‘Tupu noa ˈtura te parau a Iehova’
‘Tupu noa ˈtura te parau a Iehova’
“Ua hapono oia i ta ˈna parau i te fenua nei, te horo etaeta nei ta ˈna i faaue.”—SALAMO 147:15.
1, 2. Eaha te hopoia ta Iesu i horoa na ta ˈna mau pǐpǐ, e eaha ta te reira i titau?
HOÊ o te mau parau tohu bibilia maere roa ˈˈe, tei roto ïa i te Ohipa 1:8. Hou rii oia a maue ai i nia i te raˈi, ua parau atu Iesu i ta ˈna mau pǐpǐ haapao maitai e: ‘E noaa to outou mana i te varua moˈa ia haere mai i nia iho ia outou: e ei ite hoi outou no ˈu e tae noa ˈtu i te hopea o te fenua.’ Auê ïa ohipa i te rahi e!
2 Ua riro mau paha te pororaa i te parau a te Atua na te fenua atoa ei hopoia fifi na taua nau pǐpǐ rii tei faauehia ra. A feruri na i tei titauhia ra. E tia ia ratou ia tauturu i te taata ia maramarama i te parau apî maitai o te Basileia o te Atua. (Mataio 24:14) E titau atoa te faaiteraa ia Iesu ia horoa i ta ˈna mau haapiiraa mana na vetahi ê e ia faataa i ta ˈna tuhaa i roto i te opuaraa a Iehova. Hau atu â, e tia ia haa no te faariro i te taata ei pǐpǐ a bapetizo atu ai. E ia na reirahia na te ao atoa nei!—Mataio 28:19, 20.
3. Eaha ta Iesu i haapapu atu i ta ˈna mau pǐpǐ, e eaha to ratou huru i mua i te ohipa i horoahia ˈtu na ratou?
3 Teie râ, ua haapapu Iesu i ta ˈna mau pǐpǐ e ei ia ratou ra te varua moˈa ia haapao ratou i te ohipa ta ˈna i horoa ˈtu na ratou. No reira, noa ˈtu te rahi o te hopoia e te tuutuu ore e te mau tutavaraa uˈana a te feia patoi no te haamamû ia ratou, ua manuïa te mau pǐpǐ matamua a Iesu i te raveraa i ta ˈna i faaue atu. E tupuraa tera o te tuatapaparaa eita e nehenehe e patoihia.
4. Nafea i itehia ˈi te aroha o te Atua i roto i te faaueraa e poro e e haapii ia vetahi ê?
4 Ua riro te ohipa pororaa e haapiiraa na te ao atoa ei faaiteraa i te aroha o te Atua i te feia i ore i ite ia ˈna. Ua horoa te reira i te ravea ia haafatata ˈtu ratou ia Iehova e ia faaorehia ta ratou mau hara. (Ohipa 26:18) Ua faaite atoa te faaueraa e poro e e haapii, i te aroha o te Atua i te feia e taˈitaˈi ra i te poroi no te mea maoti te reira e faaite ai ratou i to ratou paieti ia Iehova e to ratou aroha i te taata-tupu. (Mataio 22:37-39) No to te aposetolo Paulo haafaufaaraa i te taviniraa Kerisetiano i faahiti ai oia i te reira mai te hoê “taoˈa.”—Korinetia 2, 4:7.
5. (a) Ihea e itea mai ai ia tatou te aamu o te mau Kerisetiano matamua e nehenehe roa ˈˈe e tiaturihia, e eaha te tupuraa e faataahia ra i roto? (b) No te aha e mea faufaa roa te buka Ohipa no te mau tavini a te Atua i teie mahana?
