i te Mesia tei faatiahia mai.

 No te aha outou atoa e nehenehe ai e tiaturi i te tia-faahou-raa o Iesu? Eaha te haapapuraa e ua tupu iho â te reira?

No te aha e hiˈo ai i te haapapuraa?

O na Evanelia e maha atoa ra te faatia ra i te tia-faahou-raa o Iesu. (Mataio 28:1-10; Mareko 16:1-8; Luka 24:1-12; Ioane 20:1-29) * Mea papu maitai te tia-faahou-raa o te Mesia mai te pohe mai i roto i te tahi atu â mau tuhaa o te mau Papai Heleni Kerisetiano.

E ere i te mea maere e ua faaite haere te mau pǐpǐ i te tia-faahou-raa o Iesu! Mai te peu e ua faahoˈi mai iho â te Atua ia ˈna i te ora, e parau apî maere roa ˈˈe teie ta te ao i faaroo aˈenei. E tapao faaite ïa e te vai mau ra te Atua. E tapao faaite atoa e te ora ra Iesu i teie iho nei.

Eaha te faufaaraa o te reira no tatou? Ua pure Iesu e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) Oia, e nehenehe e noaa mai ia tatou te ite faaora ia Iesu e i to ˈna Metua. Na roto i te faaohiparaa i taua ite ra, noa ˈtu e e pohe tatou, e nehenehe tatou e faatiahia mai, no te mea ua faatiahia mai o Iesu. (Ioane 5:28, 29) E nehenehe e noaa mai ia tatou te tiaturiraa o te ora mure ore i nia i te hoê fenua paradaiso i raro aˈe i te Basileia o te Atua i te raˈi e faaterehia e ta ˈna Tamaiti faahanahanahia, o Iesu Mesia, te Arii o te mau arii.—Isaia 9:6, 7; Luka 23:43; Apokalupo 17:14.

No reira, mea faufaa roa te uiraa ua faatiahia mai anei Iesu mai te pohe mai. E ohipa te reira i nia i to tatou oraraa i teie nei e to tatou tiaturiraa no te tau a muri aˈe. Te ani atu nei ïa matou ia outou ia faahohonu e maha haapapuraa e ua pohe e ua faatiahia mai o Iesu.

Ua pohe mau â Iesu i nia i te pou

E parau te tahi mau taata tiaturi ore e noa ˈtu â e ua patǐtǐhia oia, aita mau â Iesu i pohe i nia i te pou. No ratou, ua fatata noa oia i te pohe e ua ora faahou mai maoti te haumǎrû o te menema. Te haapapu ra râ te mau parau faataa atoa e vai ra e o te tino ora ore o Iesu tei tuuhia i roto i te menema.

I te mea e ua haapohehia o Iesu i mua i te taata, te vai ra ïa tei ite mata roa e ua pohe mau â oia i nia i te pou. Na te raatira hanere, tei haapao i te haapoheraa, i haapapu i to Iesu poheraa. Mea aravihi taua raatira faehau ra, o ta ˈna atoa ohipa te faataaraa e ua pohe mau anei te taata. Hau atu â, i muri aˈe noa i te haapapuraahia e ua pohe Iesu to te tavana Roma ra o Ponotio Pilato horoaraa i te tino o Iesu na Iosepha no Arimataio e huna.—Mareko 15:39-46.

Te menema aita e taata to roto

O te menema aita e taata to roto te haapapuraa matamua no te mau pǐpǐ e ua faatiahia mai o Iesu, e aita teie haapapuraa i patoi-noa ˈˈe-hia. Ua hunahia o Iesu i roto i te hoê menema apî tei ore i faaohipahia aˈenei. Tei pihai iho te menema i te vahi i patǐtǐhia ˈi oia e i taua tau ra, e ite-maitai-hia taua vahi ra. (Ioane 19:41, 42) E tu te mau faatiaraa Evanelia atoa e i to te mau hoa o Iesu taeraa ˈtu i te menema i te piti o te poipoi i muri aˈe i to ˈna poheraa, aita faahou to ˈna tino.—Mataio 28:1-7; Mareko 16:1-7; Luka 24:1-3; Ioane 20:1-10.

Ua maere te mau enemi o Iesu, mai to ˈna mau hoa atoa, e aita e taata to roto i te menema. I tutava maoro na to ˈna mau enemi i te rave e ia haapohehia e ia tanuhia oia. I te tupuraa ta ratou opuaraa, ua ara ratou e ia tiaihia e ia tapirihia te menema. I te poipoi râ o te mahana matamua o te hebedoma, aita e taata i roto i te menema.

