A haapao atu i te mau ohipa taa ê a te Atua
A haapao atu i te mau ohipa taa ê a te Atua
‘E rave rahi, e tau Atua, e Iehova, te mau ohipa taa ê i ravehia e oe ra, e to oe ra manaˈo ia matou nei; [aita to oe e faaau].’—SALAMO 40:5; MN.
1, 2. Eaha te haapapuraa o te mau ohipa taa ê a te Atua e vai ra, e e tia ia turai te reira ia tatou ia aha?
IA TAIO outou i te Bibilia, e itea noa ia outou e ua rave te Atua i te mau mea taa ê no to ˈna nunaa i tahito ra, o Iseraela. (Iosua 3:5; Salamo 106:7, 21, 22) Noa ˈtu e aita Iehova e haa maira mai te reira i teie nei i roto i te mau ohipa a te taata, ua ati tatou i te haapapuraa e rave rahi o ta ˈna mau ohipa taa ê. E tano ïa tatou e apiti i te papai salamo i te na ôraa e: “Aita te huru rau o ta oe ra ohipa, e Iehova! e mau ravea paari anaˈe â ta oe! Ua î te fenua nei i ta oe ra taoˈa.”—Salamo 104:24; 148:1-5.
2 Mea rahi i teie mahana o te ore e tâuˈa aore ra o te patoi i teie haapapuraa o ta te Atua Poiete mau haaraa. (Roma 1:20) Teie râ, mea maitai ia feruri tatou i te reira e ia huti i te mau faaotiraa no nia i to tatou tiaraa e ta tatou mau hopoia i mua i Tei hamani ia tatou. E mau tauturu maitatai te Ioba, mau pene 38 e tae atu i te 41 no te reira, inaha, te huti ra Iehova i te ara-maite-raa o Ioba i nia i te tahi mau tuhaa o ta ˈNa mau ohipa taa ê. A hiˈopoa na i te tahi mau tumu parau maitatai ta te Atua i faahiti.
Mau ohipa puai e te taa ê
3. Mai tei papaihia i roto i te Ioba 38:22, 23, 25-29, ua ui te Atua no nia i te aha?
3 I te hoê taime, ua ui te Atua ia Ioba e: “Ua tomo anei oe i roto i te pueraa o te hiona? e ua hiˈo oe i te pueraa o te ûa-paari, i vaiihohia e au no te mahana e roohia ˈi i te ati, no te mahana tamaˈi e te aroraa ra.” I te mau vahi e rave rahi o to tatou fenua, mea matauhia te hiona e te ûa paari. Ua na ô â te Atua e: “Na vai i haapao i to te pape pue ra haerea, e te tereraa no te uira patiri ra? Ia ûahia to te fenua taata ore, i nia i te medebara aore i parahihia e te taata ra; ei faarari i te fenua moemoe, e te faaruehia, e te ano, e ia oteu mai te raau apî ra i nia. O vai to te ûa ra metua? e na vai te hau nei i fanau? No to vai ra opu te vai-paari; e te mâriri uouo no te raˈi, na vai oia i fanau?”—Ioba 38:22, 23, 25-29.
4-6. Eaha te mea e ore ai e navai te ite o te taata no nia i te hiona?
4 E hiˈo paha te vetahi o te faaea i roto i te hoê totaiete e ru noa e o te tia ia tere haere, i te hiona mai te hoê noa haafifiraa. Teie râ, mea rahi roa o te hiˈo i te hiona mai te hoê mea au mau, o te faanehenehe i te fenua i te tau toetoe e te horoa i te ravea no te tahi mau ohipa taa ê. A haamanaˈo na i te uiraa a te Atua, mea hohonu anei to outou ite no nia i te hiona, no nia noa ˈˈe i to ˈna huru? E, ua ite tatou eaha te huru o te pueraa hiona, peneiaˈe na roto i te mau hohoˈa o te mau haapueraa hiona aore ra no te mea ua ite mata tatou e rave rahi hiona. Eaha râ ïa no te mau huˈahuˈa hiona? Ua ite anei outou eaha to ratou huru, peneiaˈe na roto i te hiˈopoaraa ˈtu i te tumu iho?
