E aratai te faˈiraa hara i te maitairaa pae varua

“IA ˈU i mamû noa ra, ua ino roa o ˈu mau ivi, i te uuru no ˈu e rui noa ˈtu te mahana. Te teiaha maira hoi to rima i nia ia ˈu, i te rui e te ao; ua mǎrô atura vau mai te mǎrô o te tau poai ra.” (Salamo 32:3, 4) Te faaite ra paha teie mau parau haaputapû i te mauiui rahi o te aau o te arii o Iseraela i tahito ra o Davida, mauiui ta ˈna iho i hopoi mai i nia ia ˈna no to ˈna hunaraa i te hoê hara ino maoti i te faˈi i te reira.

E taata ravea faahiahia roa o Davida. E taata tamaˈi mǎtaˈu ore oia, e faatere hau aravihi, e rohipehe e e taata faataˈi upaupa. Aita râ oia i tiaturi i to ˈna mau aravihi, i te Atua râ. (Samuela 1, 17:45, 46) Ua faataahia oia mai te hoê taata ‘i au to ˈna aau ia Iehova.’ (Mau arii 1, 11:4) Mea huru rahi râ hoê o ta ˈna mau hara i rave, e te faahiti ra paha oia i te reira i roto i te Salamo 32. E nehenehe tatou e haapii rahi mai na roto i te hiˈopoaraa i te mau huru tupuraa hou ta ˈna hara. E haroaroa tatou i te mau marei e tia ia apehia e te faufaaraa e faˈi i ta tatou mau hara no te tataî faahou i to tatou taairaa e te Atua.

Ua topa te hoê arii taiva ore i roto i te hara

Tei roto te nunaa Iseraela i te hoê tau tamaˈi e te mau ati Amona, te faaea noa ra râ o Davida i Ierusalema. I te hoê ahiahi, a ori haere ai oia i nia i te tapoˈi fare o to ˈna aorai, ua ite oia i te hoê vahine haviti e hopu ra i te pape i te hoê fare tapiri. Aita oia i haavî ia ˈna iho, ua haamata râ oia i te hinaaro rahi roa ia ˈna. I to ˈna iteraa e o Bate-seba tera, te vahine a Uria, faehau o ta ˈna nuu, ua faahaere mai o Davida ia ˈna, e ua faaturi ihora e oia. I te taime au, ua faatae o Bate-seba i te poroi ia Davida e ua hapu oia.—Samuela 2, 11:1-5.

Ua topa o Davida i roto i te marei. Ia itehia ta raua hara, te utua no raua e piti atoa ra, o te pohe ïa. (Levitiko 20:10) No reira oia i feruri ai i te hoê opuaraa. Ua titau oia i te tane a Bate-seba, o Uria, ia hoˈi mai mai te tamaˈi. Ia oti ia ˈna i te uiui maitai no nia i te tamaˈi, ua faaue Davida ia Uria e hoˈi i te fare. Te tiaturi ra o Davida e e manaˈohia e o Uria te metua o to Bate-seba aiû.—Samuela 2, 11:6-9.

Ua peapea o Davida i te mea e aita Uria i haere atu i ta ˈna vahine ra. Ua parau o Uria e eita e tia ia ˈna ia hoˈi i te fare a faaruru ai te nuu i te huru riaria o te tamaˈi. Tei roto anaˈe te hoê nuu Iseraela i te hoê tau tamaˈi, e haapae te mau tane i te taatiraa pae tino, e tae noa ˈtu e ta ratou iho vahine. E tia ia ratou ia vai moˈa noa i te pae oroa. (Samuela 1, 21:5) Ua titau o Davida ia Uria no te hoê tamaaraa e faainu ihora ia ˈna e ia taero roa, eitâ râ oia e hoˈi i te fare i ta ˈna vahine ra. Ua faahapa te haerea haapao maitai o Uria i te hara ino a Davida.—Samuela 2, 11:10-13.

