‘E rahi roa to tatou pue mahana i te paari’

O VAI te patoi e mea faufaa roa te paari no te faaruru i te mau fifi o te oraraa? Te paari mau, o te ravea ïa e faaohipa maitai i te ite e te maramaramaraa. E taa ê roa te reira i te maamaa, te neneva, e te maau rahi. No reira te mau Papai e aˈo ai ia tatou ia titau i te paari. (Maseli 4:7) Inaha, ua papai-na-mua-hia te buka bibilia o te Maseli no te horoa mai i te paari e te aˈo. Te na ô ra to ˈna mau parau matamua e: “Te maseli a te arii o Iseraela, a Solomona, te tamaiti na Davida ra. Ia ite i te paari e te aˈo.”—Maseli 1:1, 2.

E hiˈo noa na tatou i te mau haapiiraa papu maitai o nau pene matamua o te Maseli. Mai te hoê metua î i te here o te faaitoito ra i ta ˈna tamaiti, e taparuparu o Solomona i to ˈna feia taio ia farii i te aˈo e ia fariu i te tariˈa i te paari ra. (Pene 1 e te 2) E faaite mai oia nafea ia faahotu i te auhoaraa piri e o Iehova e nafea ia tiai i to tatou aau. (Pene 3 e te 4) Te aˈohia ra tatou ia vai mâ noa i te pae morare. (Pene 5 e te 6) Oia, mea faufaa roa no tatou te mau heheuraa i te raveraa a te hoê taata morare ore. (Pene 7) E auê te au te taparuparuraa a te paari faataatahia no te taata atoa! (Pene 8) Hou e faahiti ai i te mau maseli taa maitai atoa i roto i te mau pene i muri mai, e horoa te arii Solomona i te hoê haapotoraa faaitoito o te mea ta ˈna i hohora na mua ˈtu.—Pene 9.

‘A haere mai e amu i ta ˈu maa e e inu i ta ˈu uaina’

E ere te faahopea o te tuhaa matamua o te Maseli i te hoê haapotoraa faufaa ore o te faataa noa ra i te manaˈo maitai i faahitihia aˈenei. E ere, te hohorahia ra te reira mai te hoê faahohoˈaraa faahiahia e te au roa, o te turai i te taata taio ia tapi i te paari.

E haamata te pene 9 o te buka bibilia o te Maseli na roto i teie mau parau: “Ua faatia te paari i to ˈna fare: e ua tarai hoi oia i na pou nehenehe e hitu no ˈna ra.” (Maseli 9:1) ‘Na pou e hitu ra,’ ia au i te hoê aivanaa, e “faaiteraa ïa e e aorai teie i hamanihia e e aua to ropu, e ua faatiahia e toru pou i te hoê pae, e toru pou i te tahi atu pae, e hoê i ropu i te toru o te pae i mua i te uputa.” Noa ˈtu e mea tano teie parau aore ra eita, ua hamani te paari mau i te hoê fare etaeta no te farii i te mau manihini e rave rahi.

Ua ineine te mau mea atoa no te faatupu i te hoê oroa tamaaraa. Te vai ra te maa e te uaina. Ua faaineine maitai te paari i te maa e ua faanahonaho i te airaa maa. “Ua patia oia i ta ˈna mau puaa e ua anoihia ta ˈna uaina; e ua faanahonaho oia i tana amuraa.” (Maseli 9:2) E au ra ïa e te vai ra te maa pae varua o te patu e au ia feruri-maitai-hia i nia i teie airaa maa taipe.—Isaia 55:1, 2.

O vai te mau manihini i te oroa i faaineinehia e te paari mau? “Te tono nei [oia] i tana mau tavini vahine ei aratai mai i te taata; e te pii nei i te mau vahi teitei o te oire, O tei ore e ite ra, e fariu mai oia i ǒ nei; e te feia maua ra, te parau atura oia, E haere mai e amu i ta ˈu nei maa, e inu hoi i te uaina i anoihia e au ra. E faarue i te maamaa, ia ora; e na te eˈa haapao maitai i te haere.”—Maseli 9:3-6.