5 Ua rave te tahi mau taata tau ahuru matahiti no te faahohonu e te pata i te hohoˈa o te mau huˈahuˈa hiona. E nehenehe te hoê huˈahuˈa hiona e hamanihia i te hoê hanere huˈahuˈa vai paari tahe haere noa e rau te hohoˈa e te haviti mau. Te na ô ra te buka Atmosphere e: “Ua ite maite te taata e ua hope te rau o te mau huˈahuˈa hiona, e noa ˈtu e te onoono ra te mau aivanaa e aita e ture o te natura e opani ra ia tataipiti te reira, aita i itehia aˈenei e piti huˈahuˈa hoê â hohoˈa. Ua faaterehia te hoê maimiraa i nia i te hoê faito rahi roa e . . . Wilson A. Bentley, tei rave hau atu i te 40 matahiti no te hiˈopoa e te pata i te hohoˈa o te mau huˈahuˈa hiona na roto i te hoê mata faanui ma te ore roa ˈtu e itea mai e piti hoê â roa hohoˈa.” E ahiri noa ˈtu e, i roto i te hoê hiˈoraa varavara roa, e itehia mai e piti e au ra e hoê â hohoˈa, e faaiti mau anei te reira i te faahiahia o te huru rau hope o te mau huˈahuˈa hiona?
6 A haamanaˈo na i te uiraa a te Atua: “Ua tomo anei oe i roto i te pueraa o te hiona?” Mea rahi o te manaˈo e o te mau ata te mau pueraa o te hiona. E nehenehe anei ta outou e feruri e haere i roto i teie mau pueraa e numera i te mau huˈahuˈa hiona ma te faataa i to ratou huru rau hope e e maimi nafea to ratou faraa mai? Te na ô ra te hoê buka ite rahi no nia i te ihi e: “E ere â i te mea papu nohea mai te huˈa tumu o te vai paari e eaha mau na to ˈna huru, o taua huˈa tumu ra hoi te hinaarohia ia paari mai te mau topata rii o te ata i te faito anuvera fatata e -40°F (-40°C).”—Salamo 147:16, 17; Isaia 55:9, 10.
7. Mai te aha te hohonu o te ite o te taata no nia i te ûa?
7 E te ûa ïa? Ua ui te Atua ia Ioba e: “O vai to te ûa ra metua? e na vai te hau nei i fanau?” Te na ô ra taua noâ buka ite rahi no nia i te ihi ra e: “No te huru rau o te mau hautiutiraa o te reva e te huru tauiui rahi o te mau ata pape e te mau huˈahuˈa e vai ra i roto i te mataˈi, e au ra e eita roa ˈtu e nehenehe e hamani i te hoê manaˈo rahi tia roa no nia i te ravea e tupu ai te mau ata e te ûa.” Ei faaohieraa, ua pûpû te mau aivanaa i te tahi mau manaˈo i tataratara-maitai-hia, eita mau râ ta ratou e nehenehe e faataa maitai i te ûa. Ua ite râ outou e e topa mai te ûa faufaa rahi, a faarari ai i te fenua, a faaoraora ˈi i te mau raau tupu, a faatupu ai i te ora e a faariro atu ai ei mea au mau.
8. No te aha e tano ai te mau parau a Paulo i roto i te Ohipa 14:17?
8 Eita anei outou e farii i te faaotiraa a te aposetolo Paulo? Ua faaitoito oia ia vetahi ê e hiˈo i teie mau ohipa taa ê ei faaiteraa no nia i To muri mai i te reira. Ua parau o Paulo no nia i te Atua ra o Iehova e: “Aita râ oia i ere i te faaite ia ˈna iho, oia i hamani maitai mai, e te horoaraa mai i te ûa no nia i te raˈi ra, e te anotau auhune, e te faaîraa mai i to tatou aau i te maa e te oaoa.”—Ohipa 14:17; Salamo 147:8.
