Te parau apî maitai o te Basileia—Eaha te reira?

I te matahiti i mairi aˈenei i roto e 235 fenua na te ao nei, e 6 035 564 taata, te apî e te ruhiruhia, tei rave 1 171 270 425 hora no te paraparau no nia i te reira ia vetahi ê. Hau atu â i te faaite atu na roto i te parau, ua tuu ratou hau atu i te 700 mirioni papai i roto i te rima o te taata no te haavevo e te faataa i te reira. Ua opere atoa ratou tau tausani ripene haruharu e video no te haaparare i te reira. Eaha “te reira”?

O TE parau apî maitai o te Basileia o te Atua “te reira.” Oia mau, aita “te [parau apî maitai] o te basileia” i porohia aˈenei i roto i te tuatapaparaa o te taata i nia i te faito ta tatou e ite nei i teie mahana.—Mataio 24:14; MN.

E mau rima tauturu anaˈe teie e rave nei i teie ohipa pororaa e haapiiraa na te ao nei. I te hiˈoraa o te raita, e au ra paha e aita ratou i ineine no tera ohipa. Nafea ïa ia faataa i to ratou itoito e to ratou manuïaraa? O te mana o te parau apî maitai o te Basileia te hoê tumu faufaa, no te mea e parau apî maitai teie no nia i te mau haamaitairaa e faataehia i nia i te huitaata. E mau haamaitairaa teie ta te taata atoa e hinaaro—te oaoa, te matararaa te fifi i te pae moni, te hoê faatereraa maitai, te hau e te panoonoo ore, e te mea fifi roa no te rahiraa o te taata ia tiaturi—te ora mure ore! E parau apî maitai mau â teie no te feia e imi ra i te auraa e te tumu o te oraraa. Oia, e nehenehe outou iho e fanaˈo i teie mau haamaitairaa atoa e te tahi atu â ia farii outou i te pororaa i te parau apî maitai o te Basileia.

Eaha te Basileia?

Eaha râ te Basileia e poro-haere-hia ra ei parau apî maitai? O te Basileia ïa tei haapiihia i te mau mirioni taata ia pure na roto i teie mau parau matauhia: “E to matou Metua i te ao ra, ia raa to oe iˈoa. Ia tae to oe ra hau. Ia haapaohia to oe hinaaro i te fenua nei, mai tei te ao atoa na.”—Mataio 6:9, 10.

O teie Basileia ta te peropheta Hebera o Daniela i faahiti a 25 e tiahapa senekele aˈenei, i to ˈna papairaa e: ‘E faatupu te Atua o te raˈi ra i te hoê basileia, o te ore roa ïa e mou, e ore roa hoi e riro ia vetahi ê; e hope roa hoi taua mau basileia ra i te parari e e pau, e vai tera e a muri noa ˈtu.’—Daniela 2:44.

No reira, o te parau apî maitai ïa o te Basileia, aore ra faatereraa, a te Atua o te faaore i te ino atoa, e faatere atu ai i te fenua taatoa i roto i te hau. E faatupu te reira i te opuaraa matamua a  te Atua Poiete no te huitaata e no te fenua.—Genese 1:28.

“Te fatata mai nei hoi te basileia o te ao”

Fatata a 2 000 matahiti aˈenei, na te hoê taata pûpûhia, e huti rahi hoi to ˈna hohoˈa e to ˈna haerea i te ara-maite-raa, i poro haere na mua i te parau apî maitai o te Basileia i mua i te taata. O Ioane Bapetizo taua taata ra, te tamaiti a te tahuˈa ati Iuda ra o Zekaria e ta ˈna vahine o Elisabeta. E huruhuru kamela to Ioane ahu, i tatuahia to ˈna tauupu i te iri puaa, mai to te peropheta Elia, tei faahohoˈa ia ˈna. O ta ˈna râ poroi tei huti i te ara-maite-raa o te taata e rave rahi. “E tatarahapa outou,” ta ˈna ïa i faaite haere, “te fatata mai nei hoi te basileia o te ao.”—Mataio 3:1-6.

E mau ati Iuda te feia e faaroo ra ia Ioane, ua parau ratou e te haamori ra ratou i te Atua mau ra o Iehova. Ei nunaa, ua horoahia te faufaa o te Ture na ratou na roto i te arai o Mose fatata 1 500 matahiti na mua ˈtu. Tei Ierusalema noa te hiero nehenehe, i reira e pûpûhia ˈi te mau tusia ia au i te Ture. Ua papu i te mau ati Iuda e mea tano ta ratou haamoriraa i te aro o te Atua.