Ua tono te paari i ta ˈna mau paretenia no te titau manihini i te taata. Ua haere ratou na te mau vahi taata i reira ratou e nehenehe ai e  pii i te mau taata e rave rahi roa ˈˈe. O te taatoaraa te titau-manihini-hia—te feia “maua,” aore ra maramarama ore, tae noa ˈtu te feia ite ore. (Maseli 9:4) E e parau tǎpǔ o te ora te pûpûhia na ratou. Papu maitai e fatata o te taatoaraa te nehenehe e fanaˈo i te paari e vai ra i roto i te Parau a te Atua, tae noa ˈtu to roto i te buka Maseli. I teie mahana, ei mau vea na te paari mau, te haa ra te mau Ite no Iehova i te titau manihini i te taata, i te mau vahi atoa to reira ratou, ia haapii i te Bibilia. Oia mau, e nehenehe te noaaraa mai teie ite e aratai atu i te ora mure ore ra.—Ioane 17:3.

Mea titauhia ia farii te mau Kerisetiano ma te haehaa i te aˈo a te paari. E parau mau iho â râ no te feia apî e te feia no haamata noa ˈtura i te haapii no nia ia Iehova. No te mea e ite iti to ratou i te mau eˈa o te Atua, mea “maua” ratou. E ere te auraa e mea ino to ratou mau manaˈo atoa, tera râ, e titauhia te taime e te tutavaraa no te taui i te mafatu, e mauruuru atu ai te Atua ra o Iehova. Mea titauhia ïa ia faaau ratou i to ratou mau manaˈo, mau hinaaro, mau manaˈo o te aau, e mau tapao i nia i te mea ta te Atua e farii. Mea faufaa mau â ia ‘hiaai maite ratou i te û anoi-ore-hia ra i te parau.’—Petero 1, 2:2.

Inaha, eita anei e tia ia vaiiho tatou paatoa i “te parau matamua”? Eita e ore e mea hinaarohia ia anaanatae tatou i ‘te mau mea hohonu a te Atua’ e ia amu i te maa etaeta na te taata paari ra. (Hebera 5:12–6:1; Korinetia 1, 2:10) Te opere maite ra “te tavini haapao maitai e te paari,” ta Iesu Mesia e tiaau roa ra, i te maa varua na te taatoaraa i te hora mau. (Mataio 24:45-47) Ia tamaa ïa tatou i te airaa maa a te paari na roto i te haapii-maite-raa i te Parau a te Atua e te mau papai niuhia i nia i te Bibilia ta te pǔpǔ o te tavini e horoa maira.

“Eiaha e aˈo atu i te tâhitohito ra”

To roto atoa te avau e te aˈo i te mau haapiiraa a te paari. E ere teie tuhaa o te paari i te mea farii-maitai-hia e te taatoaraa. No reira ïa te faahopea o te tuhaa matamua o te buka Maseli e horoa ˈi i teie faaararaa: “O tei avau atu i te tâhitohito ra, e tâhitohia mai ïa; e o tei aˈo atu i te taata ino ra, e faainohia ïa. Eiaha e aˈo atu i te tâhitohito ra, a ririhia mai oe e ana.”—Maseli 9:7, 8a.

E inoino e e riri noa te taata tâhitohito i te hoê o te tamata ra i te faatitiaifaro i to ˈna eˈa. Eita e taa i te hoê taata ino te faufaaraa o te aˈo. E ere mau â i te haerea paari ia tamata i te haapii i te parau mau nehenehe o te Parau a te Atua i te hoê taata aita e au ra i te parau mau aore ra o te imi noa ra i te tâhitohito i te reira! A poro ai te aposetolo Paulo i Anetiohia, ua farerei oia i te hoê pǔpǔ ati Iuda aita i hinaaro i te parau mau. Ua tamata ratou i te faaô ia ˈna i roto i te hoê mârôraa na roto i te patoiraa ia ˈna ma te mau parau faaino, tera râ, ua parau noa ˈtu Paulo e: “O outou râ i tute ê atu i tana parau nei, e te parau na outou eita outou e au i te ora mure ore, inaha, te fariu nei matou i te Etene.”—Ohipa 13:45, 46.