Ua rave anei te mau hoa o Iesu i to ˈna tino i roto i te menema? Eita e ore e aita, te faaite ra hoi te mau Evanelia e e oto i te rahi to ratou i muri  aˈe i to ˈna haapoheraahia. Hau atu â, eita paha ta ˈna mau pǐpǐ e faaruru i te hamani-ino-raa e te pohe no te hoê mea ta ratou i ite e e ohipa haavare.

Na vai i rave i te tino? O te mau enemi o Iesu te manaˈo-ore-roa ˈˈe-hia e na ratou i rave i te tino. Ahiri e ua na reira iho â ratou, ia maoro aˈe, ua faaite mai ïa ratou i te tino no te patoi i te mau parau a te mau pǐpǐ e ua faatiahia mai o Iesu e te ora ra oia. Aita râ hoê aˈe mea mai te reira i tupu, no te mea na te Atua i rave i te tino.

Tau hebedoma i muri aˈe, aita te mau enemi o Iesu i pahono noa ˈˈe ma te patoi rahi i to Petero parauraa e: “E te mau taata o Iseraela nei, e faaroo mai outou i teie nei parau; o Iesu o Nazareta, o te taata i tiahia e te Atua, i rotopu ia outou i te mau ohipa mana e te semeio, e te mau tapao ta te Atua i rave ia ˈna i ropu ia outou nei, ua ite atoa hoi outou iho na. Oia râ i tuuhia mai ia outou i te opua mau e te haapao-atea-raa a te Atua, i noaa ˈi ia outou, [patǐtǐhia] ihora [i nia i te pou], e taparahi pohe roa ˈtura i te rima o te haapao ore ra. Oia hoi ta te Atua i faatia aˈenei, ua matara hoi ia ˈna te tapea ra o te pohe, e ore roa hoi oia e mau i te reira. Te parau maira hoi Davida ia ˈna e, Ua ite au i te Fatu e tia i mua i tau mata . . . E taoto atoa hoi tau tino ma te tiai; e ore hoi oe e vaiiho i tau [nephe] i hade, e ore hoi oe e tuu i to mea moˈa ra ia tahuti noa na.”—Ohipa 2:22-27; MN.

Mea rahi tei ite mata ia Iesu tei faatiahia mai

I roto i te buka Ohipa, ua na ô te papai Evanelia ra o Luka e: “O ta [Iesu] atoa ïa i faaite ia ˈna iho [i te mau aposetolo] i te oraraa, i muri aˈe i tana poheraa, ma te tapao hapa ore e rave rahi ra; e maha hoi ahururaa o ˈna rui i te hiˈohiˈoraahia e ratou, e te parauraa oia ia ratou i te parau o te basileia o te Atua.” (Ohipa 1:2, 3) Tau pǐpǐ tei ite mata ia Iesu tei faatiahia mai e rave rau taime—i roto i te hoê aua, i nia i te purumu, i te hoê taime tamaaraa, i te miti i Tiberia.—Mataio 28:8-10; Luka 24:13-43; Ioane 21:1-23.

Te mârô ra te feia faahapa i te parau mau o teie mau faraa. Te parau ra ratou e ua hamani te feia papai i te mau faatiaraa, aore ra te faahiti ra i te tahi mau mea e au ra e mea taa ê roa i roto i te reira. Oia mau, te haapapu ra te mau taa-ê-raa haihai i roto i te mau faatiaraa Evanelia e aita e faaauraa parau. E rahi atu â to tatou ite ia Iesu ia horoa te hoê taata papai i te tahi mau parau rii hau no nia i te tahi mau ohipa i tupu i roto i te oraraa o te Mesia i te fenua nei.

Ua hape anei te mau mata i te iteraa i te mau faraa o Iesu i muri aˈe i to ˈna tia-faahou-raa? Eita e nehenehe e tiaturi i te mau huru haaferuriraa atoa no te haapapu i teie parau, i te mea e mea rahi roa te taata i ite mata ia ˈna. Te vai ra te mau taata ravaai, te mau vahine, te hoê taata toroa, tae noa ˈtu te aposetolo e feaa ra o Toma, tei papu roa te manaˈo i to ˈna noa iteraa ˈtu i te haapapuraa eita e nehenehe e patoihia e ua faatiahia mai Iesu mai te pohe mai. (Ioane 20:24-29) E rave rahi taime, aita te mau pǐpǐ a Iesu i ite oioi e o to ratou Fatu i faatiahia mai tera. I te hoê taime, e 500 e tiahapa taata tei ite mata ia ˈna, te ora noa ra te rahiraa a faahiti ai te aposetolo Paulo i te reira parau ei haapapuraa i roto i ta ˈna parururaa i te tia-faahou-raa.—Korinetia 1, 15:6.