5 Tei roto te faatiaraa i te ohipa pororaa a te mau Kerisetiano matamua o te nehenehe roa ˈˈe e tiaturihia i te buka faauruahia o te Ohipa, papaihia e te pǐpǐ ra o Luka. E aamu ïa o te tupuraa maere e te vitiviti. Te haamanaˈo maira teie tupuraa o te ite i te Parau a te Atua i te Salamo 147:15 e na ô ra e: “Ua hapono [Iehova] i ta ˈna parau i te fenua nei, te horo etaeta nei ta ˈna i faaue.” Mea oaoa e te faufaa rahi atoa te aamu o te mau Kerisetiano matamua tei haapuaihia e te varua moˈa, no tatou i teie mahana. Tei roto te mau Ite no Iehova i te hoê â ohipa pororaa e faariroraa i te taata ei pǐpǐ, i nia noa râ i te hoê faito aano aˈe. Te farerei atoa ra tatou i te mau fifi e au i to te mau Kerisetiano no te senekele matamua. A hiˈopoa ˈi tatou nafea to Iehova haamaitairaa e haapuairaa i te mau Kerisetiano matamua, e paari mai to tatou faaroo i ta ˈna tauturu.
Maraaraa o te rahiraa pǐpǐ
6. Eaha te parau no nia i te tupuraa e itehia e toru taime i roto i te buka Ohipa, e ua taaihia te reira i te aha?
6 Te hoê ravea e hiˈopoa ˈi i te tupuraa o te Ohipa 1:8, te raveraa ïa i te parau ra ‘tupu noa ˈtura te parau a Iehova,’ te hoê parau e itehia, ma te tahi mau tauiraa haihai roa, e toru noa taime i roto i te Bibilia e i roto paatoa i te buka Ohipa. (Ohipa 6:7; 12:24; 19:20) ‘Te parau a Iehova,’ aore ra “te parau a te Atua,” i roto i teie mau irava, o te parau apî maitai ïa—te poroi haaputapû o te parau mau a te Atua, te poroi ora e te puai o tei taui i te oraraa o te feia i farii atu.—Hebera 4:12.
7. I roto i te Ohipa 6:7, ua taaihia te tupuraa o te parau a te Atua i te aha, e eaha tei tupu i te mahana Penetekose 33 T.T.?
7 Te taime matamua e itehia ˈi te parau o te tupuraa o te parau a te Atua, tei roto ïa i te Ohipa 6:7. Te taio nei tatou i reira e: “Tupu atura te parau a te Atua, e rahi roa ˈtura hoi te mau pǐpǐ i Ierusalema, e rave rahi atoa hoi to te feia tahuˈa i faaroo i te parau.” I ǒ nei, te taaihia ra te tupuraa i te maraaraa o te rahiraa pǐpǐ. Na mua ˈtu, i te mahana o te Penetekose 33 T.T., ua niniihia te varua moˈa o te Atua i nia i na pǐpǐ fatata 120 e putuputu ra i roto i te hoê piha i te tahua i nia. Ua vauvau atura te aposetolo Petero i te hoê oreroraa parau haaputapû, e i roto i te feia i faaroo, fatata e 3 000 tei riro mai ei feia tiaturi i taua iho mahana ra. Eaha râ ïa te aehuehu a haere atu ai te mau tausani taata i te vahi aore ra i te mau vahi hopuraa pape i roto ia Ierusalema aore ra na rapae mai ia bapetizohia ratou i te iˈoa o Iesu, te taata i patǐtǐhia mai te hoê taata ohipa ino fatata a 50 mahana na mua ˈˈe!—Ohipa 2:41.