9. Nafea te mau ohipa taa ê a te Atua e faaite ai i to ˈna mana rahi?
9 Eita e nehenehe e feaa e e paari hope e e mana i te rahi to Tei rave i taua mau ohipa taa ê e te maitatai ra. No nia i to ˈna mana, a feruri na i teie mea: Te parauhia ra e fatata e 45 000 vero te tupu i te mahana hoê, ua hau atu ïa i te 16 mirioni i te matahiti hoê. Fatata ïa e 2 000 teie e tupu nei i teie iho nei taime. E horoa mai te mau ata rau o te hoê noa vero i te ito e faito i to na paura atomi hoê ahuru aore ra hau atu i taorahia i te tau o te Piti o te Tamaˈi Rahi. E ite outou i te tahi pae o taua ito ra ei uira. Hau atu i te riroraa ei mea mǎtaˈuhia, e tauturu mau te uira ia faatupu i te mau huru nitrogène o te tae mai i nia i te repo, i reira te mau raau tupu e rave atu ai ei raau faatupu a te natura. E faaiteraa ito ïa te uira, e hopoi atoa mai râ i te mau maitai mau.—Salamo 104:14, 15.
Eaha ˈtura to outou manaˈo?
10. Nafea outou ia pahono i te mau uiraa e itehia ra i roto i te Ioba 38:33-38?
10 A feruri na e o outou aˈe o Ioba, e te uiuihia ra outou e te Atua Mana hope. E farii paha outou e aita te rahiraa o te taata e haapao rahi atura i te mau ohipa taa ê a te Atua. Te ui mai ra Iehova i te mau uiraa ta tatou e taio ra i roto i te Ioba 38:33-38 (MN). “Te ite ra anei oe i te ture o te raˈi? e na oe anei i tuu i [to ˈna mana] i nia i te fenua nei? E tae anei te reo i nia roa i te ata ra; e moe ihora oe i te hoê maa pape rahi i nia iho ia oe? Na oe anei e tono i te uira? e tae mai anei ratou a parau mai ai ia oe e, Teie matou? Na vai i tuu atu i te paari i roto [i te ata] ra? e na vai i horoa ˈtu i te haapao maitai i te [raˈi]; e hope ia vai te mau ata ia taio i to ˈna paari? e manii ia vai te mau hue o te raˈi ra, ia riro te repo huˈahuˈa roa ei vari ra; e ia ati roa te repo etaeta ra?”
11, 12. Eaha te tahi mau mea e haapapu ra e o te Atua Tei rave i te mau ohipa taa ê?
11 Ua rave tatou i te tahi noa o te mau manaˈo ta Elihu i faahiti i mua ia Ioba, e ua tapao tatou i te tahi mau uiraa ta Iehova i titau ia Ioba e pahono “mai ta te taata” pautuutu ra. (Ioba 38:3) Te parau nei matou “te tahi” no te mea i roto i te mau pene 38 e te 39, ua huti te Atua i te ara-maite-raa i nia i te tahi atu mau tuhaa faufaa o te mea poietehia. Ei hiˈoraa, te mau haapueraa fetia o te raˈi. O vai te ite i to ratou atoa ture? (Ioba 38:31-33) Ua aratai Iehova i to Ioba ara-maite-raa i nia i te tahi mau animara—te liona e te oreba, te puaaniho mato e te asini oviri toretore, te reema e te renanima, te puaahorofenua etaeta e te aeto. Oia mau, ua ui te Atua ia Ioba na ˈna anei i horoa i te mau huru taa ê o teie mau animara e rave rau, a faatia ˈtu ai ia ora e ia tupu maitai. E oaoa paha outou i te faahohonu i teie mau pene, mai te peu iho â râ mea au na outou te mau puaahorofenua aore ra te tahi atu mau animara.—Salamo 50:10, 11.
12 E nehenehe atoa outou e hiˈopoa i te Ioba pene 40 e te 41, i reira to Iehova ani-faahou-raa ia Ioba e pahono i te mau uiraa no nia e piti mea poietehia taa maitai. Te taa ra ia tatou e o te puaa pape (o Behemota) te hoê, o te hope i te rahi e te etaeta te tino, o te moo pape riaria o te Nil (o Leviatana) te tahi. Ia au i to raua iho huru, mea faahiahia e piti atoa ra i roto i te mea poietehia o te tia ia haapaohia ˈtu. E hiˈo anaˈe i teie nei eaha te mau faaotiraa ta tatou e nehenehe e huti mai.