A faaroo ai râ ratou ia Ioane, ua taa ˈtura i te tahi pae taata e e ere ta ratou haapaoraa i ta ratou i manaˈo na. Ua ô te taˈere e te philosophia Heleni i roto i te mau haapiiraa faaroo ati Iuda. I teie nei, ua huru ê roa te ture ta te Atua i horoa na roto ia Mose, ua faufaa ore atoa i te mau tiaturiraa e te mau tutuu a te taata. (Mataio 15:6) I te mea e ua aratai-hape-hia ratou e to ratou mau aratai haapaoraa aau etaeta e te aroha ore, aita te rahiraa e haamori faahou ra i te Atua ma te au. (Iakobo 1:27) Mea titauhia ia tatarahapa ratou i ta ratou mau hara i te Atua e i te faufaa o te Ture.

I taua tau ra, mea rahi te mau ati Iuda e tiai ra i te faraa mai o te Mesia tǎpǔhia, e mea iti te feruri ra no nia ia Ioane e: ‘E riro paha o oia te Mesia.’ Ua patoi atu râ Ioane e ua aratai maoti ia ratou i te tahi atu taata ta ˈna i parau e: ‘E ore e au ia ˈu ia tatara i te tapea i ta ˈna tamaa.’ (Luka 3:15, 16) Ma te faaite ia Iesu i ta ˈna mau pǐpǐ, ua na ô o Ioane e: “A hiˈo na i te Arenio a te Atua, o tei hopoi ê atu i te hara o te ao.”—Ioane 1:29.

Tera mau te parau apî maitai, no te mea te faaite ra Ioane i te eˈa o te ora e o te oaoa i te taata atoa—oia, o Iesu “tei hopoi ê atu i te hara o te ao.” Ei huaai o Adamu raua o Eva, ua fanauhia te taata atoa i raro aˈe i te faatîtîraa a te hara e te pohe. Te faataa ra te Roma 5:19 e: “Mai te taata atoa hoi e rave rahi i faarirohia ei taata hara i te haapao ore o te taata hoê ra [Adamu], e rave rahi hoi tei faarirohia ei taata parau-tia, i te haapao o te taata hoê ra [Iesu].” Mea titauhia ia “hopoi ê” Iesu, mai te hoê arenio e faatusiahia, “i te hara” e ia faaafaro i te tupuraa peapea o te mau ohipa a te taata. “E utua te pohe no te hara,” ta te Bibilia ïa e faataa ra, “area te ora  mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.”—Roma 6:23.

Ei taata tia roa—oia mau, te taata rahi roa ˈˈe i ora aˈenei—ua poro o Iesu i te parau apî maitai. Te na ô maira te faatiaraa bibilia i roto i te Mareko 1:14, 15 e: “Ia tapeahia . . . Ioane, haere atura Iesu i Galilea, i te parau haerea i te parau maitai o te basileia o te Atua. Na ô atura, Ua tae i te tau, te fatata mai nei te basileia o te Atua; a tatarahapa, a faaroo mai i te evanelia nei.”

Te haamaitai-rahi-hia ra te feia i farii i te poroi a Iesu e tei faatupu i te faaroo i te parau apî maitai. Te na ô ra te Ioane 1:12 e: “Te feia atoa . . . i ite atu ia [Iesu] i te faarooraa i to ˈna ra iˈoa, homai ra oia i te mana ra ia ratou ei tamarii na te Atua.” Ei tamarii, aore ra tamaiti, na te Atua, e au ia ratou te haamaitairaa o te ora mure ore.—Ioane 1, 2:25.

Aita râ te fanaˈo-taa-ê-raa i te mau haamaitairaa a te Basileia i taotiahia i te feia i te senekele matamua. Mai tei parauhia ˈtu na, te porohia ra e te haapiihia ra te parau apî maitai o te Basileia o te Atua e ati aˈe te fenua atoa i teie mahana. No reira, te vai noa ra te mau haamaitairaa a te Basileia. Eaha te tia ia outou ia rave no te fanaˈo i taua mau haamaitairaa ra? Na te tumu parau i muri nei e faataa mai.