8. Nafea te numera o te mau pǐpǐ i te maraaraa i te mau matahiti i muri mai i te Penetekose 33 T.T.?
8 O te haamataraa noa iho â ïa tera. Ua faufaa ore te mau tutavaraa tamau a te mau aratai haapaoraa ati Iuda e tapea i te ohipa pororaa. Ei inoinoraa no taua mau aratai ra, “te feia i faaorahia ra, ua amuihia ïa e te Fatu i te ekalesia ra [oia hoi te mau pǐpǐ], aita e mahana i tuua.” (Ohipa 2:47) Aita i maoro, “a pae atura tausani te taata ia taio.” I muri aˈe, ‘te feia i faaroo i te Fatu ra, e rave rahi roa ˈtura ïa tei amui mai ia ratou ra, te tane e te vahine atoa hoi.’ (Ohipa 4:4; 5:14) No nia i te hoê tau i muri mai â, te taio nei tatou e: ‘E hau atura to te mau amuiraa ra i reira e ati noa ˈˈe Iudea atoa e Galilea, e Samaria hoi; itoito atura, e te mǎtaˈu hoi ia Iehova i to ratou haerea, e ma te aˈo hoi a te varua moˈa, rahi noa ˈtura ratou.’ (Ohipa 9:31) Tau matahiti i muri aˈe, peneiaˈe i te area 58 T.T., ua faahitihia te parau o ‘na feia faaroo e rave rahi tausani.’ (Ohipa 21:20) I taua taime ra, mea rahi atoa te feia faaroo Etene.
9. Nafea outou e faataa ˈi i te mau Kerisetiano matamua?
9 Maoti te tauiraa i te faaroo te rahiraa o teie maraaraa o te numera. Mea apî te haapaoraa—mea itoito râ. E ere roa ˈtu te mau pǐpǐ i te mau melo ekalesia faaea noa, mea haapao maitai roa râ ratou ia Iehova e i ta ˈna Parau, ua haapii hoi te tahi pae i te parau mau i pihai i te feia i hamani-ino-hua-hia. (Ohipa 16:23, 26-33) Te feia i farii i te Kerisetianoraa, ua rave ïa i te faaotiraa feruri-maitai-hia e ma te ite maite. (Roma 12:1) Ua haapiihia ratou i te mau eˈa o te Atua; tei roto te parau mau i to ratou feruriraa e to ratou aau. (Hebera 8:10, 11) Ua ineine ratou i te pohe no te mea ta ratou e tiaturi ra.—Ohipa 7:51-60.
10. Eaha te hopoia ta te mau Kerisetiano matamua i farii, e eaha te turuaraa ta tatou e ite ra i teie mahana?
10 Ua ite te feia i farii i te haapiiraa Kerisetiano i ta ratou hopoia e faaite i te parau mau ia vetahi ê. Na te reira i faatupu i te maraa-faahou-raa o te numera. Ua parau te hoê aivanaa bibilia e: “Aita e manaˈohia ra e na te feia itoito roa aore ra te mau poro evanelia i nomino-roa-hia te hopoia e haaparare i te faaroo. E fanaˈoraa taa ê e e hopoia na te mau melo Ekalesia atoa te pororaa evanelia. . . . Maoti te parare-oioi-raa o te taatoaraa o te pǔpǔ Kerisetiano i haere rahi ai te Kerisetianoraa i mua i te omuaraa iho â.” Ua papai â oia e: “O te pororaa evanelia te puai ora iho o te mau Kerisetiano matamua.” Hoê â atoa no te mau Kerisetiano mau i teie mahana.
Tupuraa i te pae tuhaa fenua
11. Eaha te huru tupuraa e faataahia ra i roto i te Ohipa 12:24, e nafea te reira i te noaaraa mai?
11 E itehia te piti o te parau no te tupuraa o te parau a te Atua i roto i te Ohipa 12:24: “Tupu atura hoi te parau a te Atua, e aano roa ˈtura.” I ǒ nei, te taaihia ra te parau i te tupuraa i te pae tuhaa fenua. Noa ˈtu te patoiraa a te faatereraa, ua tamau noa te ohipa i te ruperupe mai. Ua ninii-na-mua-hia te varua moˈa i Ierusalema, e mai reira ˈtu ua parare oioi te parau. Ua haapurara te hamani-ino-raa i Ierusalema i te mau pǐpǐ i te mau tuhaa fenua na Iudea e na Samaria. Eaha te faahopearaa? “O taua feia ra i purara ê ra, haere atura, e haapii haere i te parau e ati noa ˈˈe te fenua atoa.” (Ohipa 8:1, 4) Ua arataihia o Philipi e poro i te hoê taata o tei hopoi i te poroi i Etiopia i muri aˈe i to ˈna bapetizoraahia. (Ohipa 8:26-28, 38, 39) Aita i maoro to te parau mau aˈaraahia i Luda, i te fenua papu o Sarona, e i Iopa. (Ohipa 9:35, 42) I muri aˈe, ua tere te aposetolo Paulo ehia tausani kilometera na nia i te moana e te fenua, a haamau ai i te mau amuiraa na te mau fenua e rave rahi i te pae miti Mediteranea. Ua haere te aposetolo Petero i Babulonia. (Petero 1, 5:13) E 30 matahiti i muri aˈe i te niniiraa o te varua moˈa i te Penetekose, ua papai o Paulo e ua “faaite-haere-hia” te parau apî maitai “i te taata atoa i raro aˈe i teie nei raˈi,” te manaˈo ra tera oia i te fenua i matauhia i taua tau ra.—Kolosa 1:23.