13. Eaha te faahopearaa o te uiuiraa a te Atua i nia ia Ioba, e nafea teie mau parau e tia ˈi ia ohipa i nia ia tatou?
13 Te faaite maira te Ioba pene 42 eaha te faahopearaa o te uiuiraa a te Atua i nia ia Ioba. Na mua ˈˈe, ua haapao rahi roa Ioba ia ˈna iho e ia vetahi ê. Ma te farii râ i te aˈoraa e vai ra i roto i te mau uiraa a te Atua, ua taui o Ioba i to ˈna manaˈo. Ua faˈi oia e: “Ua ite au e, e puaihope to oe [Iehova], e e ore ta oe i opua ra e tia ia faaore. O vai teie e haamoe i te parau e ore e taea e te ite ra? Ua parau vau i tei ore i itea e au ra; e parau taa ê, e ore e taea, e ore e itea e au.” (Ioba 42:2, 3) Oia, i muri aˈe i to ˈna haapaoraa ˈtu i te mau ohipa a te Atua, ua parau Ioba e e taa ê roa teie mau mea na ˈna. I muri aˈe i to tatou hiˈo-faahou-raa i teie mau mea faahiahia i poietehia, e tia atoa ia putapû tatou i te paari e te mana o te Atua. Eaha te fa? Ia putapû noa anei tatou i te mana e te aravihi rahi o Iehova? Aore ra ia turai-hau-hia ˈtu â tatou i te reira?
14. Eaha to Davida huru i mua i te mau ohipa taa ê a te Atua?
14 Oia mau, i roto i te Salamo 86, e ite mai tatou i te mau parau a Davida tei parau i roto i te hoê salamo na mua ˈtu e: “Te parau hua nei te mau raˈi i te hanahana o te Atua! e te faaite nei te reva i te ohipa a tana rima! Te haapii nei te tahi ao i te tahi i te parau, e te faaite nei te tahi rui i te tahi i te ite.” (Salamo 19:1, 2) Ua haere atu â râ Davida i mua. I roto i te Salamo 86:10, 11, te taio nei tatou e: “E Atua rahi hoi oe, e te ohipa taa ê ta oe e rave ra! o oe anaˈe ra te Atua mau! E haapii mai oe, e Iehova, i to oe ra eˈa, e haapao vau i ta oe ra parau mau: ia rotahi maite hoi tau aau i te mǎtaˈuraa i to iˈoa na.” Te vai ra te hoê faito tano mǎtaˈu paieti i roto i te mǎtaˈu tura o Davida i te Atua Poiete no ta ˈNa mau ohipa taa ê atoa. E taa ia outou no te aha. Aita Davida i hinaaro e faariri i Tei nehenehe e rave i teie mau ohipa taa ê. Eiaha atoa tatou.
15. No te aha i tano ai to Davida mǎtaˈuraa i te Atua ma te tura?
15 Ua taa paha ia Davida e i te mea e e mana rahi roa to te Atua e te vî ra ia ˈna, e nehenehe ta ˈna e faaohipa i te reira i nia i te taata atoa e tano to ˈna ririraa ia ratou. No ratou, mea riaria te reira. Ua ui te Atua ia Ioba e: “Ua tomo anei oe i roto i te pueraa o te hiona? e ua hiˈo oe i te pueraa o te ûa-paari, i vaiihohia e au no te mahana e roohia ˈi i te ati, no te mahana tamaˈi e te aroraa ra.” Tei roto anaˈe te hiona, te ûa paari, te ûa puai, te mataˈi e te uira i ta ˈna pueraa mauhaa. E mau mauhaa natura puai rahi mau tera!—Ioba 38:22, 23.
16, 17. Eaha te faaite ra i te mana riaria o te Atua, e nafea to ˈna faaohiparaa i taua mana ra i mutaa ihora?
16 Te haamanaˈo ra paha outou i te tahi ati o to outou fenua tei faatupuhia e te hoê o teie mau mea—te hoê verohuri, te hoê mataˈi puahiohio, te hoê mataˈi rorofai, te ûa paari, aore ra te hoê vai pue taime poto. Ei hiˈoraa, i te pae hopea o te matahiti 1999, ua tairi te hoê vero rahi i te pae apatoa tooa o te râ o Europa. Ua hitimaue atoa te mau aivanaa ihi ahuaraˈi. Ua raea i te mataˈi puai e 200 kilometera i te hora, a tatara ˈi i te mau tausani tapoˈi fare, a tairi ai i te mau pou niuniu uira i raro, e a faatahuri ai i te mau pereoo rarahi. A tamata na i te feruri i teie: Ua taihitumu taua vero ra aore ra ua ofati na ropu fatata e 270 mirioni tumu raau, 10 000 i roto noa i te aua o Versailles, i rapae mai ia Paris. Ua mau te uira i roto i te mau mirioni fare. Fatata 100 taata tei pohe. Ua tupu paatoa te reira i roto noa i te hoê taime poto. Auê ïa puai e!