Te tafifi roa ˈtura o Davida i te mau faahopearaa o ta ˈna hara. No te hepohepo, hoê noa ravea ta ˈna e ite ra. Ua faahoˈi oia ia Uria i te tamaˈi ma te hoê rata na te tenerara o te nuu, o Ioaba. Mea maramarama maitai te manaˈo o te rata poto ra: “E tuu ia Uria i mua mau i te aroraa ra, a orai ai outou i muri ia tairihia oia, ia pohe.” Na roto i te rata, e au ra i te arii puai e ua huna oia i to ˈna haerea a hopoi ai ia Uria i te pohe.—Samuela 2, 11:14-17.

I te hoperaa iho â te tau otoraa a Bate-seba no ta ˈna tane, ua faaipoipo Davida ia ˈna. Ua mairi te tau, e fanauhia maira to raua tamarii. I te  roaraa o teie mau tupuraa, aita roa ˈtu Davida i paraparau aˈe no nia i ta ˈna mau hara. Peneiaˈe te tamata ra oia i te faatia i ta ˈna mau ohipa ia ˈna iho. Aita anei hoi Uria i pohe ma te tura i te tamaˈi mai ia vetahi ê? Hau atu â, aita anei oia i faaroo ore i to ˈna arii na roto i te oreraa e haere i ta ˈna vahine ra? E faaohipa iho â te ‘aau haavare’ i te mau huru haaferuriraa atoa no te tamata i te faatia i te hara.—Ieremia 17:9; Samuela 2, 11:25.

Mau hape o te aratai atu i te hara ra

Nafea to Davida, te hoê hoa o te parau-tia, toparaa i te pae morare a rave atu ai i te faaturi e te taparahiraa taata? Mea papu e ua ueuehia te mau huero o ta ˈna hara i te roaraa o te hoê tau. E nehenehe tatou e maere no te aha aita o Davida i ǒ to ˈna mau taata ra no te turu ia ratou i roto i ta ratou tau tamaˈi i te mau enemi o Iehova. Area râ, te tamǎrû ra o Davida ia ˈna iho i to ˈna aorai, mea atea roa ïa te mau tupuraa mau o te tamaˈi no te faaore roa i te hinaaro tia ore i te vahine a te hoê faehau haapao maitai. I teie mahana, e parururaa no te Kerisetiano mau te haa-maite-raa no te tapi i te mau mea pae varua e ta ratou amuiraa e te apiti-tamau-raa i roto i te ohipa pororaa evanelia.—Timoteo 1, 6:12.

Ua faauehia te arii no Iseraela e hamani i te hoê hohoˈa o te Ture e e taio atu i te mau mahana atoa. Te faaite ra te Bibilia eaha te tumu: “Ia mǎtaˈu oia i to ˈna ra Atua ia Iehova, e ia haapao i te mau parau atoa o teie nei ture, e teie nei mau haapaoraa ia ravehia. Ia ore ia teitei to ˈna aau i to ˈna ra mau taeae; ia ore oia ia ohipa ê i teie nei parau, i te pae atau e te pae aui.” (Deuteronomi 17:18-20) E riro paha e aita Davida e haapao ra i teie faaueraa i te taime i rave ai oia i teie mau hara ino. E tauturu mau â te haapiiraa e te feruriruriraa tamau i te Parau a te Atua i te paruru ia tatou eiaha ia rave i te hara i teie anotau fifi.—Maseli 2:10-12.

Hau atu â, te na ô maitai ra te hopea o na Ture Ahuru e: “Eiaha atoa oe e nounou i ta vetahi ê ra vahine.” (Exodo 20:17) I taua taime ra, tau vahine faaipoipo e tau vahine faaea noa ta Davida. (Samuela 2, 3:2-5) Aita râ te reira i tapea ia ˈna eiaha ia hinaaro i te tahi atu vahine au mau. Te haamanaˈo maira teie aamu i te faufaaraa o te mau parau a Iesu: “O te hiˈo noa ˈtu i te vetahi ê ra vahine ei faatupu i te hinaaro, ua faaturi ïa ia ˈna i to ˈna ihora aau.” (Mataio 5:28) Eiaha tatou e atuatu i tera mau hinaaro tano ore, e faaore oioi anaˈe râ i te reira i roto i to tatou feruriraa e to tatou mafatu.