A tutava ˈi tatou i te faaite i te parau apî maitai o te Basileia i te feia aau tia, ia ara maitai tatou eiaha e mârô atu e te feia tâhitohito. Ua haapii te Mesia ra o Iesu i ta ˈna mau pǐpǐ e: “E ia tomo atu outou i roto i te fare, a faaora ˈtu i taua fetii ra. E te au ra taua fetii ra, o te ora ta outou i hinaaro no ratou ra, e tae ïa i nia ia ratou: ia ore râ ia au, e hoˈi mai ïa ora i nia ia outou iho. E o te ore e ite mai ia outou, e aore e haapao i ta outou parau, ia haere ê outou i  taua fare ra e i taua oire ra, e ueue atu i te repo o to outou avae.”—Mataio 10:12-14.

E taa ê roa te huru o te taata paari i mua i te aˈo i to te taata tâhitohito. Te na ô ra Solomona e: ‘E aˈo i te taata paari, e e herehia mai oe e ana. E haapii atu i te taata paari, e e tupu hoi to ˈna paari.’ (Maseli 9:8b, 9a) Ua ite te taata paari e “aita roa hoi e aˈo e riro ei mea oaoa i reira ra, e mea oto râ; area i muri aˈe, o te maitai ra ïa o te parau-tia te tupu i taua aˈo ra, i te feia i haamatarohia i te reira.” (Hebera 12:11) Noa ˈtu e e au ra e mea mauiui te aˈoraa, no te aha e tia ˈi ia tahoo atu aore ra ia huru ê tatou mai te peu e e paari atu â tatou ia farii tatou i te reira?

“E haapii i te taata parau-tia, e e tupu hoi to ˈna ite,” ta te arii paari ïa e parau â. (Maseli 9:9) Aita hoê aˈe taata mea paari roa aore ra mea ruau roa no te tamau i te haapii. Auê te oaoa ia ite e o te mau ruhiruhia atoa teie e farii nei i te parau mau e e pûpû nei ia ratou na Iehova! Ia tutava atoa ïa tatou i te hinaaro noa e haapii e i te faaohipa noa i te feruriraa.

“E apiti-atoa-hia to oe na pue mahana i te oraraa ra”

No te haamataratara i te manaˈo tumu o te tumu parau e hiˈopoahia ra, e faahiti atoa Solomona i te titauraa matamua faufaa ia noaa mai te paari. E papai oia e: “O te matamua o te paari ra, o te mǎtaˈu ïa ia Iehova; e te ite i te mau parau moˈa ra, o te ite ïa.” (Maseli 9:10) Aita e paari no ǒ mai i te Atua ra mai te peu e aita e mǎtaˈu faatura hohonu i te Atua mau. E ite rahi paha to te hoê taata, mai te peu râ e aita oia e mǎtaˈu ra ia Iehova, eita ïa oia e faaohipa i taua ite ra e ia faahanahanahia ˈtu te Atua Poiete. E nehenehe atoa oia e huti mai i te mau faahopea tano ore na roto i te mau tupuraa matauhia, a riro atu ai oia ei mea maamaa. Hau atu â, mea faufaa roa te ite ia Iehova, Tei Moˈa Roa, ia maramarama tatou, e huru faahiahia hoi teie o te paari.

Eaha ta te paari e faahotu? (Maseli 8:12-21, 35) E na ô te arii o Iseraela e: “E rahi roa hoi to oe pue mahana ia ˈu, e apiti-atoa-hia to oe na pue mahana i te oraraa ra.” (Maseli 9:11) E rahi roa te pue mahana e te pue matahiti o to tatou oraraa ia apiti noa tatou i te paari. Oia, ‘na te paari e horoa mai i te ora i te feia fatu ra.’—Koheleta 7:12.

Te faaitoitoraa i te titau i te paari, o ta tatou ïa hopoia. No te haapapu i teie parau, e na ô Solomona e: “Ia paari oe ra, no oe iho to oe paari; e ia tâhito mai oe ra, o oe iho te ino i te reira.” (Maseli 9:12) Mea paari te hoê taata paari no to ˈna iho maitai, e na te taata tâhitohito anaˈe te hape e mauiui ai oia iho. Oia mau, e ooti iho â tatou i ta tatou i ueue. No reira, e ‘fariu anaˈe i to tatou tariˈa i te paari ra.’—Maseli 2:2.

