Te manaˈo ra anei outou e aita outou e taahia ra?

TE AHOAHO ra o Antonio. Ua toetoe taue to ˈna hoa rahi o Leonardo i nia ia ˈna ma te ore e taahia. * Tau taime, aita te mau aroharaa ˈtu a Antonio i tâuˈahia mai, e ia farerei raua, e au ra i teie nei e e patu to rotopu ia raua. Ua haamata o Antonio i te mǎtaˈu e ua rave aore ra ua parau paha oia i te hoê mea aita i taa i to ˈna hoa. Eaha râ ïa?

E tupu pinepine te mau taa-ore-raa. Mea haihai te rahiraa e mea ohie ia faaafaro atu. E inoino roa te taata i te tahi atu, ia tamau noa iho â râ te mau manaˈo hape noa ˈtu te mau tutavaraa atoa no te faaore i te reira. Eaha te tumu e tupu mai ai te mau taa-ore-raa? Nafea te reira e ohipa ˈi i nia i te feia e roohia ra i te reira? Eaha ta outou e nehenehe e rave ia taa ore ia vetahi ê te hoê mea ta outou e rave ra? Mea faufaa anei hoi to vetahi ê manaˈo ia outou?

Te hoê tupuraa eita e nehenehe e apehia

I te mea e eita ta vetahi ê e nehenehe e ite i roto i to tatou mau manaˈo e ta tatou mau opuaraa, te vai ra iho â te hoê taime e tatara hape ai te hoê taata i ta tatou mau parau aore ra ta tatou mau ohipa. Mea rahi te mau ravea e tupu mai ai te mau taa-ore-raa. I te tahi mau taime, aita noa tatou i faaite i to tatou mau manaˈo ma te maramarama e te tano i hinaarohia. No te maniania e te tahi atu mau faanevanevaraa, mea fifi roa paha no vetahi ê e faaroo mai ia tatou.

E pinepine atoa i te tatara-hape-hia te tahi mau huru raveraa e mau peu. E parau-hape-hia te hoê taata mamahu, ei hiˈoraa, ei toetoe, ei tâuˈa ore, aore ra ei teoteo. E faatupu paha te tahi mau mea i farereihia i mutaa iho i te huru hitahita o te aau eiaha râ i te huru ferurihia i mua i te tahi mau tupuraa. No te mau taa-ê-raa o te taˈere e o te reo, eita iho â e taa i te taata te tahi i te tahi mai tei manaˈohia. A amui mai i te faatiaraa hape e te parau faaino, e eiaha ïa tatou e maere e mea ê roa te auraa e manaˈohia o te tahi mau mea i tei opuahia i te  omuaraa. Mea iti roa iho â ïa te tamahanahanaraa ta teie mau mea atoa e horoa na te feia e manaˈo ra e ua tatara-hape-hia ta ratou mau opuaraa.

Ei hiˈoraa, ua parau o Anna i te hoê parau ino ore no nia i te mea e mea auhia te hoê hoa aita to reira. Ua faahitihia ˈtu ta ˈna parau eiaha râ ma te huru tupuraa mau, e i muri iho, ua maere e ua peapea o Anna i to taua hoa ra pariraa ia ˈna ma te riri i mua tau feia mataitai e te pohehae ra oia no te mea te tâuˈahia ra oia e te tahi hoa tane. Ua tatara-hape-roa-hia te parau a Anna, e ua pau ta ˈna mau tutavaraa e haapapu i to ˈna hoa e aita roa ˈtu oia i opua e faaino ia ˈna. Ua faatupu taua tupuraa ra i te mauiui rahi, e ua mairi rahi te taime hou o Anna a nehenehe ai e faaafaro roa ino i te taa-ore-raa.

