Te faatia ra te feia poro i te Basileia

Ua faaorehia te faainoraa i nia i te iˈoa o te Atua

TE NA ô ra te Parau a te Atua, te Bibilia, e: ‘Ia maitai to outou haerea i rotopu i te mau Etene: ta ratou hoi i faaino mai ia outou, mai te mea e feia rave parau ino, ia hiˈo râ ratou i ta outou ohipa maitai, ia haamaitai ratou i te Atua i te mahana e roohia mai ai ra.’ (Petero 1, 2:12) No reira, te tutava ra te mau Kerisetiano mau i te faaite noa i te hoê haerea maitai ia ore te iˈoa o Iehova e faainohia.

I te hoê tuhaa fenua atea i Zambie, parauhia Senanga, ua eiâhia te radio a te hoê orometua haapii i roto i to ˈna fare. I te mea e te poro ra te mau Ite no Iehova na taua vahi ra, ua pari aˈera te orometua haapii e o ratou te eiâ. Ua faaara ˈtura oia i te mau mutoi, ma te parau e na te mau Ite i eiâ i ta ˈna radio. Ei haapapuraa e ua tomo te mau Ite i roto i to ˈna fare, ua faaite oia i te hoê api parau ta ˈna i ite i raro. Aita râ te mau mutoi i tiaturi ia ˈna. Ua faaue atura ratou ia ˈna e haere e paimi maitai atu â.

Ua faaitoito te tino matahiapo i te mau Ite tei poro na pihai i te fare o te orometua haapii i taua mahana ra, ia haere e paraparau no nia i te reira i te orometua haapii. Ua haere atura vetahi pae o te mau taeae e paraparau ia ˈna, ma te faataa e te hinaaro ra ratou e ia faaorehia te faainoraa i nia i te iˈoa o Iehova. I roto i ta ratou aparauraa, ua parau ratou ia ˈna e ua farerei ratou i te hoê taurearea i roto i to ˈna fare e ua horoa ˈtu i te hoê api parau na ˈna. Na roto i ta ratou faataaraa, ua taa aˈera i te orometua haapii o vai tera taurearea. Inaha, hoê â ta raua ekalesia. Ua paraparau atura te orometua haapii i te taurearea, aita râ oia i faaite i te parau mau. I muri aˈe, ua tauaparau te orometua haapii no nia i te reira i te mau metua o te taurearea e ua hoˈi atura i te fare. I roto hoê hora, ua faahoˈi te mama o te taurearea i te radio i eiâhia.

No to ˈna tatarahapa, ua farerei atu te orometua haapii i te tino matahiapo e ani atura e ia faaore ratou i ta ˈna mau pariraa hape. Ua farii te mau matahiapo e ua ani râ e ia faaitehia te mau faaotiraa i mua i te taata ia ite ratou paatoa e mea hapa ore te mau Ite. Ua horoahia ˈtura te hoê parau faaara i te haapiiraa, a faaore atu ai i te faainoraa i nia i te iˈoa o Iehova. E nehenehe te mau Ite no Iehova e tamau i te poro ma te fifi ore i taua vahi ra.

[Hohoˈa fenua/Hohoˈa i te api 19]

(Hiˈo i te papai)

AFIRIKA

Zambie

[Faaiteraa i te tumu]

Mountain High Maps® Copyright © 1997 Digital Wisdom, Inc.