Te faatia ra te feia poro i te Basileia

Inidia—Te hoê “auhoêraa i roto i te huru rau”

“AUHOÊRAA i roto i te huru rau,” e poroi matauhia teie no te faataa i te tahoêraa te fenua i Inidia. E ere i te ohipa nainai te faatupuraa i te auhoêraa i roto i teie fenua rahi ua rau roa te taˈere, te reo, te haapaoraa, te nunaa, te ahuraa, e te maa. Te itehia ra râ taua auhoêraa ra i te piha tiaauraa a te mau Ite no Iehova i Inidia, noa ˈtu e no te mau hau e te mau tuhaa fenua amui e rave rahi na rima tauturu e faaea ra e e haa ra i reira, e e paraparau ratou i te tahi mau reo taa ê.

• E farerei tatou ia Rajrani—te hoê vahine apî no te Pendjab, i te pae apatoerau tooa o te râ roa o Inidia. Te haere noa ra o Rajrani i te haapiiraa i haamata ˈi te hoê o to ˈna mau hoa haapiiraa i te haapii i te Bibilia e te mau Ite no Iehova. Ua tamata teie potii i te rave e ia anaanatae o Rajrani i te Bibilia. I te mea e e ere te hoa haapiiraa i te mea ite roa i te reo Beretane e aita e Pare Tiairaa na roto i te reo Pendjabi i taua tau ra, ua ani atoa oia i te tauturu a Rajrani no te huri i te mau mea i papaihia i roto i te vea no ˈna. Ua haamata ˈtura te mea ta Rajrani i taio i roto i Te Pare Tiairaa i te ohipa roa i nia ia ˈna, e noa ˈtu te patoiraa a to ˈna mau metua, ua tae roa oia i te pûpû i to ˈna oraraa na te Atua ra o Iehova. I teie mahana, te tavini ra oia i te Betela no Inidia, e te rave ra oia i te mea iho i ite ai oia i te parau mau. E huri oia i te mau papai Kerisetiano na roto i te reo Pendjabi!

• A hiˈo atoa na ia Bijoe, no te tahi atu fenua i Inidia—te hau apatoa tooa o te râ o Kerala. Ua tiavaruhia o Bijoe i rapaeau i te haapiiraa tuarua no to ˈna oreraa e amui i roto i te mau oroa here aiˈa. I muri aˈe i te hoê haavaraa roa tei hope ma te hoê upootiaraa eita e moehia no te haamoriraa viivii ore, ua hoˈi faahou o Bijoe i te haapiiraa. * Ua haere atoa oia i te haapiiraa tuatoru. No te mea râ e te peapea ra to ˈna manaˈo haava no te tupuraa morare ore i ǒ, ua faarue oia i te haapiiraa i na avaˈe matamua e toru. I teie nei, i muri aˈe hoê ahuru matahiti i te Betela, te manaˈo ra oia e ua faufaa-rahi-aˈe-hia oia i te riroraa ei melo o te utuafare rau e te tahoê râ o te Betela, i te tapiraa i te haapiiraa teitei.

• E 70 e tiahapa matahiti to Norma raua o Lily e e vahine ivi raua ehia matahiti i te maoro. Ua haa raua toopiti atoa ra e hau atu i te 40 matahiti i roto i te taviniraa taime taatoa. I haa na o Lily i te amaa fatata e 20 matahiti i te maoro ei huri parau ei reo Tamoul. Ua haere o Norma i te Betela 13 matahiti aˈenei i muri aˈe i te poheraa ta ˈna tane. E hiˈoraa maitai raua ei mau rave ohipa itoito e te haapao maitai e e mana tahoê to raua i nia i te utuafare taatoa o te Betela. Mea au na raua e faaarearea i te mau ratere, e mea oaoa na raua e amui e te mau melo api aˈe o te utuafare, e e aparau atu no nia i te mau oaoa o te oraraa Kerisetiano ehia matahiti i te maoro. Area te feia apî ra, e titau manihini ïa ia raua i roto i to ratou piha no te faahoa e te horoa i te rima tauturu ia hinaarohia. E mau hiˈoraa maitai mau teie!

I te mea e ua upootia ratou i nia i te mau taa-ê-raa o te faatupu i te amahamaharaa e te mârôraa i te mau vahi e rave rahi, te haa amui nei teie mau rima tauturu ma te oaoa i te tavini ia vetahi ê ei melo o te utuafare tahoê o te Betela i Inidia.—Salamo 133:1.

[Nota i raro i te api]

[Faaiteraa i te fatu o te hohoˈa i te api 8]

I muri mai: Mountain High Maps® Copyright © 1997 Digital Wisdom, Inc.