12. Nafea to te feia patoi i te Kerisetianoraa fariiraa i te tupuraa o te parau a te Atua i te pae tuhaa fenua?
12 Ua farii atoa te feia patoi i te Kerisetianoraa e ua aˈahia te parau a te Atua na te Hau emepera Roma atoa. Ei hiˈoraa, te faatia ra te Ohipa 17:6 e i Tesalonia, i Heleni apatoerau, ua tuô te feia patoi e: “O te mau taata orure hau teie i te mau fenua atoa nei, e teie mai nei â hoi.” Hau atu â, i te omuaraa o te senekele piti, ua papai o Pline le Jeune na te emepera Roma o Trajan mai Bitunia mai no nia i te Kerisetianoraa. Ua autâ oia e: “Aita [te reira] i vai noa i roto i te mau oire, ua haaparare atoa râ i to ˈna viivii i roto i te mau oire rii e te mau fenua tapiri.”
13. Nafea te tupuraa i te pae tuhaa fenua i te faaiteraa i te aroha o te Atua i te huitaata?
13 E faaiteraa te tupuraa i te pae tuhaa fenua i te aroha rahi o Iehova i te huitaata e au ia fanaˈo i te taraehara. I to Petero iteraa e te ohipa ra te varua moˈa i nia i te Etene ra o Korenelio, ua na ô oia e: “Ua ite mau atura vau e ore te Atua e haapao i te huru o te taata. O tei mǎtaˈu ra ia ˈna, e o tei rave i te parau-tia i te mau fenua atoa ra, o te itehia mai ïa e ana.” (Ohipa 10:34, 35) Oia, ua riro e te riro nei â te parau apî maitai ei poroi na te mau nunaa atoa, e maoti te tupuraa o te parau a te Atua i te pae tuhaa fenua i noaa ˈi i te mau nunaa i te mau vahi atoa te ravea e farii i te aroha o te Atua. I teie nei senekele 21, ua parare mau te parau a te Atua i te mau vahi atoa o te fenua.
Tupuraa puai
14. Eaha te huru tupuraa e faataahia ra i roto i te Ohipa 19:20, e ua puai aˈe te parau a te Atua i te aha?
14 Te toru o te taime e parauhia ˈi no te tupuraa o te parau a te Atua, tei roto ïa i te Ohipa 19:20 (MN): “Ma te mana, ua tupu noa te parau a Iehova e ua vai puai noa.” Te vai ra te auraa “e faaohipa i te puai” i roto i te taˈo Heleni tumu tei hurihia ei “vai puai.” Te faatia ra te mau irava na mua ˈtu e mea rahi to Ephesia tei riro mai ei feia faaroo, e ua tutui te tahi pae tei rave na i te peu tahutahu i ta ratou mau buka i te auahi i mua i te taata atoa. Ua puai aˈe ïa te parau a te Atua i te mau tiaturiraa faaroo hape. Ua puai aˈe atoa te parau apî maitai i te mau haafifiraa, mai te hamani-ino-raa. Aita e mea i nehenehe e tapea i te reira. Te ite atoa ra tatou i te hoê turuaraa maere e te Kerisetianoraa mau i to tatou nei tau.