Tei te huru e taa ˈi ia ratou ta outou mau opuaraa e haava ˈi vetahi ê ia outou. E inoino iho â ïa outou ia tatara hape te taata i to outou hinaaro. E riri paha outou, a manaˈo ai e aita e tumu e taa ore ai te hoê ia outou. Ia outou, mea faatia pae tahi, e faainoraa, aore ra mea hape roa taua mau haavaraa ra, e e nehenehe te reira e haamauiui roa ino—ia haafaufaa iho â râ outou i te manaˈo o te feia e faahiti ra i te mau haavaraa tia ore.

Noa ˈtu e e peapea paha outou no te huru e haava ˈi te taata ia outou, mea tano râ ia faatura i to vetahi ê manaˈo. Eita e tia i te Kerisetiano ia vahavaha i ta vetahi ê e manaˈo ra, e eita roa ˈtu tatou e hinaaro ia faaino ta tatou mau parau aore ra mau ohipa i te tahi atu taata. (Mataio 7:12; Korinetia 1, 8:12) No reira, i te tahi taime, e titauhia paha ia tamata outou i te faaafaro i to te hoê taata manaˈo hape ia outou. E ere râ i te mea maitai ia haapeapea rahi roa e ia farii-maitai-hia mai outou, e aratai hoi te reira i te ereraa i te faatura ia outou iho aore ra i te manaˈo e te apehia ra outou. Inaha hoi, e ere to outou faufaa mau tei to vetahi ê manaˈo.

I te tahi aˈe pae, e ite atu paha outou e mea tano te parau haava no nia ia outou. E haamauiui atoa te reira, ia tae râ to outou aau e farii ma te haavare ore i to outou mau hape, e tupu te faahopearaa maitai o te turai ia outou ia rave i te mau tauiraa hinaarohia.

Mau faahopearaa iino

E aratai atu paha te mau taa-ore-raa i te mau faahopearaa peapea aore ra eita. Ia faaroo outou i te hoê taata e paraparau puai ra i roto i te hoê fare tamaaraa, ei hiˈoraa, e manaˈo paha outou e e taata faaiteite roa tera i to ˈna huru. Ua hape paha outou. E nehenehe e riro e e tariˈa turi rii to te taata ta ˈna e paraparau atura. Aore ra peneiaˈe e au ra e mea au ore te hoê vahine hoo, teie râ, e maˈi rii paha to ˈna. Noa ˈtu e e faatupu teie mau taa-ore-raa i te mau manaˈo iino, eita mau paha te reira e horoa mai i te mau faahopearaa peapea aore ra maoro. I te tahi râ mau taime, e nehenehe te mau taa-ore-raa e faatupu i te ati. A hiˈo na e piti tupuraa o te aamu o Iseraela i tahito ra.

I to Nahasa, arii no Amona, poheraa, ua tono o Davida i te mau vea e tamahanahana i ta ˈna tamaiti o Hanuna tei haamata i te faatere ei mono i to ˈna metua tane. Ua tatara-hape-hia râ te tere o te mau vea ei tere hiˈo e te ino i to te ati Amona fenua, o tei turai ïa ia Hanuna ia faahaama na mua i te mau vea e i muri iho ia faatupu i te tamaˈi ia Iseraela. Ei faahopearaa, e 47 000 aˈe taata tei pohe—no te  hoê noa ïa taa-ore-raa i te mau opuaraa maitatai.—Paraleipomeno 1, 19:1-19.

Na mua ˈtu i roto i te aamu o Iseraela, ua faaafarohia te tahi atu taa-ore-raa ma te huru ê rii. Ua faatia te opu o Reubena e o Gada e to Manase i te hoê fata e ite-maitai-hia i pihai i te anavai Ioridana. Ua manaˈo te toea o Iseraela e e ohipa taiva tera, te hoê orureraa ia Iehova. Ua putuputu aˈera ratou no te tamaˈi. Hou a rave ai i te hoê mea etaeta, ua tono teie toea Iseraela i te mau vea e faaite i to ratou riri i tei manaˈohia e e ohipa taiva. Ua tano ratou i te na reiraraa, ua pahono hoi te feia i faatia i te fata e aita roa ˈtu ratou i opua e faarue i te haamoriraa viivii ore. Ua riro râ te fata ei haamanaˈoraa i to ratou haapao maitai ia Iehova. Fatata roa teie taa-ore-raa i te faatupu i te faataheraa toto, maoti râ te paari i apehia ˈi te mau faahopearaa riaria.—Iosua 22:10-34.

