“Ua riro Iehova ei mea maitai roa i nia ia ˈu!”

I TE hoê ahiahi au mau i te avaˈe Mati 1985, te faatupu ra te mau tane e te mau vahine o te Tuhaa Papairaa i te pu rahi a te mau Ite no Iehova i New York, Hau Amui, i te oroa no te hoê haereraa i mua faufaa mau. Ua tavini atura ïa o Karl F. Klein e 60 matahiti i roto i te taviniraa taime taatoa. Ma te aau tae mau, ua na ô Taeae Klein e: “Ua riro Iehova ei mea maitai roa i nia ia ˈu!” Ua parau oia e e irava bibilia au roa na ˈna te Salamo 37:4. I muri aˈe, ua faaoaoa oia i te taata atoa na roto i te faataˈiraa i ta ˈna violoncelle.

I te roaraa o na 15 matahiti i muri mai, ua tamau noa Taeae Klein i te haa i roto i te pǔpǔ papai e te tavini i roto i te Tino Aratai a te mau Ite no Iehova. E, i te 3 no Tenuare 2001, i te 95raa o to ˈna matahiti, ua faaoti o Karl Klein i ta ˈna hororaa i te fenua nei ma te taiva ore.

Ua fanauhia o Karl i Heremani. Ua haere to ˈna utuafare i te mau Hau Amui, e ua paari mai o Karl i te hoê tuhaa oire o Chicago, i Illinois. Mea apî roâ o Karl raua to ˈna teina o Ted i to raua anaanatae-rahi-raa i te Bibilia. Ua bapetizohia o Karl i te matahiti 1918, e ua faatupu te mau parau oaoa ta ˈna i faaroo i te hoê tairururaa a te Feia haapii Bibilia i te matahiti 1922 i te hinaaro i te pororaa tei vai noa i te roaraa o to ˈna oraraa. Aita oia i hinaaro ia mairi te hoê hebedoma aita oia i haere i roto i te ohipa pororaa, a na reira atoa ˈi i te mau hebedoma hopea o to ˈna oraraa.

Ua ô mai o Karl i roto i te feia rave ohipa i te pu rahi i te matahiti 1925, e ua haamata oia i roto i te neneiraa. Mea au mau na ˈna te upaupa, e tau matahiti i te maoro, ua faataˈi oia i te violoncelle i roto i te hoê pǔpǔ tei faaroo-rahi-hia na i roto i te mau haapurororaa radio Kerisetiano. I muri aˈe i te reira, ua haa oia i roto i te Tuhaa o te Taviniraa, a fanaˈo taa ê ai i to ˈna auhoaraa e to ˈna tiaau o T. J. Sullivan. I taua area taime ra, ua faaipoipo o Ted e ua rave i te taviniraa mitionare e ta ˈna vahine o Doris i Porto Rico.

Ua afa senekele to Karl Klein haaraa i roto i te Tuhaa Papairaa, mea rahi ta ˈna i rave i reira no te mea mea au roa na ˈna e faatupu i te mau maimiraa e mea hohonu roa to ˈna ite i te Bibilia. I te matahiti 1963, ua faaipoipo o Karl ia Margareta, te hoê mitionare Heremani e tavini ra i Bolivia. Ma ta ˈna tauturu î i te here, i to ˈna iho â râ farereiraa i te mau fifi o te ea, ua nehenehe ta ˈna e haa maitai ua maoro i muri aˈe i te matahiti i reira te rahiraa e faatufaahia ˈi. No to Karl huru haavare ore, e to ˈna aau tae ei taata faataˈi upaupa, eita e moehia ta ˈna mau oreroraa parau i roto i te mau amuiraa e i te mau tairururaa. Aita i maoro hou to ˈna poheraa, ua peretiteni oia i te hoê tauaparauraa i te irava poipoi i mua i te utuafare rahi o te Betela i New York, e ua oaoa roa e ua faufaahia te taatoaraa.

E rave rahi feia taio tamau i Te Pare Tiairaa o te haamanaˈo i te aamu o Taeae Klein, te hoê faatiaraa anaanatae mau o ta ˈna mau mea i farerei tei neneihia i roto i te numera o te 1 no Me 1985 (Farani). E oaoa outou i te taio aore ra i te taio faahou i taua aamu ra, a haamanaˈo ai e ua tavini â tei papai i te reira hau atu i te 15 matahiti ei Kerisetiano haapao maitai e te itoito.

Ei hoê o te mau pǐpǐ faatavaihia a te Fatu, ua hinaaro Taeae Klein ma to ˈna aau atoa e faatere e te Mesia i nia i te raˈi. E tia roa ia matou ia tiaturi e ua faatupu Iehova i taua hinaaro ra i teie nei.—Luka 22:28-30.

[Hohoˈa i te api 31]

O Karl i te matahiti 1943 e o T. J. Sullivan e o Ted raua Doris

[Hohoˈa i te api 31]

O Karl e o Margareta, i te avaˈe Atopa 2000