Ta oe moni aore ra to oe ora?

Ua faarooroo paha outou no nia i te tahi mau taata eiâ o tei faatano i te pupuhi i nia i te hoê taata ma te parau atu e: “Ta oe moni aore ra to oe ora!” I teie mahana, te itehia ra teie parau matau-maitai-hia i roto i te hoê fifi i te rahi ta tatou paatoa e faaruru ra—te feia iho â râ i roto ia tatou o te ora ra i te mau fenua fanaˈo aˈe. I teie râ taime, e ere o te eiâ teie e parau onoono ra i te reira. O te haafaufaa-rahi-raa râ te huitaata i te moni e te manuïaraa materia.

NO TAUA haafaufaaraa ra, ua hiti mai te tahi mau uiraa e mau tapitapiraa apî. Eaha te pau ia tapihia te moni e te mau mea materia? E nehenehe anei tatou e oaoa mai te peu e mea iti ta tatou mau mea materia? Te haapae mau ra anei te taata i “te ora mau” no te nounou taoˈa? O te moni anei te ravea e fanaˈo ai tatou i te hoê oraraa oaoa?

Popore moni

I roto i te mau hinaaro e te mau huru uˈana o te aau o te taata—mea tano aore ra eita—o te nounou moni te imi i te na nia ˈˈe. Taa ê atu i te hinaaro e taati e e tamaa, e nehenehe te popore moni e tupu tamau aita e hopearaa. Eita teie hinaaro e mâha ia ruau te taata. I roto i te mau tupuraa e rave rahi, e nehenehe mau â te matahiti rahi e faarahi i to te hoê taata anaanatae i te moni aore ra to ˈna tapitapi no te reira e eaha ta te moni e nehenehe e hoo mai.

E au ra e te rahi noa ˈtura te nounou. Teie ta te hoê tane hauti teata matamua i roto i te hoê hohoˈa matauhia i parau: “Te manuïa ra te nounou. Mea maitai te nounou.” Noa ˈtu e mea rahi o tei parau e e Ui o te nounou te mau matahiti 1980, te faaite ra te mau mea i tupu na mua ˈtu e i muri aˈe i taua tau ra e ua taui rii to te taata huru i mua i te moni i te roaraa o te mau matahiti.

Te mea apî paha, oia ïa mea rahi roa taata o te ite nei i te mau ravea no te haamâha oioi i te hinaaro i te mau taoˈa materia rahi atu â. E au ra e i te rahiraa o te taime, te horoa ra te rahiraa o te taata na te ao nei i to ratou puai no te hamani e no te titau e rave rahi noa ˈtu â mau mea. E parau atoa paha outou e i roto i te oraraa no teie tau, ua riro mai te fanaˈoraa i te mau mea materia e te haamâuˈaraa i te moni ei tutavaraa uˈana, e pinepine mea hamani-roa ˈˈe-hia.

Tera râ, mea oaoa aˈe anei te taata i te pae hopea? No te pahono i taua uiraa ra, teie ta te arii paari e te taoˈa rahi roa o Solomona i papai a 3 000 matahiti aˈenei: “O tei nounou i te ario ra, e ore ïa e mauruuru i te ario; e tei nounou i te taoˈa ra, e ore ïa e mauruuru i te taoˈa e ia rahi noa ˈtu. E mea faufaa ore atoa te reira.” (Koheleta 5:10) Te horoa maira te ihi totiare no to tatou tau i te hoê â mau haapiiraa anaanatae.

Te moni e te oaoa

Hoê o te mau itearaa maere roa ˈˈe no nia i te haerea o te taata, oia ïa aita iho â te haaputuraa i te moni e te mau mea materia e faarahi ra i te mauruuru e te oaoa. Ua ite te feia maimi e rave rahi e ia naeahia i te hoê taata te tahi faito taoˈa rahi, tei te rahiraa ïa o ta ˈna mau mea materia e ite ai oia i te mauruuru e te oaoa.