A faaafaro i te parau i roto i te here

E noaa mai te haapiiraa na roto i te faaauraa i teie mau aamu. Papu maitai, te ohipa maitai e rave, te faaafaroraa ïa i te parau. I roto i te aamu hopea i tauaparauhia, o vai te ite ehia rahiraa taata i faaorahia no te mea noa e ua paraparau na pae e piti? I roto i te rahiraa o te mau tupuraa, eita te taata e faaû i te ati ia ore e taa ia outou te mau opuaraa mau a te tahi atu taata, te auhoaraa râ, oia ïa. No reira, ia manaˈo outou e ua hape te hoê taata i nia ia outou, ua papu anei ia outou e ua taa ia outou te tupuraa mau, aore ra te tatara hape atura outou? Eaha tei turai i te tahi atu taata? A ui atu ia ˈna. Te manaˈo ra anei outou e aita outou e taahia ra? A tauaparau i te reira. Eiaha e vaiiho i te teoteo ia tapea ia outou.

Ua horoa Iesu i te faaitoitoraa maitai roa no te faaafaro i te mau taa-ore-raa: “E teie nei ia hopoi oe i ta oe taoˈa horoa noa i te fata ra, e ua manaˈo ihora oe i reira, e e hara ta to taeae ia oe na; e vaiiho atu i to taoˈa i mua i te fata ra, e mata na i te haere e faaite i to taeae, a haere a hopoi ai i ta oe taoˈa.” (Mataio 5:23, 24) Te ohipa e tia ia rave, te tapiri-omoe-raa ˈtu ïa i te taata ma te ore e faaô mai ia vetahi ê. Eita e tauturu ia faaroo na mua te taata i hara ia outou i ta outou autâraa i pihai iho i te tahi atu taata. (Maseli 17:9) Ta outou fa, ia faahau ïa i roto i te here. A faataa mǎrû noa i te fifi ma te mau parau maramarama, te ohie e te ore e pari. A faaite eaha to outou manaˈo i te tupuraa. A faaroo atu ai ma te tatara ore i to te tahi atu manaˈo. Eiaha e ru i te faahapa i te opuaraa. A ineine i te tiaturi e aita te tahi atu taata i opua i te mea ino. A haamanaˈo, e “faaroo” aore ra e tiaturi te here “i te mau mea atoa ra.”—Korinetia 1, 13:7.

Parau mau, noa ˈtu e ua faaafarohia te mau taa-ore-raa, e vai noa mai â paha te mau manaˈo mauiui aore ra te mau faahopearaa iino e te roa. Eaha te nehenehe e ravehia? Ia hinaarohia, e tano mau ia taparuparu ma te haavare ore, ma te rave atoa i te tahi atu mea o te nehenehe mau e ravehia no te faaafaro i te parau. I roto i te mau tupuraa atoa mai teie, mea maitai ia pee te taata i haamauiuihia i te aˈoraa i faauruahia: “E faaoromai te tahi i te tahi, e e faaore te tahi i ta te tahi hapa, ia pariraahia ta te tahi i te tahi; mai [ta Iehova] atoa i faaore i ta outou na, e na reira atoa outou: e ei nia roa iho i taua mau mea atoa nei, [a ahu i] te aroha o taua tatua nehenehe roa ra ïa.”—Kolosa 3:13, 14; Petero 1, 4:8; MN.