Tatarahapa e aroha

Aita te faatiaraa haavare ore i te hara a Davida i papaihia i roto i te Bibilia no te haamâha i te mau hinaaro i te pae taatiraa o te taata. Te horoa maira te aamu i te hoê ravea ia ite tatou i te faaiteraa puai e te haaputapû i te hoê o te mau huru maitatai faahiahia roa o Iehova—to ˈna aroha.—Exodo 34:6, 7.

I muri aˈe i to Bate-seba fanauraa i te hoê tamaiti, ua tono Iehova i te peropheta ra o Natana e tia ˈtu i mua ia Davida. E ohipa o te aroha tera. Ahiri e aita o Davida i paraparauhia e ahiri oia i mamû noa, peneiaˈe e haapaari oia ia ˈna iho i roto i te hara. (Hebera 3:13) Auaa râ, ua farii o Davida i te aroha o te Atua. Ua puta te manaˈo haava o Davida i te mau parau feruri-maitai-hia e te maramarama a Natana, e ua faˈi oia ma te haehaa e ua hara oia i te Atua. Oia mau, ua fatuhia te Salamo 51 no nia i te hara a Davida raua o Bate-seba i muri aˈe i to ˈna tatarahaparaa e faˈiraa i ta ˈna hara ino. Eiaha roa ˈtu tatou e vaiiho ia haapaari to tatou aau ia rave noa ˈtu tatou i te hoê hara ino.—Samuela 2, 12:1-13.

Ua faaorehia ta Davida hara, ua aˈohia râ oia e aita te mau faahopearaa o ta ˈna hara i tatarahia. (Maseli 6:27) Nafea hoi e ore ai? Mai te peu e e tapo noa te Atua i te mata i nia i te mau mea atoa, e haafaufaa-ore-hia ïa ta ˈna mau faito. E riro ïa oia ei mea manuïa ore mai te Tahuˈa Rahi ra o Eli, tei faahapa rii noa i ta ˈna na tamaiti iino a vaiiho noa ˈtu ai ia tamau noa i ta raua mau ohipa ino. (Samuela 1, 2:22-25) Teie râ, eita Iehova e tâpû ê atu i te taata e tatarahapa ra i to ˈNa aroha hamani maitai. E tauturu to ˈna aroha, mai te pape haumârû, i te taata i hape ia faaruru i te mau faahopearaa o te hara. E maitai mai te taata i hara i te pae varua  maoti te faaoreraa hara mahanahana a te Atua e te amuiraa o te patu e te mau hoa haamoriraa. Oia, auaa te tusia taraehara a te Mesia, e nehenehe te taata e tatarahapa ra e ite roa ˈtu i “te rahi o to [te Atua] aroha mau.”—Ephesia 1:7.

“Te aau mâ” e ‘te aau manaˈo apî’