15. (a) Eaha ta te hoê taata tuatapapa bibilia i papai no nia i te mau Kerisetiano matamua? (b) Ia au i te mau pǐpǐ, auaa o vai i manuïa ˈi ratou?
15 Ua poro te mau aposetolo e te tahi atu mau Kerisetiano matamua i te parau a te Atua ma te itoito rahi. No nia ia ratou, ua tapao te hoê taata tuatapapa bibilia e: “Ia hinaaro mau te taata e paraparau no nia i to ratou Fatu, eita ratou e ere i te ravea no te na reira. Oia mau, o te mea e turai i teie mau tane e mau vahine ta tatou e maere hau atu i ta ratou mau ravea.” Teie râ, ua faˈi taua mau Kerisetiano matamua ra e e ere noa maoti ta ratou mau tutavaraa i manuïa ˈi ta ratou taviniraa. Na te Atua ratou i faaue e haapao i ta ratou ohipa, e na te Atua ratou i tauturu. No ǒ mai i te Atua ra te tupuraa pae varua. Ua farii te aposetolo Paulo i te reira i roto i ta ˈna rata na te amuiraa no Korinetia. Ua papai oia e: “Na ˈu hoi i tanu, e na Apolo i faarari i te pape, na te Atua râ i faatupu. E hoa rave ohipa hoi matou no te Atua.”—Korinetia 1, 3:6, 9.
Ia ohipa te varua moˈa
16. Eaha te faaite ra e ua faaitoito te varua moˈa i te mau pǐpǐ ia paraparau ma te mǎtaˈu ore?
16 A haamanaˈo e ua haapapu Iesu i ta ˈna mau pǐpǐ e e tuhaa ta te varua moˈa i roto i te tupuraa o te parau a te Atua e e haapuai te varua moˈa i te mau pǐpǐ i roto i ta ratou ohipa pororaa. (Ohipa 1:8) Nafea te reira i tupu ai? Aita i maoro i muri aˈe i te niniiraahia te varua i nia i te mau pǐpǐ i te Penetekose, ua titauhia o Petero e o Ioane e paraparau i mua i te Sunederi ati Iuda, te tiripuna teitei roa ˈˈe o te fenua, na to ˈna mau haava hoi i rave e ia haapohehia Iesu Mesia. E ruru anei te mau aposetolo i te mǎtaˈu i mua i taua apooraa rahi e riri roa ra? Eita roa ˈtu! Ua haapuai te varua moˈa ia Petero e ia Ioane ia paraparau raua ma te mǎtaˈu ore, maere roa ˈtura to raua mau enemi, e “ite aˈera . . . ratou e, ia Iesu atoa ra hoi raua.” (Ohipa 4:8, 13) Maoti atoa te varua moˈa i poro ai Setephano ma te mǎtaˈu ore i te Sunederi. (Ohipa 6:12; 7:55, 56) Na mua ˈtu, ua turai te varua moˈa i te mau pǐpǐ ia poro ma te mǎtaˈu ore. Te faataa ra Luka e: “Te pure ra ratou, aueue ihora ta ratou vahi e apoo ra, e faaîhia maira ratou atoa i te [varua moˈa], ua parau noa ihora i te parau a te Atua ma te mǎtaˈu ore.”—Ohipa 4:31; MN.
17. Nafea ˈtu â to te varua moˈa tautururaa i te mau pǐpǐ i roto i ta ratou taviniraa?
17 Na roto i to ˈna varua moˈa puai, ua aratai Iehova e o Iesu atoa tei faatiahia i te ohipa pororaa. (Ioane 14:28; 15:26) I te niniiraahia te varua i nia ia Korenelio, to ˈna mau fetii, e to ˈna mau hoa rahi, ua farii te aposetolo Petero e e tiaraa to te mau Etene peritome-ore-hia ia bapetizohia i te iˈoa o Iesu Mesia. (Ohipa 10:24, 44-48) I muri aˈe, e tuhaa faufaa ta te varua i roto i te nominoraa ia Baranaba e ia Saulo (te aposetolo Paulo) no te ohipa mitionare e i roto i te aratairaa ihea raua e haere ai e e ore ai e haere. (Ohipa 13:2, 4; 16:6, 7) Ua aratai te reira i te huru faaotiraa parau a te mau aposetolo e te mau matahiapo no Ierusalema. (Ohipa 15:23, 28, 29) Ua aratai atoa te varua moˈa i te nominoraa i te mau tiaau o te amuiraa Kerisetiano.—Ohipa 20:28.
