“Te hoê fifi atâta huna no te ea o te taata”

HOÊ tuhaa maere i nia i te toru o te mau taata paari e faaohipa ra i te Internet i te mau Hau Amui no Marite tei mataitai i te tahi mau afata poroi no nia i te taatiraa pae tino, tera ïa ta te hoê titorotororaa apî no nia i te mau taatiraa pae tino i nia i te Internet i faaite mai. I teie nei, mea rahi roa mau taata o te hema nei i to ratou mau hinaaro e taati na roto i te Internet. “Teie te hoê fifi atâta huna no te ea o te taata o te tupu taue nei, no te mea i nia i te tahi faito, mea iti roa o te farii nei aore ra o te haapao maitai nei i te reira,” tera ïa ta Taote Al Cooper, tahuˈa manava tei rave i te titorotororaa, e parau ra.

O vai iho â râ te hema ohie noa i taua cybersex ra aore ra reni a te roro uira no nia i te taatiraa pae tino? “O tera ïa mau taata aita roa ˈtu e taati ra i te pae tino aore ra mea iti roa i te roaraa o to ratou oraraa” o “tei itea taue râ i te mau ravea pau ore e taati” i nia i te Internet, ta Taote Cooper ïa e parau ra.

Tera râ, te manaˈo ra te rahiraa o te feia e mataitai ra i te mau afata poroi no nia i te taatiraa pae tino e aita e fifi to te reira. Oia mau anei? E imi e rave rahi taata tei matau roa i te cybersex i te hoê “faito” rahi o te taatiraa pae tino i nia i te Internet no te haamâha i to ratou mau hinaaro, mai te hoê atoa taata i matau roa i te raau taero. E nehenehe atoa ratou e ere i ta ratou ohipa e e mutu paha to ratou taairaa e to ratou hoa faaipoipo!

E tumu ê atu râ e ape ai te feia e hinaaro e faaoaoa i te Atua eiaha e mataitai i te mau afata poroi no nia i te taatiraa pae tino i nia i te Internet. Te aˈo maira te Parau a te Atua e: “E tena na, uumi iho i to outou mau melo i te mau mea o teie nei ao, mai te faaturi, te parau faufau ra, te paia ra, te hinaaro tia ore ra, e te nounou taoˈa, e haamori idolo ïa. No taua mau mea ra e roohia mai ai te tamarii faaroo ore i te riri o te Atua ra.” (Kolosa 3:5, 6) No te ‘uumi i to ˈna mau melo’ no nia i te hinaaro tia ore e taati, mea titauhia ia faahotu te hoê taata i te here puai i te Atua ra o Iehova. (Salamo 97:10) Mai te peu e ua hema oia i te fifi atâta no te ea o te taata oia hoi te cybersex, e tia ïa ia ˈna ia haapapu i to ˈna here ia Iehova na roto i te haapiiraa i te Parau a te Atua, te Bibilia. E nehenehe atoa te auhoaraa maitai e te mau Ite no Iehova i te Piha a te Basileia o to ˈna vahi e tauturu ia ˈna ia haapapu i ta ˈna faaotiraa e faaoaoa i te Atua.