Mau uiraa a te feia taio

I te mea e ua ineine Iehova i te faaore i te hara maoti te tusia taraehara, no te aha e titauhia ˈi ia faˈi te mau Kerisetiano i te reira i te mau matahiapo i roto i te amuiraa?

Mai ta tatou e nehenehe e ite i roto i te hiˈoraa o Davida raua o Bate-seba, ua faaore Iehova i te hara a Davida noa ˈtu e e hara rahi, no te mea ua tatarahapa mau â Davida. I to te peropheta Natana farereiraa ˈtu ia ˈna, ua faˈi roa Davida e: “Ua hara vau ia Iehova.”—Samuela 2, 12:13.

Teie râ, eita noa Iehova e farii i te faˈiraa hapa haavare ore a te hoê taata hara, e faaore atu ai i ta ˈna hara, e rave atoa râ oia i te mau faanahoraa î i te here o te tauturu i te taata e hape ra ia maitai roa mai i te pae varua. I roto i te hiˈoraa o Davida, no ǒ mai te tauturu i te peropheta Natana ra. I teie mahana, i roto i te amuiraa Kerisetiano, te vai ra te mau matahiapo paari i te pae varua. Te faataa ra te pǐpǐ ra o Iakobo e: “Te pohe ra anei te hoê o outou i te maˈi [i te pae varua]? e tii oia i te mau [“matahiapo o te amuiraa,” MN] ra, e na ratou e pure ia ˈna, ma te faatahinu ia ˈna i te monoˈi i te iˈoa o te Fatu [Iehova] ra. E e ora taua maˈi ra i te pure faaroo, e na te Fatu [Iehova] oia e faatia i nia; e i rave na oia i te hara ra, e faaorehia ta ˈna hara.”—Iakobo 5:14, 15.

E nehenehe ta te mau matahiapo aravihi e tamǎrû rahi i te oto o te taata rave hara e tatarahapa ra. E tutava ratou i te pee ia Iehova e nafea  ratou ia ˈna. Eita roa ˈtu ratou e hinaaro e riro ei mea etaeta, noa ˈtu e mea tano ia aˈo ia ˈna ma te uˈanana. E hiˈo maoti ratou ma te aau aroha i te mau hinaaro ru o te taata. E tutava ratou ma te faaoromai i te faatitiaifaro i te huru feruriraa o te taata e hape ra ma te faaohipa i te Parau a te Atua. (Galatia 6:1) Noa ˈtu e eita te hoê taata e hinaaro e faˈi i ta ˈna hara, e nehenehe oia e turaihia ia tatarahapa ia farereihia oia e te mau matahiapo, mai ia Davida o tei farereihia e Natana. No reira, maoti te turu a te mau matahiapo e nehenehe ai te taata e hape ra eiaha e rave faahou i te hara e e ape i te mau faahopearaa iino oia te riroraa ei taata rave hara etaeta.—Hebera 10:26-31.

E ere iho â i te mea ohie ia faˈi i te mau mea ia vetahi ê no te mea e mea haama e ia faaorehia ta tatou hara. E titauhia te puai no roto mai. A feruri na râ i te hoê taime i te mea ta tatou e nehenehe e maiti. Teie ta te hoê taata, tei ore i faaite i ta ˈna hara rahi i te mau matahiapo o te amuiraa, i parau: “Ua oto noa to ˈu aau. Ua tutava ˈtu â vau i te rave i te ohipa pororaa, tera râ, ua tatarahapa noa to ˈu aau.” Ua manaˈo oia e ua navai te faˈiraa i te hara i te Atua na roto i te pure, mea papu râ e aita, no te mea ua faaruru oia i te mau huru o te aau mai to te arii Davida. (Salamo 51:8, 11) Mea maitai aˈe ïa e farii i te tauturu î i te here ta Iehova e horoa mai ra na roto i te mau matahiapo!