I muri aˈe i to Davida faˈiraa i ta ˈna hara, aita oia i topa i roto i te manaˈo haaparuparu e aita to ˈna e faufaa. Te faaite ra ta ˈna mau parau i roto i te mau salamo ta ˈna i papai no nia i te faˈiraa hara e ua maitai mai oia e ua faaoti maite oia e tavini i te Atua ma te haapao maitai. A hiˈo na, ei hiˈoraa, i te Salamo 32. I te irava 1, te taio nei tatou e: “E ao to ˈna! to tei faaorehia ta ˈna hara, e tei tapoˈihia to ˈna ino.” Noa ˈtu te ino o te hara, e nehenehe te faahopearaa e riro ei mea oaoa ia tatarahapa te hoê taata ma te haavare ore. Te hoê ravea no te faaite i teie haavare ore, o te farii-roa-raa ïa i to tatou hape, mai ia Davida. (Samuela 2, 12:13) Aita oia i tamata i te faatia ia ˈna iho i mua ia Iehova aore ra i te pari ia vetahi ê. Te na ô ra te irava 5 e: “E maoro aˈera, ua faˈi atura vau i tau hara ia oe; e aore au i huna i to ˈu nei piˈo: i na ô aˈera hoi au e, E faˈi au i tau hara ia Iehova ra; e ua faaore mai oe i te ino o taua hara na ˈu ra.” E hopoi mai te faˈiraa hara mau i te maitairaa, eita ïa te hoê taata e mauiui faahou i to ˈna manaˈo haava no te mau hape i ravehia.

I muri aˈe i to ˈna taparuparuraa ia faaore mai Iehova i ta ˈna hara, ua ani Davida e: “E faaau na oe i te aau mâ i roto ia ˈu nei, e tau Atua. E faahou na hoi oe i te aau manaˈo tia i roto ia ˈu nei.” (Salamo 51:10) Te faaite ra to Davida aniraa i “te aau mâ” e ‘te aau manaˈo apî’ e ua ite maitai oia e te vai ra te hinaaro e hara i roto ia ˈna e te hinaaro ra oia i te tauturu a te Atua no te tamâ i to ˈna aau e te rave i te hoê haamataraa apî. Maoti i te topa ˈtu i roto i te aroharaa ia ˈna iho, ua faaoti maite oia e haere i mua i roto i te taviniraa i te Atua. Ua pure oia e: “E vevete na oe, e Iehova, i tau vaha, e na tau vaha e arue ia oe.”—Salamo 51:15.

Eaha te huru o Iehova i to Davida tatarahaparaa ma te haavare ore e tutava-maite-raa e tavini ia ˈna? Ua horoa oia i teie haapapuraa mahanahana na Davida: “E haapii atu vau ia oe, e faaite au ia oe i ta oe eˈa ia haere ra; e aˈo atu vau ia oe, e ei nia ia oe tau mata vai ai.” (Salamo 32:8) E haapapuraa teie e e tâuˈa iho â Iehova i te mau huru o te aau e te mau hinaaro o te taata e tatarahapa ra. Ua rave Iehova e horoa hau atu  â i te aau maramarama na Davida, i te aravihi e ite hohonu atu â i tei ite-mata-noa-hia. Ia farerei faahou â oia i te faahemaraa, e nehenehe ïa ta ˈna e haroaroa i te faahopearaa o ta ˈna mau raveraa e to te reira ohiparaa i nia ia vetahi ê, e nehenehe atu ai ta ˈna e haa ma te paari.

Ua riro teie tupuraa o te oraraa o Davida ei faaitoitoraa i te feia atoa i topa i roto i te hara ino. Na roto i te faˈiraa i ta tatou hara e te tatarahaparaa ma te haavare ore, e nehenehe e noaa faahou mai ta tatou taoˈa faufaa roa ˈˈe, to tatou taairaa e te Atua ra o Iehova. Mea au roa ˈˈe te mauiui e te haama taime poto ta tatou paha e faaoromai i te ahoaho e tupu mai ia mamû noa tatou, aore ra i te faahopearaa riaria o te vaiihoraa ia haapaari tatou i roto i te hoê haerea orure hau. (Salamo 32:9) E nehenehe maoti tatou e ite i te faaoreraa hara mahanahana a te hoê Atua î i te here e te aroha, ‘te [Metua] o te aroha e te Atua no ˈna anaˈe te mahanahana.’—Korinetia 2, 1:3; MN.

[Hohoˈa i te api 31]

Ua tiaturi o Davida e e ape oia i te mau faahopearaa o ta ˈna mau hara na roto i te hopoiraa ia Uria i te pohe