17 E parau paha te hoê e e mau tupuraa manaˈo-ore-hia, te aratai-ore-hia e te vî ore te mau vero. Eaha râ ïa mai te peu e e faatupu Te mana hope i te mau ohipa taa ê na roto i te faaohiparaa i taua mau mauhaa ra ma te haavî e te aratai maite atu? Ua rave oia i te hoê mea mai te reira i te tau o Aberahama tei haapii e ua faito te Haava o te fenua atoa i te ino o na oire ra o Sodoma e Gomora. No to raua viivii rahi, ua tae te mau auê ia raua i te Atua ra tei tauturu i te feia parau-tia atoa ia maue ê atu i te mau oire i haavahia. Te faataa ra te tuatapaparaa e: “I haamairi mai ai Iehova iho i te gopherita e te auahi no ǒ ia Iehova, no nia i te raˈi,” i nia iho i taua na oire ra. E ohipa taa ê tera tei faaora i te feia parau-tia e tei haamou i te feia iino aita e ravea e taui ai.—Genese 19:24.
18. Eaha te mau mea taa ê ta te Isaia pene 25 e haamahiti ra?
18 I muri aˈe, ua faaoti te Atua i te hoê parau haavaraa i nia i te oire no tahito ra o Babulonia, te oire paha e faahitihia ra i roto i te Isaia pene 25. Ua tohu te Atua e e riro te hoê oire ei puea huˈahuˈa: “Ua faariro hoi oe i te oire ei puea, e te oire i faaetaeta-rahi-hia ra ei auˈa: e te fare arii o te mau taata ê ra, ia ore ia parauhia e oire; e ia ore roa ia patu-faahou-hia i nia ra.” (Isaia 25:2) E nehenehe ta te feia mataitai i te vairaa o Babulonia e haapapu e ua tupu mau â te reira. E tupuraa tanotano noa anei te haamouraa o Babulonia? Eita. E nehenehe râ tatou e farii i te manaˈo o Isaia: “E Iehova, o tau Atua hoi oe, e faateitei au ia oe; e haamaitai au i to oe iˈoa: e mau mea taa ê anaˈe ta oe i rave; e te parau tahito na oe ra, e parau haavare ore anaˈe ïa e te parau mau.”—Isaia 25:1.
Mau ohipa taa ê a muri aˈe
19, 20. E nehenehe tatou e tiai i teihea tupuraa o te Isaia 25:6-8?
19 Ua faatupu te Atua i te parau tohu i nia nei i mutaa ihora, e e haa oia ma te taa ê a muri aˈe. I roto i teie tupuraa, i te vahi e faahiti ai Isaia i te “mau mea taa ê” a te Atua, te ite ra tatou i te hoê parau tohu papu te tiâ ia faatupuhia, mai te faatupuraahia te haavaraa i nia ia Babulonia. Eaha te “mea taa ê” i tǎpǔhia? Te na ô ra te Isaia 25:6 e: “Ei reira Iehova sabaota ra e rave ai, na te taata atoa i teie nei mouˈa, i te oroa amuraa maa maitatai, i te oroa uaina tahito, i te mau mea maitatai roa ra, i te uaina tahito faaateate-maitai-hia ra.”
20 E faatupu-papu-hia taua parau tohu ra i roto i te ao apî ta te Atua i tǎpǔ e e fatata roa maira. I te reira tau, e faaorehia to te huitaata mau fifi e faateimaha ra i te feia e rave rahi roa i teie mahana. Oia mau, te haapapu ra te parau tohu i roto i te Isaia 25:7, 8 e e faaohipa te Atua i to ˈna mana poieteraa no te rave hoê o te mau ohipa taa ê roa ˈˈe o te mau tau atoa: “E na ˈna e haamou roa i te pohe e a muri noa ˈtu; e na te Fatu ra, na Iehova, e horoi i te roimata i te mau mata atoa ra, e faaore hoi i te faaino i to ˈna taata i nia i te fenua atoa nei: o Iehova hoi teie e parau nei.” Ua faahiti te aposetolo Paulo i teie irava i muri aˈe e ua faaau atu i te taime e faahoˈi mai ai te Atua i te feia pohe i te ora, e faatia faahou ai i tei pohe. E riro mau â te reira ei ohipa taa ê!—Korinetia 1, 15:51-54.