No reira, te turai ra te tapiraa mâha ore i te mau mea materia e i te moni i te taata e rave rahi ia ui e, ‘E au ra e te oaoa ra tatou i te mau mea apî  ta tatou e hoo mai; teie râ, ia oti te mau mea atoa i te hiˈopoahia, no te aha teie mau navenave e ore ai e faarahi atu â i te mauruuru?’

I roto i ta ˈna buka Happy People, te na ô ra te taata papai ra o Jonathan Freedman e: “I te noaaraa mai iho â te tahi aˈe moni ohipa, e ere te rahiraa o ta outou moni i te mea faufaa no te hopoi mai i te oaoa. I nia ˈˈe i te taotiaraa o te veve, mea iti roa te taairaa i rotopu i te moni ohipa e te oaoa.” Mea rahi te taata o te ite ra e o te mau maitai pae varua, te mau tapiraa faufaa i roto i te oraraa, e te mau maitai morare te faaoaoa mau â i te hoê taata. Mea faufaa atoa te mau taairaa maitatai e vetahi ê e te oraraa ma te ore e aro aore ra ma te ore e haafifihia, aita anaˈe, eita ïa tatou e fanaˈo i ta tatou mau mea.

Mea rahi o te ite ra e te tumu mau o te rahiraa o te mau fifi totiare nei, o te hinaaro ïa e tamata i te faaohipa i te ruperuperaa materia no te faatitiaifaro i te mau peapea o roto mai. Te faahiti ra te tahi mau taata tatara parau totiare i te hoê huru rumaruma o te manaˈo e te mauruuru ore rahi. Te ite atoa ra ratou i te hinaaro rahi o te taata i te tahi mau fenua fanaˈo aˈe e haere e hiˈo i te taote aore ra e imi i te auraa o te oraraa e te hau o te feruriraa i pihai i te mau gourous, te mau pǔpǔ faaroo iti, e te mau pǔpǔ e parau ra e rapaau ratou i te taata. Te haapapu ra te reira e eita te mau taoˈa materia e horoa mai i te auraa mau o te oraraa.

Te mana e te mana ore o te moni

Parau mau, e mana to te moni. E nehenehe ta te reira e hoo mai i te fare, te ahu, e te tauihaa fare nehenehe roa. E nehenehe atoa oia e hoo mai i te arueraa, te auraroraa, aore ra te faatietieraa, e e horoa atoa mai i te tahi mau hoa tau poto tei ineine noa i te tauturu. Tera noa râ ta te mana o te moni e nehenehe e rave. Eita e noaa mai i te moni te mau mea ta tatou e hinaaro roa ˈˈe, oia te here o te hoê hoa mau, te hau o te feruriraa, te tahi aˈe tamahanahanaraa haavare ore ia fatata tatou i te pohe. E no te feia e poihere ra i to ratou taairaa e to ratou Atua Poiete, eita ta te moni e nehenehe e hoo mai i te farii maitai a te Atua.

Ua farii te arii Solomona, o tei fanaˈo i te mau mea au maitai atoa ta te moni e nehenehe e hoo mai i to ˈna ra tau, e eita iho â te tiaturi i te mau taoˈa materia e hopoi mai i te oaoa mure ore. (Koheleta 5:12-15) E nehenehe te moni e pau ia topatari te fare moni aore ra ia maraa te hoo. E nehenehe te taatoaraa o te mau fare e vavahihia e te mau mataˈi rorofai. Eita te mau parururaa, noa ˈtu e e mono ratou i te mau pau materia i nia i te tahi faito, e mono i te mau pau i te pae o te aau. E nehenehe te mau haapueraa taoˈa e te mau parau faaau e faufaa ore taue ia topa taue te ihiihi. E nehenehe e vai mai te hoê ohipa aufau-maitai-hia i teie mahana e ore atu ai ananahi.

Nafea ïa ia vai faito noa to tatou manaˈo no nia i te moni? Eaha te tuhaa a te moni aore ra a te mau taoˈa i roto i to tatou oraraa? A hiˈopoa hohonu atu â i te tumu parau no te ite nafea outou e nehenehe ai e fanaˈo i te hoê mea faufaa roa ˈˈe—“te ora mau.”

[Hohoˈa i te api 4]

Eita te mau taoˈa materia e hopoi mai i te oaoa mure ore