“E parau rahi tei te vahine maamaa”

Area râ, e na ô Solomona i muri iho e: “E parau rahi tei te vahine maamaa; e manaˈo ore to ˈna e e ite ore ra. E tia i te parahiraa i te uputa o to ˈna fare i nia i te pǎpǎ, i te vahi teitei o te oire ra, ei parau atu i te feia e haere noa na te eˈa; o tei haere na te mau eˈa mau ra: o tei ore e ite ra, e fariu mai oia i ǒ nei.”—Maseli 9:13-16a.

Ua faahohoˈahia te maamaa i te hoê vahine mamahu ore, te hitahita, e te ite ore. Ua hamani atoa oia i te hoê fare. E ua haere oia e pii i te feia ite ore atoa ra. Na te taata ïa e haere noa ra e maiti. E farii anei ratou i ta te paari titau-manihini-raa aore ra ta te maamaa?

“E maaro to te pape eiâhia ra”

E titau manihini te paari e te maamaa atoa i te feia e faaroo ra ia ‘fariu mai i ǒ nei.’ Mea ê râ te poroi. E titau manihini te paari i te taata i te hoê oroa tamaaraa te vai ra te uaina, te maa, e te pane. Te haamanaˈo maira te umeraa ta te maamaa e pûpû ra i te raveraa a te hoê vahine morare ore. E na ô Solomona e: “E te taata maua ra, te na ô ra oia, E maaro to te pape eiâhia ra, e te maa i amu-huna-hia ra, e te maitai ïa.”—Maseli 9:16b, 17.

 E ere i te uaina anoihia ta “te vahine maamaa” e pûpû, e pape eiâhia râ. (Maseli 9:13) I roto i te mau Papai, te faaauhia ra te imiraa i te navenave i te pae taatiraa i te inuraa i te pape haumârû. (Maseli 5:15-17) Te faahohoˈa ra ïa te pape eiâhia i te taatiraa morare ore i rave-omoe-hia. E au ra e mea maaro taua pape ra—mea maitai aˈe i te uaina—no te mea e mea eiâhia e te horoa ra te reira i te manaˈo e eita e noaahia. No te pane amu-omoe-hia, e au ra e mea au aˈe ïa i te pane e te maa a te paari no te mea iho â râ ua noaa mai te reira na roto i te mau ravea tia ore. Ia hiˈo te hoê i te mea opanihia e te huna ei mea au roa, e tapao faaite ïa tera o te maamaa.

E faahiti atoa te paari i te parau tǎpǔ o te ora i roto i ta ˈna titau-manihini-raa, area te vahine maamaa ra, eita ïa e faaite i te mau faahopearaa ia pee te taata i to ˈna mau eˈa. E faaara mai râ Solomona e: “Aore oia i ite, e tiapapau pohe roa tei reira e tei raro roa to ˈna tei hade.” (Maseli 9:18) “E ere i te fare to [te vahine maamaa], e menema râ,” ta te hoê aivanaa ïa i papai. “Ia tomo oe i roto, eita oe e haere oraora mai i rapae.” E ere i te haerea paari ia ora i te hoê huru oraraa morare ore; mea pohe râ.

Ua parau Iesu Mesia e: “E tomo na te uputa pirihao; te atea nei hoi te uputa e te aano nei te eˈa e tae atu ai i te pohe; e e rave rahi tei na reira i te tomo. Te apǐapǐ râ o te uputa e te piri hoi o te eˈa e tae atu ai i te ora, e te iti hoi o te feia i ite atu i te reira!” (Mataio 7:13, 14) Ia tamaa noa ïa tatou i te airaa maa a te paari e i rotopu atoa tatou i te feia e haere ra na te eˈa e tae atu ai i te ora.

[Hohoˈa i te api 31]

E farii popou te taata paari i te aˈo

[Hohoˈa i te api 31]

E hopoia na te taata taitahi te titauraa i te paari