18. Nafea to te mau Kerisetiano matamua faaiteraa i te aroha?
18 Hau atu â, ua ohipa te varua moˈa i roto i te mau Kerisetiano iho, a faahotu ai i te mau huru maitatai e au i to te Atua, mai te aroha. (Galatia 5:22, 23) Na te aroha i turai i te mau pǐpǐ ia opere te tahi na te tahi. Ei hiˈoraa, i muri aˈe i te Penetekose 33 T.T., ua haamauhia te hoê afata faufaa amui no te aupuru i te mau hinaaro pae tino o te mau pǐpǐ i Ierusalema. Te na ô ra te Bibilia e: “Aore roa hoi te hoê o ratou i ere, e te feia atoa hoi e fenua to ratou ra e te fare, hoo atura ïa, e hopoi maira i te hoo i taua mau mea i hoohia ra, tuuhia ihora i raro i te pae avae o te mau aposetolo ra; e tufahia ihora na ratou atoa e au maite aˈera.” (Ohipa 4:34, 35) Ua faataehia teie aroha eiaha noa i nia i te mau hoa faaroo, i nia atoa râ ia vetahi ê, na roto i te pororaa i te parau apî maitai e na roto atoa i te tahi atu â mau ohipa maitatai. (Ohipa 28:8, 9) Ua parau Iesu e tei te aroha ma te haapae ia ratou iho e itehia ˈi ta ˈna mau pǐpǐ. (Ioane 13:34, 35) Papu mau, ua huti te huru maitai faufaa roa o te aroha i te taata i te Atua ra e ua turu i te tupuraa i te senekele matamua mai i teie mahana atoa.—Mataio 5:14, 16.
19. (a) Eaha na ravea e toru i tupu ai te parau a Iehova i te senekele matamua? (b) Eaha ta tatou e hiˈopoa i roto i te tumu parau i muri nei?
19 I te taatoaraa, e itehia te parau “varua moˈa” e 41 taime i roto i te buka Ohipa. Papu maitai, ua taai-roa-hia te tupuraa Kerisetiano mau i te senekele matamua i te mana e te aratairaa a te varua moˈa. Ua maraa te numera o te mau pǐpǐ, ua parare te parau a te Atua na te hoê tuhaa fenua aano, e ua puai aˈe i te mau haapaoraa e te mau philosophia o taua tau ra. Te turua ra teie tupuraa i te senekele matamua e te ohipa a te mau Ite no Iehova i teie mahana. I roto i te tumu parau i muri nei, e hiˈopoa tatou i te tupuraa hoê â maereraa o te parau a te Atua i teie nei tau.
Te haamanaˈo ra anei outou?
• Nafea te mau pǐpǐ matamua i te tupuraa i te pae numera?
• Nafea te parau a te Atua i te parareraa i te pae tuhaa fenua?
• Nafea te parau a te Atua i te puairaa i te senekele matamua?
• Eaha te tuhaa a te varua moˈa i roto i te tupuraa o te parau a te Atua?
[Uiraa haapiiraa]
[Hohoˈa i te api 12]
Ua poro o Philipi i te Etiopia, a haaparare ai i te parau apî maitai i te pae tuhaa fenua
[Hohoˈa i te api 13]
Ua aratai te varua moˈa i te mau aposetolo e te mau matahiapo no Ierusalema
[Faaiteraa i te fatu o te hohoˈa i te api 10]
I te poro atau i nia: Faahohoˈaraa o te oire o Ierusalema i te tau o te piti o te hiero - i roto i te aua o te hotela Holyland Hotel, i Ierusalema