21. Eaha te mau ohipa taa ê ta te Atua e rave no tei pohe?
21 Te tahi atu tumu e ore ai te mau roimata, o te mea ïa e e faaorehia te mau maˈi pae tino o te taata. A tia noa mai ai Iesu i te fenua nei, ua faaora oia i te taata e rave rahi—ua araara mai te mata o te matapo, ua faaroo te tariˈa turi, ua itoitohia te paruparu. Te faatia ra te Ioane 5:5-9 e ua faaora oia i te hoê taata e 38 matahiti to ˈna vai-pirioi-raa. Ua manaˈo te feia mataitai e e ohipa faahiahia, aore ra taa ê tera. E tera iho â! Ua parau atu râ Iesu ia ratou e e ohipa faahiahia ˈtu â ia faatia faahou oia i tei pohe: “Eiaha e maere i te reira; te fatata mai nei hoi te hora e faaroo ai te feia atoa i roto i te apoo ra i tana reo, e e haere mai i rapae; e te feia i mau na i te parau maitai ra, e tia mai ïa e rave i te ora.”—Ioane 5:28, 29.
22. No te aha tei veve e tei ati ra e nehenehe ai e hiˈo i mua ma te tiaturi?
22 E tupu mau â te reira no te mea o Iehova tera e tǎpǔ ra. Ia papu noa ia outou e ia faaohipa oia e ia aratai maite oia i to ˈna mana faaora rahi, e mea taa ê te noaa mai. Te haamahiti ra te Salamo 72 i te mea ta ˈna e rave na roto i ta ˈna Tamaiti Arii. I reira te feia parau-tia e tupu ai. E rahi roa te hau. E faaora te Atua i tei veve e tei ati ra. Te tǎpǔ ra oia e: “E riro hoi e maa sitona tei te fenua i nia i te tupuai o te mau mouˈa ra, e tei tupu ra, e ahehe ïa mai te mau raau e tupu i Lebanona ra; e ruperupe to te oire ra mai te raau o te fenua nei.”—Salamo 72:16.
23. E tia ia turai te mau ohipa taa ê a te Atua ia tatou ia aha?
23 Papu maitai, e tano tatou ia haapao atu i te mau ohipa taa ê atoa a Iehova—ta ˈna i rave i mutaa ihora, ta ˈna e rave ra i teie mahana, e ta ˈna e rave a muri rii aˈe. “Ia haamaitaihia te Atua, te Atua o Iseraela, o Iehova, oia anaˈe ra tei rave i te mau mea taa ê ra; ia haamaitaihia hoi to ˈna iˈoa hanahana e a muri noa ˈtu: ia faaîhia hoi te mau fenua atoa i to ˈna hanahana; Amene, e Amene.” (Salamo 72:18, 19) E tia ia riro te reira ei tumu parau o ta tatou mau aparauraa aau tae e te mau fetii e o vetahi ê. Oia, “e faaite [anaˈe] i to ˈna hanahana i roto i te mau etene; e ta ˈna ra mau ohipa taa ê i roto i te taata atoa ra.”—Salamo 78:3, 4; 96:3, 4.
Nafea outou ia pahono?
• Nafea te mau uiraa i uihia ˈtu ia Ioba e haapapu ai e mea taotiahia te ite o te taata?
• Eaha te mau hiˈoraa o te mau ohipa taa ê a te Atua i faataahia i roto i te Ioba, mau pene 37-41 e haaputapû ra ia outou?
• Eaha to tatou huru i muri aˈe i te hiˈopoaraa i te tahi o te mau ohipa taa ê a te Atua, e tia ˈi?
[Uiraa haapiiraa]
[Hohoˈa i te api 10]
Eaha to outou manaˈo i te huru rau hope o te mau huˈahuˈa hiona e i te puai rahi riaria o te maramarama?
[Faaiteraa i te tumu]
snowcrystals.net
[Hohoˈa i te api 13]
Ia paraparau tamau outou no nia i te mau ohipa taa ê a te Atua