Te ohipa ra o Iesu e ora ra i nia i te taata

E ere te tia-faahou-raa o Iesu i te hoê noa tumu parau o te faatupu i te anoenoe aore ra te mârôraa.  Ua ohipa maitai te parau ra e te ora ra oia i nia i te taata i te mau vahi atoa. Mai te senekele matamua mai, e rave rahi roa taata, mea tâuˈa ore hoi aore ra mea patoi roa ratou na mua ˈˈe, tei farii i te Kerisetianoraa ma te tiaturi papu roa e tera te haapaoraa mau. Maoti te aha i taui ai ratou? Ua haapapu te hoê haapiiraa i te mau Papai ia ratou e ua faahoˈi mai te Atua ia Iesu i te ora ei varua hanahana i nia i te raˈi. (Philipi 2:8-11) Ua faatupu ratou i te faaroo ia Iesu e i te faanahoraa a te Atua ra o Iehova oia te faaoraraa maoti te tusia taraehara a te Mesia. (Roma 5:8) Ua itea mai i taua mau taata ra te oaoa mau na roto i te raveraa i te hinaaro o te Atua e te oraraa ia au i te mau haapiiraa a Iesu.

A hiˈo na eaha te auraa e riro ei Kerisetiano i te senekele matamua. Aita e apî to te tiaraa teitei, te mana, aore ra te faufaa. Area râ, mea rahi te mau Kerisetiano matamua ‘tei farii noa i te haruraa i ta ratou taoˈa ma te oaoa’ no to ratou faaroo. (Hebera 10:34) I roto i te Kerisetianoraa, mea titauhia ia ora i te hoê oraraa haapae e ma te hamani-ino-hia, mea rahi hoi tei pohe no te faaroo.

Hou a riro ai ei pǐpǐ a te Mesia, e mau tiaturiraa maitatai to vetahi pae no nia i te tiaraa teitei e te faufaa. Ua haapiihia o Saulo no Tareso e te haapii Ture tuiroo ra o Gamaliela e te haamata ra oia i te riro ei taata taa ê mau no te mau ati Iuda. (Ohipa 9:1, 2; 22:3; Galatia 1:14) Tera râ, ua riro mai o Saulo ei aposetolo Paulo. Ua faarue oia e e rave rahi atu â i te tiaraa teitei e te mana ta teie ao e pûpû ra. No te aha? No te haaparare i te poroi o te hoê tiaturiraa mau niuhia i nia i te mau parau tǎpǔ a te Atua e i nia i te mea ra ua faatiahia mai o Iesu Mesia mai te pohe mai. (Kolosa 1:28) Ua ineine ratou i te mauiui no te hoê tumu ta ratou i ite e ua niuhia i nia i te parau mau.

Mai tera atoa no te mau mirioni taata i teie mahana. E nehenehe outou e ite ia ratou i roto i te mau amuiraa a te mau Ite no Iehova na te ao nei. Te titau manihini maitai atu nei te mau Ite ia outou i te oroa matahiti o te poheraa o te Mesia, o te tupu i muri aˈe i te toparaa mahana i te Tapati 8 no Eperera 2001. E oaoa ratou ia tae mai outou i taua oroa ra e i ta ratou mau putuputuraa atoa no te haapiiraa bibilia i ta ratou mau Piha a te Basileia.

No te aha e ore ai e haapii hau atu â, eiaha noa no nia i te pohe e te tia-faahou-raa o Iesu, no nia atoa râ i to ˈna oraraa e ta ˈna mau haapiiraa? Te titau manihini maira oia ia tatou ia haere ia ˈna ra. (Mataio 11:28-30) A haa i teie nei ia noaa mai te ite mau i te Atua ra o Iehova e ia Iesu Mesia. Ia na reira outou, e fanaˈo ïa outou i te ora mure ore i raro aˈe i te Basileia o te Atua e faaterehia e ta ˈna Tamaiti here.

[Nota i raro i te api]

[Hohoˈa i te api 7]

E mau mirioni taata tei itea mai ia ratou te oaoa mau ei mau pǐpǐ a Iesu Mesia

[Faaiteraa i te fatu o te hohoˈa i te api 6]

No roto mai i te huriraa Self-Pronouncing Edition of the Holy Bible, to roto te King James Version e te Revised Version