A vai tia ore noa ˈi tatou, e tupu noa iho â te taa-ore-raa e te manaˈo mauiui. E hape te taata atoa aore ra e paraparau ma te huru haapao ore aore ra te maitai ore. Te faaite ra te Bibilia e: “Te hapa nei hoi tatou atoa i te mau mea atoa e rave rahi. E ia ore te hoê taata ia hapa i te parau ra, e te taata parau-tia oia, e tia ia ˈna ia tapea i te tino atoa ra.” (Iakobo 3:2) I te mea e ua ite maite te Atua ra o Iehova i te reira, ua horoa mai oia i teie mau faaueraa: “Eiaha ia ru noa to aau i te riri, tei te opu o te maamaa ra te riri i te vai-maite-raa. Eiaha oe e haapao i te mau parau atoa i parauhia ra, o te ite hoi oe i to tavini i te faainoraa ia oe. Ua ite hoi to aau na, e rave rahi ta oe faainoraa ia vetahi ê.”—Koheleta 7:9, 21, 22.

 ‘Te imi maite ra Iehova i te mau aau o te taata nei’

Eaha ïa mai te peu e aita e ravea e afaro ai to te hoê taata manaˈo ino ia outou? Eiaha e hepohepo. A tamau i te faahotu e te faaite i te mau huru maitatai Kerisetiano ma te maitai roa ˈˈe. A ani ia Iehova e tauturu mai ia outou e haamaitai i tei hinaarohia. E ere roa ˈtu to outou faufaa mau ei taata tei vetahi ê. O Iehova anaˈe te nehenehe e “imi” ma te tano “i te mau aau o te taata nei.” (Maseli 21:2) Aita atoa Iesu i haafaufaa-rahi-hia e ua vahavahahia oia e te taata, aita râ te reira i taui i to Iehova manaˈo ia ˈna. (Isaia 53:3) Noa ˈtu e e haava hape te vetahi ia outou, e nehenehe ta outou “e ninii hua i to outou aau” i mau ia Iehova, ma te tiaturi e e taa ia ˈna to outou huru, “e ore hoi ta Iehova hiˈoraa e au i ta te taata; e hiˈo hoi te taata i te huru i rapae au aˈe, area o Iehova, e hiˈo ïa i te aau.” (Salamo 62:8; Samuela 1, 16:7) Ia tamau noa outou i te rave i te mea maitai, e nehenehe te feia i hamani i te manaˈo ino i nia ia outou e ite mai ia maoro rii i to ratou hape e e taui i to ratou manaˈo.—Galatia 6:9; Timoteo 2, 2:15.

Te haamanaˈo ra anei outou ia Antonio tei faataahia ˈtu i te omuaraa o te tumu parau? Ua faaitoito oia i te pee i te aˈoraa bibilia, e ua paraparau oia i to ˈna hoa o Leonardo, a ui atu ai eaha ta ˈna i rave i inoino ai oia. Eaha te faahopearaa? Ua maere roa o Leonardo. Ua pahono oia e aita o Antonio i rave i te hoê noa ˈˈe mea i inoino ai oia e ua haapapu atu ia ˈna e aita oia i manaˈo e taui i to ˈna huru i nia ia ˈna. Mai te peu e ua huru toetoe oia, peneiaˈe te manaˈonaˈo ra oia. Ua ani o Leonardo e faaore mai i ta ˈna hara no to ˈna haamauiuiraa ma te opua-ore-hia i te aau o to ˈna hoa e ua haamauruuru ia ˈna no to ˈna faaararaa ia ˈna no nia i teie ohipa. Ua na ô â oia e i te mau mahana i mua nei, e haapao maitai atu â oia eiaha e faatupu i tauâ manaˈo ra i roto ia vetahi ê. Ua ore ohie noa te fifi, e ua piri atu â na hoa ra i tei mutaa ihora.

E ere iho â i te mea au ia manaˈo e aita tatou e taahia ra. Ia rave râ outou i te mau taahiraa avae atoa e nehenehe no te faaafaro i te parau e te faaohipa i te mau faaueraa tumu bibilia o te aroha e te faaoreraa hara, papu mau e e raea atoa ia outou taua mau faahopearaa maitatai ra.

[Nota i raro i te api]

[Hohoˈa i te api 23]

E nehenehe te faaafaroraa i te parau i roto i te here e te faaoreraa hara e aratai atu i te mau faahopearaa oaoa